“Oupwe Chón Apwénúetá ewe Kapas”

1-2. Met a efisi án néún Kot aramas repwe pwapwa? (Jemes 1:​22-25)

JIOWA me Néún we mi áchengicheng ra mochen ach sipwe pwapwa. Ewe chón makkeei Kölfel 119:​2, Testament mi Fö, a apasa: “Mi feioch [“pwapwa,” NW] ir mi alleasochisi an kewe afalafal, ir mi kukutta i seni lon unusen letiper.” Iei met Jises a pwal anúkúnúkú ngenikich: “Chókkewe mi rongorong ewe kapasen Kot me akkamwéchú, iir ra pwapwa!”—Luk 11:28.

² Kich néún Jiowa aramas, kich aramas mi pwapwa. Pwata? A wor chómmóng popun, nge ewe ákkáeúin popun pún sia kan ákkálleani án Kot we Kapas me achocho le apwénúetá met sia káé.—Álleani Jemes 1:​22-25.

3. Ifa ussun sia kúna feiéch atun sia apwénúetá met sia álleani lón án Kot Kapas?

³ A wor chómmóng feiéch sia kúna atun sia “chón apwénúetá ewe kapas.” (Jem. 1:22) Áwewe chék, atun sia apwénúetá met sia káé seni án Kot we Kapas, sia apwapwaai Jiowa me ina met a pwal apwapwakich. (SalAf. 12:13) Pwal och, atun sia álleasochisi ekkewe kapasen fén lón án Kot we Kapas, sia émúrinnéló ach riri ngeni chón ach famili me chón ach mwichefel. Ese mwáál ka pwisin kúna pwúngún ena lón pwisin manawom. Pwal och, sia ttiisenikich chómmóng osukosuk mi tori ekkewe rese álleasochisi án Jiowa kewe allúk. Sia tipeeú ngeni met King Tafit a apasa lón an we kél. Mwirin an kapas ussun ekkewe allúk me án Jiowa kapwúng, iei met a erá: “Eman mi apwönüetä epwe angei liwinin mi lapalap.”—Kölf. 19:​7-11.

4. Pwata esap fansoun meinisin epwe mecheres ach sipwe apwénúetá met sia álleani?

⁴ Ren enletin, esap fansoun meinisin epwe mecheres ach sipwe álleani án Kot we Kapas me apwénúetá met sia káé. Inaamwo iká a chómmóng met sia kan féfféri iteitan, nge mi lamot sipwe awora fansoun le álleani ewe Paipel me káé pwe sipwe weweiti met Jiowa a mochen ach sipwe féri. Iei sipwele ppii ekkóch kapasen pesepes mi tongeni álisikich le álleani ewe Paipel iteitan. Sipwe pwal káé met epwe álisikich le ekieki met ekkewe sia álleani me ppii ifa ussun sia tongeni apwénúetá met sia káé.

ÁIMUOLÓ EÚ ÓM FANSOUN ÁLLEAAN PAIPEL

5. Ikkefa ekkóch me lein ekkewe mettóch mi tongeni angealó ach fansoun?

⁵ Lape ngenikich néún Jiowa aramas, a kan chómmóng met sia kan féfféri. Sia áeá watteen ach fansoun le féri sókkopaten angang ewe Paipel a erá pwe mi lamot. Áwewe chék, lape ngenikich a wor ach angangen moni pwe sipwe atufichi pwisinkich me ach famili. (1 Tim. 5:8) Chómmóng Chón Kraist ra kan túmúnú chón ar famili mi semmwen are chinnap. Me oukich meinisin, a lamot sipwe túmúnú péchékkúlen inisich, nge ena a pwal lamot watteen fansoun fán itan. A pwal wor ekkewe mettóch mi aúchea a lamot sipwe féri lón ewe mwichefel. Eú angang mi lamot sipwe féri, ina ach sipwe tinikken le afalafala ewe kapas allim. Iwe, ren meinisin ekkena angang ka eáni, ifa ussun kopwe awora óm fansoun le állea Paipel iteitan, ekilonei met ka álleani, me apwénúetá?

6. Ifa ussun ka tongeni akkomwa óm állea Paipel? (Pwal ppii ewe sasing.)

⁶ Állea Paipel, ina eú me lein “ekkewe mettóch mi fókkun aúchea” fán itach Chón Kraist, ina popun mi lamot sipwe akkomwa. (Fil. 1:10) Iei met Kölfel sópwun 1 a apasa ussun aramas mi pwapwa: “Ra pwapwaiti än ewe Samol mi Lapalap allük o ekieki usun [“álleani,” NW] lerän me lepwin.” (Kölf. 1:​1, 2) A ffat weween ena, a lamot ach sipwe áimuoló eú fansoun sipwe állea Paipel lón. Ineet atun mi kon múrinné ach sipwe állea Paipel? Emén me emén kich sia tongeni filaatá menni atun lón eú rán. Nge ewe a kon lamot, ina ach filaatá eú atun epwe álisikich le álleani ewe Paipel iteitan. Emén Chón Kraist mwán itan Victor a apasa: “Úa kan sani le álleani Paipel iteiten lesossor. Inaamwo iká úse kan sani le nelókkái lesossor, nge ina ewe fansoun mi kinamwe. A fataffatéch ái ekiek me úa tongeni nefótófót wóón ái állea.” Ese mwáál ka pwal kúna pwúngún ena. Pwisin eisinuk, ‘Ineet atun a kon múrinné ngeniei ái úpwe állea Paipel?’

EKIEKI MET KA ÁLLEANI

7-8. Met a tongeni eppetikich seni ach unusen kúna feiéch seni met sia álleani? Áweweei.

⁷ Iká ka akkóta óm fansoun le álleani Paipel, mi wor pwal och mettóch mi lamot kopwe túmúnú. Ka fen álleani och pwóróus nge mwirin chék kese chúen chechchemeni? A fis ngenikich meinisin ena. A pwal tongeni fis ena lón ach álleani Paipel. Áwewe chék, eli sia filaatá ach sipwe álleani fitu sópwun lón Paipel iteiten rán. A mmen múrinné ena. A lamot sipwe isettiw met sipwe achocho ngeni me fitipachei. (1 Kor. 9:26) Nge iká sia mochen unusen kúna feiéch seni ach álleani Paipel, mi wor met sipwe pwal féri me lúkún ach chék álleani.

⁸ Ekieki ei kapas áwewe: A lamot púngún rán ngeni ekkewe irá pwe repwe manaw. Nge iká a púngúchoutiw rán me mwittir alélétáái ewe pwúl, iwe ewe konik esap tongeni tolong leutun, me esap chúen álilliséch ngeni ekkewe irá. A mmen múrinné iká ese kon watte púngún rán, pún ewe konik epwe tongeni tolong leutun ewe pwúl me ámáári ekkewe irá. A pwal ina ussun ren ach állea Paipel, sipwe túmúnú ach sisap álleani fán atapwalapwal, pwe iká ina, iwe esap naf ach fansoun le ekieki, chemeni, me áeá minne sia álleani.—Jem. 1:24.

9. Met a lamot sipwe féri iká sia mirititi pwe sia kan chék emwittiri ach állea Paipel?

⁹ Ka meefi fán ekkóch pwe ka chék emwittiri óm állea Paipel? Met a lamot kopwe féri? Kopwe ammanga óm állea pwe kopwe tongeni ekieki ussun met ewe ka álleani are awora fansoun mwirin óm állea le ekieki ussun. Ese pwal wor weiresin óm féri ena. Iká a weires me reom óm kopwe ekilon, iwe eli kopwe ekieki pwe ekilon a wewe ngeni óm kopwe chék ekieki minne ka álleani. Eli ka tongeni filaatá le attamaaló óm fansoun káé pwe epwe wor óm fansoun ekilonei met ka álleani. Are ka tongeni filaatá le álleani chék fitu wokisin me áeá ewe lusun fansoun le ekieki ussun met ewe ka álleani. Iei alon Victor, ewe sia fós ussun me mwan: “Úa kan chék amwocha met úa álleani, eli eú chék sópwun.” A pwal apasa: “Pokiten úa kan állea lesossorusich, iwe úa tongeni ekieki lón unusen ewe rán met ewe úa álleani.” Ka tongeni filaatá úkúúkún met kopwe álleani, nge a lamot óm kosap atapwalapwal lón óm állea pwe kopwe tongeni ekieki ussun met ka álleani.—Kölf. 119:97; ppii ewe pwóór “Kapas Eis Kopwe Ekieki.”

10. Áweweei ifa ussun ka tongeni apwénúetá met ka kákkáé. (1 Tesalonika 5:​17, 18)

¹⁰ Atun ka álleani fitu wokisin lón óm állea Paipel, ekieki ifa ussun ka tongeni apwénúretá. Atun ka álleani eú kinikin lón án Kot we Kapas, pwisin eisinuk, ‘Ifa ussun úa tongeni apwénúetá ei pwóróus iei are lón fansoun mwach?’ Áwewe chék, anchangei pwe ka álleani 1 Tesalonika 5:​17, 18 (Álleani.) Mwirin óm álleani, ka tongeni kaúló me ekieki iká fán fite ka kan iótek me ifa úkúúkún alóllóólun masouan. Pwal och, ka tongeni ekieki ussun ekkewe mettóch ka kilisou ren. Eli ka filaatá óm kopwe kilisou ngeni Jiowa ren óm tichiki ngeni úlúngát mettóch. Ikáámwo ka chék néúni fitu minich le ekieki ekkewe lesen ka káé seni Paipel, nge epwe álisuk le weweiti án Kot we Kapas me apwénúetá met a apasa. Ekieki úkúúkún ekkewe feiéch kopwe kúna ren óm féfféri ena mettóch iteiten rán atun óm álleani ekkewe pwal ekkóch kinikinin Paipel. Ewer, kopwe feffeitá lón óm emén chón apwénúetá án Kot Kapas. Nge met kopwe féri iká a chómmóng met mi lamot kopwe angang wóór?

ISETTIW MET KOPWE ACHOCHO LE TIKERI

11. Eli pwata fán ekkóch kopwe meefi lichippúng? Eáni eú kapas áwewe.

¹¹ Atun ka álleani ewe Paipel me kútta ifa ussun kopwe apwénúetá ekkewe kapasen emmwen lón, eli fán ekkóch kopwe meefi lichippúng atun ka kúna pwe a kon chómmóng met kopwe angang wóón. Áwewe chék, anchangei pwe eú rán ka állea Paipel nge a wor ewe kapasen emmwen ussun ach sisap eimwumwu ngeni aramas. (Jem. 2:​1-8) Ka kúna pwe ka tongeni émúrinnéló napanapen óm féffér ngeni ekkewe ekkóch, ina pwata ka filaatá le féri ekkóch siwil. A fókkun éch ena! Iwe lón ewe rán mwirin, ka álleani ekkóch wokisin mi pwáári lamoten óm kopwe nemeni óm fós. (Jem. 3:​1-12) Ka mirititi pwe fán ekkóch ka kan eáni fós ese pwáári kirekiréch, are fós mi ámmetek. Ina popun ka filaatá le eáni fós mi apéchékkúl atun ka fós ngeni ekkewe ekkóch. Iwe pwal lón ewe rán mwirin, ka álleani eú éúréúr ussun chiechi ngeni chón fénúfan. (Jem. 4:​4-12) Ka esilla pwe a lamot óm kopwe kefiléch wóón met ekkewe kopwe kan álleani, aúseling ngeni, me katol. Iwe lón pwal ewe rán mwirin, ka meefi pwe ussun a kon weires óm kopwe féri ekkena siwil.

12. Pwata kosap lichippúng iká ka kúna seni óm álleaan Paipel pwe mi lamot óm kopwe féri ekkóch siwil?

¹² Iká a lamot óm kopwe féri ekkóch siwil, are émúrinnéló napanapom, kosap meefi lichippúng. Óm mirititi ena, a pwáári pwe en emén mi tipetekison me ka eáni letip mi múrinné. Emén mi tipetekison me wenechar ngeni pwisin i, epwe álleani ewe Paipel me kútta met epwe pwisin angang wóón.a Kopwe pwal chemeni pwe óm éúféúfa ngonuk “ewe manaw mi fé,” ina eú angang mi chék sópwósópwoló. (Kol. 3:10) Met epwe álisuk óm kopwe sópweeló lón óm chón apwénúetá án Kot Kapas?

13. Ifa ussun kopwe apwénúetá met ka álleani? (Pwal ppii ewe sasing.)

¹³ Ka tongeni apwénúetá eú are ruu me lein ekkewe mettóch ka álleani, lap seni óm sótun apwénúretá meinisin fán eú chék. (SalF. 11:2) Ka tongeni sótuni ei: Makkeetiw ekkewe mettóch mi lamot kopwe angang wóór. Mwirin, filaatá eú are ruu kopwe akkomw angang wóón, iwe kopwap angang wóón ekkewe lusun. Met kopwe akkomw poputá wóón?

14. Menni lein ekkewe mettóch ka achocho ngeni ka tongeni akkomw poputá wóón?

¹⁴ Neman kopwe filaatá le poputá wóón eú mi mecheres óm kopwe tikeri. Are neman kopwe filaatá le angang wóón och mettóch ka meefi pwe mi lamot óm kopwe kon émúrinnéló. Atun ka silleni iká menni, iwe kopwe research lón néúch kewe puk, áwewe chék, kopwe néúnéú ewe Watch Tower Publications Index are ewe Research Guide for Jehovah’s Witnesses. Iótek ngeni Jiowa me tingorei an epwe fang ngonuk “ewe mochen me ewe tufichin angang.” (Fil. 2:13) Mwirin, poputá le apwénúetá met ka káé. Atun ka kúna pwe ka tongeni féri eú siwil are émúrinnéló eú napanapom napanapen Chón Kraist, epwe lapóló óm meefi pwe ka tongeni angang wóón pwal eú. Me ese mwáál epwele mecheres ngonuk óm kopwele féri ekkewe pwal ekkóch siwil.

MUT NGENI ÁN KOT KAPAS EPWE “ANGANG LÓN ÁMI”

15. Pwata néún Jiowa kewe aramas ra sókkóló seni chómmóng mi álleani ewe Paipel? (1 Tesalonika 2:13)

¹⁵ Ekkóch aramas ra erá pwe ra álleani án Kot we Kapas fán chómmóng. Nge itá ra enletin lúkú met ra álleani lón Paipel? Ra apwénúetá met ra álleani are mut ngeni an epwe angang lón manawer? Aapw, lape ngeni aramas rese apwénúetá án Paipel kapasen fén. A ifa me sókkofeseniir seni néún Jiowa kewe aramas! Kich sia ussun ekkewe Chón Kraist lóóm, sia etiwa ewe Paipel “ren met wesewesen enletin, . . . ina kapasen Kot.” Pwal och, sia achocho le pwáári pwe án Kot Kapas a angang lón manawach.—Álleani 1 Tesalonika 2:13.

16. Met a tongeni álisikich le wiliiti emén chón apwénúetá ewe Kapas?

¹⁶ Esap fansoun meinisin epwe mecheres ach sipwe álleani án Kot we Kapas me apwénúetá. Neman epwe weires ach sipwe awora fansoun le álleani. Are eli sia kon emwittiri ach állea nge sise pwal ekieki met sia álleani. Are eli sia meefi pwe a kon chou ngenikich meinisin ekkewe siwil mi lamot sipwe féri. Ese lifilifil met sókkun mettóch epwe eppetuk, nge ka tongeni pwákiniir ren án Jiowa álillis. Amwo sipwe úppós le etiwa an álillis me wiliiti emén chón apwénúetá ewe Kapas nge esap emén chón rong chék me ménúkaaló. Ese wor tipemwárámwár pwe lapólóón óm álleani án Kot we Kapas, epwe pwal ina lapólóón óm pwapwa.—Jem. 1:25.