Eáni Leenien Áppirú Ekkewe Soufós Usun Mika
1. Ifa ewe kapas eis eli Mika a ekieki, nge pwata ese sópwongaw an we angangen afalafal?
1 ‘Ineet epwe war sópwólóón ei ótót mi ngaw?’ Ewe soufós Mika eli a pwal ekieki ena esin kapas eis atun a esilefeili án Jiowa pwóróusen kapwúng wóón ekkewe mwúún Israel me Juta. Iwe nge an angangen afalafal ese sópwongaw. Lemwúún Mika we, a pwénúetá alon Jiowa we usun an kapwúng wóón Samaria lap seni 700 ier mwen án Jesus uputiw. (Mik. 1:6, 7) Mwirin, Jerusalem a taló lón ewe ier 607 B.C.E. (Mik. 3:12) Ifa usun sipwe tongeni áppirú Mika atun sia witiwiti pwénútáán án Jiowa kapwúng lón ach ei fansoun?
2. Ifa usun me pwata sipwe pwári mosonottam atun sia witiwiti ránin Jiowa we?
2 Kopwe Mosonottam: Iei makkeien Mika: “Ngang upwe witiwiti ewe SAMOL. Non ai nikiitu upwe witiwiti God, ewe epwe amanaua ei.” (Mik. 7:7, KG) Ewer, Mika ese chék witiwiti warotoon ewe sópwólóón nge a pwal fókkun féri an angangen soufós. Atun sia witiwiti ránin Jiowa we, mi lamot sipwe pwal “manaueni eu manau mi pin mi nonom fän nemenien Kot.” (2 Pet. 3:11, 12) Án Jiowa mosonottam a awora fansoun fán iten án aramas repwe aiersefál. (2 Pet. 3:9) Ina minne, ousipwe lechúni án Kot éúréúr usun ach sipwe áppirú ekkewe soufós lón ar mosonottam.—Jas. 5:10.
3. Pwata mi lamot ach sipwe tingorei Jiowa an we manaman mi fel?
3 Lúkúlúk Wóón Án Jiowa Péchékkúl: Inaamwo ika a weires wisen Mika we, nge a sepiiti Jiowa pwe epwe apéchékkúla le apwénúetá wisan. (Mik. 3:8) Lón ewe Paipel, Jiowa a pesekich le lúkúlúk wóón i ren an péchékkúl. Jiowa a kisáseú le ngeni chókkewe mi mélúlú ar péchékkúl pwe repwe tongeni apwénúetá wiser kewe lón pekin lúkú. (Kölf. 84:5, 7; Ais. 40:28-31) Ka fen piin meefi án Jiowa apéchékkúlok lón óm angang ngeni? Ka kan tittingor álillisin an we manaman mi fel?—Luk. 11:13.
4. Ifa ewe leenien áppirú mi fókkun múrinné sia káé seni pwóróusen manawen Mika?
4 Lón unusen manawen Mika, a aúcheani an féri letipen Kot lap seni meinisin. A úppós le amwéchú an tuppwél inaamwo ika a nóm lein aramas mi féfféringaw. A pwal ina usun kich. Iteiten rán sia kúna sóssótun ach tuppwél. Ina minne ousipwe apéchékkúla ach úppós le “aleasochis ngeni ewe Samol mi Lapalap ach we Kot tori feilfeilachok.”—Mik. 4:5.