Kapas Eis Seni Chón Állea
Atun Tafit a makkeei masouen Kölfel 61:8, (NW) a apasa pwe i epwe mwareiti iten Kot tori “feilfeiló.” Iwe, a itá wewe ngeni pwe a ekieki pwe esap tongeni máló?
Aapw. A pwúng minne Tafit a makkeei.
Ekieki met a makkeei lón ena wokisin me lón ekkeei ekkóch wokisin: “Upwe kélún mwareiti itom feilfeiló, lupwen ua apwénúetá ai kewe pwon iteiten rán.” “Ai Samol me ai Kot, üpwe kilisou ngonuk ren unusen lelukei, üpwe alinga itom tori feilfeilachök.” “Üpwe mwareiti itom tori feilfeilachök.”—Kölf. 61:8, NW; 86:12; 145:1, 2.
Atun Tafit a makkeei ena wokisin, ese ekieki pwe esap tongeni máló. A silei pwe Jiowa a apasa pwe aramas repwe máló pwe ra tipis, me Tafit a pwal silei pwe i emén chón tipis. (Ken. 3:3, 17-19; Kölf. 51:4, 5) A silei pwe pwal mwo nge ekkewe mwán Kot a aúcheaniir, ra máló, áwewe chék ren Apraham, Isaak, me Jakop. Me Tafit a silei pwe i epwe pwal máló. (Kölf. 37:25; 39:4) Nge alon Tafit na lón Kölfel 61:8, a pwári an mochen me an úppós le mwareiti Kot tori feilfeiló, weween pwe lón ánein manawan.—2 Sam. 7:12.
Fán ekkóch, Tafit a makkeei pwisin pwóróusen manawan usun met sia kúna seni ekkewe kapas mwan lón Kölfel sópwun 18, 51, me 52. Lón Kölfel 23, Tafit a áweweei Jiowa ngeni emén chón masen siip mi awora emmwen, kinamwe, me túmún. Tafit pwal i emén chón masen siip. Me a mochen angang ngeni Kot ‘lon ränin manauan meinisin.’—Kölf. 23:6.
Chemeni pwe Jiowa a emmweni Tafit lón meinisin minne a makkeei. A kapachelong lón minne a makkeei, ekkewe oesini usun met repwe fis mwirin fitu fansoun. Áwewe chék, Tafit a makkeei lón Kölfel 110 usun ewe fansoun an we Samol epwe ‘mot lepelifichin [Kot]’ lón láng me epwe angei watteen manaman. Met epwe féri? Epwe okkufu chón oputen Kot me “epwe eäni kapwüng won chon ekewe mwü” wóón fénúfan. Tafit i semelapen ewe Messaia, ewe emén epwe nemenem seni láng me “souasor tori feilfeilachök.” (Kölf. 110:1-6) Jesus a apasa pwe ena oesini lón Kölfel 110 a fós usun i, me epwe pwénúetá lón mwachkkan.—Mat. 22:41-45.
Ewer, Jiowa a emmweni Tafit le makkeei usun pwóróusan lón ena atun, me lón fansoun mwach atun epwe manawsefál me mwareiti Jiowa tori feilfeiló. Ina minne Kölfel 37:10, 11, 29, a tongeni weneiti ewe fansoun a kerán mak me a pwal tongeni weneiti lón fansoun mwach. Ekkena wokisin ra pwénútá lón Israel lóóm me repwe pwal pwénúetá wóón unusen fénúfan lón fansoun mwach atun Kot epwe apwénúetá an kewe pwon.—Ppii parakraf 8 lón ewe lesen lón ei puk itelapan “Kopwe Nóm Rei lón Paratis.”
Ina minne Kölfel 61:8, me pwal ekkewe wokisin usun chék ena, ra pwári pwe Tafit a mochen elingaaló Jiowa atun fansoun ekkewe chón Israel lóóm tori an a máló. Me ekkena wokisin ra áiti ngenikich met Tafit epwe tufichin féri lón mwachkkan atun Jiowa epwe amanawasefáli.