Famili Kana, Mwareiti Kot Ussun Kinikinin An We Mwichefel
“Upwe mwareiti ewe Samol lon ewe mwich mi lap.”—KÖLFEL 26:12.
1. Ifa pwal eu kinikinin ach fel mi enlet lukun kaeo me iotek lon imwach?
FELIN Jiowa esap chok wewe ngeni ach iotek me kaeoon Paipel lon imwach nge a pwal kapachelong ach fiti fofforun ewe mwichefelin Kot. Mi alluk ngeni Israel loom pwe repwe “emwichafengeni ekewe aramas, mwan, fefin me semirit,” pwe repwe kaeo allukun Kot me fetal lon an we aal. (Tuteronomi 31:12; Josua 8:35) Mei wor kapasen pesepes ngeni ekkewe chinnap me ekkewe ‘aluwol me fopul’ le mwareiti iten Jiowa. (Kol Fel 148:12, 13) Mei pwal wor ena esin kokkot lon ewe mwichefelin Chon Kraist. Lon ekkewe Kingdom Hall won unusen fonufan, mwan, fefin, me semirit ra uwawu ar memmeef atun a fich ngeni, me chommong ra pwapwa le fori ena mettoch.—Ipru 10:23-25.
2. (a) Met popun ar ammonlata a lamot ika semirit repwe pwapwaesini ekkewe mwich? (b) An io leenien appiru mi lamot?
2 Pwungun pwe, mi weires ach sipwe alisi ekkewe kukkun le fiti kokkotun ewe mwichefel. Epwe met popun ekkoch semirit mi fiti semer me iner rese pwapwaiti ekkewe mwich? Pwungun pwe, lape ngeni ekkewe semirit ra tongeni auselingoch ren fansoun mwochomwoch chok me ra muttir tipitipingau. Ammonloch epwe tongeni pwakini ei osukosuk. Ika rese ammonlata, ekkewe semirit resap tongeni uwawuochu meefier lon ekkewe mwich. (An Salomon Fos 15:23) Ika rese ammonlata, epwe weires ngeniir le feffeita lon pekin ngun pwe repwe menemenoch ren. (1 Timoti 4:12, 15) Met epwe tongeni alisiir? Akkom, mi lamot pwe ekkewe sam me in repwe pwisin eisiniir ika ra kan ammonlata fan iten ekkewe mwich. Ar foffor epwe amocheni nour kewe le appirur. (Luk 6:40) Ar akkotaochu ewe famili kaeo ina pwal eu mettoch mi lamot.
Amaaraataochu ewe Letip
3. Atun ewe famili kaeo, met popun sipwe angang ngeni kalisataan ewe letip, me ifa ussun sipwe fori?
3 An ewe famili kaeo esap eu fansoun fan iten repwe chok amasoua ewe tupuw ren sile nge pwal eu fansoun epwe amariochueta ewe letip. Mei lamot ach miritiiti ekkewe osukosuk mi tori ewe famili me ach tongei emon me emon leir. Jiowa a “sotuni leluken aramas.”—1 Kronika 29:17.
4. (a) Met weween ach sipwe “osupwang lon lelukach”? (b) Met a kapachelong lon ach “angei tipatchem”?
4 Met Jiowa a kuna lupwen a atittina letipen nouch kewe? A kon lap me leir repwe apasa pwe ra tongei Kot, me a mmen och ena. Nge, emon mi kukkun are emon a keran kaeo ussun Jiowa ese mwo kon weweoch ussun alen Jiowa. Pokiten a wewemmang, eli epwe “osupwang lon lelukan,” ussun alon ewe Paipel. Eli esap ngau ekiekin meinisin, nge sise tongeni muttir siwili lapalapen letipach ngeni eu mi wesewesen apwapwai Kot. Ei mettoch epwe wewe ngeni ach atipeeufengenni ach ekiek, mochen, memmeef, me minne sia achocho ngeni lon manauach ren minne Kot a pwapwa ren, me ren ach tufich pokiten kich sise unusoch. Lupwen emon a sotun le siwili lapalapan kewe me ren an Kot mochen, weween pwe a “angei tipatchem.”—An Salomon Fos 9:4; 19:8, New World Translation.
5, 6. Ifa ussun ekkewe sam me in repwe tongeni alisi nour kewe le ‘angei tipatchem’?
5 Ekkewe sam me in repwe tongeni alisi nour kewe le ‘angei tipatchem’? Pwungun pwe esor emon epwe tongeni alapalapaochu letipen pwal emon. Mei nom ren emon me emon leich ewe tufichin filata, me chommong mettoch a longolong won minne sia ekieki ussun. Iwe nge, ren mirit, ekkewe sam me in repwe tongeni lukeato minne a nom lon letipen noun we me awora ewe alillis mi lamot ngeni. Eani ei esin kapas eis, ‘Met meefiom ussun ei mettoch?’ me ‘Met ka wesewesen mochen fori?’ Mwirin, auselingoch. Kesap muttir song. (An Salomon Fos 20:5) Om pwarata kirokiroch, weweoch, me tong mi fokkun lamot ika ka mochen achungu ewe letip.
6 Ren om apposa ekiekoch, foffosfengen ussun uwaan ewe ngun—ir meinisin—me angangfengen ussun eu famili pwe oupwe tongeni amaaraata ekkeei mettoch. (Kalesia 5:22, 23) Amaaraata tong fan iten Jiowa me fan iten Jises Kraist, esap chok ren ach apasa pwe sipwe ita tongeer nge ren ach porausfengen ussun ekkewe popun sia tongeer me ifa ussun sipwe tongeni pwarata ena esin tong. (2 Korint 5:14, 15) Apochokkula ewe mochen le fori minne mi pwung ren poraus ussun ekkewe feioch epwe pop seni ena. Amaaraata lon letiper ewe mochen poutalo ekkewe ekiek, kapas, me foffor mi mwaal ren ami porausfengen ussun ekkewe feiengau epwe torikich seni ekkena mettoch. (Amos 5:15; 3 Jon 11) Pwarata ifa ussun ekkewe ekiek, kapas, me foffor—inaamwo ika ir mi och are ngau—epwe tongeni kku ach riri ngeni Jiowa.
7. Met sokkun mettoch epwe alisi ekkewe semirit le pwakini ar osukosuk me filata mettoch lon manauer lon och lapalap mi alisata ar chiechioch me Jiowa?
7 Lupwen emon semirit a osukosuk are epwe filata och mettoch mi lamot, sipwe tongeni eisini: ‘Met meefien Jiowa ussun ei mettoch? Ifa om silei ussun Jiowa a efisi om polueni ina ussun? Ka fen iotek ngeni i ussun ena mettoch?’ Kopwe muttir poputa le alisata an noum kewe semirit eorenalo ar kukkuta letipen Kot, iwe, mwirin apwonueta alon. Iwe, lupwen a pochokkulelo ar ririoch ngeni Jiowa, repwe pwapwaesini ar feffetal lon an kewe aal. (Kol Fel 119:34, 35) Ei mettoch epwe amaaraata lon letiper ar aucheani ewe tufichin chiechi ngeni ewe mwichefelin Kot mi enlet.
Ammonlata fan iten Ekkewe Mwich
8. (a) Met epwe alisikich le apachalong lon ewe famili kaeo mettoch meinisin mi lamot? (b) Ifa lamoten ei kaeo?
8 Mei wor chommong mettoch sipwe ekieki ussun atun ewe famili kaeo. Ifa ussun kopwe tongeni apwonuureta meinisin? Sise tawe le foriir meinisin lon eu chok fansoun. Nge neman kopwe makkeeretiu lon echo taropwe. (An Salomon Fos 21:5) Fan ekkoch, enniwili met ka fen makkei me ekieki ussun minne kopwe achocho ngeni. Nennengeni feffeitaan emon me emon lon om famili. Ei kokkot fan iten ewe famili kaeo eu kinikin mi lamot lon an Chon Kraist kaeo, pokiten epwe atufichi manauach iei me ammonlakich fan iten ewe manau esemuch epwe feito.—1 Timoti 4:8.
9. Ikkefa ekkewe mettoch lon ach famili kaeo sipwe achocho ngeni ekis me ekis ren ach ammonlata ngeni ekkewe mwich?
9 Mei wor fansoun ami ammonlata ngeni ekkewe mwich lon ami famili kaeo? Mei wor sokkopaten project oupwe tongeni angang won lupwen oua kaeofengen. Neman oupwe angang ngeniir ren fitu wiik, maram, are pwal mwo nge ier mwen repwe pwonuta. Ekieki mwo ussun ekkeei mettoch oupwe achocho ngeni: (1) chon ewe famili repwe mmonleta le polueni kapas eis lon ekkewe mwich; (2) emon me emon epwe achocho le polueni lon pwisin an fos; (3) pachalong wokisin seni ewe Paipel lupwen a polueni; me (4) atittinafichi ewe lesen pwe epwe apwonueta lon manauan. Ekkeei mettoch meinisin epwe tongeni alisi emon pwe epwe lefareni ewe enlet.—Kol Fel 25:4, 5.
10. (a) Ifa ussun sipwe tongeni ammonlata fan iten ekkewe mwich meinisin? (b) Met lamotan ei mettoch?
10 Inaamwo ika ami famili kaeo a longolong won ewe lesen seni ewe Leenien Mas fan iten ena wiik nge, ousap tunalo ewe lamoten an emon me emon are an ewe famili ammonlereta fan iten ewe Congregation Book Study, ewe Sukulen Afalafal, me ewe Service Meeting. Ekkeei mettoch pwal eu kinikin mi lamot lon ewe kokkot mi aitingenikich le fetal won alen Jiowa. Eli fan ekkoch unusen ewe famili epwe tongeni ammonlereta fan iten ekkewe mwich. Ren ami angangfengen, oupwe lipwakochulo lon ami tufichin kaeo. Iwe, mwiriloon, epwe pwal lapelo ewe alillis oupwe kuna seni ekkewe mwich. Pwal och, poraus won ekkewe feioch epwe torikich ika sipwe akkammonlata fan iten ekkeei mwich me ewe lamoten ach sipwe akkota eu fansoun fan iten ei mettoch.—Efisus 5:15-17.
11, 12. Ifa ussun ach ammonlata fen iten ekkewe kol sipwe eani lon ekkewe mwich epwe efeiochukich, me ifa ussun sipwe ammonlata?
11 Lon ewe “An Kot we Alen Manau” Mwichelap, mei wor kapasen pesepes le ammonla ngeni pwal eu kinikinin ach kewe mwich—ach kokkol. Ka fen apwonueta alon ena fon? Ach fori epwe apochokkula ekkewe enlet seni Paipel lon ekiekich me letipach me epwe pwal alapalo ach pwapwaesini ekkewe mwich.
12 Ammonlata mi kapachelong ach alleani me porausfengen won weween ekkewe kapas lon ekkewe ekkoch kol sipwe eani lon ewe mwich epwe alisikich ach sipwe kol seni letipach. Lon Israel loom, ra eani ekkewe pisekin nikkatik lon ar fel. (1 Kronika 25:1; Kol Fel 28:7) Mei wor emon lon om famili epwe tongeni etiki eu pisekin nikkatik? Pwata ouse akkasossot eu kol oupwe eani lon ena wiik, me mwirin unusen ewe famili epwe tongeni kol. Pwal och, oupwe tongeni nounou ekkewe teip lupwen oupwe akkasossot. Lon ekkoch fonu pwiich kewe ra angoch le kol inaamwo ika esor pisekin nikkatik mi emmweniir. Lupwen ra fetal won aal are angang lon ar kewe atake, ra pwapwaesini ar kokkolwu ekkewe kol repwe eani lon ekkewe mwich fan iten ena wiik.—Efisus 5:19.
An Famili Ammonlata fan iten ewe Angangen Afalafal
13, 14. Ifa aucheaan an ewe famili porausfengen pwe epwe ammonlata letipach fan iten ewe angangen afalafal?
13 Ach afalafala aramas ussun Jiowa me an we kokkot ina eu kinikinin manauach mi lamot. (Aisea 43:10-12; Mattu 24:14) Inaamwo ika kich mi kukkun are chinnap, epwe lapelo ach pwapwa le fori ei angang me ewe mettoch mi murinno sipwe tongeni apwonueta ika sia mmonloch. Epwe ifa ussun sipwe tongeni fori ei mettoch lon ewe famili?
14 Ussun chok ren mettoch meinisin mi weneiti ach fel, mi lamot pwe sipwe ammonlata letipach. Mi lamot ach sipwe porausfengen esap chok ussun met sipwe fori nge pwal ewe popun sipwe fori ewe angang. Lon ewe ranin King Jehoshaphat, ekkewe aramas ra angei emmwen lon ewe alluk mi fel, nge ewe Paipel a erenikich pwe resap “mwo kul ngeni an ar kewe lewo we Kot, pwe repwe angang ngeni ren unusen leluker.” Iwe, ra suuki letiper ngeni ekkewe minen etipetip mi tongeni arikalo ar feffetal lon ewe fel mi enlet. (2 Kronika 20:33; 21:11) Sisap chok achocho ngeni ach sipwe tongeni repotei ach kewe awa lon ewe angangen afalafal, are ach anounou ngeni aramas ekkewe puk. Ach angangen afalafal epwe ita pwarata ach tongei Jiowa me ach tong fan iten aramas resaamwo tufichin filata manau. (Ipru 13:15) Lon ei angang kich “chon angangen Kot mi akangangfengen.” (1 Korint 3:9) A ifa me watteen ei feioch! Lupwen sia fiti ewe angangen afalafal, sia angangfengen ren ekkewe chonlang mi fel. (Pwarata 14:6, 7) Sipwe tongeni amaaraata kilisou fan iten ei mettoch lon ach famili porausfengen, ese lifilifil ika atun ach kaeo iteiten wiik are lupwen sia poraus won eu wokisin mi fich ngeni ena mettoch seni Examining the Scriptures Daily!
15. Ineet ewe famili epwe tongeni ammonlata fan iten ewe angangen afalafal?
15 Fan ekkoch ka aea ewe fansoun lon ami famili kaeo le alisata an chon le imwom ammonlata fan iten ewe angangen afalafal fan iten ena wiik? Om fori ena mettoch epwe alillisoch. (2 Timoti 2:15) Epwe tongeni alisata pwapwaan me uwaan ar angangen afalafal. Fan ekkoch, kopwe tongeni aea unusen ewe famili kaeo fan iten ami ammonlata. Fan chommong, kopwe ekis poraus won ewe angangen afalafal le muchuloon ewe famili kaeo are lon pwal eu fansoun lon ewe wiik.
16. Awewei lamoten eu me eu poraus mi mak lon ewe parakraf.
16 Neman ewe famili epwe ekieki ussun och mettoch repwe fori, awewe chok: (1) Ammonlata eu afalafal me ika mi tawe ngeni, alleani eu wokisin seni ewe Paipel. (2) Ika mi tufich, pii pwe emon me emon a wor pwisin ar pwotou, eu Paipel, eu notebook, efoch pin are pen, ekkewe tract, me ekkoch puk mi torotoroch. Sap minne pwe ewe pwotou epwe liwinimmong, nge epwe limelimoch. (3) Poraus won ia me ifa ussun epwe fis afalafal mi sereseroch. Mwin le afalafal mwirin ekkeei fansoun porausfengen. Awora emmwen mi alillisoch, nge kosap kon eiponi chommong poraus.
17, 18. (a) Ifa ussun ewe famili epwe tongeni mmonleta pwe ar angangen afalafal epwe uwaoch? (b) Ifa ussun ewe famili epwe tongeni ammonlata iteiten wiik?
17 Ewe angangen foralo chon kaeo ina eu kinikinin mi lamot lon ewe angang Jises Kraist a awiisa ngeni noun kewe chon kaeo. (Mattu 28:19, 20) Ewe angangen foralo chon kaeo esap chok wewe ngeni afalafal. A wewe ngeni ach sipwe asukula aramas. Epwe ifa ussun om famili kaeo epwe tongeni alipwakochukelo le fori ei angang?
18 Porausfengen ussun io oupwe tongeni chuurisefalli. Eli ekkoch leir ra nouni eu puk; eli ekkoch ra chok auseling. Neman oua fen chuuriir lupwen oua afalafal imw me imw are atun afalafal mi sereseroch lon ewe market are lon sukul. Mut ngeni ewe Kapasen Kot an epwe emmwenuk. (Kol Fel 25:9; Isikiel 9:4) Emon me emon leimi epwe filata io epwe chuuri lon ena wiik. Met oupwe fos ussun? An ewe famili porausfengen iei ussun epwe alisi chon ewe famili le ammonlata. Ekieki ussun menni wokisin oupwe aiti ngeni ekkewe aramas mi mochen auseling me pwal och poraus seni ewe brochure Met Kot A Kutta Senikich? are ewe puk Knowledge That Leads to Everlasting Life. Kesap aiti ngeni emonnewe chommong poraus lon eu fansoun. Eani eu kapas eis epwe polu lupwen oupwe chufengensefal. Pwata ouse akkota lon ami famili iteiten wiik le filata menni aramas oupwe chuurisefalli, ineet oupwe chuuriir, me met oua mochen apwonueta. Ren ami fori ekkeei mettoch kopwe alisi uwaochun an ewe famili angangen afalafal.
Sopweilo le Asukuleer An Jiowa we Aal
19. Ika chon ewe famili repwe sopweilo le feffetal lon alen Jiowa we, repwe ita kuna met, me met epwe alisata ei mettoch?
19 Mi weires wiisen mokuren famili lon ei fonufan mi ppwor. Setan me noun kewe timon ra sotun le ataielo lukuen noun Jiowa kewe. (1 Piter 5:8) Pwal och, ikenai mei wor chommong osukosuk a tori ekkewe sam me in, lape ngeni ekkewe sam me in mi lipich. Ese naf ewe fansoun pwe oupwe fori mettoch meinisin oua mochen fori. Nge ami angang epwe uwaoch, inaamwo ika oupwe chok apwonueta eu me lein ekkewe emmwen lon eu fansoun, me ekis me ekis amurinnolo kokkotun ami famili kaeo. Om kuna an atongom kewe fetal won alen Jiowa lon tuppwol epwe eu liwin mi apwapwa. Ika emon epwe sopwoch le fetal won alen Jiowa, epwe lamot pwe chon ewe famili repwe kuna pwapwa ren ar fiffiti ekkewe mwich me ewe angangen afalafal. Ika epwe fis ena mettoch, mi lamot ar ammonlata—ammonlata mi apochokkulata ewe letip me alipwakochu emon lon ewe angang.
20. Met epwe alisi pwal chommong sam me in le kuna ewe sokkun pwapwa mi mak lon 3 Jon 4?
20 Ewe aposel Jon a makkei ussun chokkewe a alisi lon pekin ngun: “Esor och pwapwa mi lap seni ai pwapwa lupwen ai rong pwe nei kena ra fefetal lon ewe enlet.” (3 Jon 4) Epwe nom ren ewe famili ena esin pwapwa ika epwe ffat met repwe achocho ngeni lon ar kaeo me ika ewe mokuren famili a kirokiroch le awora alillis mi fich ngeni emon me emon lon ewe famili. Ren ar amaaraata kilisou fan iten an Kot we alen manau, ekkewe sam me in repwe alisi ar famili le pwapwaesini ewe alen manau mi murinno seni meinisin.—Kol Fel 19:7-11.
Kopwe Tongeni Awewei?
◻ Met popun ach ammonlata fan iten ekkewe mwich mi fokkun lamot ngeni nouch kewe?
◻ Ifa ussun ekkewe sam me in repwe tongeni alisi nour kewe le ‘angei tipatchem’?
◻ Ifa ussun ach kewe famili kaeo epwe tongeni alisata ach ammonlata fan iten ekkewe mwich meinisin?
◻ Ifa ussun ammonlatafengen lon famili fan iten ewe angangen afalafal epwe alisata ach lipwakochulo lon ewe angang?
[Sasing lón pekin taropwe 29]
Ach akkasossota ekkewe kol fan iten ekkewe mwich epwe efeiochukich