Jiowa a Silei Ifa Usun epwe Angasaalo Nöün Aramas

“Ewe Samol [Jiowa] a silei usun an epwe amanaua ekewe aramas mi likitü lon ar lükü seni sosot.”​—2 PET. 2:9.

PWATA SIA LÜKÜLÜK PWE JIOWA:

Epwe nemeni ineet ekkewe mettoch repwe fis pwe epwe pwönütä minne a tipeni?

Epwe mmolnetä le äeä an we manaman le amanaua nöün kewe aramas?

A fokkun silei ifa usun ekkewe mettoch repwe fis atun ewe riäfföü mi lapalap?

1. Epwe ifa napanapen fönüfan atun ewe “riaffou lapalap”?

KATALOON än Setan otot epwe mwittir poputä atun aramas resap ekieki usun. (1 Tes. 5:2, 3) Atun ewe “riaffou lapalap” fönüfan epwe ur ren fitikoko. (Sef. 1:14-17) Epwe watte riäfföü me osupwang lon ena fansoun. Epwe eü fansoun weires “usun chok esaamo fis seni le poputan fonufan tori ikenai.”​—Älleani Mattu 24:21, 22, TF.

2, 3. (a) Met nöün Kot kewe aramas repwe küna atun ewe “riaffou lapalap”? (b) Met epwe tongeni apöchökküla ach lükülük woon än Jiowa tufichin amanaua nöün kewe aramas?

² Isikiel a oesini usun ewe säingoon eriäfföü ngeni nöün Kot kewe aramas arapakkan lemuchuloon ewe riäfföü mi lapalap. Ena riäfföü epwe feito seni “Kok . . . lon ewe fanü Makok.” “Eu mwichemongun sounfiu” epwe maunei nöün Kot kewe aramas “usun eu mölümöl mi tori ewe fanü.” (Is. 38:2, 14-16) Ese wor mwicheichen aramas epwe älisi nöün Jiowa kewe aramas. Iwe, a lamot repwe lükülük pwe Kot epwe amanauer. Met nöün Jiowa kewe aramas repwe föri atun chon koputer repwele nirelo?

³ Ika en emön nöün Jiowa chon angang, a wor om lükü pwe Jiowa a tongeni me epwe seläni nöün kewe aramas atun ewe riäfföü mi lapalap? Ewe aposel Piter a makkeei: “Ewe Samol [Jiowa] a silei usun an epwe amanaua ekewe aramas mi likitü lon ar lükü seni sosot, nge epwe amwöchü ekewe chon föföringau ngeni ewe Ränin Kapwüng, pwe epwe apwüngüür.” (2 Pit. 2:9) Epwe pöchökkülelo ach lükülük woon än Jiowa tufichin amanaua nöün kewe aramas, ika sia ekilonei pworausen än Jiowa amanaua nöün kewe chon angang me loom. Iwe, sipwele käeö usun ekkeei ülüngät pworaus.

A MANAUEWU SENI EWE NOTER

4. Met a lamot epwe wes me mwen an epwe fis ewe Noter?

⁴ Ewe äeüin pworaus sipwe käeö usun, pworausen ewe Noter lon fansoun Noa. A wor ekkoch mettoch a lamot epwe fför me mwen epwe fis ewe Noter. A lamot epwe fför efoch waimw me walong ekkewe man lon. Ewe pworaus lon Keneses ese apasa pwe Jiowa a witiwit tori wesin ewe waimw me mwen an epwe filatä ineet ewe Noter epwe fis. Jiowa a tongeni filatä eü rän pwe epwe poputä ewe Noter, nge ese pwal ekieki ika ewe waimw ese mwo wes. Kot a fen filatä ineet epwe poputä ewe Noter langattam fansoun me mwen an a ereni Noa pwe epwe föri ewe waimw. Ifa usun sia silei ena?

5. Met Jiowa a apasa lon Keneses 6:3? Ineet a apwüngalo ena mettoch?

⁵ Ewe Paipel a erenikich pwe Jiowa a fen föri eü kefil me a esilei lon läng. Lon Keneses 6:3, Kot a apasa: ‘Ai manaman esap nonom lon aramas tori feilfeilachök, pun aramas futuk chök. Iwe, ränin manauan epwe ipükü rüe ier chök.’ Jiowa ese fos usun langattamen manauen aramas lon ena fansoun. Nge Jiowa a apasa ineet epwe aükatiw föfföringaw meinisin woon fönüfan. Ewe Noter a poputä lon ewe ier 2370 mwen Kraist. Iwe, sia tongeni weweiti pwe Kot a fen apwüngalo poputään ewe Noter lon ewe ier 2490 mwen Kraist. Lon ena fansoun a 480 ierin Noa. (Ken. 7:6) Orun 20 ier mwirin, lon ewe ier 2470 mwen Kraist, nöün Noa kewe ra poputä le uputiw. (Ken. 5:32) Iwe, a chüen wor 100 ier me mwen än ewe Noter epwe fis. Nge Jiowa esaamwo ereni Noa usun ewe angang mi lamot epwe ewisa ngeni me ifa usun ena angang epwe amanaua aramas. Ifa ttamen än Jiowa witiwit me mwen an epwe ereni Noa?

6. Ineet Jiowa a ereni Noa an epwe föri ewe waimw?

⁶ Usun itä Jiowa a witiwit fite fite ier me mwen an epwe ereni Noa met I epwe föri. Pwata sia ekieki ena? Ewe Paipel a erä pwe nöün Noa kewe ra fen watte me pwüpwülü lupwen Kot a ereni epwe föri ewe waimw. Jiowa a ereni: “Ngang üpwe föri ai pwon ngonuk. Oupwe tolong lon ewe waimw, ämi me noum kewe mwän, pwal pwülüom me pwülüer kewe.” (Ken. 6:9-18) Ese mwääl lupwen Kot a ereni Noa an epwe föri ewe waimw a chök 40 are 50 ier me mwen ewe Noter.

7. (a) Ifa usun Noa me an we famili ra pwäraatä ar lükü? (b) Ineet Kot a wesewesen ereni Noa pwe epwe poputä ewe Noter?

⁷ Atun Noa me an we famili ra föri ewe waimw, neman ra ekieki ika epwe ifa usun än Kot epwe efisi ewe Noter, me ineet epwe poputä. Nge inaamwo ika rese silei tichikin, nge ra pwäraatä ar lükü ren ar sopwelo le föri ewe waimw. Ewe Paipel a apasa: “Noa a föri meinisin mine Kot a allük ngeni.” (Ken. 6:22) Jiowa a ereni Noa pwe ewe Noter epwe poputä mwirin fisu rän. A üküköch ewe fansoun än Noa me an we famili repwe panaalong ekkewe man lon ewe waimw. Iwe, lupwen a poputä le püng rän “Noa a ierini wonopükü, lon engol me fisuen ränin ewe aruuen maram,” mettoch meinisin ra mmolnetä.​—Ken. 7:1-5, 11.

8. Ifa usun pworausen ewe Noter a alükülükükich pwe Jiowa a silei ineet epwe amanaua nöün kewe aramas lesopwoloon ei otot?

⁸ Pworausen ewe Noter a änneta pwe fansoun meinisin Jiowa a silei ineet ewe fansoun mi fokkun öch me ifa usun epwe amanaua nöün kewe aramas. Atun sia akkarap ngeni sopwoloon ei otot, sia tongeni lükülük pwe meinisin minne Jiowa a tipeni epwe fis lon wesewesen “ewe rän are ewe kulok” a fen filatä.​—Mt. 24:36; älleani Apakuk 2:3.

RA NGASELO ME LON EWE SETIPAR

9, 10. Ifa usun Jiowa a nöünöü nöün kewe aramas le ssärei ekkewe sounfiun Isip?

⁹ Sia fen käeö seni pworausen ewe Noter pwe nemenien Jiowa ineet ekkewe mettoch repwe fis pwe epwe pwönüetä minne a tipeni. Ewe oruuen pworaus sipwe käeö epwe äitingenikich pwe sia tongeni lükü pwe Jiowa epwe äeä an we manaman mi somwolo le amanaua nöün kewe aramas me wesewesen apwönüetä minne a tipeni. Pwüngün, fansoun meinisin Jiowa a tongeni amanaua nöün kewe aramas. Nge fän ekkoch a mut ngeniir repwe nom lon efeiengaw fän iten an epwe ssärei chon koputan kewe. Iei met a fis lupwen Jiowa a angasaalo ekkewe chon Israel seni ar slave lon Isip.

¹⁰ Ükükün ülüngät million chon Israel ra lo seni Isip. Jiowa a mut ngeni Moses an epwe emmweniir lon ewe napanap epwe efisi än Farao epwe ekieki pwe ra rukolo. (Älleani Ekistos 14:1-4.) Ina pwata Farao me nöün kewe sounfiu ra cheer me tikeriir me lon ewe Setipar. Usun itä ese chüen wor än chon Israel alen ngaselo. (Eks. 14:5-10) Nge ren enletin rese nonnom lon feiengaw. Pwata? Pun Jiowa a mmolnetä le amanauer.

11, 12. (a) Ifa usun Jiowa a älisi ekkewe chon Israel? Ifa mwiriloon? (b) Met ei pworaus a äiti ngenikich usun Jiowa?

¹¹ “Ewe ürekuchu” mi emmweni ekkewe chon Israel a feilo lüküsökürür me eppetiir seni ekkewe chon Isip. A ekkirochalo ekkewe chon Isip me a asarama chon Israel pwal mwo nge lepwin. (Älleani Ekistos 14:19, 20.) Jiowa a äimufeseni ewe säät ren eü enienin äsepwälin ötiw mi pöchökkül, iwe, a pwasetä ewe säät. Ese mwääl a mmang le pwas pun ewe wokisin a apasa pwe ewe äsepwäl a enien “lon unusen ewe pwin” me mwirin ena, “ekewe aramasen Israel ra fetal lukalapen ewe sät won pwasapwas.” Ekkewe chon Israel ra mwökütümmang lap seni waan ewe mwichen sounfiun Isip kewe woken. Nge ekkewe chon Isip rese tongeni tikeriir, pun Jiowa a fiu fän iten nöün kana aramas. Jiowa a efitikokooi ekkewe mwichen re Isip, me I a ‘amwöchü willen war woken, pwe ra weires le kul.’​—Eks. 14:21-25.

¹² Lupwen meinisin ekkewe chon Israel ra tori ewe epek, Jiowa a ereni Moses: “Kopwe aitiela poum won ewe sät pwe lölön lon epwe liwinfengen won ekewe re Isip, won war woken pwal won nöür sounfiu mi wawa oris.” Lupwen ekkewe sounfiu ra sotuni le sü seni ewe säät epwele pwönüürolo, “ewe Samol mi Lapalap a amopuretiu lukalapen ewe sät.” Ese tufich ar repwe sü seni. “Esap fokun wor eman leir a chüen manau.” (Eks. 14:26-28) Jiowa a pwäraatä pwe a wor an manaman le angasaalo nöün kewe aramas fansoun meinisin.

EKKOCH RA SÜ SENI KATALOON JERUSALEM

13. Ifa ewe kapasen emmwen Jises a awora, iwe, eli epwe ifa ekiekin nöün kewe chon äppirü?

¹³ Ewe aülüngätin pworaus sipwele käeö, ina met a fis atun ekkewe sounfiun Rom ra maunei Jerusalem lon fansoun ekkewe aposel. Ei pworaus a menlapei pwe Jiowa a fokkun silei ifa usun ekkewe mettoch repwe fis pwe epwe pwönütä minne a tipeni. Jiowa a nöünöü Jises le awora kapasen emmwen ngeni ekkewe Chon Kraist mi nom Jerusalem me Jutia me mwen kataloon Jerusalem lon ewe ier 70 mwirin Kraist. Jises a apasa pwe ika ra küna ‘ewe mettoch mi eniweniw’ mi ütä “lon ewe leni mi pin,” repwe “sütä won ekewe chuk.” (Mt. 24:15, 16) Ifa usun nöün Jises kewe chon äppirü repwe silei ineet ei oesini epwe pwönüetä?

14. Ikkefa ekkewe mettoch a fis mi affata weween än Jises kewe kapasen emmwen?

¹⁴ Mwirin fitu ier a ffatolo weween alon Jises. Lon ewe ier 66 mwirin Kraist, ekkewe sounfiun Rom fän emmwenien Cestius Gallus ra tori Jerusalem pwe repwe aükatiw än ekkoch chon Jus angangen ü ngeni. Lupwen ekkewe chon Jus chon ü ngeni, ra pwal iteni Zealot, ra op lon ewe imwenfel, ekkewe sounfiun Rom ra poputä le atai tittin ewe imwenfel. Ekkewe Chon Kraist mi chechchemeni än Jises kapasen emmwen ra silei met weween ekkena mettoch ra küna. Ra weweiti pwe ekkewe sounfiun Rom mi uwei ar filaik, ina ‘ewe mettoch mi eniweniw’ a tori tittin ewe imwenfel, ina “ewe leni mi pin.” A tori ewe fansoun nöün Jises kewe chon äppirü repwele “sütä won ekewe chuk.” Nge ifa usun repwe towu seni ena telinimw chon koputer mi rokopwälielo? A wor och mettoch rese tepereni pwe epwe fis.

15, 16. (a) Ifa än Jises we kapasen emmwen mi tichik? Pwata a fokkun lamot nöün kewe chon äppirü repwe älleasochisi? (b) Met a lamot sipwe föri pwe sipwe manau?

¹⁵ A fokkun ämäirü pun Cestius Gallus me nöün kewe sounfiu ra lo seni Jerusalem me liwiniti leenier. Iwe, ekkewe Zealot ra cheer. Pokiten rese chüen nom, iwe, a suuk ngeni nöün Jises kewe chon äppirü ar repwe towu seni ena telinimw. Jises a affata ngeniir pwe repwe mwittir sü me likitalo pisekiir kewe. (Älleani Mattu 24:17, 18.) A fokkun lamot ar repwe älleasochisi Jises me mwittir towu. Pwata? Pun mwirin chök fitu rän ekkewe Zealot ra liwin me poputä eriäfföüü ekkewe aramas mi nom Jerusalem me Jutia pwe repwe fitiir lon ar angangen ü ngeni. Chommong mwichen chon Jus ra fiufengen ika iö epwe wisen nemenem, me a watteelo osukosuk lon ewe telinimw. Iwe, a weiresilo ar repwe towu seni. Lupwen ekkewe chon Rom ra liwin lon ewe ier 70 mwirin Kraist, ese chüen tufich ngeni chon nom lon ewe telinimw ar repwe towu seni. (Luk 19:43) Iö a nomwotiw lon ewe telinimw ese chüen tongeni towu! Nge ekkewe Chon Kraist mi älleasochisi än Jises kapasen emmwen me sütä woon ekkewe chuuk ra manau. Ra pwisin küna pwe Jiowa a silei ifa usun epwe amanaua nöün kewe aramas. Met sia tongeni käeö seni ei pworaus?

¹⁶ Atun ewe riäfföü mi lapalap, a lamot Chon Kraist repwe älleasochisi ekkewe emmwen seni än Kot we Kapas me an we mwicheich. Äwewe chök, än Jises allük ngeni nöün kewe chon äppirü usun ar repwe “sütä won ekewe chuk,” epwe pwal torikich atun ewe riäfföü mi lapalap. Ifa usun sipwe sü? Sisaamwo silei.a Nge sia lükülük pwe Jiowa epwe affata ngenikich weween ekkena kapasen emmwen ika a tori ewe fansoun. Sipwe chök manau ika sia älleasochisi ekkewe kapasen emmwen mi torikich lon ena fansoun. Iwe, mi lamot sipwe pwisin eisinikich: ‘Ua älleasochisi ekkewe emmwen Jiowa a ngeni nöün kewe aramas ikenäi? Ua mwittir are akkammang le älleasochis?’​—Jem. 3:17.

LÜKÜCHAR FÄN ITEN MWACHKKAN

17. Met sia käeö seni än Apakuk we oesini usun än Kok epwe maunei nöün Kot kewe aramas?

¹⁷ Iei sipwele pworaus usun ewe feiengaw seni Kok ewe sia fen pworaus usun le poputään ei lesen. Ewe soufos Apakuk a usun chök Isikiel le fos usun ena fansoun. A apasa: “Üa rongorong usun ekei mettoch, inisi a chechech o awei a sälepwelep ren ai niuokus. Chüi ra kiroula, nge pechei ra täpäp. Üpwe witiwit fän mosonoson fän iten ewe ränin riaföü epwe feito won ekewe aramas mi mauneekem.” (Ap. 3:16) Lupwen Apakuk a silei pwe ekkewe chon oput ra feito pwe repwe maunei nöün Kot kewe aramas, a osukosuk lon lukan, chechchech awan me inisin a apwangapwangolo. Nge a tipemecheres le “witiwit fän mosonoson” ngeni ränin Jiowa we mi lapalap. Lupwen Kok me chienan kewe repwe maun ngenikich, eli sipwe pwal niuokkus. Nge, sia tongeni lükülük usun chök Apakuk me lükü pwe Jiowa epwe amanaua nöün kewe aramas.​—Ap. 3:18, 19.

18. (a) Pwata sisap niuokkus lupwen chon oput kich ra maunekich? (b) Met sipwe käeö lon ewe lesen mwirin ei?

¹⁸ Ekkewe ülüngät pworaus sia fen käeö ra ännetatä pwe ese fokkun wor tipemwaramwar pwe Jiowa a silei ifa usun epwe angasaalo nöün kewe aramas. Epwe pwönütä minne a tipeni, me epwe win. Ika sia mochen nom lon ena fansoun epwe fis apwapwaan än Jiowa win mi lap, mi lamot sipwe akkamwöchü ach tüppwöl tori sopwoloon. Ifa usun Jiowa a älisikich pwe sipwe akkamwöchü ach enletin tüppwöl lon ei fansoun? Sipwe käeö ei lon ewe lesen mwirin.