Lesen 13
Ifa Ussun Kopwe Tongeni Esinna ewe Lamalam mi Enlet?
Ekkewe lamalam meinisin ra apwapwai Kot, are eu chok? (1)
Pwata mei wor chommong lamalam mi era pwe ir lamalamen Kraist? (2)
Ifa ussun kopwe tongeni esinna ekkewe Chon Kraist mi enlet? (3-7)
1. Jises a poputani eu chok lamalamen Kraist mi enlet. Ina minne ikenai, epwe wor eu chok mwichen aramas, are mwicheichen chon fel ngeni Jiowa Kot mi enlet. (Jon 4:23, 24; Efisus 4:4, 5) Ewe Paipel a aiti ngenikich pwe chokisikis chok ra feffetal won ewe aal mi chokukkun mi alelo ngeni manau.—Mattu 7:13, 14.
2. Ewe Paipel a pin oesini pwe mwirin maloon ekkewe chon kuno, ekis me ekis ekkewe ekiek mwaal me ekkewe fofforun chon lukun repwe tolong lon ewe mwichefelin chon Kraist. Ekkewe mwan repwe lukimwaalli ngeni pwisin ir ekkewe chon luku nge esap ngeni Kraist. (Mattu 7:15, 21-23; Fofor 20:29, 30) Ina pwata sia kuna chommong sokkopaten lamalam mi era pwe ir lamalamen Kraist. Epwe ifa ussun sipwe tongeni esinna ekkewe chon Kraist mi enlet?
3. Iei ewe esissin mi lapalap seni meinisin mi esissinnata ekkewe chon Kraist mi enlet, repwe wesewesen tongfengen lefiler. (Jon 13:34, 35) Ese asukuler pwe ra murinno lap seni aramas mi sokkolo ar lewo are anuwan unucher. Iwe, rese pwal kaeo ar repwe oput chon ekis. (Fofor 10:34, 35) Ina minne resap fiti ekkewe maun. Ekkewe chon Kraist mi enlet repwe ussun chok pwipwi.—1 Jon 4:20, 21.
4. Iei pwal eu esissinnen ewe lamalam mi enlet, chon fiti repwe pwarata sufol mi alollol ngeni ewe Paipel. Ra nguuri pwe ina an Kot we Kapas me luku minne a apasa. (Jon 17:17; 2 Timoti 3:16, 17) Ra eani ewe ekiek pwe an Kot we Kapas a lamot lap seni ekiekin aramas are ar kewe eoreni. (Mattu 15:1-3, 7-9) Ra achocho le atipeeufengenni manauer ngeni ewe Paipel iteiten ran. Ina minne, resap fori och mi mwaalfesen me minne repwe eani afalafal.—Taitos 1:15, 16.
5. Ewe lamalam mi enlet epwe pwal asamolu iten Kot we. (Mattu 6:9) Jises a esile ngeni ekkewe ekkoch iten Kot we, Jiowa. Ekkewe chon Kraist mi enlet repwe foffori ussun chok. (Jon 17:6, 26; Rom 10:13, 14) Io kewe lon sopwum we ra kan esile ngeni ekkewe ekkoch iten Kot we?
6. Ekkewe chon Kraist mi enlet repwe fokkun afalafal ussun an Kot we Muu. Jises a fori ena mettoch. A kapas ussun ewe Muu iteiten fansoun meinisin. (Luk 8:1) A alluku ngeni noun kewe chon kaeo ar repwe uwei ngeni chon fonufan meinisin ei poraus. (Mattu 24:14; 28:19, 20) Ekkewe chon Kraist mi enlet ra luku pwe an Kot we Muu chok epwe wato kinamwe mi enlet me lukulukoch ngeni ei fonufan.—Kol Fel 146:3-5.
7. Noun Jises kewe chon kaeo resap chiechi ngeni ei fonufan mi ngau. (Jon 17:16) Rese angolong lon mwokutukutun ekkewe muun fonufan me minne aramas ra kan anini ussun. Rese fokkun fiti ekkewe foffor repwe tongeni feiengau ren, ekkewe foffor me ekiek mi choufetal won fonufan. (Jemes 1:27; 4:4) En mi tongeni esissinnata eu mwicheichen lamalam lon sopwum we mi eani ekkeei esissinnen ewe lamalamen Kraist mi enlet?
[Ekkewe sasing lón pekin taropwe 26, 27]
Ekkewe chon Kraist mi enlet repwe tongfengen lefiler, repwe sufoliiti ewe Paipel, me afalafal ussun an Kot we Muu