Kútta Ekkewe Pwóróus mi Aúchea Ka Tongeni Apwénúetá

Atun sia álleani ewe Paipel, sia tongeni kútta ekkewe pwóróus mi aúchea ren ach research wóór. Nge ifa ussun sia tongeni unusen kúna feiéch seniir?

Kúttafichi tichikin ekkewe pwóróus lón Paipel. Áwewe chék, ppii iká ié a makkeei ewe pwóróus, a mak ngeni ié, me ineet a mak. Ikkefa ekkewe mettóch a fiffis lón ena fansoun, met a fis me mwan, me met a fis mwirin?

Ekieki ekkewe lesen ka tongeni káé ren óm research wóón ekkeei esin kapas eis: ‘Met meefien ekkewe aramas úa álleani pwóróuseer? Ikkefa ekkewe napanap ra eáni? Pwata a lamot úpwe áppirú ekkena napanap? Pwata a lamot úpwe túmúnúei seniir pwe úsapw eániir?’

Apwénúetá ekkewe lesen ka káé, eli lón óm angangen afalafal are lón féfférum ngeni aramas. Iká ka féri ena, ka pwáári pwe en emén mi mirit are “silelap,” ussun met ei wokisin a erá: “Chokewe meinisin mi föri iei usun ra fefeitä lon ar silelap.”—Kölf. 111:10.

• Minen álillis: Ekieki ifa ussun ewe kinikin Pwóróus Aúchea Seni Kapasen Kot lón ach we mwiich lón weekday a álisikich le ekieki ifa ussun sia tongeni apwénúetá minne sia káé. Lón ena kinikin, a kan wor ekkewe kapas eis sia tongeni eisini pwisin kich, pwóróus sia tongeni ekilonei, me ekkewe sasing sia tongeni etittiner.