Ka Mmólnetá fan Iten ewe Áchechchem?

Ewe sáingoon Pasofer Jesus a féri, a fókkun lamot. Pokiten ekiseló chék epwele máló, ina minne a akkóta an epwe féri ewe Pasofer iir me néún kewe aposel me poputááni eú mineféén áchechchem epwe kan fis iteiten ier, ina ewe Fááfen Ach Samol. Ina popun a tiinaaló Petrus me Johannes ar repwe ammólnatá ewe ruumw. (Luk 22:7-13; ppii ewe sasing wóón péén.) Ei a áchchema ngenikich lamoten ach sipwe ammólnatá fán iten ewe Áchechchem lón March 27. Ese mwáál ekkewe mwichefel ra fen akkóta ié epwe wisen eáni ewe afalafal, ewe wain me ewe pilawa, me metakkan. Iwe nge, met emén me emén kich sipwe féri pwe sipwe mmólnetá ngeni ewe Áchechchem?

Ammólnatá letipom. Álleani me ekilonei ewe álleaan Paipel fán iten ewe Áchechchem. Eú kókkótun állea a nóm lón ewe puk Etittina Paipel Iteiten Rán. Nge lón Kinikin 16 lón ewe puk Minen Álillis fán Iten Káéén Paipel a pwal kawor eú kókkótun állea mi tichik. (Pwal ppii Manawach me Ach Angangen Afalafal Minen Káé fán Iten Mwich, minen April 2020.) Ekkewe famili ra tongeni kútta ekkewe pwóróus usun lamoten ewe méén kepich pwe repwe káé atun ar famili fel, repwe cheki Watch Tower Publications Index are ewe Research Guide for Jehovah’s Witnesses.

Etiwa ekkewe ekkóch ar repwe fiti. Kopwe fókkun alamota ei fansoun angangen etiwa aramas. Ekieki chókkewe ka tongeni etiwer, áwewe chék ren chókkewe ka fen afalafal ngeniir, ekkewe ka piin káé ngeniir, chienom kewe, me aramasom. Ekkewe mwán mi ásimaw repwe etiwa chókkewe ra úkútiw le féri wiser wisen emén Chón Kraist. Chechchemeni pwe ika emén ese nóm lón leeniom we, ka tongeni cheki kulókun me leenien ewe Áchechchem lón ewe leeni a nóm ie ren óm ttiki PWÓRÓUSEM asen ewe jw.org home page, mwirin ttiki “Áchechchem.”

Met sia pwal tongeni féri pwe sipwe mmólnéch?