Eechö Taropwe Seni ewe Mwichen Sou Pwüngüpwüng
Ngeni Pwiich kewe Chon Pwäratä Jiowa:
A ifa me watteen feiöchüch pun sia iteit seni iten Jiowa, ewe mi Unusen Tekia seni meinisin! Itan na epwe nomofochelo, esap tongeni morolo, me esor eü it mi löllö ngeni. Jiowa a eita ngenikich itan, iwe, äkkäeüin seni ewe ier 1931, sia sillelo ren ena it mi kkolo aüchean. (Ais. 43:10) Sia meefi pwe ina eü feiöch ach esilefeili pwe kich Chon Pwäratä Jiowa.
Ewe Tefil ese ükütiw le sotun amoielo iten Kot we. Ekkewe mwu mi nom fän nemenian ra oput iten Jiowa we. Papilon mi Lapalap, ewe a liosuetä ekkewe lamalam chofona meinisin, a oput ena it mi fel me tölawü seni chommong Paipel. Iwe nge, Jises a sokkolo pun a elingalo iten Seman we, a pwal akkomwa lon ewe iotek a äiti ngeni nöün kewe chon käeö. A apasa: “Iwe, iei usun ämi oupwe iotek: ‘Semem lon läng. Itom epwe pin.’” (Mt. 6:9) Mwirin, lon an iotek ngeni Seman we seni letipan, a apasa: “Üa pwärala itom ngeni chokewe ka ngeniei seni won fanüfan.” (Jon 17:6) Pokiten sia mochen äkkäppirü Jises, sia tipeppos le alapalo ach esilefeili iten Jiowa we woon unusen fönüfan.
“Sipwe aunusalo ach afalafala ewe kapas allim,” ina ewe lesenin ier lon ewe 2009 a amwökütükich le äwesöchüolo wisach. (Fof. 20:24) Esor tipemwaramwar pwe Jiowa a efeiöchü ach achocho lon ewe ier. Watteloon ach angangen pwäratä iten Jiowa we woon unusen fönüfan a fen elingalo me mwareiti i. Eü mineföön chochoon chon afalafal, ükükün 7,313,173, ra achocho le afalafala me asukula aramas mi letipwenechar mi kükkütta met epwe ataweei ar kewe osukosuk rän me rän. Iwe, 18,168,323 ra fiti Ächechchemenien Mäloon Kraist, ina eü minen pwäratä pwe eli a wor fite million repwe pwal köri iten Jiowa we me mwen sopwoloon ei otot mi ngaw.
Atun Jiowa mi chüen mutatä, sipwe sopwelo le afalafala ewe kapas allim usun Mwuun Kot me tinikken le chuuri aramas lon ach kewe leenien afalafal. (Mt. 24:14; Mark 13:10) Sipwe achocho ükükün ach tufich le esilefeili iten Jiowa we me met a fen aotalo ren ach afalafal imw me imw, woon al, woon phone, mak taropwe, are afalafal sereseröch.
A wor chommong popun sipwe lükü pwe Jiowa epwele mwittir epinalo itan we. (Is. 36:23) A chök arapakkan ewe fansoun lupwen aramas repwele ükütiw le eitengawa itan we. Ena fansoun epwe fokkun apwapwa ngeni nöün Jiowa kewe chon angang mi tuppwöl, chokkewe mi fen esilefeili itan we me apöchökkülatä an pwüüng le nemenem!
Än Jiowa tongei nöün kewe aramas a pwälo lon ekkewe District me International Mwichelap, itelapan “Sipwe Mammasa,” ra fis lon chommong fönü lon 2009. Lon uruwoon ach mwicheich, ekkena mwichelap ra sokkolo aücheaar pun ra ächema ngenikich lamoten ach sipwe mammasa fän iten ränin Jiowa we.—Mark 13:37; 1 Tes. 5:1, 2, 4.
Pwüngün, Jiowa a fokkun mürinnö; a ouralo letipach ren pwapwa. A akonakich lon ekkewe mälämäl mi araüaraü me emmwenikich ünükün ekkewe konik mi lüa.—Kölf. 23:1, 2; 100:2, 5.
Kopwe lükülük pwe Jiowa epwe sopwelo le efeiöchuk atun ka tinikken le angang fän iten an we Mwu lon mwachkkan!
Tong seni pwiimi Chon Kraist ngeni pwiich kewe woon unusen fönüfan,
Pwiimi kewe,
Än Chon Pwäratä Jiowa Mwichen Sou Pwüngüpwüng