Án Jesus we Manawsefál A Atoto Manaw!
ÁN JESUS manawsefál esap chék ina och mettóch a fis lóóm esor aúchean ngenikich lón ei fansoun. Ewe aposel Paulus a affata aúchean lupwen a makkeei: “Kraist a manawasäfäl seni mäló, I ewe mwen üwa a mweii chókana mi möürün mäló. Pün pokiten ren chök emön aramas, mäló a war; iwe pwal pokiten ren chök emön Aramas, manawsäfäl seni mäló a pwal war. Pün usun chök än aramas meinisin ra mäló lón Adam; iwe pwal ina chök usun pwe lón Kraist, aramas meinisin mi lükü repwe manaw.”—1 Korint 15:20-22, Agapé.
Jesus a manawsefál lón Nisan 16 ier 33, pwal ina ewe rán ekkewe chón Jus ra kan ngeni Jiowa lón ewe imwenfelin Jerusalem mwenuwaan kinier kewe seni ar atake. Ren án Paulus erá pwe Jesus ewe mwenuwa, a áweweei pwe epwe pwal wor ekkóch aramas repwe manawsefál.
Mwirin, Paulus a áweweei met án Jesus manawsefál epwe atoto ngeni aramas. A erá: “Pokiten ren chök emön aramas, mäló a war; iwe pwal pokiten ren chök emön Aramas, manawsäfäl seni mäló a pwal war.” Pokiten sia álemwiri tipis seni Atam me sise unuséch, iwe, kich meinisin sia máló. Iwe nge, ren án Jesus awora manawan we mi unuséch pwe epwe méén kepich, a suuki ngeni aramas meinisin ewe alen ngaseló seni fétekin tipis me máló ren ewe manawsefál. Iwe, Paulus a sópweló le makkeei lón Rom 6:23: “Pun liwinin tipis mäla, nge än Kot lifang manau esemüch lon Kraist Jesus ach Samol.”
Jesus pwisin a áweweei aúchean an we máló me an manawsefál fán itach. Iei alón usun pwisin i: “Nöün Aramas epwe tekiatä, pwe meinisin mi lükü i repwe eäni manau esemüch. Pun iei usun Kot a echeni chon fanüfan, pwe a fangela Nöün Aleman, pwe meinisin mi lükü i resap pöütmwälila, pwe repwe eäni manau esemüch.”—Johannes 3:14-16.
Anchangei ena sókkun manaw, esap tongeni much, ese wor metek, riáfféú, are letipechou! (Pwärätä 21:3, 4) A ifa me apwapwaan ena esin ápilúkúlúk! Emén sou káé usun Paipel a erá: “Ekkewe peias ra áchema pwe a fókkun mwochomwoch manawen aramas, nge ewe manawsefál a pwáraatá mwochomwochen ewe fansoun án emén fétek lón máló.” Ewer, án Jesus manawsefál a atoto manaw!