Áppirú Ekkewe Chónláng mi Túppwél

1-2. (a) Ifa ussun sia sókko seni ekkewe chónláng? (b) Ikkefa ekkewe mettóch sia taitap ngeni ekkewe chónláng wóór?

KICH néún Jiowa aramas, sia chóni eú familien chón fel ngeni i wóón unusen fénúfan, kapachelong ekkewe fite million chónláng. (Tan. 7:​9, 10) Atun sia ekieki ussun ekkewe chónláng, eli sia ekieki ussun sókkofeseniir senikich. Áwewe chék, ra fókkun manawattam lap senikich. (Hiop 38:​4, 7) Ra fókkun manaman me péchékkúl lap senikich. Ra pin me pwúng lap senikich pokiten kich aramas sise unuséch.—Luk 9:26.

² Inaamwo iká a chómmóng met sia sókkofesen wóón seni ekkewe chónláng, iwe nge a pwal chómmóng met sia léllé wóór. Áwewe chék, sia ussun ekkewe chónláng pwe sia tongeni áppirú napanapen Jiowa kewe mi amwarar. A wor rech ach tufichin pwisin filaatá ussun chék pwal ekkewe chónláng. A pwal pwisin wor iter, me en me wiser lón án Jiowa angang, ussun chék pwal kich. Me sia pwal ussun ekkewe chónláng, a lamot ach sipwe fel ngeni ewe Chón Féraatá.—1 Pit. 1:12.

3. Met sia tongeni káé seni ekkewe chónláng mi túppwél?

³ Pokiten a chómmóng met sia taitap ngeni ekkewe chónláng wóór, iwe ar leenien áppirú mi múrinné a tongeni apéchékkúlakich me áiti ngenikich chómmóng lesen mi aúchea. Lón ei lesen, sipwe káé ifa ussun sia tongeni áppirú ar tipetekison me túppwél, me pwal ar tongei aramas me ar likiitú me achocho an epwe chék lilliméch ewe mwichefel.

EKKEWE CHÓNLÁNG RA TIPETEKISON

4. (a) Ifa ussun ekkewe chónláng ra pwáári tipetekison? (b) Pwata ekkewe chónláng ra tipetekison? (Kölfel 89:7)

⁴ Ekkewe chónláng mi túppwél, ra tipetekison. Inaamwo iká a watte sileier, ar manaman, me ar mirit, nge ra álleasochisi án Jiowa kewe emmwen. (Kölf. 103:20) Atun ra apwénúetá wiser me ren Jiowa, rese fókkun sikesik wóón met ra féri, are einga manamaner. Ra fókkun pwapwa le féri ese lifilifil met Jiowa a ereniir ar repwe féri inaamwo iká ese wor a silei iter.a (Ken. 32:​24, 29; 2 King 19:35) Rese mochen angei ewe ling me itéch mi chék fich ngeni Jiowa. Pwata ekkewe chónláng ra fókkun tipetekison? Pokiten ra tongei Jiowa me unusen súféliti.—Álleani Kölfel 89:7.

5. Ifa ussun emén chónláng a pwáári tipetekison atun a áwena aposel Jon? (Pwal ppii ewe sasing.)

⁵ Ekieki ussun eú atun mi pwáári án ekkewe chónláng tipetekison. Lón ina epwe ewe ier 96, emén chónláng ese ffat itan a ékúna ngeni aposel Jon ekkewe mettóch mi amwarar. (Pwár. 1:1) Met Jon a féri atun a kúna ekkena mettóch mi amwarar? A chapetiw pwe epwe fel ngeni ena chónláng. Iwe nge, ena chónláng a mwittir akaúlóói me ereni: “Kopwe túmúnuk! Kosap féri ena! Ngang emén chón angang, ussun chék en me pwiium kewe . . . Kopwe fel ngeni Kot!” (Pwár. 19:10) Ena chónláng a fókkun tipetekison! Ese mochen angei ling, nge a mwittir ereni Jon an epwe fel ngeni Jiowa Kot. Ese meefi pwe Jon a lamot kisikis. Inaamwo iká ena chónláng a fen akkangang ngeni Jiowa ren langattam fansoun me a fókkun manaman seni Jon, nge a tipetekison me a kér ngeni Jon chiechian chón angang. Me inaamwo iká a lamot án ena chónláng epwe áwena Jon, nge ese áwena fán song. Nge a fen fós ngeni fán kirekiréch. A esilla pwe eli Jon a chapetiw ngeni pokiten a fókkun mwaar ren ekkewe mettóch mi amwarar a kúna.

6. Ifa ussun sia tongeni áppirú án ewe chónláng tipetekison?

⁶ Ifa ussun sia tongeni áppirú án ewe chónláng tipetekison? Sia tongeni áppirú ren ach achocho lón án Jiowa angang nge sisap pwal sikesik wóón met sia féri, are ékúna ngeni aramas pwe a kkóló aúchean ach kewe tufich. (1 Kor. 4:7) Pwal och, a lamot ach sisap meefi pwe sia tekia seni ekkewe ekkóch itá pokiten sia angang ngeni Jiowa ren langattam fansoun lap seniir, are pokiten sia wiseni och wis ekkewe ekkóch rese pwal wiseni. Ren enletin, itá úrúrún lapólóón wisach lón án Jiowa angang, epwe pwal ina lapólóón ach ekisakichetiw fán ekkewe ekkóch. (Luk 9:48) Sia mochen ussun ekkewe chónláng le angang fán iten ekkewe ekkóch. Sise mochen féri met epwe efisi án ekkewe ekkóch repwe ekieki pwe sia aúchea seniir.

7. Ifa ussun sia tongeni pwáári tipetekison atun a lamot ach sipwe áwena are apwúngú emén?

⁷ Sia tongeni pwal pwáári ach tipetekison iká a lamot ach sipwe áwena are apwúngú emén, áwewe chék emén chienach lón ewe mwichefel are néúch kewe. Atun sia áwener, eli a lamot ach sipwe tuwenewen. Nge ussun ewe chónláng mi áwena Jon fán kirekiréch, sia tongeni áwena emén nge sisap efisi an epwe meefi lichippúng. Iká sise ekieki pwe sia múrinné seni ekkewe ekkóch, iwe epwe álisikich le awora kapasen fén seni Paipel lón ewe esin napanap mi fiti súfél me tong.—Kol. 4:6.

EKKEWE CHÓNLÁNG RA TONGEI ARAMAS

8. (a) Me ren Luk 15:​10, ifa ussun ekkewe chónláng ra pwáári ar tongei aramas? (b) Ifa ussun ekkewe chónláng ra álisikich lón ewe angangen afalafal? (Pwal ppii ewe wóón péén.)

⁸ Ekkewe chónláng rese tunaaló met a kan fiffis ngeni aramas are ekieki pwe ese wor aúchear. Nge ra fen tongei aramas. Ra pwapwa atun emén mi tipis a áier, weween atun emén siip mi mwálecheló a liwiniti Jiowa are atun emén a ekkesiwili manawan me tolong lón ewe enlet. (Álleani Luk 15:10.) Ekkewe chónláng ra pwal ákkálisikich lón ewe angangen afalafal. (Pwár. 14:6) Inaamwo iká rese wesen afalafal ngeni aramas, nge ra tongeni emmweni emén chón afalafal ngeni emén mi mochen káé ussun Jiowa. Ewer, sise tongeni erá pwe epwe fis iteitan án ekkewe chónláng emmwenikich ngeni emén lón ewe angangen afalafal. Jiowa a pwal tongeni áeá ekkóch mettóch, áwewe chék ren an we ngún mi fel le álisi emén mi mochen silei ussun i, are a pwal tongeni áeá le emmweni néún kewe aramas ngeni emén mi mochen káé ussun i. (Féf. 16:​6, 7) Iwe nge, a chúen néúnéú néún kewe chónláng. Ina popun atun sia afalafala ewe kapas allim, sia tongeni lúkúlúk pwe ekkewe chónláng ra nóm rech pwe repwe álisikich.—Ppii ewe pwóór, “A Pélú Ar Iótek.”b

9. Ifa ussun sia tongeni áppirú án ekkewe chónláng tongei aramas?

⁹ Ifa ussun sia tongeni áppirú án ekkewe chónláng tongei aramas? Atun sia rong eú apio lón mwiich pwe emén a liwinsefál, sipwe fiti ekkewe chónláng le pwapwa. Sia tongeni pwáár ngeni chienach na pwe sia tongei me sia pwapwa ren an angang sefál ngeni Jiowa. (Luk 15:​4-7; 2 Kor. 2:​6-8) Sia pwal tongeni áppirú ekkewe chónláng ren ach fókkun achocho lón ewe angangen afalafal. (SalAf. 11:6) Me ussun chék án ekkewe chónláng álisikich le esilefeili ewe kapas allim, sia tongeni kútta alen ach sipwe álisaatá chienach kewe Chón Kraist lón ewe angangen afalafal. Áwewe chék, sia tongeni akkóta ach sipwe mwin lón ewe angangen afalafal me emén mi kerán tolong lón ewe enlet. Sia pwal tongeni álisi emén chienach chinnap are emén mi wor an semmwen an epwe fitikich le afalafal.

10. Met sia tongeni káé seni pwóróusen Sara?

¹⁰ Ifa ussun iká nónnómuch a aúkúkú met sia tongeni féri lón án Jiowa angang? Sia chúen tongeni kútta alen ach sipwe angangfengen me ekkewe chónláng lón ewe angangen afalafal. Áwewe chék ren pwóróusen Sara,c emén Chón Kraist fefin lón India. Mwirin an pioneer ren ina epwe úkúúkún 20 ier, a úri eú semmwen mi chou me a chék mwenilong lón imw. Ewer, a fókkun letipechou. Nge ló, ló, ló, Sara a pwapwasefál pokiten án chienach kewe Chón Kraist lón an we mwichefel álisi, me pwal seni an akkachocho le állea Paipel. Iwe nge, a pwal lamot an epwe kútta alen ifa ussun epwe tongeni afalafal inaamwo iká a ina ussun nónnómun. Pokiten ese tongeni mómmóót me mak taropwe, iwe a chék tongeni afalafal wóón phone. Iwe, a kan kéri néún kewe return visit, me néún kena return visit ra kan ereni pwe a pwal wor ekkóch aramas iir mi mochen káé. Iwe, met mwirilóón? Mwirin chék fitu maram, a wor 70 néún Sara chón káé, me ese tongeni káé ngeniir meinisin! Ina popun a akkóta ngeni ekkewe ekkóch lón ewe mwichefel ar repwe káé ngeni ekkóch me leir. Chómmóng me lein ekkena chón káé ra fiffiti ach mwiich iei. A ifa me pwapwaan ekkewe chónláng le angangfengen me ekkewe Chón Kraist, ussun chék Sara, iir kewe mi fókkun achocho úkúúkún ar tufich lón ewe angangen afalafal!

EKKEWE CHÓNLÁNG RA PWÁÁRI AR LIKIITÚ

11. Ifa ussun ekkewe chónláng mi túppwél ra pwáári watteen ar likiitú?

¹¹ Ekkewe chónláng mi túppwél ra isettiw leenien áppirú mi múrinné ussun ar likiitú. Ren fitengéréú ier, ra fen likiitú ngeni án aramas féfféringaw me féfférún pwúngúngaw. Ra kúna Setan me ekkewe chómmóng chónláng, iir mi piin fitiir lón ar angang ngeni Jiowa, nge ra ú ngeni. (Ken. 3:1; 6:​1, 2; Juta 6) Ewe Paipel a apwóróusa ussun emén chónláng mi túppwél mi fiu ngeni emén chónláng mi ngaw ren fitu rán. (Tan. 10:13) Pwal seni fansoun Atam me If, ekkewe chónláng ra kúna pwe a chék wor ekkóch aramas mi filaatá le angang ngeni Jiowa. Ikáámwo ina, nge ekkena chónláng mi túppwél ra sópweeló le angang ngeni Jiowa fán pwapwa me tinikken. Ra silei pwe lón ewe fansoun mi fich, Kot epwe amóeló meinisin féfférún pwúngúngaw.

12. Met a tongeni álisikich le likiitú?

¹² Ifa ussun sia tongeni áppirú án ekkewe chónláng likiitú? Eli sia pwal kúna féfférún pwúngúngaw ussun chék ekkewe chónláng. Nge sia ussur le lúkú pwe Kot epwe amóeló meinisin féfférún pwúngúngaw lón ewe fansoun mi fich. Sia pwal ussun ekkena chónláng mi túppwél, sise “fangetá le féri minne mi múrinné.” (Kal. 6:9) Me Kot a pwonei pwe epwe álisikich le likiitú. (1 Kor. 10:13) Sia tongeni iótek ngeni Jiowa ren an we ngún mi fel, ewe mi uwaani mosonottam me pwapwa. (Kal. 5:22; Kol. 1:11) Nge, ifa ussun iká aramas ra ú ngonuk? Kopwe unusen lúkúlúk wóón Jiowa, nge kosap niwokkus. Fansoun meinisin, Jiowa epwe álisuk me apéchékkúlok.—Ipru 13:6.

EKKEWE CHÓNLÁNG RA KAN ÁLISAATÁ LIMÉCHÚN EWE MWICHEFEL

13. Ifa ewe wis mi aúchea a kewis ngeni ekkewe chónláng lón ekkeei fansoun sópwólóón? (Mattu 13:​47-49)

¹³ Lón ekkeei ránin lesópwólóón, Jiowa a fen fang ngeni ekkewe chónláng eú wis mi aúchea. (Álleani Mattu 13:​47-49.) Fite million aramas wóón unusen fénúfan ra fen etiwa ewe kapas allim. Ekkóch me leir ra ekkesiwili manawer me wiliiti Chón Kraist, nge ekkewe ekkóch rese féri ena. A kewis ngeni ekkewe chónláng ar repwe “áimuoló ekkewe mi fókkun ngaw seni me lein ekkewe mi pwúng.” Weween, pwe wiser ar repwe túmúnú liméchún ewe mwichefel. Nge ar féri ena, ese wewe ngeni pwe meinisin chókkewe mi úkútiw le fitikich ren ese lifilifil popun, resap chúen fókkun tongeni liwinsefál, are esap pwal chúen wor osukosuk lón ewe mwichefel. Iwe nge, sia tongeni lúkúlúk pwe ekkewe chónláng ra angang weires le álisaatá liméchún ekkewe mwichefel.

14-15. Ifa ussun sia tongeni áppirú ekkewe chónláng, me pwáári ach ekieki liméchún ewe mwichefel? (Pwal ppii ekkewe sasing.)

¹⁴ Ifa ussun sia tongeni áppirú án ekkewe chónláng ekieki liméchún ewe mwichefel? A lamot ach sipwe angang weires le túmúnú ach riri ngeni Jiowa. Sia féri ena ren ach fili le chiechi ngeni chókkewe mi tongei i, me ren ach atowawa senikich ese lifilifil met epwe tongeni atai ach chiechi ngeni Jiowa. Iká sia féri ena, iwe sia túmúnú liméchún ewe mwichefel. (Kölf. 101:3) Sia pwal tongeni álisi chienach kewe Chón Kraist le chék túttúppwél ngeni Jiowa. Áwewe chék, met sipwe féri iká sia silei pwe emén chienach Chón Kraist a féri eú tipis mi chou? Pokiten sia tongei, iwe sipwe pesei an epwe fós ngeni ekkewe mwán mi ásimaw. Iká ese mochen féri ena, iwe sipwe wisen fós ngeni ekkena mwán mi ásimaw ussun ena mettóch. Sia mochen án chienach kewe Chón Kraist mi apwangapwang lón pekin ngún repwe mwittir angei álillis!—Jem. 5:​14, 15.

¹⁵ A elichippúng pwe ekkóch me lein chókkewe mi féri tipis mi chou ra katowu seni ewe mwichefel. Atun a fis ena, iwe sipwe “úkútiw le chichchiechi” ngeniir.d (1 Kor. 5:​9-13) Ena kókkót a álisaatá liméchún ewe mwichefel. Nge lap seni ena, ach filaatá ach sisap chiechi ngeni ekkewe mi katowu, a pwáári ach kirekiréch ngeniir, pokiten ach úppós le álleasochisi Jiowa, epwe tongeni álisiir le mirititi lamoten ar repwe liwiniti Jiowa. Iká a fis ena, sia fiti Jiowa me néún kewe chónláng le pwapwa.—Luk 15:7.

16. Ikkefa ekkewe mettóch kopwe achocho le áppirú ekkewe chónláng lón?

¹⁶ A ifa me watteen feiéchúch ren án Jiowa mut ngenikich ach sipwe káé ussun ekkewe chónláng me angangfengen me iir! Amwo sipwe áppirú napanaper kewe mi múrinné, áwewe chék ren ar tipetekison, tongei aramas, likiitú, me ar ekieki liméchún ewe mwichefel lón pekin áion me lón pekin ngún. Iká sia áppirú ekkewe chónláng mi túppwél, sipwe pwal tongeni chóni án Jiowa we familien chón fel ngeni i tori feilfeiló chék.