Ousipwe Pwäratä Ach Kilisou Epwe Fis ewe Ächechchem lon April 17
1. Ifa meefien ewe sou makken köl we a äkkäeüin fich atun ewe Ächechchem?
1 Ewe sou makken köl fel a chchüng ren chommongun än Jiowa angangen kirekiröch me seläni aramas, ina popun a eis: “Met üpwe liwini ngeni ewe Samol mi Lapalap ren ekewe feiöch meinisin a ngeniei?” (Kölf. 116:12) Ikenäi, a pwal mwo nge wor popun än nöün Kot kewe chon angang repwe pwäratä kilisou. Fite fite ier mwirin an a mak alon ena sou makken köl na, Jiowa a fang ngeni aramas ewe liffang mi lapalap, ina ewe möön kepich. A wor popun sipwe pwäratä kilisou atun sia mmolnetä ngeni Ächechchemenien än Jises mälo lon April 17.—Kol. 3:15.
2. Ikkefa ekkoch popun sipwe aücheani ewe möön kepich?
2 Feiöchün ewe Möön Kepich: Ewe möön kepich a atufichikich le küna ‘omusomusen ach tipis.’ (Kol. 1:13, 14) A atufichikich le fel ngeni Jiowa ren eü mwelien letip mi limelimöch. (Ipru 9:13, 14) Sia tufichin fos ngeni Jiowa lon iotek. (Ipru 4:14-16) Chokkewe mi lükü ewe möön kepich ra eäni ewe äpilükülükün manau esemuch!—Jon 3:16.
3. Ifa usun sipwe tongeni pwäri ach kilisou ngeni Jiowa ren ewe möön kepich?
3 Pwäratä Kilisou: Ach kilisou ren ewe möön kepich epwe pwälo ren ach älleani me ekilonei ewe älleaan Paipel fän iten ewe Ächechchem. Sia pwal tongeni ereni Jiowa lon ach iotek ükükün ach aücheani ewe möön kepich. (1 Tes. 5:17, 18) Ach fiti ena Ächechchem a pwäratä pwe sia älleasochisi än Jises allük me pwäratä kilisou. (1 Kor. 11:24, 25) Pwal och, sia tongeni äppirü än Jiowa tong mi lap me etiwa chommong aramas le fiti ena Ächechchem.—Ais. 55:1-3.
4. Met sipwe üppos le föri?
4 Nöün Jiowa kewe chon angang mi aücheani ewe Ächechchem resap ekieki pwe ena Ächechchem a usun chök ekkewe mwich ra kan fiffis iteitan. Nge ina ewe mwich mi kon aüchea lein ekkewe mwich meinisin ra fiffis iteiten ier! Atun ewe Ächechchem a kkanoto, amwo sipwe üppos usun ewe sou makken kölfel a makkeei: “Kopwe mwareiti ewe Samol mi Lapalap, kosap manlükala an kirikiröch ngonuk.”—Kölf. 103:2.