Chechchemeni ewe Möön Kepichilo Fiti Kilisou
1, 2. Ikkefa ekkewe popun sipwe chechchemeni ewe möön kepichilo fiti kilisou?
1 Ren ach älleäsochisi än Jises öüröür, Chon Kraist meinisin woon unusen fönüfan repwe mwichfengen mwirin tuputiuen ewe akkar lon Ammol, March 22, 2008, pwe repwe chechchemeni än Jises Kraist we mälo. (Luk 22:19; 1 Kor. 11:23-26) Alolloolun ach kilisou ren met a pwönütä lon ena fansoun 1,975 ier loom a amwökütükich ach sipwe fiti ena Ächechchem. Ren än Jises amwöchü an tuppwöl fän weires tori an we mälo woon ewe irään ninni, Jises a alingalo iten Seman we me pölüeni än Setan kewe kapasen esiit.—Hiop 1:11; SalF. 27:11.
2 Chchaan Jises we a apöchökküla ewe pwon mi fö, me a atufichi aramas rese unusöch ar repwe wiliti nöün Kot kewe me repwe nemenem ren Kraist lon an we Mwu lon läng. (Jer. 31:31-34; Mark 14:24) Pwal och, alolloolun än Kot tong ngeni fönüfan a unusen pwälo lupwen a asoresini Nöün we mi achengicheng, ussun met Jises a awewe ngeni Nikitimos.—Jon 3:16.
3. Ifa ussun ekkewe chon fiti ewe Ächechchem repwe küna feiöch?
3 Etiwa Ekkewe Ekkoch: Ewe Ach Angangen Afalafala Ewe Mwu minen January a pesekich ach sipwe makketiu iten chienach kewe me pwisin etiwer. Ka fen poputä le etiwa ekkewe ka fen makkei iter? Ka fen akkota pwe kopwe fiti ewe angangen etiwa aramas ngeni ewe Ächechchem epwe poputä lon March 1? Chokkewe repwe fiti repwe rongorong och afalafal seni Paipel epwe apöchökküla ar lükü ewe möön kepichilo me epwe emmwen ngeniir manau esemuch.—Rom 10:17.
4. Pwata sipwe warekäi atun ewe Ächechchem?
4 Iir kewe mi tongeni, repwe akkota ar repwe warekäi pwe repwe etiwa ekkewe chon fiti. Pokiten chommong aramas ra fiti ewe Ächechchem, a mmen lamot ach sipwe äkkäeüin äteneki ekkewe minefö pwal ekkewe ra kan fiti mwich fän ekkoch.
5. Ifa ussun kopwe ammolnatä letipom fän iten ewe Ächechchem?
5 Ammolnatä Letipom: Lon ewe Examining the Scriptures Daily—2008 (Ach Lesenin Ran) me ewe 2008 Calendar a mak ewe kkotun Älleään Paipel fän iten ewe Ächechchem epwe poputä March 17. Om ekiekifichi ekkewe mettoch mi lamot a fis ngeni Jises le sopwoloon manauan epwe älisuk om kopwe ammolnatä letipom fän iten ewe Ächechchem. (Ezra 7:10) Lupwen ka ekkekiek woon ekkena pworaus fan iotek, epwe alollololo om aücheani än Jiowa me Jises tong le awora ewe möön kepichilo.—Kolf. 143:5.
6. Ifa ussun sipwe küna feiöch ren ach achocho le alapalo ach aücheani ewe möön kepichilo?
6 Ewe Ächechchem a arapakaneto, amwo sipwe ammolnaöchü me älisi pwal ekkewe ekkoch fän iten ei Fääf mi kkolo aüchean. Ach chechchemeni me aücheani ewe möön kepichilo epwe apöchökküla ach ririöch ngeni Jiowa me Nöün we Jises. (2 Kor. 5:14, 15) Epwe pwal amwökütükich ach sipwe äppirüür lon ar pwäratä tong ngeni aramas.—1 Jon 4:11.