“Oupwe Kinamwefengen me Aramas Meinisin”
1. Ifa ewe kapasen éúréúr sipwe apwénúetá atun sia sereni án ekkóch aramas song ngenikich?
1 Néún Jiowa kewe aramas iir chón efisatá kinamwe me ach angangen afalafal ina ewe angang mi ekinamwe. (Ais. 52:7) Nge fán ekkóch, sia sereni ekkóch aramas mi song pokiten ach afalafal ren imwer kewe. Met epwe álisikich le efisi kinamwe ika a fis ekkena sókkun?—Rom 12:18.
2. Pwata a lamot ach sipwe eáni mirit?
2 Eáni Mirit: Ekkóch ra song pokiten ra oput ewe enlet, nge ekkóch ra song pokiten pwal och popun ese riri ngeni ewe enlet. Eli sia etto afalafal lón ewe atun ese fich. Eli ewe chón imw a song pokiten pwisin an kewe osukosuk. Inaamwo ika a song pokiten ewe pwóróus allim nge mi lamot sipwe chechchemeni pwe eli a ina usun pokiten a fen tipetipeló. (2 Kor. 4:4) Ach eáni mirit epwe álisikich le eáni kinamwe me esilla pwe sap minne a wesewesen pwúkúpwúkún song rech.—SalF. 19:11.
3. Ifa usun sipwe pwáraatá ach súféliti ewe chón imw?
3 Pwáraatá Súfél: Chómmóng aramas lón ach we leenien afalafal a kon péchékkúl ar lúkú. (2 Kor. 10:4, Ewe Kapasen God) A wor ar pwúng le filatá ika repwe aúseling ngenikich are resap. Sisap esiita án emén chón imw lúkú are ámmeef ngeni pwe sia tipachem lón Paipel lap seni. Ika a erenikich pwe sipwe ló seni imwan we, iwe sipwe feiló fán súfél.
4. Met weween ach sipwe eáni kapas pwetete?
4 Kapas Pwetete: Inaamwo ika aramas ra eáni kapas mi ngaw ngenikich, nge sipwe pélúweni fán mosonoson me pwetete. (Kol. 4:6; 1 Pet. 2:23) Sipwe kútta och pwóróus sipwe tongeni tipeeúfengen wóón lap seni ach sipwe ánini wóón och mettóch. Eli sipwe tongeni eiséch ika met popun ewe chón imw ese tipeeú ngeni met sia pwóróus wóón. Iwe nge, fán ekkóch a éch ach sipwe aúkatiw ach fós pwe sisap asonga.—SalF. 9:7; 17:14.
5. Met sókkun feiéch epwe tori chókkewe mi eáni kinamwe lón ewe angangen afalafal?
5 Ika sia eáni kinamwe, eli ewe chón imw epwe chechchemeni ena napanap mi éch sia pwáraatá, iwe epwe aúseling ngeni pwal emén chón afalafal ngeni lón pwal eú fansoun. (Rom 12:20, 21) Inaamwo ika a péchékkúl an ú ngenikich, nge eli eú rán epwe wiliti emén pwich. (Kal. 1:13, 14) Ese lifilifil ika a etiwa ewe enlet are ese, nge ika sia nemeniéchú pwisin kich me eáni kinamwe, iwe sipwe mwareiti Jiowa me elinga ach lúkú.—2 Kor. 6:3.