Pwapwa le Ammólnatá fán Iten ewe Áchechchem
1. Met a suuk ngenikich lón fansoun Áchechchem?
1 Ewe Áchechchem epwe fis lón Oruu, March 26. Ina ewe fansoun mi kon aúchea a suuk ngenikich ach sipwe pwapwa ren án Kot angangen amanaw. (Ais. 61:10) Pwal mwo nge me mwen epwe fis ena, ach eáni letip mi pwapwa epwe álisikich le mmólnéch. Ifa usun?
2. Met a amwékútúkich le ammólnatá fán iten ewe Áchechchem?
2 Ammólnatá fán Iten ei Mwich mi Aúchea: Ewe Fááfen ach Samol eú mwich mi kon aúchea nge mi chék mecheres met sipwe ammólnatá fán itan. Inaamwo ika a ina usun, nge epwe chúen lamot ach sipwe mmólnéch pwe site namanaaló ekkewe ekkóch mi kon lamot. (SalF. 21:5) A lamot pwe ewe kulók me ewe leeni mi éch repwe kefilitá. Túmúnú pwe ewe pilawa me ewe wain mi fich repwe kawor. Epwe liméch me torotoréch ewe leenien mwich. Ewe chón afalafal epwe wesewesen mmólnéch fán iten wisan we. Akkótaéchú angangen ekkewe chón uwei wain me pilawa me ekkewe chón etiwa aramas. Sia mmólnéch fán iten ei mwich mi fel pokiten ach meefi watteen ach kilisou ren ewe méén kepich a tufichin amanawakich.—1 Pet. 1:8, 9.
3. Ifa usun sipwe ammólnatá letipach fán iten ewe Fááfen Ach Samol?
3 Ammólnatá ewe Letip: A pwal lamot ach sipwe ammólnatá letipach pwe sipwe aúcheani unusen weween ewe Áchechchem. (Esra 7:10) Ren ei popun, sia mochen akkóta eú fansoun le pwóróusfengen wóón ekkewe wokisin lón Paipel mi weneiti ewe Áchechchem me mwirin ekipwichi sáingoon ránin manawen Jesus wóón fénúfan. Ei mettóch epwe alóllóólu ach aúcheani ewe tongen Jiowa mi lapalap a pwáraatá fán iten chón fénúfan. Pwal eú, ei mettóch a amwékútúkich le angang úkúkún ach tufich pokiten án Jesus pennúkúóló manawan.—Kal. 2:20.
4. Menni lein feiéchún ewe méén kepich ka mmen pwapwa ren?
4 Málóón Jesus a álisatá án Jiowa pwúúng le nemenem. A epichikicheló seni tipis me máló. (1 Joh. 2:2) A suuk ngenikich ach sipwe ririéch ngeni Kot me atufichikich le aleni ewe alen manaw esemuch. (Kol. 1:21, 22) A pwal álisikich ach sipwe tipeppós le apwénúetá weween ach fangóló manawach ngeni Jiowa me péchékkúleló lón wisach wisen néún Kraist chón káé. (Mat. 16:24) Atun ka ammólnatá me fiti ei Áchechchem epwe fis, sia áneán pwe óm pwapwa epwe lapóló!