Dhilebiwe na Mateu
12 Siku dhahi, Yezu ovira mminddani dha tirigu nali siku na Sabuddu. Anamasunza aye akaliwa dala, venevo aroma onvula tirigu bagamutakuna. 2 Afarizi monelani esidhá, aloga dhahi: “Moone! Anamasunza enyu anokosa dhilobo dhihinrumelihiwa siku na Sabuddu.” 3 Yezu ohawakula: “Nyuwo kamwengesile ekosile Davidi vamodha na alobwana aye mwakanelani dala? 4 Iyene kavolowile mba mwa Mulugu vamodha na alobwana aye, baja pawu dhaperhekeliwa Mulugu, esuwene dhaharumelihiwa oja iyene vamodha na alobwana aye, mbwenyi dharumelihiwa anamakutta bahi? 5 Obe kamwengesile Munlamuloni wi na Masabuddu anamakutta a mumparhani anolupa nlamulo na Sabuddu bakala semuladdu? 6 Vano ddinouwaddelani, apano okalavo munddimuwa ompitta mparha. 7 Nona, kowiliwa mwahinonelamo entapulela mazu aba, ‘Ddinfuna ttagaraga, ottiya mukutto,’ kamugaattongile attu ahinna muladdu. 8 Sabwani Mwana-muttu, Nabuya wa Sabuddu.”
9 Mvenyeliye venevale ovolowa musinagoga* mwawa, 10 mwenemo mwahikala mulobwana dhahi woragala nlada! Attu ena afunaga ompwatteliha muladdu, ahinvuza dhahi: “Enorumelihiwa onvulumutxa muttu siku na Sabuddu?” 11 Iyene ohawakula: “Akala mmodha wa nyuwo onokana nibila naye, nigwela muttoloni siku na Sabuddu, kanvolowamo baburutxamo? 12 Muttu na nibila onnetxa ttima bani? Nona jorumelihiwa okosa yapama siku na Sabuddu.” 13 Iyene ohiloga na mulobwanayá: “Katapula nlada nawo.” Mulobwanayá mutapuleliye nlada naye, nladana niyamo, nikala pama ninga nina. 14 Mbwenyi Afarizi abudduwavo vina adhowa omulaganela wi ampe. 15 Yezu muziweliye, ovenyavo, attu enjene ahinfwara vina ohavulumutxa otene, 16 iyene ohakokomeza wi ahimwaddele muttu eliye, 17 wi akwanihedheye mazu alogile namavuhulela Izaiya, eraga:
18 “Mmone! Mwimeleli waga omusakulimi, onimukwelimi vina onimurumelimi! Ddinele omvaha muya waga* wi àtapulelemo attu a malogo otene, oligana waga. 19 Kanakulane, kanapambihane na muttu, nne lizu naye kanneweye mmarampani. 20 Kanamarihe murere wowundeya vina kanattimihe panti yokuwara, mpaka wakwaniha oligana. 21 Txibarene, malogo otene anele ojedhela nzina naye.”
22 Ottukuleliwa vàliye muttu wavolowiwe muya wabure, wahawodha ologa vina wahawodha wona. Iyene ohinvulumutxa; muttuyá oddo, oroma ologa vina wona. 23 Muttitti mwinjene wa attu àlivo, atikina alogaga: “Ngani oddu kahiyo Mwana Davidi?” 24 Afarizi ewaga esidhá, ahiloga: “Oddo onttamagiha muya dhabure na guru dha Satana,* oli mulamuleli wa adomonyo.” 25 Aziwaga dhobuwelani, iyene ohiloga: “Omwene wotene ongaweya kunimela, sidadi ji sidadi obe nyumba ji nyumba engaweya, kinimela. 26 N’ekalelo yakakene, akala Satana onomuttamagiha Satana, bahito, iyeneyá ogaweya. Kito omwene waye onemele dhavi? 27 Vano, akala miyo ddinttamagiha muya dhabure na guru dha Satana, kito anenyu anttamagiha na guru dha ani? Nona awene banauttongeni. 28 Mbwenyi akala miyo ddinttamagiha muya dhabure na guru dha muya wokoddela wa Mulugu, txibarene Omwene wa Mulugu oufiyedhani. 29 Obe enwodheya dhavi muttu ofiya vatakulu va mulobwana woliba, bamwiyela dhotedhene dhinniyena, ahiromile ommaga mulobwanayá? Agamala ommaga, panawodhiye omwiyela. 30 Ole ohili mpaddi waga kali na miyo, vina ohintaganyiha na miyo, onomwalamwadha.
31 “Nona miyo ddinouwaddelani, yottega-yottegaví vamodha na dhoveyihadhá dhinoleveleliwa, vano ole onveyiha muya wokoddela, kanleveleliwa-wene. 32 Ninga motagiha, ole onimuloga bure Mwana-muttu, onoleveleliwa; vano ole onloga bure muya wokoddela,* kanaleveleliwe-wene, nne masaka abano, nne abo a musogorho.
33 “Akala munotxeya muri wapama, dhobaladhá dhinakale dhapama, akala munotxeya muri wabure, dhobaladhá dhinakale dhabure. Muri bu muri onziweya na milima dhaye. 34 Ziza na dhivili nyuwo; enwodheya dhavi mwano mwenyu obudduwamo mazu apama oku nyuwoyá bamuli abure? Vowi mulomo onloga esile dhidhalile mmirimani. 35 Muttu wapama onoburutxa dhapama mmafumoni mwaye apama, vina muttu wabure onoburutxa dhili dhabure mmafumoni mwaye abure. 36 Miyo ddinouwaddelani wi Siku N’ottonga, muttu-muttu onele wakulela dhotowa ttima dhotene dhilogiliye; 37 sabwani na mazu awo, weyo onele okuweliwa muligani; vina na mazu awo, onele ottongiwana.”
38 Nowidhawo, anamasunziha magano na Afarizi ahiloga: “Namasunziha munonihe ezinddiyelo endha wa nyuwo.” 39 Iyene ohawakula dhahi: “Nyuwo attu* abure vina ohiwananeyana, muntamela moone ezinddiyelo, mbwenyi kamunonihiwe ezinddiyelo, ehili ejile ya namavuhulela Jona. 40 Sabwani dhahene ninga Jona wali mbani mwa oba malabo mararu mutana na mattiyu, Mwana-muttu vina onele okala mwikuttani masiku mararu mutana na mattiyu. 41 Siku N’ottonga, attu o Nínive anele ovenya vamodha n’attu a nsaka nttino, àkone; vowi awene ahitxinuwa mwiwalani esile dhalaleyile Jona. Vano ziwaní wi apano okalavo muttu munddimuwa onimpitta Jonayá. 42 Musano w’o gusuni* onele ovenya vamodha n’attu a nsaka nttino, wi àkone; vowi iyene odha wolapela-wene wi ewe zelu dha Salomau. Vano ziwaní wi apano okalavo muttu munddimuwa onimpitta Salomau.
43 “Muya wabure ogavenyamo mmaningoni mwa muttu, onovira mimburo dhihinkaliwa otamelaga vofwasa, mbwenyi kunfwanya. 44 Nowidhawo onologa: ‘Ddinowiyelela nyumba yaga emwalilemi;’ ogeyela onofwanya nyumbayá ehikaliwaga, mbwenyi jimalile osasanyedhiwa, okuputtiwa, vina okoddelihiwa. 45 Venevo, onodhowa ottukula muya dhina mitanu na minli dhottabwa wopiha opitta iyene, dhinodha ovolowa, okalaga mwenemo; omagomelo wa muttu oddo onottabwa otakala opitta omaromelo waye. Jijene enapadduwe na attu a nsaka ntti otakala murima.”
46 Yezu alogagavi na muttitti, maye na abalaye ahimela otakulu atamelaga ologana. 47 Venevo muttu dhahi omwaddela: “Mamayenyu vamodha na abalinyu ali oko otakulu, anfuna aloge na nyuwo.” 48 Iyene omwakula ole wamwaddelayá: “Mamayaga bani, kito abalaga bani?” 49 Àtapulelaga nlada anamasunza aye, ohiloga: “Mamayaga na abalaga baba! 50 Sabwani onkosa ofuna wa Babaga oli wirimu, oddo ddi mbalaga, ddi murogoraga vina ddi mamayaga.”