Ka Tongeni Fiti Afalafal Lepwin?
1. Ineet atun ewe aposel Paulus a afalafal imw me imw me ren alón eú puk?
1 Lape ngeni, ewe aposel Paulus a kan afalafal imw me imw “seni kulók 4 lekuniol ngeni lepwin.” Ina alón ewe puk itelapan Daily Life in Bible Times. Sise silei ika ina wesewesen án Paulus schedule, nge sia silei pwe Paulus a tipemecheres le féri mettóch meinisin “fan asengesin ewe kapas allim.” (1 Kor. 9: 19-23, TF) Epwe kapachelong án akkóta an fansoun pwe epwe ló afalafal imw me imw lón ekkewe atun epwe uwaéch an féri ena.
2. Pwata lepwin ina eú fansoun mi múrinné ach sipwe afalafal?
2 Lape ngeni ekkewe chón afalafal lón chómmóng leeni, ra afalafal imw me imw lesossor iteiten wiik. Nge lón leeniom, mi chúen múrinné afalafal lesossor? Iei alon emén pioneer usun an we leenien afalafal: “Fán chómmóng aramas rese nóm lón imwer lerán. Nge ika a pwin, lape ngeniir ra nóm lón imwer.” Afalafal lepwin a tongeni suuki ngenikich eú fansoun mi fókkun múrinné ach sipwe afalafala ewe kapas allim, ákkáeúin ngeni ekkewe mwán. Lape ngeni ekkewe chón imw lón ena atun ra kinamwe me ra tipemecheres le fós ngenikich. Ekkewe elter repwe akkóta eú mwichen afalafal lepwin ika mi lamot.
3. Ifa usun sipwe eáni mirit atun sia fiti afalafal lepwin?
3 Eáni Mirit: Mi lamot mirit atun sia fiti afalafal lepwin. Áwewe chék, ika ka chuuri emén nge ka meefi pwe ese éch ewe fansoun fán itan, choweán an fansoun mwéngéén lefááf, iwe mi éch kopwe ereni pwe kopwap liwinsefál. Ika a kiroch, kopwe útá ikewe ia ewe chón imw epwe kúnók me ie, me mwittir ereni en ié me met popun ka mochen chuuri. Eú alen tipachem an epwe wor chienom are óm kúmi mi wituk lón ewe leeni mi saram ia, ikewe kosap ákkáláemén ie. Kosap kon afalafaloló pwe kete aosukosuka ekkewe chón imw lón ar ammólnatá ngeni ar repwele méúr. (2 Kor. 6:3) Ika mi efeiengaw ewe leeni lepwin, kopwe afalafal mwen an esaamwo pwin.—SalF. 22:3.
4. Ikkefa ekkewe feiéch sipwe kúna seni ach fiti afalafal lepwin?
4 Ekkewe Feiéch: A kon apwapwa ach afalafal atun sia tufichin fós ngeni ekkewe aramas. Lapólóón ach afalafal ngeni aramas pwal ina lapólóón alen ach tufichin álisi ekkewe ekkóch ar “repwe küna manau, repwe pwal silei ewe let.” (1 Tim. 2:3, 4) Ka tongeni siwili óm schedule pwe kopwe fiti afalafal lepwin?