Ifa Usun Kopwe Kúna Álilliséchún Óm Álleaan Paipel?

1. Met a pwári pwe Jesus a aúcheani ekkewe Taropwe mi Pin?

ANCHANGEI meefiom atun ka aúseling ngeni án Jesus asukul. Fán chómmóng, a aloni masouen ekkewe Taropwe mi Pin seni met a fen chechchemeni! Ren enletin, minne Jesus a apasa mwirin an we papatais, me ekkóch alon kewe mwen an we epwele máló, a aloni seni ekkewe Taropwe mi Pin.b (Tut. 8:3; Kölf. 31:5; Luk. 4:4; 23:46) Atun ekkewe úlúngát esopw ier lefilen ekkena ruu atun, fán chómmóng Jesus a álleani, aloni, me áweweei ngeni aramas masouen ekkewe Taropwe mi Pin.​—Mat. 5:17, 18, 21, 22, 27, 28; Luk. 4:16-20.

2. Atun Jesus a mámmááritá, met a álisi le silefichi ekkewe Taropwe mi Pin? (Ppii ewe sasing wóón péén.)

² Fite fite ier me mwen án Jesus poputááni an angangen afalafal, a állea me rong án Kot we Kapas fán chómmóng. Ese wor tipemwaramwar pwe a rong me lón imwer we án Maria me Josef aloni masouen ekkewe Taropwe mi Pin lón ar pwóróusfengen iteiten rán lón ar famili.c (Tut. 6:6, 7) Sia tongeni lúkúlúk pwe Jesus a kan pwal fiti chón an we famili le ló ren ewe sinakok iteiten ránin Sapat. (Luk. 4:16) Atun a nóm ikena, eli a aúselingéch álleaan ekkewe Taropwe mi Pin. Ló, ló, ló, Jesus a pwisin sile le állea ekkena Taropwe mi Pin. Ina popun, Jesus ese chék silefichi ekkewe Taropwe mi Pin, nge a pwal aúcheaniir me mut ngeni an epwe emmweni féfférún. Áwewe chék, chemeni met a fis ngeni me lón ewe imwenfel atun a chék 12 ierin. Ekkewe sense mi silefichi ewe Allúkún Moses ra “mwar ren an weweöch me an silelap le pölüeni ekewe kapas ais.”​—Luk. 2:46, 47, 52.

3. Met sipwele káé lón ei lesen?

³ Sia pwal tongeni silei me aúcheani án Kot we Kapas atun sia álleani iteitan. Nge ifa usun sipwe tongeni kúna álilliséchún minne sia álleani? Sia tongeni káé seni met Jesus a ereni chókkewe mi sileéchú ewe Allúk, kapachelong ekkewe senseen allúk, Farisi, me Satusi. Fán chómmóng, ekkena néúwisin lamalam ra álleani ekkewe Taropwe mi Pin, nge rese kúna álillis seni met ra álleani. Jesus a menlapei úlúngát mettóch itá úrúrún chókkana repwe féri pwe repwe kúna álillis seni met ra álleani. Minne a ereniir epwe álisikich le alapaaló ach tufichin (1) weweiti met sia álleani, (2) kúna ekkewe pwóróus mi aúchea, me (3) mut ngeni án Kot we Kapas an epwe ekkesiwili napanapach.

ACHOCHO LE WEWEITI MINNE KA ÁLLEANI

4. Met Lukas 10:25-29 a áiti ngenikich usun ach álleani án Kot we Kapas?

⁴ Sia mochen weweiti weween met sia álleani me lón án Kot we Kapas. Ika sise weweiti, iwe eli sisap unusen kúna álilliséchún met sia álleani. Áwewe chék, ren met Jesus me “eman Sensen Allük” ra eáni pwóróusfengen. (Álleani Lukas 10:25-29.) Lupwen ena mwán a eisini Jesus met a lamot epwe féri pwe epwe kúna manaw esemuch, a álisi le kúna pélúwan seni án Kot we Kapas ren an ereni: “Met a mak lon ewe Allük? Met ka aleani?” A pwúng met ena mwán a pélúwen ngeni ren an aloni alon ekkewe taropwe mi pin mi fós usun ach tongei Kot me chón oruch. (Lif. 19:18; Tut. 6:5) Nge nengeni met a erá mwirin. “Iö chon ori?” A pwá pwe ena mwán ese weweiti enletin weween met a fen álleani. Ina popun ese silei ifa usun epwe apwénúetáfichi masouen ena wokisin lón manawan.

5. Ifa usun ach iótek me akkammang le állea epwe álisikich le wewefichiti met sia álleani?

⁵ Sia tongeni alapaaló ach weweiti án Kot we Kapas ika sia émúrinnéló napanapen ach állea. Ikkeei ekkóch kapasen emmwen mi tongeni álisuk. Iótek me mwen óm kopwe poputá le állea. A lamot ngenikich án Jiowa álillis pwe sipwe tongeni weweiti ewe Paipel, ina popun kopwe tingorei an we ngún mi fel pwe kopwe tongeni nefótófót wóón met ka álleani. Mwirin, kopwe chék akkammang le állea. Ena mettóch epwe álisuk le weweiti met ka álleani. Eli epwe álilliséch óm léúwommóng le állea are fiti ewe álleaan Paipel mi record le állea. Ika ka rong kapasen ewe álleaan Paipel mi record me fiti lón noum we Paipel, a tongeni álisuk le weweiti, chemeni, me káé chómmóng seni met ka álleani. (Jos. 1:8) Atun ka wes le állea, kopwe pwal ióteksefál me kilisou ngeni Jiowa ren an liffang an we Kapas, me tingorei an epwe álisuk le apwénúetá met ka álleani.

6. Pwata óm pwisin eisinuk ekkóch kapas eis me makkeetiw ekkóch pwóróus, a tongeni álisuk atun ka állea? (Pwal ppii ewe sasing.)

⁶ Pwal ikkeei ruu kapasen emmwen ra tongeni álisuk le wewefichiti ewe Paipel. Pwisin eisinuk ekkewe kapas eis usun met ka álleani. Atun ka álleani eú pwóróus seni ewe Paipel, kopwe kútta pélúwen ekkeei kapas eis: ‘Ié keei ua álleani pwóróuseer? Ié ei a fóffós? Ié e fóffós ngeni, me pwata? Ia a fis me ie, me ineet a fis?’ Ekkena kapas eis repwe álisuk le ekieki me weweiti ekkewe menlapen pwóróus lón met ewe ka álleani. Kopwe pwal makkeetiw ekkóch ekkewe pwóróus atun ka állea. Atun ka makkeetiw met ka álleani, epwe lapóló óm ekieki usun, epwe álisuk le wewefichiti, me epwe pwal álisuk le chechchemeni. Ka tongeni makkeetiw ekkewe kapas eis, met ka kúna seni óm research, ekkewe menlapen pwóróus, ifa usun ka tongeni néúnéú ekkewe pwóróus ka álleani, are meefiom ren met ka álleani. Kopwe kúna pwe óm makkeetiw met ka álleani, a tongeni álisuk le meefi pwe ewe Paipel ina néún Kot taropwe ngonuk.

7. Ifa ewe napanap mi lamot ngenikich atun sia álleani ewe Paipel, me pwata? (Mateus 24:15)

⁷ Jesus a áiti ngenikich eú napanap mi aúchea sipwe napanapeni ika sia mochen weweiti met sia álleani seni án Kot we Kapas. Ina ewe napanap, mirit. (Álleani Mateus 24:15.) Met weween mirit? Ina ewe tufichin weweiti ririfengenin me sókkofesenin ruu pwóróus, me weweiti met ese pwá me lón ena pwóróus. Pwal och, Jesus a áiti ngenikich pwe a lamot mirit ren ach sipwe esilla ekkewe mettóch mi fiffis mi apwénúetá ekkewe oesini lón Paipel. A pwal lamot ngenikich ena napanap pwe sipwe tongeni unusen kúna álillis seni meinisin met sia álleani seni Paipel.

8. Ifa usun sia tongeni álleani ewe Paipel fán mirit?

⁸ Jiowa a fang mirit ngeni néún kewe chón angang. Ina popun kopwe seppiti lón iótek me tingorei an epwe álisuk le ámááraatá ena napanap. (SalF. 2:6) Met kopwe féri pwe óm tingor epwe tipeeú ngeni óm iótek? Etittinaéchú met ka álleani, me ppii ifa usun a riri ngeni pwal ekkóch mettóch ka fen silei. Ka tongeni kútta álillis seni néúch kewe minen álillis seni Paipel, áwewe chék ren ewe Research Guide for Jehovah’s Witnesses. Ekkena minen álillis repwe álisuk le esilla weween eú pwóróus seni Paipel me silei ifa usun kopwe tongeni apwénúetá lón manawom. (Ipru 5:14) Atun ka álleani ewe Paipel fán mirit, epwe lapóló óm weweiti ekkewe pwóróus lón.

ACHOCHO LE KÚTTA PWÓRÓUS AÚCHEA LÓN ÓM ÁLLEA

9. Ifa ewe pwóróus mi aúchea me enlet lón ekkewe Taropwe mi Pin ekkewe Satusi ra tunaló?

⁹ Ekkewe Satusi ra sileéchú ekkewe nimu puk mi akkomw lón ewe Tesin Ipru, nge ra tunaló ekkewe pwóróus mi aúchea lón ekkena puk mi pin. Áwewe chék, ekieki met Jesus a ereni ekkewe Satusi mi eisini usun ewe manawsefál. A eisiniir: “Ousamwo aleani lon ewe puken Moses usun ewe iräfölüföl mi pulopulen ekkei? Seni lon ewe irä Kot a kapas ngeni Moses, ‘Ngang än Apraham, Isaak me Jakop we Kot.’” (Mark. 12:18, 26) Inaamwo ika ekkewe Satusi ra álleani ena pwóróus fán chómmóng, nge án Jesus kapas eis ngeniir a pwári pwe ra tunaló eú pwóróus mi aúchea me enlet lón ekkewe Taropwe mi Pin, ina ewe asukul usun manawsefál.​—Mark. 12:27; Luk. 20:38.d

10. Met a lamot sipwe túmúnúéchú atun sia álleani ewe Paipel?

¹⁰ Met sia tongeni káé? Atun sia állea Paipel, a lamot sipwe túmúnúéchú meinisin met eú wokisin are pwóróus lón Paipel a asukula ngenikich. Sise mochen sipwe chék weweiti ekkewe mettóch mi mecheres, nge pwal ekkewe pwóróus mi alóllóól me ekkewe kapasen emmwen ese mecheres ach sipwe kúner.

11. Me ren 2 Timoty 3:16, 17, ifa usun kopwe tongeni kúna ekkewe pwóróus mi aúchea lón ewe Paipel?

¹¹ Ifa usun ka tongeni kúna ekkewe pwóróus mi aúchea atun ka álleani ewe Paipel? Nengeni met 2 Timoty 3:16, 17 a erá. (Álleani.) Ena wokisin a erá pwe “kapasen lon ekewe Toropwe mi Pin meinisin . . . ra aüchea” fán iten (1) afalafal, (2) emirit, (3) apwúng, me (4) káit. Ka tongeni kúna iir me rúáánú ekkena mettóch pwal mwo nge seni ekkewe puk lón Paipel kese kon lien ákkállea. Etittina ewe pwóróus pwe kopwe kúna met a afalafala are asukula ngonuk usun Jiowa, minne a tipeni, are usun an kewe kapasen emmwen. Pwal ppii ifa usun a álilliséch fán iten emirit are fén. Kopwe féri ena ren óm kútta ifa usun ekkewe wokisin ra álisuk le esilla me ttin sonuk mochen are féffér ese pwúng pwe kopwe akkamwéchú óm tuppwél ngeni Jiowa. Etittina ifa usun ka tongeni néúnéú ewe pwóróus le apwúngú are áwena eú ekiek ese pwúng eli emén a eppiietá lón ewe angangen afalafal. Me kopwe pwal kútta ifa usun ekkewe wokisin ra awora káit are emirit mi tongeni álisuk le eáni án Jiowa ekiek. Atun ka chemeni ekkena rúáánú mettóch mi aúchea, epwe álisuk le kúna ekkewe pwóróus mi aúchea mi tongeni alapaaló álilliséchún óm álleaan Paipel.

MUT NGENI ÓM ÁLLEA EPWE SIWILI NAPANAPOM

12. Pwata Jesus a eisini ekkewe Farisi, “Ousamwo aleani?”

¹² Jesus a pwal eisini ekkewe Farisi, “Ousamwo aleani?” pwe epwe pwári pwe ese pwúng minne ra eáni ekiek usun met ra álleani lón ekkewe Taropwe mi Pin. (Mat. 12:1-7)e Lón ena atun, ekkewe Farisi ra erá pwe néún Jesus kewe chón káé ra atai ewe allúkún Sapat. Jesus a pélúweniir ren an aloni alon ruu pwóróus seni ekkewe Taropwe mi Pin me alon eú wokisin seni ewe puken Osea pwe epwe pwári pwe ekkewe Farisi rese weweiti popun an ffér ewe allúkún Sapat me iir rese pwal pwári úméúméch. Pwata án ekkena mwán álleani Án Kot we Kapas ese kkúú letiper? Pokiten ra álleani fán ekiek mi esiit me lamalamtekia. Ikkena met a eppetiir seni ar repwe weweiti minne ra álleani.​—Mat. 23:23; Joh. 5:39, 40.

13. Met sókkun ekiek sipwe eáni atun sia álleani ewe Paipel, me pwata?

¹³ Sia káé seni alon Jesus kewe pwe mi lamot ach sipwe eáni ekiek mi pwúng lón ach álleani Paipel. Sisap usun ekkewe Farisi, nge sipwe tipetekison me tipemecheres le káé. A lamot sipwe ‘atekisonakich . . . o sipwe etiwa ewe kapas a fot loch.’ (Jas. 1:21) Ika sia tipepwetete, sipwe mut ngeni án Kot we Kapas epwe ekkesiwili manawach. Ekkewe lesen seni Paipel usun úméúméch, kirekiréch, me tong repwe chék angang lón manawach ika sia ttiisenikich ekiekin esiit me lamalamtekia.

14. Ifa usun sia tongeni esilla ika sia mut ngeni ewe Paipel an epwe siwili napanapach? (Pwal ppii ekkewe sasing.)

¹⁴ Féfférúch ngeni ekkewe ekkóch a tongeni pwári ika sia mut ngeni án Kot we Kapas epwe ekkesiwili napanapach. Ekkewe Farisi rese mut ngeni án Kot we Kapas an epwe siwili napanaper, ina popun ra “atipisi ekewe aramas esap wor ar tipis.” (Mat. 12:7) Pwal ina usun, ekiekich me féfférúch ngeni ekkewe ekkóch ra pwári ika sia mut ngeni án Kot we Kapas an epwe siwili napanapach. Áwewe chék, sia kan fóffós usun ekkewe napanap mi múrinné sia kúna seni ekkewe ekkóch, are sia kan fóffós usun ar kewe apwangapwang? Sia eáni úméúméch me omusaaló tipisin ekkewe ekkóch, are sia kan esiiter me akkamwéchú ach song rer? Ekkena kapas eis ra tongeni pwári ika sia mut ngeni minne sia álleani an epwe siwili ekiekich, meefiach, me féfférúch.​—1 Tim. 4:12, 15; Ipru 4:12.

ÁLLEA MI EMMWEN NGENI PWAPWA

15. Ifa meefien Jesus usun ekkewe Taropwe mi Pin?

¹⁵ Jesus a aúcheani ekkewe Taropwe mi Pin, me iei met Kölfel 40:8 a oesini usun meefian. A apasa: “Üa pwapwa le föri letipom, ai Kot, om allük a nom lon lelukei.” Pokiten Jesus a aúcheani án Kot we Kapas, a pwapwa me sópwéch lón an angang ngeni. Sia pwal tongeni pwapwa me sópwéch ika sia álleani án Kot we Kapas me aúcheani.​—Kölf. 1:1-3.

16. Met kopwe féri pwe kopwe kúna álilliséchún óm álleani án Kot we Kapas? (Ppii ewe pwóór, “Minne Jesus A Apasa A Tongeni Álisuk le Weweiti Met Ka Álleani.”)

¹⁶ Ren ach sipwe apwénúetá met Jesus a apasa me isetiw lón an leenien áppirú, sipwe émúrinnéló ach állea Paipel. Sia tongeni émúrinnéló ach weweiti ewe Paipel ren ach iótek, akkammang le állea, pwisin eisinikich ekkóch kapas eis, me makkeetiw ekkóch pwóróus. Sia tongeni eáni mirit ren ach etittinaéchú minne sia álleani ren álillisin néúch kewe minen álillisin Paipel. Sia tongeni alapaaló ach néúnéú ewe Paipel, pwal mwo nge ekkewe wokisin sise kon sileéchúúr ren ach kútta ekkewe pwóróus mi aúchea mi weneitiir. Me sia tongeni mut ngeni án Kot we Kapas an epwe siwili napanapach ren ach achocho le eáni ekiek mi pwúng atun sia állea. Atun sia achocho úkúkún ach tufich le féri ekkena mettóch, epwe lapóló met sipwe káé seni ach állea Paipel me sipwe ririéch ngeni Jiowa.​—Kölf. 119:17, 18; Jas. 4:8.