Atütü ekkewe Pwikil pwe repwe Määritä
1. Met a lamot epwe atütü pwe epwe määritä?
1 A lamot epwe atütü ekkewe föün pwikil mi ffot lon eü atake pwe repwe määritä. A pwal ina usun ren pwikilin ewe enlet mi ffot lon letipen aramas lon ach leenien afalafal. (1 Kor. 3:6) Ika sia mochen epwe pwük warer me märöchütä, mi lamot sipwe chuursefäliir me atütü ekkeei föün pwikil lon kapas äwewe ren ach nöünöü än Kot we Kapas.
2. Ifa usun sipwe älisi ewe chon imw an epwe pwapwaiti ach liwinsefäliti?
2 Epiietä Eü Kapas Eis: Lupwen ka ammolnatä minne kopwe apasa ngeni ewe chon imw, pwata kese pwal ammolnatä eü kapas eis epwe luki letipan nge ka tongeni pölüweni atun ka liwin? Eäni ewe kapas eis le muchuloon ämi pworausfengen me akkota ewe fansoun kopwe liwiniti. Chommong ra meefi pwe mi älillisöch ngeniir ar filatä och pworaus seni ewe puk Paipel A Apasa pun ra tongeni äiti ngeni ewe chon imw ewe kokkotun käeöön Paipel.
3. Met kopwe makketiw lupwen ka chuuri emön mi pwapwaiti ewe pworaus?
3 Makketiw: Lupwen ka lo seni ewe imw, mwittir chök makkeei met oua pworausfengen woon. Makketiw itan me leenian. A pwal öch kopwe makkeei ewe rän me fansoun oua chufengen, met oua pworaus usun, me menni puk ka anöünöü ngeni. Mi apasa menni lamalam a fiti? A famili? A pwär ngonuk met a pwapwaiti me met a aüreki? Ekkeei mettoch epwe älisuk le fos usun ekkewe pworaus mi lamot ngeni ewe chon imw lupwen ka liwiniti. Pwal makkeei ineet kopwe liwin me ewe kapas eis kopwe pölüweni.
4. Pwata a lamot sipwe achocho lupwen sia chuursefäli aramas?
4 Achocho: Setan a fokkun angang weires le “angei ewe kapas” a fen ffot lon letipen aramas. (Mark 4:14, 15, TF) Ina minne, kosap fangetä ika a weires om kopwe künasefäli ewe emön ka chuuri. En mi tongeni mak ngeni taropwe me likiti fän asaman we are tiinaalo lon posto? Emön pioneer a poputä le käeö ngeni emön fefin ewe Paipel me ppen asaman we. Nge a weires an epwe künasefäli ewe fefin, iwe a chök mak taropwe me tiinaalo ngeni. Mwirin och fansoun ra chufengensefäl, iwe ewe fefin a apasa pwe a fokkun chchüng letipan ren ewe tong ewe pioneer a pwär ngeni. Atun sia atütü pwikilin ewe enlet, sia tongeni pwapwa le küna pwükütäär, mämmääriir me ar “uani ilik, ekoch wone, pwal ekoch ipükü.”—Mark 4:20.