Pwäratä Kilisou Ren Än Kot Liffang mi Mürinnö Seni Meinisin
1. Pwata sia fokkun meefi kilisou ngeni Jiowa?
1 Än Jiowa liffang mi mürinnö seni an kewe ‘lifang meinisin,’ ina ewe möön kepich Nöün we mi ächengicheng a awora. (Jem. 1:17) A suuk ngenikich chommong feiöch, kapachelong omusomusen ach tipis. (Ef. 1:7) Sia meefi kilisou fansoun meinisin ren ena liffang. Äkkäeüin, atun ewe Ächechchem, sia ekilonei ei liffang mi aüchea.
2. Ifa usun chon om famili repwe ämääraatä ar aücheani ewe möön kepich?
2 Ämääraatä än om Famili Kilisou: Epwe lapolo än om famili aücheani ei liffang ika oupwe enniwili ekkoch pworausen ewe möön kepich lon ämi Famili Fel fitu wiik me mwen ewe Ächechchem epwe fis lon March 30. Pwal och, oupwe älleani ewe älleaan Paipel fän iten ewe Ächechchem iteitan rän. Ekilonei ifa usun ewe möön kepich a efeiöchuk, me ifa usun a älisatä ekiek mi mürinnö usun Jiowa, pwisin en, ekkewe ekkoch, me mwachkkan. A pwal lamot chon ewe famili repwe praktis ekkewe rüüachö köl sipwe eäni lon ewe Ächechchem, nampa 40 me 44.—Köl Fel 77:12.
3. Ifa usun sipwe pwäratä ach kilisou?
3 Pwäratä Kilisou: Ach aücheani ewe möön kepich epwe amwökütükich le esilei ngeni aramas usun Jiowa me an tong mi lapalap ren an tinatiw Nöün we. (Köl Fel 145:2-7) Ekkoch famili ra pwäratä ar kilisou ren ar akkota pwe mwaren emön lon ar famili epwe auxiliary pioneer fän March, April, me May. Nge ika ese tufich, pwata ouse alapalo me “alomota [ami] fansoun” le fiti ewe angangen afalafal? (Ef. 5:16) Ach kilisou epwe pwal amwökütükich le etiwa aramas le fiti ewe Ächechchem. (Pwar. 22:17) Makkeei iten nöüm kewe return visit, chon käeö, märärum, chienom chon angang, me chon orum. Mwirin, kopwe achocho le etiwer repwe fiti ewe Ächechchem.
4. Ifa usun sipwe äeäöchü ach fansoun atun ewe Ächechchem?
4 Ewe fansoun Ächechchem a atufichikich pwe sipwe pwäratä ükükün ach kilisou ren än Jiowa liffang ngeni aramas meinisin. Amwo sipwe alapalo me pwäratä ach kilisou ren ewe möön kepich me meinisin “wöün Kraist esap wor epin.”—Ef. 3:8.