Dhilebiwe na Mateu
13 Siku nttile, Yezu obudduwa vatakulu odhowa ogilati nikome na nyaza. 2 Muttitti mwinjene wa attu otugumana vàliye, venevo iyene owela mmwanddiyani vina ogilati, oku muttittiyá buli nikome na nyaza. 3 Yezu ohasunziha dhinjidhene na dholaddaniha, iyene ohawaddela: “Kavuruwanani! Namalima dhahi ovenya odhowa owaza beu. 4 Awazagavi, beu dhina dhimottela nikome na dila, balame dhidha, dhija. 5 Dhina dhimottela vamaluguni vahalitxi mattaka, dhimela momaguva sabwani mattakayá àli vadhulu-vadhulu. 6 Mbwenyi mobele nzuwa, dhinyala, dhihuma, sabwani kadhanetxa mitxitxi. 7 Dhina dhimottela vamingani, munuwele mingadhá dhihoga. 8 Oku dhina dhimottela vamattakani apama, dhiroma obala milima, dhina opitta dila 100, dhina dila 60, dhina dila 30. 9 Onna maru, ewe.”
10 Dhahene anamasunza aye afiya vàliye, ahinvuza: “Namasunziha, mugalogaga na attu munlogela nni na dholaddaniha?” 11 Iyene ohawakula: “Nyuwo muvahiwa ononelamo wa dhoviteya dha Mulugu mwaha wa Omwene wa wirimu, mbwenyi awene kavahiwe. 12 Ole onna, onele ovahiwavi, vina onele okaana dhinjene; vano ole ohinna, eng’onovi enna iyene, onele wakiwa. 13 Nona ddigaloga na awene na dholaddaniha; vowi anowang’ana mbwenyi kanona, anowiwa mbwenyi kaniwelelamo vina kannonelamo. 14 Dhinapadduwela sisile dhalogile namavuhulela Izaiya dhawi: ‘Nyuwo munele wiwa, vano kamunanonelemo, munele wang’ana, vano kamunone elo. 15 Nlogo ntti ttawuma murima, awene afuga maru awa na mento awa, wila ahiwodhege wona na mento awa, wiwa na maru awa, wi ahinonelemo na murima wawa, atxinuwá, miyo ddavulumutxa.’
16 “Nona, ohagalala ba mento enyu, sabwani anowona vina maru enyu, sabwani anowiwa. 17 Miyo ddinouwaddelani ebaribari, anamavuhulela enjene vamodha na attu oligana murima, anfuna wona dhinoninyu mbwenyi konile, vina anfuna wiwa dhiniwenyu, mbwenyi kewale.
18 “Kavuruwanani yoladdaniha ya muttu owazile beu yaye. 19 Ole oniwa miselu dha Omwene vano ahinonelamo, onodha mwiddani baburutxamo yaliwe mmirimani mwaye, eji beu ewaziwe nikome na dila. 20 Ejile emottele vamaluguni vahalitxi mattaka, enimutonya ole oniwa nzu na Mulugu, arumela n’oziveliwa. 21 Iyene kanna mitxitxi, onroromela mudhidhi mung’onovi, vasogorhova agafwanyiwa makattamiho vina ofwara-fwariwa sabwa ya nzu, onokwakwattuwa momaguva. 22 Beu emottele vamingani, enimutonya ole oniwa nzu, mbwenyi dhozuzumiha dha elabo ejino na murega wa dhorela, dhinohoga nzuna, bahibala milima. 23 Emottele vamattakani apama enimutonya ole oniwa nzu, anonelamo; oddo txibarene onobala milima; mwina opitta dila 100, mwina dila 60, mwina dila 30.”
24 Iyene ohawaddela yoladdaniha yina; ohiloga dhahi: “Omwene wa wirimu onladdanihiwa na muttu walile beu yapama mmunddani mwaye. 25 Anamalabayá agonaga, ofiya mwiddani, omwala joyu mmunddani mwa tirigu, odhowa vyaye. 26 Munuwele tirigu aroma otaburuwa, ohoneyamo vina joyu. 27 Anamalaba a mwinya wa vatakulu ahidha omvuza dhahi, ‘Nabuya, mmunddani mwenyu kamwalilemo beuvi yapama? Kito joyu odhile wuvi?’ 28 Iyene ohawakula: ‘Okalawo okosile esodhá, oddoya ddi mwiddanaga.’ Anamalabayá ahinvuza wili: ‘Bili dhawene, munofuna wi namuddulemo?’ 29 Iyene ohawakula, ‘Nne, kammuddule, enadhe opadduwa mwamuddulaga joyu mmuddule vina tirigu. 30 Kattiyani wi dhotene dhunuwe vamodha, nsaka n’osinanga, miyo ddinele wawaddela dhahi anamasinangayá: Karomaní omuguddela joyu vamodhavi wi addumeyiwe; mugamala, tiriguyá mmusinangele vanddarani vaga.’”
31 Iyene ohawaddela yoladdaniha yina; ohiloga dhahi: “Omwene wa wirimu onladdana na ttaga ya mostarda yalile muttu mmunddani mwaye. 32 Ttagayá joyeva opitta dhina, mbwenyi muriyá ogonuwa onokala munddimuwa opitta miri dha milima dhina, balame dhodhulu dhinomagamo vinddara dhawa.”
33 Iyene ohawaddela yoladdaniha yina: “Omwene wa wirimu onladdanihiwa na emela ettukulile muyana, bataganyiha na mpimo miraru dha ottu, ofiyedha odhakuwa.”
34 Dhotedhene dhaloga Yezu na muttitti, waloga na dholaddaniha. Txibarene, iyene kasunziha elo ahiladdanihaga, 35 wi dhakwanihedheye dhalogile namavuhulela eraga: “Ddinele ofugula mulomo waga na dholaddaniha, ddinele ovuwiha dhotedhene dhaviteyile ovenyana omaromelo wa elabo.”
36 Mmaleliye opaganya muttitti, ovolowa mba; anamasunza aye amususela, amukumbirha dhahi: “Munaddele entapulela yoladdaniha ya joyu wa mmunddani.” 37 Iyene ohawakula: “Namawaza beu yapama ddi Mwana-muttu; 38 mundda ji elabo. Beu yapama ba ana a Omwene, mbwenyi joyu ba ana a mwiddani. 39 Mwiddani onimwala joyu ddi Ddiabo. Nsaka n’osinanga ku omagomelo wa elabo ejino, anamasinanga ba anju. 40 Nona, dhahene ninga joyu onguddeliwa vamodhavi aponyedhiwa vamottoni, yakakene jinapadduwe omagomelo wa elabo ejino. 41 Mwana-muttu onele waruma anju aye, atugumanihe dhotene dhinkwakwattutxa Mumweneni mwaye, na otene anlupa nlamulo, 42 awene anele waponyedha vamottoni. Wenewo anele wunla na okubanya onddimuwa vaddiddi.* 43 Nsaka-ntto aligani anele ong’animela ninga nzuwa, Mumweneni mwa Babawa. Onna maru, ewe.
44 “Omwene wa wirimu onladdana na nifumo niviteyile mmunddani, nifwanyiwe na muttu dhahi, avita wili; na ottaba odhowa oguliha dhotedhene dhaniye, odhowa ogula munddayá.
45 “Vina Omwene wa wirimu onladdana na munyamarhondda, watamela myarha* dhattima. 46 Mufwanyeliye mwarayá,* odhowa oguliha dhaye dhotedhene, ogula.
47 “Vina Omwene wa wirimu onladdana na mulaba otuputxedhiwe mwiko, okukusa oba dhottiyana-ttiyana. 48 Mudhalelaní anamattaddayá awetela otakulu, agilati, aroma osakula; dhapamadha ahika muyoboni mwawa, dhaburedha ahirayilela otakulu. 49 Yakakene jinapadduwe omagomelo wa elabo. Anju anele wattiyaniha avuti na aligani 50 vina anele waponyedha vamottoni. Wenewo anele wunla na okubanya onddimuwa vaddiddi.*
51 “Munonelamo entapulela dhotene esi?” Awene ahakula: “Ndde.” 52 Yezu odhowanavi: “Akala pumwenemo, muziwe wi namasunziha ddi namasunziha, agasunzihiwa mwaha wa Omwene wa wirimu onoladdana na muttu, mwinya wa ntakulu omburutxa vamafumoni vaye dhilobo dhiswa na dhawale.”
53 Mmalele Yezu ologa dholaddaniha esi, ovenyavo. 54 Mfiyedhiye sidadi ebaliwiye, oroma wasunziha attu mmasinagoga mwawa; awene atikina eraga: “Muttu oddu zelu ninga eji vina gurudhá dhokosana matikiniho odhilena wuvi? 55 Oddu kahiyo mwana namasema? Maye kahiyo Maria, ki abalaye kahiyo Tiago, Jozé, Simoni na Juda? 56 Arogoriye kahiyo aba otene ali veneva na iyo, kito ewodhelo ninga eji odhilena wuvi?” 57 N’eji awene aroma okwakwattuwa mwaha waye. Venevo Yezu ohawaddela: “Kavo namavuhulela onttittimihiwa mmuruddani mwaye vina vatakulu vaye.” 58 Iyene kakosile matikiniho menjene mmuruddani mpule sabwa ya otowa wawa nroromelo.