Pwapwaesini Feiéch Esemuch Seni ewe Chón Fératá

Kot a pwon ngeni ewe soufós Apraham pwe emén me lein mwirimwirin kewe epwe aworato feiéch ngeni “chon ekewe mwü won unusen fanüfan.” (Keneses 22:18) Epwe ié na mwirimwirin?

Arapakkan 2,000 ier a ló, Kot a ngeni Jesus ewe tufichin féri manaman nge i emén mwirimwirin Apraham. Ekkena manaman ra pwári pwe, ren Jesus, ewe pwon ngeni Apraham epwe pwénútá ngeni ekkewe mwú.​—Kalatia 3:14.

Ekkewe manaman Jesus a féri a álisi aramas ar repwe esilla pwe i ewe Kot a filatá pwe epwe efeiéchú aramas. Ra pwal pwári ifa usun Kot epwe néúnéú i le efeiéchú aramas tori feilfeiló. Ppii ifa usun ekkewe manaman Jesus a féri ra menlapei ekkóch napanapan kewe mi múrinné.

Kirekiréch​—Jesus a echikara ekkewe mi samau.

Lón eú atun, emén mi keinepan a tingormaú ngeni Jesus an epwe echikara. Jesus a attapa iwe a erá: “Üa mochen.” Mwittir chék, ewe keinepan a móló.​—Markus 1:40-42.

Fangafangéch​—Jesus a amwéngééni ekkewe mi echik.

Jesus ese mochen aramas repwe echik. Esap chék fán eú a féri manaman le amwéngééni ngeréún aramas ren an kinietiw fiteféú pilawa me fitemén kúkkún iik. (Mateus 14:17-21; 15:32-38) Mwirin ar mwéngé, meinisin ra mét me a watte ewe lusun mwéngé.

Tong​—Jesus a amanawasefáli ekkewe mi máló.

Jesus “a fokun tongei” ewe fefin mi má seni pwúlúwan ese chúen wor ié epwe túmúnú, ina popun a amanawasefáli néún na fefin we át.​—Lukas 7:12-15.