“Ekei Kapas . . . Repwe Nom lon Lelukom”

Sam me in ra usun chón masen siip. A lamot repwe túmúnúéchú néúr kewe semirit ekkewe ra mecheresin mworukoló me mecheres ar repwe tipetipeló. (SalF. 27:23) Ifa usun ekkewe sam me in repwe apwénúetá ei wis? A lamot repwe awora fansoun iteiten rán le apwóróus me néúr kewe ren ar repwe silei met a nóm lón ekiekiir me letiper. (SalF. 20:5) Pwal och, a lamot ekkewe sam me in repwe kaútá wóón minne esap tongeni kareló ren ekkei pwe epwe anúkúchara lúkúen néúr kewe. (1 Kor. 3:10-15) Ewe video “These Words . . . Must Be on Your Heart” a menlapei lamoten an epwe fis ewe famili fel iteitan. Oupwe katolfengen, iwe mwirin pwóróus wóón ekkeei kapas eis.

(1) Met a efisi án ewe Roman famili esap nefótófót wóón ekkewe mettóchun lúkú? (2) Pwata án pwiich we Thomas Roman akkomw sótuni ewe famili fel ese sópwéch? (3) Ifa ewe kapasen emmwen seni Paipel a tongeni álisi sópwéchún ewe angangen túmúnú semirit? (Tut. 6:6, 7) (4) Met a tongeni álisatá múrinnélóón pwóppwóróusfengen lón famili? (5) Met sókkun mettóch ekkewe sam me in repwe pennúkúóló fán iten néúr kewe? (6) Ifa usun pwiich me fefinach Barrow ra álisi ewe Roman famili? (SalF. 27:17) (7) Met a lamot ewe mékúren famili epwe féri me mwan pwe ewe famili fel epwe sópwéch? (8) Met pwiich Thomas Roman a féri pwe epwe ámúrinnééló an famili? (9) Pwata a lamot epwe chék fiffis ewe famili fel? (Ef. 6:4) (10) Ikkefa ekkewe mettóch epwe ámúrinnééló ewe famili fel? (11) Ifa usun pwiich Thomas Roman a pwári mosonottam nge mi ú péchékkúl atun a álisi Markus pwe epwe aúcheani lamoten an epwe féri minne mi pwúng? (Jer. 17:9) (12) Ifa usun pwiich me fefinach Roman ra álisiéchú Rebecca pwe epwe kefiléch ren an chiechi ngeni Justin? (Mark. 12:30; 2 Tim. 2:22) (13) Ifa usun pwiich me fefinach  Roman ra pwári ar lúkú atun ra féri ekkesiwil lón manawer? (Mat. 6:33) (14) Ifa usun ei video a menlapei lamoten mékúren famili epwe álisi an famili le riri ngeni Jiowa? (1 Tim. 5:8) (15) Met mékúren famili epwe úppós le féri?

FÁN ITEN MÉKÚREN FAMILI: Ei sipai a fis atun ewe mwichelap lón summer lón 2011. Iwe lón na atun, ka esilla pwe a lamot kopwe ámúrinnééló óm famili fel? Nge ifa usun iei? Ika mi lamot pwe kopwe pwal féri ekkesiwil, kese mochen kopwe iótek fiti óm féri ekkewe ekkesiwil fán iten óm famili epwe feiéch fóchófóch.​—Ef. 5:15-17.