Áeáéchú Óm Fansoun lón ewe Angangen Afalafal
Lón ewe 2014 service ier, Chón Pwáraatá Jiowa ra áeá 1,945,487,604 awa lón ewe angangen afalafal, eú pisekin pwáraatá mi ffat pwe sia achocho le alapaaló ach fansoun lón án Jiowa we angang! (Kölf. 110:3; 1 Kor. 15:58) Pokiten ewe “fansoun a chok mochomoch,” a itá tufich ach sipwe áeá ach fansoun mi aúchea lón ewe angangen afalafal pwe sipwe chuuri chómmóng aramas?—1 Kor. 7:29, Testament mi Fö.
A lamot tipemecheres le siwili ach kókkót pwe sipwe áeáéchú ach fansoun lón ewe angangen afalafal. Áwewe chék, ika fán chómmóng ka kan fiti eú kinikinin angangen afalafal nge a eú are lap seni eú awa ese wor emén ka tongeni afalafal ngeni, en mi tongeni siwili óm kókkót pwe kopwe tongeni kúna emén are afalafal ngeni chómmóng? Mi sókkofesen nónnómun aramas lón leeni me leeni. Iwe nge, ekkewe kapasen pesepes fan eli repwe tongeni álisuk óm kopwe áeáéchú óm fansoun pwe kosap “afolu asapwal.”—1 Kor. 9:26, TF.
Afalafal Imw me Imw: Ren fite fite ier, lape ngeni ekkewe chón afalafal ra kan poputááni ar angangen afalafal ren ar afalafal imw me imw. Iwe nge, pokiten chómmóng aramas ra kan angang lerán, pwata kese sótuni le afalafal imw me imw lekuniol are lefááf atun lape ngeni ekkewe aramas ra nóm lón imwer me ra fen asésé? Lerán, eli ewe angangen afalafal wóón al are afalafal lón sitowa epwe uwaéch.
Afalafal Lein Chómmóng Aramas: Repwe itá nóm ekkewe cheepel me waa mi ékúna ngeni aramas ekkewe puk lón án ewe mwichefel leenien afalafal ikewe mi etieppach aramas ie. (Ppii Ach Angangen Afalafala ewe Mwú minen July 2013 p. 5.) Ika ese chúen kon chómmóng aramas, iwe eli ewe Chón Tupuni Mwichen Mwán mi Ásimaw epwe apwúngaló pwe epwe siwil leenien ekkewe minen ékúna ngeni aramas ekkewe puk ngeni ewe leeni mi etieppach aramas ie.
Chuursefáli Aramas me Chuuri Chón Káé: En mi tongeni féri óm schedule le chuursefáli aramas me chuuri chón káé atun ekkewe kinikinin angangen afalafal rese kon uwaéch? Áwewe chék, ika ewe afalafal imw me imw a uwaéch iteiten lesossorun Ammól, en mi tongeni chuuri noum kewe chón káé mwirin leolowas are lefááf? Atun chuursefáli aramas, ekkewe chón afalafal ra tongeni akkóta pwe repwe chuurpékú néúr kewe chón káé pwe epwe watte minne ra féri lón ewe angangen afalafal?
Pwúngún pwe sia tongeni apachaalong néúch awa ese lifilifil ineet atun sia fiti afalafal, iwe nge epwe lapóló ach pwapwa atun sia uwaéch. Ika ka meefi pwe óm fiti eú kinikinin ewe angangen afalafal ese kon uwaéch lón eú fansoun, kopwe sótuni pwal eú sókkun. Kopwe iótek ngeni Jiowa, “ewe Samolun räs,” ren an emmwen pwe kopwe tongeni áeáéchú óm fansoun lón ewe angangen afalafal!—Mat. 9:38.