Engol me Ruu Popun Sia Akkafalafal

Pwata sia afalafal me asukula aramas ewe kapas allim? Itá ewe ákkáeúin popun pwe epwe álisi aramas mi letip wenechar le fetál wóón ewe alen manaw? (Mat. 7:14) Ina ewe mettóch a akkomw mak me fan, nge esap ina ewe áeúin popun. Om ekiek nge menni lein ekkeei 12 popun a kon aúchea sia fiti ewe angangen afalafal?

1. Atun sia afalafal, sia álisatá ewe angangen amanawa aramas.​—Joh. 17:3.

2. Atun sia afalafal, sia éúréúra chón féfféringaw.​—Is. 3:18, 19.

3. Atun sia afalafal, sia álisatá pwénúetáán án Paipel oesini.​—Mat. 24:14.

4. Atun sia afalafal, sia ánnetatá pwe Jiowa mi pwúng. Esor epwe tongeni tipi ngeni Jiowa pwe a nieló ekkewe mi ngaw pwe ese awora ngeniir fansoun le aier.​—Föf. 17:30, 31; 1 Tim. 2:3, 4.

5. Atun sia afalafal, sia tufichin apwénúetá wisach le álisi aramas lón pekin lúkú, weween chókkewe Jesus a fen mééniir ren chchaan.​—Rom 1:14, 15.

6. Ach afalafal, a atufichikich ach sisap eáni tipisin nimanaw.​—Föf. 20:26, 27.

7. Atun sia afalafal, sia anganga met sipwe pwisin manaw ren.​—Is. 3:19; Rom 10:9, 10.

8. Atun sia afalafal, sia ánnetatá pwe sia tongei chón oruch.​—Mat. 22:39.

9. Atun sia afalafal, sia pwáraatá pwe sia álleasochisi Jiowa me Néún we.​—Mat. 28:19, 20.

10. Ach afalafal, ina kinikinin ach fel ngeni Jiowa.​—Ipr. 13:15.

11. Atun sia afalafal, sia pwári ach tong fán iten Kot.​—1 Joh. 5:3.

12. Ach afalafal, a álisatá pinilóón iten Jiowa we.​—Ais. 43:10-12; Mat. 6:9.

Ewer, esap chék ikeei ekkewe popun sia fiti ewe angangen afalafal. Áwewe chék, ach akkafalafal a apéchékkúlaló ach lúkú me pwal ngenikich ewe wis mi kkóló aúchean le angangfengen me Kot. (1 Kor. 3:9, TF) Iwe nge, ewe nampa 12, ina ewe popun mi kon aúchea lap seni meinisin sia afalafal. Inaamwo ika aramas ra aúseling are rese aúseling, nge ewe angangen afalafal a álisatá pinilóón iten Kot we me Jiowa a tongeni pélúweni átewe mi eitengawa i. (SalF. 27:11) Ewer, a wor ekkewe popun mi múrinné ach sipwe ‘sopwelo le afalafal o áiti ngeni aramas ewe Pworausen Manau.’​—Föf. 5:42.