Ka Akkammolnatá fán Iten ewe Áchechchem?

Iei ewe Nisan 13, 33 C.E. Jesus a silei pwe a wor eú chék lusun pwin an epwe nóm ren chiechian kewe me mwen an epwele máló. Epwe féri ewe amuchúlóón Pasofer rer, mwirin epwe poputááni eú mineféén kókkót, ina ewe Fááfen Ach Samol. Pokiten ena fansoun mi fókkun aúchea, iwe a lamot angangen ammólnatá. Ina minne, a tinaló Petrus me Johannes pwe repwe ammólnatá. (Luk. 22:7-13) Iteiten ier seni ena atun, a mmen lamot ngeni Chón Kraist, chókkewe mi mochen féri ewe Áchechchem ar repwe ammólnatá fán iten ena rán. (Luk. 22:19) Ikkefa ekkewe mettóch mi lamot sipwe ammólnatá fán iten ewe Áchechchem lón April 3?

Minne Ekkewe Mwán mi Ásimaw Repwe Ammólnatá:

Akkóta le áeá ewe Leenien Mwich are pwal eú leeni mi fich. Mi lamot epwe naf ekkewe sea, ttinéch ewe tengki me epwe múrinné ewe ásepwál lón. Akkóta pwe epwe fókkun elimelim ewe leeni me mwen epwe tori ewe rán.
Filatá emén mi lipwákéch le eáni ewe afalafal, emén chón átettel me chókkewe repwe ióteki ekkewe pilawa me wain.
Ika epwe wor fitu mwichefel repwe áeá ewe leeni, kókkótfengen wóón kulókun ewe mwich, kókkótun tolong me towu me leenien waa.
Filatá me akkóta ekkewe chón etiwa aramas me chón pásini ewe wain me ewe pilawa.
Akkóta pwe epwe wor ekkewe wain me pilawa mi fich, pwal mwo ekkewe peneich, kapen wain, eú cheepel mi éch me chechchan we.

Minne Ekkewe Chón Afalafal Repwe Ammólnatá:

Akkóta pwe kopwe unusen fiti ewe angangen etiwetiw fán iten ewe Áchechchem.
Makketiw lón taropwe iten noum chón káé, aramasom, chienom chón sukul, chienom chón angang me pwal ekkewe ekkóch, mwirin etiwer.
Álleani me ekilonei ewe álleaan Paipel fán iten ewe Áchechchem.
Mmólnetá me mwittir feiló ngeni ewe Áchechchem pwe kopwe etiwa ekkewe waséla.