Kot A Chúnguk
EWE Paipel a masou ren kapasen emmwen mi fókkun múrinné fán itach, pún a feito seni Kot. Esap ina eú puken sáfei, nge a tongeni áiti ngenikich ifa usun sipwe likiitú lón fansoun weires, atun a osukosuk ach ekiek, weires letipach, me atun sia semmwen me torikich osukosuken tupwuach.
Met mi kon aúchea seni meinisin, ewe Paipel a alúkúlúkú ngenikich pwe Jiowa Kot,a ewe Chón Férikichetá, a kon weweiti met sia ekieki me meefi lap seni ekkewe ekkóch. A fókkun mochen álisikich le likiitú fán ese lifilifil osukosuk sia kúkkúna. Áwewe chék, ekieki ekkeei ruu wokisin mi oururukich:
“Ewe Samol mi Lapalap a kan ngeni chokewe mi luketatakis, a amanaua chokewe mi apilükingau.”—KÖLFEL 34:18.
“Ngang om Kot ewe Samol mi Lapalap üa amwöchü pöüifichum, pwal ngang ätewe mi ürenuk, ‘Kosap niuokus, ngang üpwe alisuk.’”—AISEA 41:13.
Iwe nge, ifa usun Jiowa epwe álisikich ika a úrikich are úri ekkewe ekkóch osukosuken tupwu? Usun met kopwele káé lón ekkewe lesen mwirin ei, Jiowa a pwári pwe a enletin chúngúkich lón chómmóng napanap mi álilliséch.
a Jiowa ina iten Kot we. (Kölfel 83:18) Ewe kapasen lepoputáán lón ewe Paipel are Testamentin Lom me Testament Söfö, a apasa pwe “lon ewe Testamentin Lom sia nöünöü . . . ‘Samol mi Lapalap’ fän iten Jiowa ika Yahwe.”