“Oupwe Föri Ei”
Ächechchem lon April 5
1. Pwata a lamot ach sipwe föri ewe Ächechchem?
1 “Oupwe föri ei pwe oupwe chechemeniei.” (Luk 22:19) Ren ekkena kapas, Jises a allük ngeni ekkewe chon tapwelo mwirin pwe repwe föri ächechchemenien an asorun mälo. Pokiten met a fen pwönüetä ren ewe möön kepich, iwe ese pwal wor eü rän mi kon lamot are aüchea me ren ekkewe chon Kraist me lükün ewe Ächechchem mi fis iteiten ier. Atun a kkanoto ewe ächechchem epwe fis lon April 5, ifa usun sipwe pwäri ach kilisou ngeni Jiowa?—Kol. 3:15.
2. Ifa usun sipwe pwäri ach aücheani ewe Ächechchem ren ach käeö me ekilon?
2 Mmolnetä: Sia kan mmolnetä fän iten ekkewe mettoch sia ekieki pwe mi lamot ngenikich. Ina popun, sipwe ammolnatä letipach fän iten ewe Ächechchem ren ach pworausfengen me chon ach famili me ekilonei ekkewe fansoun mi fis lon säingoon ränin manauen Jises woon fönüfan. (Esra 7:10) Eü prokramin Älleaan Paipel fän iten ewe Ächechchem a mak lon Ach Angangen Afalafala Ewe Mwu minen November 2011, pekin taropwe 6.
3. Ifa usun sipwe tongeni pwäri pwe sia aücheani ewe Ächechchem ren ach alapaalo ach fiti ewe angangen afalafal?
3 Afalafal: Ach unusen fiti ewe angangen afalafal a pwal pwäri ach kilisou ngeni Jiowa. (Luk 6:45) Ewe angangen etiwa aramas woon unusen fönüfan ngeni ewe Ächechchem epwe poputä lon Ammol, March 17. Ka tongeni siwili nonnomumw pwe epwe lapolo om fiti ewe angangen afalafal, eli ren om fiti ewe angangen auxiliary pioneer. Pwata ouse fosfengen usun ena mettoch me chon om we famili atun epwe fis ämi we Famili Fel?
4. Ikkefa ekkewe feiöch sipwe küna seni ach fiti ewe Ächechchem?
4 A ifa me feiöchüch ren ach fiffiti ewe Ächechchem iteiten ier! Ach pwapwa me tong ngeni Kot epwe lapolo ren ach ekieki usun ümöümöchün Jiowa ren an fangolo Nöün we äläemön pwe epwe eü möön kepich. (Jon 3:16; 1 Jon 4:9, 10) Ena mettoch a amwökütükich pwe sisap chüen manau fän pwisin itach. (2 Kor. 5:14, 15) A pwal amwasangasangakichetä le mwareiti Jiowa ren ach afalafal ngeni aramas meinisin. (Kölf. 102:19-21) Ewer, nöün Jiowa kewe chon angang mi meefi kilisou ra fokkun mwötöresiti ar repwe “asilefeili mälan ach Samol” lon ewe Ächechchem epwe fis lon April 5.—1 Kor. 11:26.