Ifa Usun Sipwe Néúnéú ewe Brochure Ié Kewe Ra Féfféri Letipen Jiowa Lón Ei Fansoun?
Ei Minefé Brochure a Ffér pwe Epwe Emmweni Ekkewe Chón Káé Paipel Ngeni ewe Mwicheich
1. Ikkefa ekkewe úlúngát popun a ffér ewe Letipen Jiowa brochure?
1 En mi fen nénnéúnéú ewe mineféén brochure Ié Kewe Ra Féfféri Letipen Jiowa Lón Ei Fansoun? Populapan an a ffér (1) pwe epwe álisi ekkewe chón káé Paipel le silefichi usuch Chón Pwáraatá Jiowa, (2) ar repwe álisiir le silei ach kewe angang me (3) epwe pwáraatá ngeniir ifa usun angangen ach mwicheich. Lón ewe Letipen Jiowa brochure a wor eú lesen lón eú pekin taropwe pwe epwe mecheres ámi pwóróus wóón lón úkúkún nimu ngeni engol minich iteiten wesin ámi káé.
2. Apwóróusa napanapen fférún me met masouen ei brochure.
2 Napanapen Fférún: Ewe brochure a wor úlúngát kinikinin. Eú me eú kinikin a pwóróus usun sókkópaten kinikinin angangen án Jiowa we mwicheich usun a fen affat me asan. Itelapen eú me eú ekkena 28 lesen a mak lón napanapen kapas eis, me ra pélú ren ekkewe itelap kisikis mwirin. Mi wor sasingin lap seni 50 fénú mi affatetiw iter lón ei puk. Ra pwáraatá úkúkún watteen ach angang mi fis wóón unusen fénúfan. A wor fitu pwóór itelapan “Alapaaló Óm Silei” lón fitu lesen, iwe, a masou ren ekkewe kapasen pesepes pwe kopwe apéchékkúla ngeni noum we chón káé an epwe féri.
3. Ifa usun sipwe tongeni néúnéú ewe Letipen Jiowa brochure?
3 Ifa Usun Kopwe Tongeni Néúnéú: Poputá ren óm áiti ngeni itelapen ewe lesen mi napanapen kapas eis. Atun oua álleafengen ewe lesen, menlapei ekkewe itelap kisikis mi kon chól makkan. Sáingoon, pwóróusfengen usun ekkewe kapas eis mi nóm fachikin fán iten enniwili. Álleani unusen ewe lesen are álleani me pwóróusfengen wóón eú me eú ekkewe kinikin. Kefiléch le filatá menni wokisin mi nóm lón an epwe állea. Chechchemeni le pwóróus wóón ekkewe sasing me ewe pwóór “Alapaaló Óm Silei.” Lape ngeni a éch an epwe tetteléch ámi pwóróus wóón ekkewe lesen. Iwe nge, ka tongeni mwet ngeni ewe lesen mi fichiiti ewe pwóróus mi ppiitá lón ena fansoun. Áwewe chék, ika epwele fis mwichelap, kopwe suuk ngeni lesen 11.
4. Pwata ka pwapwa le néúni ei mineféén brochure?
4 Lupwen sia káé Paipel ngeni emén, sia álisi an epwe silei Semach we lón láng. Iwe nge, a pwal lamot sipwe áiti ngeni usun án Jiowa we mwicheich. (SalF. 6:20) A ifa me pwapwaach le néúni ei mineféén brochure pwe epwe ámecheresikich le féri ena mettóch!