Etiwa Aramas

1. Ineet epwe poputá ewe angangen etiwetiw fán iten ewe mwichelap

¹ Ese mwáál kopwe mwasangasang le etiwa aramas ika ka akkóta eú mwéngéfengen mi kkóló aúchean, ewe a watte angangan me méén, fán iten chiechiom are chón óm famili. Pwal ina chék usun ren ach we mwichelap epwele fis, a pwal watte angangan le ammólnatá ekkewe mettóch epwe fis lón ena mwéngéfengen lón pekin lúkú. Úlúngát wiik mwen ewe mwichelap, Jiowa a ewisa ngenikich ewe wis mi aúchea le etiwa ekkewe ekkóch le fiti. Met epwe álisikich le etiwa aramas fán mwasangasang?

2. Met epwe amwékútúkich le unusen fiti ewe angangen etiwetiw?

² Ach ekilonei úkúkún álillis sia pwisin angei seni ewe káit mi apéchékkúl Jiowa a awora lón ach kewe mwichelap, epwe amwékútúkich le unusen fiti ewe angangen etiwetiw. (Ais. 65:13, 14) Sipwe pwal chechchemeni pwe a sópwéch ewe angangen etiwetiw mi fis iteiten ier. (Ppii ewe pwóór “Mi Sópwéch.”) Ekkóch me lein ekkewe sia etiwer repwe fitikich lón ewe mwichelap nge ekkóch resap. Ach tinikken atun ewe angangen etiwetiw epwe mwareiti Jiowa me pwári an fangafangéch ese lifilifil ika fitemén repwe fiti ewe mwichelap.—Kölf. 145:3, 7; Pwär. 22:17.

3. Ifa usun ewe taropween etiwetiw epwe einet?

³ Eú me eú kúmiin mwán mi ásimaw epwe apwúngaló kókkótun einetin ekkewe taropween etiwetiw, kapachelong ika repwe likitatiw ewe taropwe lón ewe imw ese nóm chón are einet ia chómmóng aramas ra nóm ie nge epwe lón án ewe mwichefel territory. Lón Ammól me Ráninfel ewe Leenien Mas epwe pwal anéúnéú ika mi fich. Lesópwólóón ena angang, epwele ifan me watteen ach pwapwa le silei pwe sia mwasangasang le fiti me etiwa chómmóng aramas le fitikich lón ewe kametip lón pekin lúkú Jiowa a awora!

Mi Sópwéch

Fite ier ra ló atun emén Chón Kraist fefin a fiti einetin ewe taropween etiwetiw, a ekieki ika mi wor lamotan unusen ena angang. A ekieki, ‘Aramas repwe itá wesewesen etiwa me fitikem lón ewe mwichelap?’ Lesossorun Ammólun ewe mwichelap, a kúna emén Sikh, emén mi fiti lamalamen India itan Sikhism, a mómmóót arapakkan ngeni. Iwe, chienach na a ereni ena mwán itan. A pwá pwe ewe mwán a fiti ewe mwichelap pokiten a angei ewe taropween etiwetiw. A chómmóng án ena mwán kapas eis me chienach na fefin a pélúweniir. Ewe mwán a apasa pwe a pwapwaiti ekkewe afalafal me a mwaar ren limelimen me féfférún ekkewe chón fiti. Pwal lón ena rán, chienach na fefin a chuuri eú pean pwúpwúlú mi mómmóót únúkkún. Pwal iir ra angei ewe taropween etiwetiw me fiti ewe mwichelap ren ar fiti efóch bus. Ra pwapwaiti ewe mwichelap me ra pwal akkóta pwe repwe pwal fiti sorotáán. Iwe chienach na fefin a mirititi aúchean ewe angangen eineti ewe taropween etiwetiw sia kan féfféri iteiten ier.
Lón ewe mwichelap a kerán fis, eú pwúpwúlú iir regular pioneer ra apasa iter ngeni pwal eú pwúpwúlú mi watte ieriir seniir. Ewe pwúpwúlú mi watte seniir a apasa pwe ina ewe áeúin ar fiti. Ewe pwúpwúlú iir pioneer ra eis: “Ié a etiwakemi?” Iwe, ra pélúweni: “Atun aua wareiti imwem we lón eú rán, aua kúna ewe taropween etiwetiw fán asamem we.” Ra álleani ewe taropween etiwetiw me ra pwal mwo nge amasoua ewe coupon mi nóm lúkúnúppen. Ekkóch chón fiti ra amwéngééni ei pwúpwúlú ener mwéngéén leolowas. Ra fókkun pwapwaiti ewe mwichelap ina popun ra akkóta pwe repwe pwal fiti sorotáán. Chienach kewe ra akkóta ar repwe chuuri ei pean pwúpwúlú.