Jiowa A “Apöchöküla Ir mi Tatakis Leluker”

1. Met meefien Jiowa ussun néún kewe chón angang?

JIOWA a kúna meinisin met a fiffis ngeni néún kewe chón angang. A kúna atun sia pwapwa me atun sia letipechou. (Kölf. 37:18) Atun a kúna pwe sia achocho úkúúkún ach tufich le angang ngeni inaamwo iká sia nóm fán weires, a fókkun pwapwa rech! Nge lap seni ena, a fókkun mochen álisikich me oururukich.

2. Met Jiowa a féri ngeni ekkewe aramas mi tatakkis leluker, me met sipwe féri pwe sipwe unusen kúna an túmún?

² Kölfel 147:​3, a apasa pwe Jiowa a ‘filiti kinasen’ ekkewe mi tatakkis leluker. Ena wokisin a áweweei ifa ussun Jiowa a angepwetete le túmúnúéchú chókkewe mi kinás letiper. Met a lamot sipwe féri iká sia mochen unusen kúna án Jiowa túmún? Ekieki ei kapas áwewe. Emén tokter mi lipwákéch a tongeni álisi emén mi feiengaw an epwe chikar. Nge ren án ena mi feiengaw epwe chikar, a lamot epwe unusen álleasochisi met ewe tokter a ereni an epwe féri. Lón ei lesen, sipwe káé met Jiowa a apasa lón an we Kapas ngeni chókkewe mi riáfféú letiper, me sipwe pwal ppii ifa ussun sipwe apwénúetá an kewe kapasen emmwen.

JIOWA A ALÚKÚLÚKÚ NGENIKICH PWE KICH MI AÚCHEA ME REN

3. Pwata ekkóch ra meefi pwe ese wor aúchear?

³ A eletipechou pún chómmóng aramas ikenái rese tongei aramas, ina popun eli ra féfféringaw ngeniir me ámmeef ngeniir pwe ese wor aúchear. Emén chienach itan Helena a apasa: “Úa mámmááritá lón eú famili ese wor tong lón. Semei we a mmen arochongaw me iteiten rán a kan ereniei pwe ese wor aúcheai.” Eli a pwal wor emén a kan féfféringaw ngonuk, esiitok iteitan are ámmeef ngonuk pwe ese wor tongom. Iká ina, iwe eli epwe weires ngonuk óm kopwe lúkú pwe mi wor emén mi enletin tongeek.

4. Ifa án Jiowa we kapasen alúkúlúk ngenikich lón Kölfel 34:18?

⁴ Inaamwo iká a wor ekkóch ra pwal féfféringaw ngonuk, nge kopwe lúkúlúk pwe Jiowa a tongeek me aúcheanuk. I “a kan ngeni chokewe mi luketatakis.” (Álleani Kölfel 34:18.) Iká ka meefi “apilükingau,” chemeni pwe Jiowa a kúna ekkewe mettóch mi múrinné lón letipom me epwe paanukoto ngeni pwisin i. (Jon 6:44) Fansoun meinisin, a mmólnetá le álisuk pokiten ka fókkun aúchea me ren.

5. Met sia tongeni káé seni féfférún Jises ngeni ekkewe aramas mi meefi pwe ese wor aúchear?

⁵ Sia tongeni silei ussun meefien Jiowa ren ach káé pwóróusen Jises. Atun Jises a nóm wóón ei fénúfan, a fókkun kirekiréch ngeni ekkewe aramas mi meefi pwe ese wor aúchear pokiten féfférún ekkewe ekkóch ngeniir. (Mat. 9:​9-12) Lupwen emén fefin mi áneán pwe epwe chikar seni an we semmwen mi chou a attapa úfen Jises, Jises a oururu i me apúnga ren an lúkú. (Mark 5:​25-34) Jises a unusen áppirúfichi napanapen Seman we. (Jon 14:9) Ina minne, ka tongeni lúkúlúk pwe Jiowa a aúcheanuk me áfánni napanapom kewe mi múrinné, kapachelong óm lúkú me óm tongei.

6. Met ka tongeni féri iká ka meefi pwe ese wor aúcheaóm?

⁶ Met kopwe féri iká ka kan meefi pwe ese wor aúcheaóm? Álleani ekkewe wokisin mi alúkúlúkú ngonuk pwe Jiowa a aúcheanuk me kopwe ekilon wóór.b (Kölf. 94:19) Kosap apépéék ngeni ekkewe ekkóch me kosap nefótófót wóón met ekkewe kese tongeni fériir. Jiowa ese menei sonuk óm kopwe féri met ekkewe kese tongeni féri. (Kölf. 103:​13, 14) Iká emén a kirikiringaw ngonuk me lóóm, esap tipisum. Chemeni pwe Jiowa epwe wisen apwúngú ekkewe mi kirikiringaw me álisi ekkewe mi kúna weires ren met chókkana ra féri ngeniir. (1 Pit. 3:12) Sandra, ewe mi kúna weires ren féfférún kirikiringaw me lekúkkúnún, a apasa, “Úa kan tingorei Jiowa an epwe álisiei le kúna ekkewe napanap mi múrinné a kúna pwe úa napanapeni.”

7. Ifa ussun ekkewe weires sia kúna lón manawach lóóm ra tongeni álilliséch lón ach angang ngeni Jiowa?

⁷ Kosap fókkun tipemwárámwáreiti pwe Jiowa a tongeni néúnéú en le álisi ekkewe ekkóch. A fang ngonuk ewe wis óm kopwe emén chienan lón ewe angangen afalafal. (1 Kor. 3:9) Pokiten ekkewe weires ka kúkkúna lón manawom lóóm, iwe eli epwe mecheres ngonuk le weweiti meefien chókkewe mi pwal nóm lón weires. Ka fókkun tongeni álisiir. Helen, ewe sia fen fós ussun, a kúna álillis, me iei a tufichin álisi ekkewe ekkóch. Iei met a apasa: “Úa piin meefi pwe ese wor aúcheai. Nge Jiowa a álisiei ái úpwe meefi pwe mi wor tongei me a néúnéú ngang le álisi ekkewe ekkóch.” Iei Helen a pwapwa lón an fiti ewe angangen regular pioneer.

JIOWA A MOCHEN ACH SIPWE LÚKÚLÚK PWE A OMUSAALÓ TIPISICH

8. Ifa án Jiowa we kapasen alúkúlúk mi mak lón Aisea 1:18?

⁸ Ekkóch me lein néún Jiowa kewe aramas ra chúen aúreki ekkewe tipis ra fen féri me lóóm, ese lifilifil iká ra féri mwen ar papatais are mwirin. Nge kosap ménúki pwe Jiowa a fókkun tongekich me a awora ewe méén kepich pwe ach tipis epwe musoló. Sia tongeni lúkúlúk pwe i a mochen ach sipwe etiwa an na liffang. Jiowa a alúkúlúkú ngenikich pwe mwirin ach “pwüngüpwüngfengen”c me i, epwe unusen omusaaló ach tipis. (Álleani Aisea 1:18.) A ifa me kilisouch ren án Semach na mi tong, Jiowa, ménúkaaló ekkewe tipis sia féri lóóm! I ese pwal fókkun ménúki ekkewe mettóch mi múrinné sia féri.—Kölf. 103:​9, 12; Ipru 6:10.

9. Pwata a lamot ach sisap ekkekieki ekkewe tipis sia féri lóóm?

⁹ Iká ka meefi mengiringir ren ekkewe mettóch ka féri me lóóm, achocho le nefótófót wóón ekkewe mettóch ka féfféri iei me met kopwe féri lón fansoun mwach. Ekieki pwóróusen ewe aposel Paul. I a niamam ren an eriáfféwúmwááli ekkewe Chón Kraist, nge a silei pwe Jiowa a fen omusaaló tipisin. (1 Tim. 1:​12-15) Mi sópweeló le ekkekieki ussun an kewe tipis lóóm? Ese mwáál ese, ussun chék an ese pwal ekkekieki ekkewe mettóch a féri pwe epwe emén Farisi mi ésúúfél. (Fil. 3:​4-8, 13-15) Paul a fen sópweeló an achocho úkúúkún an tufich lón ewe angangen afalafal me ekieki ussun met epwe fis lón ekkewe fansoun repwe feito. Ussun chék Paul, kese tongeni ekkesiwili met a fen fis lóóm. Nge ka tongeni mwareiti Jiowa me apwapwaai i iei. Ka pwal tongeni ekieki ussun ekkewe mettóch mi amwarar a pwon ngonuk epwe fis lón mwach.

10. Met sia tongeni féri iká féfférúch kewe lóóm ra ámeteki ekkewe ekkóch?

¹⁰ Eli ka meefi mengiringir ren ekkóch féfférum kewe lóóm mi ámeteki ekkewe ekkóch. Met a tongeni álisuk? Achocho úkúúkún óm tufich le efisi kinamwesefál lefilemi, kapachelong óm omusomus ngeniir seni enletin letipom. (2 Kor. 7:11) Tingorei Jiowa an epwe álisi chókkana ka ámeteki letiper. I a tongeni álisuk me pwal álisiir pwe oupwe sópweeló ámi angang ngeni me kinamwefengen sefál.

11. Met sia tongeni káé seni pwóróusen ewe soufós Sona? (Pwal ppii ewe sasing wóón péén.)

¹¹ Kopwe káé seni met ekkewe ka mwáálliló wóón me lóóm, me tipemecheres le mut ngeni Jiowa an epwe néúnéú en lón met a mochen. Ekieki pwóróusen Sona. I ese sái ngeni Ninifa ussun met Kot a allúkú ngeni, nge a fen sáiló ewe epek. Jiowa a apwúngú Sona, me i a káé seni met a mwáálliló wóón. (Sona 1:​1-4, 15-17; 2:​7-10) Nge Jiowa ese fangetá wóón Sona. A pwal ereni an epwe feiló Ninifa, iwe iei Sona a mwittir álleasochisi. I ese mut ngeni an niamam ren féfférún me lóóm an epwe eppeti le etiwa ena angang Jiowa a ewisa ngeni.—Sona 3:​1-3.

JIOWA A OURURUKICH ME REN AN WE NGÚN MI FEL

12. Ifa ussun Jiowa a ngenikich kinamwe atun sia meefi watteen riáfféú are chúúpwúl? (Filipai 4:​6, 7)

¹² Jiowa a áeá an we ngún mi fel le oururukich atun sia meefi watteen riáfféú are chúúpwúl ren málóón attongeach. Iei pwóróusen Ron me Carol. A mmen eletipechou pún néúr we át a angealó pwisin manawan. Ra apasa: “Áúa fen nóm fán watteen riáfféú me mwen ena, nge minne a fis iei, a kon luluuló eriáfféún seni ena. Áúa iótek lón ekkewe pwinin áúse tongeni méúr, me áúa enletin meefi ewe kinamwe mi mak lón Filipai 4:​6, 7.” (Álleani.) Iká ka pwal nóm fán eú watteen weires, ka tongeni iinaawu masouen letipom ngeni Jiowa lón iótek fán chómmóng, me úkúúkún óm mochen. (Kölf. 86:3; 88:1) Tittingorei Jiowa an we ngún mi fel. I ese tongeni tunaaló óm tingor ngeni.—Luk 11:​9-13.

13. Ifa ussun ewe ngún mi fel a tongeni álisikich le sópweeló ach fel ngeni Jiowa fán túppwél? (Efisus 3:16)

¹³ Ka fen meefi apwangapwang mwirin óm nóm fán watteen weires? Ewe ngún mi fel a tongeni fang ngonuk péchékkúl pwe kopwe sópweeló le fel ngeni Jiowa fán túppwél. (Álleani Efisus 3:16.) Ekieki pwóróusen chienach ei itan Flora. Iir me pwúlúwan we ra fiti ewe angangen misineri atun pwúlúwan na a kirikiringaw ngeni, iwe ra mufesen. Iei alon neminna: “Úa fókkun meefi letipechou pokiten ese túppwél ngeniei me úse chúen tongeni ekieki pwal och mettóch. Úa tingorei Jiowa an we ngún mi fel pwe úpwe tongeni likiitú. Jiowa a fang ngeniei met ewe úa osupwangan pwe úpwe tongeni chikar me likiitú fán och mettóch ussun itá úse tongeni likiitú ngeni me lepoputáán.” Flora a meefi pwe Kot a álisi an epwe lapóló an lúkúlúk wóón i me epwe álisi lón meinisin ekkewe osukosuk mi tori. Neminna a pwal apasa: “A weneitiei masouen Kölfel 119:​32, ewe mi erá: ‘Üpwe fokun aleasochisi om kewe allük, pun ka alapala ai sile.’”

14. Met sipwe féri pwe sipwe angei án Kot we ngún mi fel?

¹⁴ Met kopwe féri mwirin óm tingorei Jiowa an we ngún mi fel? Kopwe féri ekkewe mettóch mi tongeni álisuk le angei án Kot na ngún mi fel. Kapachelong óm fiffiti ekkewe mwiich me fiffiti ewe angangen afalafal. Álleani án Kot we Kapas iteiten rán. Ina met epwe álisuk le ekilon wóón án Jiowa ekiek. (Fil. 4:​8, 9) Atun ka álleani ewe Paipel, ppii pwóróusen ekkewe aramas mi fis ngeniir weires me ekilonei ifa ussun Jiowa a álisiir le likiitú. Sandra, ewe sia fós ussun me mwan, a kúna watteen riáfféú pokiten a tori chómmóng osukosuk. Iei met a erá: “Pwóróusen Josef a fókkun apéchékkúlaei. Ese mut ngeni ekkewe sóssót me pwúngúngaw ar repwe apwangapwangaaló an riri ngeni Jiowa.”—Ken. 39:​21-23.

JIOWA A OURURUKICH REN AN NÉÚNÉÚ CHIENACH KEWE CHÓN LÚKÚ

15. Ié kewe sia tongeni kúna ourur seniir, me ifa ussun ra tongeni álisikich? (Pwal ppii ewe sasing.)

¹⁵ Atun sia riáfféú, chienach kewe chón lúkú ra tongeni ‘fókkun oururukich.’ (Kol. 4:11) Eú alen án Jiowa pwáári an tongekich, ina ren an awora ngenikich chienach kewe chón lúkú. Ra tongeni oururukich ren ar aúselingéch ngeni meefiach, are ren ar awora fansoun le nóm rech. Ra tongeni apéchékkúlakich ren ar erenikich eú wokisin seni Paipel are ren ar iótek fán itach.d (Rom 15:4) Fán ekkóch, emén chienach eli epwe áchchema ngenikich ussun ekiekin Jiowa, me ena mettóch a tongeni álisikich le meefi kinamwe. Ra pwal tongeni awora álillis ngenikich, áwewe chék ren ar uwouto anach mwéngé atun sia nóm lón weires.

16. Eli met sia tongeni féri pwe sipwe angei álillis seni ekkewe ekkóch?

¹⁶ Ren ach sipwe tongeni angei álillis seni ekkewe ekkóch, eli a lamot ach sipwe tingorer. Chienach kewe Chón Kraist ra tongekich me mochen álisikich. (SalF. 17:17) Nge eli resap silei ussun meefiach me met a lamot ngenikich. (SalF. 14:10) Iká ka meefi letipechou, ka tongeni ereni chienom kewe mi ásimaw ussun. Esile ngeniir met ra tongeni álisuk wóón. Eli ka tongeni filaatá le ereni emén are rúúemén mwán mi ásimaw ka kinamwe le fós ngeniir. Ekkóch Chón Kraist fefin ra meefi kinamwe iká ra fós ngeni pwal emén Chón Kraist fefin mi ásimaw.

17. Ikkefa ekkóch mettóch mi eppetikich ach sipwe angei kapasen apéchékkúl, me ifa ussun sia tongeni pworacho ngeniir?

¹⁷ Kosap áimukoló seni chienom kewe Chón Kraist. Pokiten ka meefi weires, iwe eli kosap mochen fós ngeni aramas. Fán ekkóch, eli chienom kewe Chón Kraist repwe wewengaweituk are eáni kapas mi ámmetek. (Jem. 3:2) Kosap mut ngeni ekkena esin weires ar repwe eppetuk seni óm angei ewe sókkun kapasen apéchékkúl mi lamot ngonuk. Iei alon emén mwán mi ásimaw itan Gavin, mi úri semwenin letipechou: “Fán chómmóng, úse sani le fóffós me nónnóm ren chienei kewe.” Iwe nge, Gavin ese mut ngeni meefian an epwe nemeni, iwe a kúna feiéch seni an chiechi ngeni ekkewe ekkóch. Emén chienach fefin itan Amy a erá: “Pokiten met a fis ngeniei me lóóm, a áweiresi ái úpwe lúkúlúk wóón aramas. Nge, úa achocho le káé ái úpwe áppirú Jiowa le tongei me lúkúlúk wóón chienei kewe Chón Kraist. Úa silei pwe ina met a apwapwaai Jiowa, me pwal ina met a apwapwaaei.”

ÁN JIOWA PWON USSUN MWACHKKAN MI TONGENI OURURUKICH

18. Met sia tongeni ésúkúsúkú pwe epwe fis lón fansoun mwach, me met sia tongeni féri iei?

¹⁸ Sia tongeni nennelói mwachkkan fán lúkúlúk, me silei pwe ekiseló chék, Jiowa epwe unusen echikara meinisin ach metek lón pekin inis me memmeef. (Pwár. 21:​3, 4) Lón ena atun, sisap chúen “ekieki usun” ekkewe mettóch mi ámmetek sia kúna. (Ais. 65:17) Nge pwal mwo iei, Jiowa a túmúnúkich atun sia nóm lón weires. A fen awora chómmóng mettóch pwe epwe oururukich me álisikich, iwe kopwe alamota an álillis. Kosap fókkun mwo nge tipemwárámwár pwe ‘i a tongeek.’—1 Pit. 5:7.