Mineféén Alen Afalafal mi Ámmeseik Lein Chómmóng Aramas
1. Ifan ewe pesepes ngeni ekkewe mwichefel lón ekkewe leeni mi kon chómmóng chón fetál ie?
1 A wor pesepes ngeni ekkewe mwichefel lón ekkewe leeni mi kon chómmóng chón fetál ie pwe repwe akkóta ar angangen afalafal ren ar áeá ekkewe leenien ékúna ngeni aramas ekkewe puk. Ika ra áeá efóch waa, iwe mwaren emén chón afalafal epwe útá are mómmóót únúkkún. Nge ika ra áeá efóch cheepel iwe rúúemén chón afalafal repwe nóm únúkkún. Ekkena chón afalafal repwe achocho le etiwetiwéch me chiechiéch. Ika emén aramas a nennengeni ekkewe puk, iwe emén me lein ekkena chón afalafal epwe tongeni poputááni eú pwóróusfengen. Eli a tongeni erá, “En mi kan ekkekieki ika met Paipel a apasa usun ena pwóróus?” Emén are rúúemén chón afalafal repwe túmúnú ewe minen ékúna ekkewe puk lón atun ra afalafal ngeni ekkewe ekkóch.
2. Apwóróusa eú pwóróus mi pwáraatá aúchean ewe sókkun afalafal lein chómmóng aramas ren áeáán eú minen ékúna ngeni aramas ekkewe puk.
2 A chómmóng mineféén chón káé Paipel seni ei eú sókkun afalafal. Emén chón sukul lón college a filatá an epwe makkeei pwóróusen Chón Pwáraatá Jiowa nge ese tongeni kúna eú Leenien Mwich. Mwirin eú wiik a kúna eú chepelin ekkewe puk ren an we sukul. A poputá le káé Paipel me iei a emén chón afalafal mi papatais me a pwal pwisin fiti ena sókkun angangen afalafal.
3. Met meefien ekkóch chón afalafal usun ei sókkun angangen afalafal lein chómmóng aramas?
3 Emén fefin Chón Kraist a kan pwapwaiti ei sókkun afalafal a erá: “Ekkóch ra kan kaúló pwe repwe angei ekkewe puk mi kerán katowu. Ekkóch ese mwo fán eú ar rong usun Chón Pwáraatá Jiowa. Ua kúna pwe ei sókkun afalafal, eú alen tori chómmóng aramas.” Pwal emén fefin Chón Kraist a erá: “Ei sókkun afalafal a mmen ámmeseik me sókkóló pún ekkewe aramas ra kan feito reom me ikaamwo rese pwapwaiti nge ra kan chék mochen silei ika met a fis.”
4. Pwata a lamot ewe minen ékúna ngeni aramas ekkewe puk epwe kawor lón ekkewe chék fansoun me leeni eú me eú wiik?
4 A mmen lamot an ewe cheepel ika waa epwe nóm lón ewe eú chék leeni, lón ekkewe chék rán, pwal ekkewe chék fansoun iteiten wiik. Ika epwe ina, iwe ekkewe aramas repwe eérenaaló ar soun chék kúkkúna ekkewe cheepel ika waa me repwe poputá le meefi kinamwe ar repwe feiló ngeni me kapas eis are angei puk. Óm mwichefel a fen féri ei sókkun afalafal lein chómmóng aramas? Ika ewer, iwe eli ka tongeni fiti ei alen “arongafeili ewe Mwün Kot” mi apwapwa me uwaéch.—Luk. 9:60.