Feiéch Ngeni Chókkewe mi Álisi Ekkewe mi Osupwangen Álillis

Chómmóng aramas wóón fénúfan ra osupwangen ener mwéngé me imwer. Ekkóch a lamot ngeniir ápilúkúlúk fán iten mwachkkan. Ifa usun ach achocho le álisi ekkena esin aramas epwe atoto ngenikich án Kot chen me feiéch?

MET EWE PAIPEL A APASA

“Eman aramas mi kichiöch ngeni chon wöüngau a fangala ngeni ewe Samol mi Lapalap [Jiowa], nge i epwe liwini ngeni liwinin an föför.”​—ÄN SALOMON FOS 19:17.

WEWEEN ACH ÁLISI EMÉN MI OSUPWANGEN ÁLILLIS

Jesus a eáni eú kapas áwewe usun emén mwán chón solá ra awata tori ar ekieki pwe a máló. (Lukas 10:29-37) Emén mwán mi álilliséch a kaúló me álisi ena mwán mi watte feiengawan, nge ese sissilei. A féri ena inaamwo ika i seni pwal eú fénú.

Ei mwán mi kirekiréch ese chék sáfeni kinásen ewe mwán mi feiengaw me álisi lón pekin aion, nge a pwal apéchékkúla me angasa seni an riáfféú.

Met sia káé seni ei kapas áwewe? Jesus a áiti ngenikich pwe sipwe álisi chókkewe mi osupwangen álillis, ese lifilifil lón met sókkun napanap. (Än Salomon Fos 14:31) Ewe Paipel a áiti ngenikich pwe ekiseló chék Kot epwele aúkatiw osupwang me riáfféú. Neman sipwe ekieki ika ifa usun me ineet Kot epwe efisi ena. Ewe lesen mwirin ei epwe pwóróus usun ekkewe feiéch ewe Chón Fératá mi tong a ammólnatá fán itom.