Ápilúkúlúk fán Iten mi Máló​—Pwata Sipwe Lúkúlúk?

Itá a pwári tiparoch le ekieki pwe ekkewe mi máló repwe manawsefál? Aposel Paulus ese ekieki ina usun, iei met a mak lón Paipel: “Are mi wor ach apilukuluk allim lon Kraist ren chok ei manau, iwe, kich mi woungau lap seni aramas meinisin. Nge a fakkun enlet pwe Kraist a manausefal seni malo, i mi chon akkom me lein ir mi mourulo.” (1 Korint 15:19, 20, TF) Paulus a lúkú ewe manawsefál. Án Jesus manawsefál a anúkúnúkú i.a (Föför 17:31) Ina popun Paulus a apasa pwe Jesus i ewe a “akkom” manawetá ngeni manaw esemuch. Ika Jesus ewe akkomw, iwe epwe pwal wor chón tapwoto mwirin.

Iei pwal eú popun sipwe tongeni lúkúlúkú ewe ápilúkúlúkún manawsefál. Jiowa i ewe Kot mi enlet, “ewe esap chofona.” (Titus 1:2) Jiowa esap fán eú an kapas chofona me esap fókkun tongeni. Itá epwe pwonei ewe ápilúkúlúkún manawsefál me pwal mwo nge pwáraatá pwe a tongeni féri nge mwirin esap apwénúetá? Esap fókkun tongeni fis ena!

Pwata Jiowa a akkóta pwe epwe wor manawsefál lón mwach? Pokiten an tong. Hiop a eis: “Are eman aramas a mäla, ifa usun, epwe pwal manausefäl? . . . En kopwe köriei, nge ngang üpwe pälüenuk. En kopwe positiei, ngang ätewe poum a föri.” (Hiop 14:14, 15) Hiop a lúkú pwe Seman we mi tong lón láng a fókkun mochen epwe amanawa. Kot a siwili an ekiek? “Ngang ewe Samol mi Lapalap, üsap tongeni siwil.” (Malakai 3:6) Kot a chúen fókkun mochen kúna án ekkewe mi máló manawsefál fán péchékkúl me pwapwa. A usun chék án emén sam are in mi tong áneánei le kúna néúr we mi máló nge ese wor ar tufich. Nge Kot a wor an manaman le féri minne a mochen.​—Kölfel 135:6.

Jiowa epwe ngeni Néún we ewe manaman pwe epwe atoto pwapwa mi somwoló ngeni chókkewe mi chúúpwún. Nge met meefien Jesus usun manawsefál? Me mwen an epwe amanawatá Lasarus, Jesus a kúna weiresin letipen fefinan me chiechier kewe, iwe “a kechü.” (Johannes 11:35) Lón pwal eú atun, Jesus a kúna emén fefin mi má pwúlúwan seni Nain nge a máló néún we áláeménún át. Jesus a “fokun tongei. Iwe, a üreni, ‘Kosap kechü.’” Lón chék ena atun Jesus a amanawatá ewe somá. (Lukas 7:13) Jesus a fókkun letipechou ren chúúpwúnún me málóón aramas. Epwe ifa me watteen an pwapwa atun epwe siwili letipeta ngeni pwapwa chapur wóón unusen fénúfan!

Ka fen piin chúúpwún? Neman ka ekieki pwe ese wor mettóch epwe tongeni áwesi máló. Nge mi wor, ina ewe manawsefál Kot epwe efisi me ren Néún we. Chechchemeni pwe Kot a mochen kopwe kúna ena mettóch. A mochen kopwe nóm lón ena atun pwe kopwe foropachesefáli attogeom kewe. Anchangei ámi kókkótfengen pwe oupwe manawfengen feilfeiló, ousap fókkun chúen káimufesen!

Lionel, ewe sia fen pwóróus usun a erá: “Iwe mwirin, ua káé usun ewe manawsefál. Nge me akkomw, use tongeni lúkú me use lúkúlúkú ewe a ereniei usun ena mettóch. Nge ua etittina ewe Paipel me ua kúna pwe a pwúng! Ua fókkun mwétéresiti le kúnasefáli semei we chinnap.”

Ka mochen alapaaló óm silei? Chón Pwáraatá Jiowa ra pwapwa le áiti ngonuk seni pwisin noum Paipel pwata ra lúkú ewe ápilúkúlúkún manawsefál.b