Junyu

Yehova waharuriha Akristu a nsaka zana mwaha wa okosa matxinjo àli ofuneya mowiwanana na esile dhapadduwa. Awene dila dhinjene anfwara-fwariwa, masaka meena eji yapadduwa mudhidhi wahajedhelani. Katanalela empadduweli Barnabé na murumiwi Paulo mudhidhi walaleyani murudda wo Listra. Dila yoroma elaleyilani wenewale ahakeliwa na mada meli vina attu enjene ahavuruwana. Mbwenyi vasogorhova, amwiddani “ahigula muthithi,” ena ahimponyedha malugu Paulo bamuttiya nena n’okwa. (Mer. 14:19) Mbwenyi Barnabe na Paulo ahidhowanavi vasogorho mabasa awa. Àkanile yopurelamo gani? Àhalaleya attu owinjiva “adhile okala anamafwara,” vina mazu awa na dhotagiha dhawa dhahawaraliha Akristu akwawa. (Mer. 14:​21, 22) Attu enjene ahikamihedheya sabwa ya Paulo na Barnabé ohiyelela mundduni masiki vafwara-fwariwani. Nigakalela ntidi okosa mabsa anittomeli Yehova ninele orurihiwa. w23.04 16-17 ddima 13-14

Mwigumini waye mwene Davidi ogumanana makattamiho menjene na amwiddani aye, dila dhinjene iyene wahitamela nikamihedho na Yehova modhela nlebo. Davidi wahikana nikuluvelo wi Yehova onovuruwana vina onowakula malobelo aye. Enowodheya weyo vina okana nikuluvelo nakene. Bibilia ononikuluveliha wi Yehova onowodha onivaha eziwelo vina guru enfunihu wi niwodhe ovilela. Iyene onowodha walabihedha abalihu vina attu ahinimulabela wi anivahe nikamihedho-nikamihedhovi. Ebaribariya, jawi kahiyo mudhidhi wotene onakula Yehova malobelo ehu na mukalelo wajedhelihu. Mbwenyi nikane nikuluvelo ntti, iyene onele wakula malobelo ehu vina onele onivaha dholoba dhehu mudhidhi wofwanyelela. Nona, kadhowavi olobelaga na nroromelo vina na nikuluvelo nawi Yehova onele wukoya ovanene. Mwilaboni eswa endawo iyene onele wavaha attu otene dhotene dhinunlelani.—Masal. 145:16. w23.05 8 ddima 4; 13 ddima 17-18

Japama wubuwela dhopurelamo dhinda sabwa ya weyo wakwaniha dhogana dhawo. Wahiromaga wubuwela dhodhelavo dhinda sabwa ya wakwaniha dhogana dhawo? Motagiha, akala yogana yawo enowiwanana na olobela vina omwengesa Bibilia, kobuwela mukalelo onalibihe yogana eji mandano awo na Yehova. (Masal. 145:​18, 19) Akala yogana yawo enowiwanana na wunuwiha mikalelo dha Okristu, kobuwela mukalelo onawukamihedhe mukalelo obu wiwanana na attu ena. (Kol. 3:14) Onkoddela nni okosa lista na dhilobo dhapama dhinuttukulela wakwaniha yogana yawo? Mudhidhi na mudhidhi wang’anege lista nawo vina, otamelege mudhidhi wa okala na attu anawukamihedhe. (Gano 13:20) Mwebaribari mwa iyo notene, ahikalawo malabo ahinkana iyo efunelo yokosa dhilobo. Kito, eji enele onittukulela ohakwanihedha dhogana dhehu? Nne. Dhahene ninga munwodheyela barku ofiya ondowiye masiki s’ohikalawo pevo, enowodheya wakwaniha dhogana dhehu masiki nihikanaga efunelo. Kahiye yovevuwa, mbwenyi japama okosa ejuwene. w23.05 27-28 ddima 5-8

Nona, oziwa wi ototile muladduya ddi iyo enele onittukulela ologa yottega yehu, osasanyedha vavonyilihu, vina orabela okosa yottega yakene. Okosa ejene enele onikamihedha odhowavi nittamagaga mudila ennittukulela wigumini. Akala ohikosa yogana yabure txini enfwanyela weyo okosa? Kunonge mudhidhi wawo vina guru dhawo otamelaga woniha wi weyo kukosile elobo yabure. Ottiya ejo, orumele yovonya yawo vina ovilibihedhe okosa dhilobo dhapama. Ogona wi ohikosa elobo yabure, na ovyeviha kamulobelele Yehova, karumela yovonya yawo vina omukumbirhe wi awulevelele. (Masal. 25:11; 51:​3, 4) Egawodheya wakumbirhe nlevelelo attu abale anyimuliliwe, vina egafuneya, okumbirhe nikamihedho wa anddimuwa a mmulogoni. (Tia. 5:​14, 15) Osunze na dhovonya dhawo, vina ovilibihedhe orabela okosa yovonya yakene. Ogakosa dhawene, kakana ebaribari wi Yehova onele wutonyihedha ttagaraga yaye vina onele wuvaha nikamihedho ninfuniwe.—Masal. 103:​8-13. w23.08 28-29 ddima 8-9

Joyadá wahimukamihedha mwene Jowás okala muttu wapama. Yodhelavoya, mwene oddule bali muzombwe, wanfuna omwagalaliha Yehova. Mbwenyi mukweli Joyadá, Jowás wahivuruwana malago abure a anddimuwa a nlogo. (2 Map. 24:​4, 17, 18) Masiki Yehova vasilidhiwiye na merelo aba a Jowás, Iyene “oarumela anamavuhulela, werele eyelele wa iyene; vano athu kavuruwanile-wene mazu a anamavuhulelayá.” Awene nne vina kafunile omwiwelela Zakariya mwana Joyadá, odduwene wali namavuhulela vina namakutta wa Yehova. Ottiya ejo, Mwene Jowás ohimpiha Zakariya. (2 Map. 22:11; 24:​19-22) Jowás keddilena merelo apama a omova Yehova. Yehova wahibaza ologa dhahi: “Ddinoapwaza abale anddipwaza.” (1 Sam. 2:30) Nikuru ning’novi na anyakoddo akadda Siria, nihigwiha nikuru ninddimuwa na anyakoddo a Jowás. (2 Map. 24:​23-25) Jowás wahipiwa na emeleli aye sabwa ya ompa Zakariya. w23.06 18-19 ddima 16-17

Paulo wahikala na abali aba o Éfezo, àlaleyelaga vina asunzihaga miselu dhapama. (Mer. 19:​1, 8-10; 20:​20, 21) Iyene wannakwela venjene abali aba vina wanfuna wakamihedha wi adhowegevi amulabelaga Yehova nororomeleya. Abali a o Éfezo ahikana dhilemelelo dha relijiau dhottambi vina ankosa dhilobo dha muniya. Akadda Éfezo ahikana elemelelo ya okosa mararuwo vina kakana manyazo a ologa makaniya aba muteyatruni vina mmakapela. (Ef. 5:3) Akadda Éfezo enjene “arimeliwa thima y’omuthu wawa,” mazu aba antapulela ohiwa opa. (Ef. 4:​17-19) Ahinatti osunza ebaribari mwaha wa eli yapama vina eli yabure, mobuwelo wawa kuwasumulela agakosa elobo yabure. Jijene emuttukulele Paulo ologa wi “malago awa aathitha, murima wawa wovadda oafuga zelu ahiziw’elo, kunafwanyihe egumi ya Mulugu.” Akadda Éfezo enagu ahittiya wedda mwiddimani. w24.03 20 ddima 2, 4; 21 ddima 5-6

Vattomiwe Jedeau wi akale namattonga wahikana mabasa menjene a okosa. Akadda Midia vattawilani vari va mattiyu Jedeau wahiroma wattamagela oromana Nttittwa no Jezrayel ofiyedha Mwinje Jordau. (Anam. 7:22) Koddi Jedeau wahatxelela sabwa ya Mwinje Jordau? Newene! Masiki vattawilani, iyene na alobwana aye 300 ahabuwa Mwinje Jordau vina wahididelavi wattamagiha. Omamalelowa, iyene wahafwanya anyakoddo abale akadda Midia vina wahatata. (Anam. 8:​4-12) Jedeau wahikuluvela wi Yehova agahimulibiha, nanda jijuwene epadduwile. (Anam. 6:​14, 34) Dila modha, Jedeau na alobwana aye elo wattamagiha na myeddo amwene eli akadda Midia attawile na akamelo. (Anam. 8:​12, 21) Mbwenyi na nikamihedho na Mulugu, ana Izrayel ahafwanya bapemberha koddoya. Na mukalelo wakakene anddimuwa a mmulogoni anofwanyela omukuluvela Yehova, odduwene ohinlema vina ohinojeya. Awene agafuna olibihiwa iyene onele walibiha.—Iza. 40:​28, 29. w23.06 6 ddima 14, 16

Enowodheya iyo okana murima woliba, kintanala makattamiho angumanihuna. Ninofwanyela omukuluvela Yehova. Katanalela mukalelo opemberhile Barak sabwa ya okuluvela malago a Yehova. Masiki mwilaboni motene mwa Izrayel mwahafwanyeyanimo mwalago obe supadda, Yehova wahinvaha malago Barak wi adhowe awane na anyakoddo akadda Kanaá ana dhipano dhowakwanela asogorheliwa na Sízera. (Anam. 5:8) Namavuhulela Debora wahimwaddela Barak wi atitele o muwuloni Kison agumane na Sízera na myuva dhaye dha mijila 900. Masiki myuva dhakamihedhani venjene mukoddoni, Barak wahiwelela malago a Yehova. Anyakoddo ahitita o Mwangoni Tabor, Yehova wahimurubwiha muzogwe. Myuva dha Sízera dhahiroma orobela mmaroveni vina Yehova wahimukamihedha Barak opemberha. (Anam. 4:​1-7, 10, 13-16) Na mukalelo wakakene, Yehova onele onikamihedha opemberha nigamukuluvela vina nigafwara malago annivaha nikuru naye. w23.07 19 ddima 17-18

Wi iyo nivuneye, enofuneya ovilela. Dhahene ninga adhari ororomeleya a masaka a mundduni, ninofwanyelela ojedhela novilela mudhidhi onakwanihedhe Mulugu dhopikirhela dhaye. (Aheb. 6:​11, 12) Bibilia ononiladdaniha na namalima. (Tia. 5:​7, 8) Namalima, onolaba na guru wi atxeye vina ahelele manje dhitxeyiliye, mbwenyi iyene kanziwa mowakwana-mwene mudhidhi onunuwani. Mbwenyi onojedhela wi onele osinanga milima. Na mukalelo wakakene, iyo ninozuzumela mabasa omuyani masiki “nihiziwaga siku ninadhe Nabuya wehu.” (Mt. 24:42) Iyo ninojedhela novilela nikuluvelaga wi nsakana nigafiya Yehova onele wakwanihedha dhotedhene dhipikirheliye. Iyo nigattiya okala attu ovilela txino ninodhaga olema ojedhela vina vang’ono-vang’ono banittiya ebaribari. Iyo vina ninodhaga otamela dhilobo dhinnipuriha momaguva-mwene. Mbwenyi nigakala attu ovilela, ninela ovuneya.—Mik. 7:7. w23.08 22 ddima 7

Nigewananiha nivuhulo ntti na Daniyel 2:​41-43 na mavuhulo mena anfwanyeya munivuruni na Daniyel vina na Ovuhulela, ninowona wi manyalo aba antonya potência Anglo-Americana, enlamulela masaka abano. Modhela potência eji Daniyel wahiloga wi omweneya onakale epaddi modha woliba epaddi yina wawobana. Sabwaya jani okala wowobana epaddi modha? Sabwani attu a mmawani antonyiwa ninga ddongo, anowobaniha ewodhelo yawa ya olaba na guru enladdana na mujila. Etapuleli Daniyel mwaha wa yoroha ejile ya engamuttu, enonisunziha ebaribari ya ttima. Yoroma, Potência Mundial Anglo-Americana, enowoniha wi ehikana owodha onddimuwa. Motagiha, Estados Unidos na Grã-Bretanha, ali vamodha na dhilabo dhipemberile Koddo Yoroma na Koddo Yanawili erabiwe elabo yotene, masiki dhawene potência Mundial eji ja wobana vina enodhowavi yobanaga, sabwa ya owanawana onkana awenevi vina na nlogo. Potência eji jinakale yomariha velaboni ya vati, ofiyedha mudhidhi onagomihe Omwene wa Mulugu olamulela wotene wa attu. w23.08 10-11 ddima 12-13

Davidi wankumuwa sabwa ya makattamiho amugwela vina dhorutxa dhagumaniyena (Masal. 18:​5, 6 [Masal. 18:​4, 5 NM]) Masiki dhawene okwela na ozuzumela wa Yehova wannimuridhiha murima. Yakala ninga Yehova wela onvelela Davidi vali “munyofu mwiti” vina “vali manje oridha.” Sabwa ya ejuwene Davidi wanwodha okanavi guru vina odhowavi amulabelaga Yehova na wagalala. (Masal. 18:​29-33 [Masal. 18:​28-32 NM]) Masaka abano vina, iyo ninwodha owanana makattamiho na nikamihedho na Yehova, enkala ninga eji enloga Bibilia: Sabwa ya okwela woweddeyana wa Yehova kanitolotxiwe, nikalawovi. (Ent. 3:22; Kol. 1:11) Davidi wahikana amwiddani a guru, vina dila dhinjene egumi yaye yakala vangovini. Masiki dhawene, iyene wakala wobareleya sabwa ya okwela wa Yehova. Iyene wahizinddiyela wi Yehova wali na iyene mudhidhi wotene, nanda jijene yamulibiha. Ji sabwaya yamuttukuleli wiba dhahi: “Oddivenyihamo wova waga.” (Masal. 34:4) Dila dhina Davidi wanttiddiwa wova venjene, masiki dhawene iyene wanwodha ovilela sabwani wahikana nikuluvelo nawi Yehova wannimukwela. w24.01 30 ddima 15-17

Kasunza na dhosakula dhabure dha Jowás. Mukwile namakutta munddimuwa Joyadá, Jowás wahikosa mandano abure. (2 Map. 24:​17, 18) Iyene wahisakula ofwara malago anamasogorhela nlogo o Juda ahamukwela Yehova. Txino onowubuwela wi Jowás wanfwanyela okala wolapela na attu abo. Ottiya ejo, notowa malago odhile ofwara malago awa ohifwanyelela. Yottabwaya vasisiguliwiye na pirimo waye Zakariya iyene wahiruma wi apiwe. (2 Map. 24:​20, 21; Mt. 23:35) Eji elobo yotakala vaddiddi ekosiliye! Jowás wahiroma pama, mbwenyi mokubanyiha-mwene wahidha okala musadduweli vina panga. Omamalelowa, wile opiwa na emeleli aye. (2 Map. 24:​22-25) Dhilobo dhigahimweddela pama kodhowavi amwiwelelaga Yehova vina abale amukwela Yehova! w23.09 9 ddima 6

Yezu wanziwa wi murumiwi Pedro agahiwodha okalavi ororomeleya. Nona na opama Yezu ohiloga na Pedro wi ahove. Mazu aba anowoniha wi Yezu wannimukuluvela Pedro nanda eji yahitxinja egumi yaye. Osogorhowa Pedro na mbale André ahittiya mabasa a ottadda banvelela Yezu mmabasani mwaye olaleya, sabwa ya ejuwene awene ahakela mareliho menjene. (Mk. 1:​16-18) Ninga namafwara wa Kristu Pedro wahikana egumi yowagalaliha vaddiddi. Iyene ohimona Yezu àvulumutxaga aredda, attamagihaga muya dhabure, vina àvenyihaga amarafula. (Mt. 8:​14-17; Mk. 5:​37, 41, 42) Pedro vina wahikana gari ya omona Yezu ninga mwene wa Omwene wa Mulugu nanda eji yahimpatta vaddiddi. (Mk. 9:​1-8; 2 Ped. 1:​16-18) Pedro ohona dhilobo dhihigawodhiliye wona kohikala namafwara wa Yezu. Se waganyedha iyene wahagalala sabwa ya owodha opemberha dhawobana dhaye vina okana gari ya wakela mareliho menjene! w23.09 21 ddima 4-5

Mukartani mwaye noroma, murumiwi Pedro ohilabihedha nzu ntti “okwelana.” Okwela oku ononikamihedha olevelela dhottega dhing’ono vina “dhothega dhinjene.” (1 Ped. 4:8) Txino Pedro wahubuwela esunziliye na Yezu mwaha wa olevelela. Mudhidhene obule, Pedro wobuwela wi iyene wali muttu wa pama valogiliye wi wanfwanyelela omulevelela mbalaye dila “tanu na bili.” Mbwenyi Yezu ohimusunziha Pedro—vina iyo notene wi—ninofwanyela olevelela “ofiyedha dila 77,” kuloga, mudhidhi wotene. (Mt. 18:21) Akala weyo onubuwela wi jorutxa ovirihamo nlago ntti, kukumuwe! Iyo notene dila dhina ninorutxiwa olevelela. Yamakamakaya ja iyo walevelela abalihu vina wandana na awene. w23.09 29 ddima 12

Mbani mwa oba, Jona wahikana nikuluvelo wi Yehova agahivuruwana nlobelo naye sabwani wahitxinuwa vina wahikana nikuluvelo wi Yehova agahimukamihedha. Yehova wahinvuna Jona, vina vasogorhova iyene wali womala-nawale wi akwanihe mabasa attomeliwiye na Yehova. (Jon. 2:10–3:4) Yahiromaga wupadduwela buli mmakattamihoni orutxa vaddiddi vina buhiwodha omwaddela Yehova mukalelo oniviwamo weyo? Obe yahiromaga wupadduwela bulema vaddiddi nanda kuhiwodha osunza? Kudduwale Yehova onoziwa pama esile dhinupadduwela. Egapadduwa dhahene, masiki akala okosile nlobelo na mazu mang’onovi, kakana nikuluvelo wi Yehova onele wuvaha ejilene enfuniwe txibarene. (Ef. 3:20) Akala onowiwa opa obe kunwodha wubuwela pama, nanda bikala yorutxa wengesa vina omusunza Bibilia kavilibihedhe wi ovuruwane ogravariwa wa Bibilia obe wa manivuru mena andela mBibiliani. Vina enokamihedha ovuruwana jibo dha Omwene obe wona vidiyu mu jw.org. Ogamulobelela Yehova vina otamela dhowakula dha mBibiliani vina mapublikasau, enkala ninga onimuwoba Yehova wi awulibihe nanda jijuwene enakosiye. w23.10 13 ddima 6; 14 ddima 9

Musana vina mparha dhamagiwe vasogorhova o Jeruzalemi, ekaleloya ya mwari kiyattiyana. Mwarimwa wakala mimburo minli—“Mburo Wokoddela” vina “Mburo Wokoddela-koddela”—na guwo enddimuwa yagawa mimburo esi. (Aheb. 9:​2-5; Obud. 26:​31-33) Mburo Wokoddela wakala panti ya woru, ebuwa vaddumeyiwa lubani vina meza vakala mikatte dhaleveliwa Mulugu. Arumelihiwa ovolowa Mburo Wokoddela ali anamakutta ottikitteliwa wi attidde mabasa attomeliwani. (Oleb. 3:​3, 7, 10) Mburo Wokoddela-koddela wakoyiwa yobo ya nipagano yasasanyiwe na woru vina Yehova waloga na namakutta munddimuwa vadhulu va yobo eji. (Obud. 25:​21, 22) Warumelihiwa okwaranya guwo enddimuwa avolowa Mburo Wokoddela-koddela, wali namakutta munddiwa vina wavolowa dila modha vayakani wi akose mwambo wa okupa dhottega. (Onam. 16:​2, 17) Iyene wanvolowana nikami na dhinama wi akupe dhottega dhaye vina dha nlogo. Na ovira wa mudhidhi, Yehova ohoniha kakamwe yatapulela dhilobo esi.—Aheb. 9:​6, 7. w23.10 27 ddima 12

Mudhidhi na mudhidhi mu Nzuni na Mulugu ninofwanyamo nlamulo “mukwelanege.” (Jo. 15:12; Rom. 13:8; 1 Tes. 4:9; 1 Ped. 1:22; 1 Jo. 4:11) Mbwenyi okwela, ekalelo enihu mmurimani mwehu, kawo muttu onwodha wona eli mmurimani mwehu. Ki attu ena anone dhavi wi iyo ninowakwela? Na mazu ehu vina dhokosa dhehu. Dhihikalawo mikalelo dhottiyana-ttiyana dhinlagiha wi ninowakwela abalihu na arogora. Koona dhotagiha dhing’onovi: “Mulogelagane ebaribari.” (Zak. 8:16) “Kalanina murenddele mukalelinyu.” (Mk. 9:50) “Muzuzumelege othithimihana.” (Rom. 12:10) “Mwakelane.” (Rom. 15:7) “Mulevelelagane.” (Kol. 3:13) “Mukamyedhane opwathela mithorho dhenyu.” (Gal. 6:2) “Pangarhazaganina.” (1 Tes. 4:18) “Libihanina murima.” (1 Tes. 5:11) “Mulobelelagane.”—Tia. 5:16. w23.11 9 ddima 7-8

Malabo otene iyo ninokosa dhosakula dhing’ono obe dhinddimuwa, elobo enanikamihedhe okosa dhosakula dhapama okana nroromelo noliba. Malabo otene iyo ninokosa dhosakula ninga esi: mandano, mavego, masunzo, matelo, okana aima vina mabasa. Egahikala yapama ovivuza: ‘Koddi dhosakula dhaga dhinowoniha wi ddihikana ebaribari wila omagomo oli vakukuvi vina elabo eswa mohigonela enele odha? Obe miyo ddinosakula okosa dhilobo dhahene ninga munkosela attu anloga wi kinwodheya okalawo namukalakala?’ (Mt. 6:​19, 20; Lk. 12:​16-21) Nigalibiha nroromelo nehu wi elabo eswa eli vakukuvi ninele okosa dhosakula dhapama. Ninofwanyela vina okana nroromelo noliba wi niwodhe okwaranya makattamiho. Txino ninodhaga ofwara-fwariwa, opattiwa eredda ehina murobwe, obe elobo yina ennikumula. Omaromo, ninodhaga wubuwela wi ninele owodha okwaranya makattamihoya. Mbwenyi akala makattamihoya anogonela—paveneva—vanfwanyela iyo okana nroromelo noliba wi niwodhe ovilela vina nidhowegevi nimulabelaga Yehova n’owagalala.—1 Ped. 1:​6, 7. w23.04 27 ddima 4-5

Yehova onjedhela wi nikose dhilobo mowiwanana na malobelo ehu. Motagiha, txino mbali onokumbirha omabasani wi adhowe o kongresoni. Yehova agakulile dhavi? Agahinvaha guru mbali wi awodhe ologa na muzugu waye, mbwenyi enofuneya mbali okosa mpaddi waye. Odhowa vali muzugu waye wi amukumbirhe, obe egahifuneya omukumbirha mukwaye womabasani wi alabe vamburoni vaye iyene ageyela alabe. Vina orumela muzugu waye ogwaddawo kobiri ya malabo abale anadhowiye omatugumanoni. Yehova onjedhela wi nilobelelege dhilobo esile dhinona iyo wi samakamaka wa iyo. Yezu ohoniha wi malobelo mena ankosihu kagakuliwe momaguva. (Lk. 11:9) Nona kulemena olobela! Kalobelaga na murima wotene dila dhinjene. (Lk. 18:​1-7) Yehova onele wona wi yokumbirha enkosihu jamakamaka vaddiddi wa iyo ottiya ejo, ninowoniha wi nihikana nroromelo vina iyene onele onikamihedha. w23.11 22 ddima 10-11

Yehova wahimupikirhela marho waye Abrahamu wi agahikana mwana vina sabwa ya iyene malogo otene a mwilaboni agahakela mareliho. (Wita 15:5; 22:18) Abrahamu wahimuroromela venjene Mulugu vina wahikana ebaribari wi Mulugu agawakwaniha nipikirhelo naye. Nsaka nene-ntto, Abrahamu wanna vyaka 100 oku Sara wanna vyaka 90, mbwenyi ali ahinatti okana nne mwana mmodha. (Wita 21:​1-7) Masiki dhawene Bibilia onloga dhahi: Abrahamu aroromelaga dhajedhiye, orumela wi onere okala nikolo na malogo menjene ninga mamwaddelele Mulugu. (Rom. 4:18) Weyo onoziwa wi ejile yajedhela Abrahamu yahipadduwa txibarene. Iyene wahikala babi wa Izaki mwana wamujedheliye. Txini yamuttukulela Abrahamu omukuluvela Yehova? Abrahamu wannimuroromela Yehova vina wanziwa-wene wi Mulugu onowodha “opuliha dhiroromelihileye.” (Rom. 4:21) Yehova wahimurumela Abrahamu vina wahimwira muligani sabwa ya nroromelo naye.—Tia. 2:23. w23.12 8 ddima 1-2

Muzombwe onkuluveleya onozuzumela deretu mabasa attomeliwiye. Kobuwela yotagiha yoligana ya Yezu. Yezu kattiya dhilobo bure-bure vina wali muttu wokuluveleya, iyene wannakwaniha mabasa otene amuttomeli Yehova masiki valani orutxa. Iyene wannakwela attu—makamaka anafwara aye—wali womala-nawale wi aperheke egumi yaye. (Jo. 13:1) Enowodheya weyo ofwara yotagiha ya Yezu modhela ovilibihedha wakwaniha mabasa-mabasavi anakeliwe. Ogahiziwe mowakwana-mwene enfwanyeliwe okosa, kalá woviyeviha vina kakumbirha nikamihedho na abali owarala. Kuttiye okosa mpaka vanwodheliwe. (Rom. 12:11) Kavilibihedhe wakwaniha mabasa awo. Okose ejuwene “n’ekalelo yomulabela Mulugu, ehilí yowalabela athu.” (Kol. 3:23) Enoziweya wi weyo oli muttu wohiligana, nona kalá wovipimelela, vina karumela yovonya-yovonyavi enakosiwe.—Gano 11:2. w23.12 26 ddima 8

Jowagalaliha vaddiddi obatiziwa vina okosa mpaddi wa anamudhi a Yehova. Abale abatiziwe akana mandano ofiyedheya na Yehova vina anorumela na mazu a Mwene Davidi aloga: “Onna gari ddule omusakulilenyu, omwithanelinyu okalaga na nyuwo mmusanani mwenyu.” (Masal. 65:4) Yehova onokala txenjewa agasakulaga abale anfuna okosa mpaddi wa murala waye. Iyene onakukusela mwibaribarini abale anfuna okana mandano ofiyedheya na iyene. (Tia. 4:8) Weyo ogamperhekela egumi yawo Yehova nanda obatiziwa onokana mareliho menjene ofiyedha ohijombeliwa elo. (Mal. 3:10; Jer. 17:8) Enoziweya wi obatiziwa kumaromo. Enele ofuneya weyo ovilibihedha, wi odhowegevi okalaga ororomeleya na Yehova masiki ogagumanana dhoweha obe makattamiho. (Koh. 5:​4, 5) Ninga namafwara wa Yezu, weyo onele ovilibihedha ofwara yotagiha yaye na dhotedhene dhisunzihiliye.—Mt. 28:​19, 20; 1 Ped. 2:21 w24.03 8 ddima 1-3

Ki akala nyuwo kamunziveliwa ovira mudhidhi vamodha? Txini enfwanyelinyu okosa? Kobuwelani wili yotagiha ya motto ogasiwe. Motto ogagasiwa kunttidda momaguva-mwene, enofuneya mudhidhi na mudhidhi wikaga kuni. Mufwaraga yotagiha eji, munkoddelani valaboni otamela mudhidhi mung’onovi wa okalaga vamodha? Mutamele okosa dhilobo dhinuzivelani moheli. (Tia. 3:18) Mugaroma vang’ono-vang’ono, munele owodha wunuwiha okwela wenyu. Orihana onofuneya venjene vamateloni. Orihana onoladdanihiwa na Oxigênio. Oxigênio ogahikalewo, motto onottima momaguva. Na mukalelo wakakene, se orihana, okwela oli vamateloni onele wobana momaguva. Mwa mpaddi mwina, mulobwana na mwadhiye agavilibihedha weddihana na nriho okwela wawa oganunuwavi. Txino, weyo onodhaga wubuwela wi onolagiha nriho, mbwenyi mamuno obe mwadhiyo onowona wi weyo onomuriha. w23.05 22 ddima 9; 24 ddima 14-15

Bibilia onowaloga adhari ororomeleya a Yehova apattiwe odhugudheya vina wova sabwa ya amwiddani awa vina sabwa ya makattamiho mena. (Masal. 18:4; 55:​1, 5) Na mukalelo wakene, ninodhaga ofwara-fwariwa oskola, omabasani vina na anamudhi obe na alamuleli. Txino ninodhaga wova okwa sabwa ya makattamiho a egumi anihu. Ejoya egapadduwa ninodhaga ovona ninga mwana ohina nibarelo. Ovano Yehova onnikamihedha dhavi nigafwanyiwa makattamiho ninga aba? Yehova ononilibiha vina ononifwasiha nigatamela mudhidhi wa okala na iyene, ologa na iyene vina wengesa Nzu naye. (Masal. 77:​1, 12-14) Ogakosa ejuwene mudhidhi wetene onagumaniwena makattamiho, elobo yoroma enakose weyo ja otamela nikamihedho na Babi wawo wa wirimu. Kamwaddele Yehova dhilobo dhotene dhinuzuzumiha vina dhinuttukulela wova. Venevo ovuruwane enuwaddela Yehova modhela omwengesa Bibilia. Ogakosa dhawene onele owodha wona nipangarhazo naye.—Masal. 119:28. w24.01 24-25 ddima 14-16

Wi niwodhe wakwaniha yogana ninofwanyela okana efunelo yapama. Okana efunelo yapama enonittukulela ovilibihedha wi nakwanihe yogana yehu. Nona efunelo yehu ya ottidda mabasa egonuwa, kinarutxe wakwaniha yogana yehu. Txini enfwanyela weyo okosa wi okane efunelo yapama? Kalobela okumbiraga efunelo yapama. Yehova onolabihedha muya waye wokoddela wi ovahe efunelo yapama wila wakwanihedhe yogana yawo. Dila dhina ninodhaga okana yogana, sabwani jijuwene enfwanyela iyo okosa. Eji kahiye yabure, mbwenyi enodhaga opadduwa iyo ohikanaga efunelo ya wakwaniha yoganaya. Katanalela dhilobo dhinikoseli Yehova. (Masal. 143:5) Murumiwi Paulo wantanalela mahala a Yehova, eji yanimuttukulela okana efunelo enddimuwa yomulabela Yehova. (1 Kor. 15:​9, 10; 1 Tim. 1:​12-14) Na mukalelo wakakene, weyo ogaroma otanalela dhilobo dhotedhene dhukoseli Yehova onele okana efunelo yapama yowakwaniha yogana yawo.—Masal. 116:12. w23.05 27 ddima 3-5

Babi wehu wa wirimu onowagalala nigatamalaga nzina naye. (Masal. 119:108) Attu ena kaniviwonana ttima vina anojedhela wi ena àsibege vina àlogege pama, kito empadduwa yakene na Yehova? Nne. Nigamutamalaga Yehova, ninomukamihedha iyene olagiha wi Satana ohiloga ottambi mwaha wehu. Dhavi? Iyene ohiloga wi kawo muttu agawodhile okalavi oweddeyana na Yehova vina obarela nzina naye. Satana ohiloga wi kawo muttu ompattiwa dhoweha nanda bawodha okalavi oweddeyana. Iyene vina ohiloga wi iyo notene nigahimunyanyala Yehova kovahiwa elobo ya ttima na muttu mwina. (Job 1:​9-11; 2:4) Mbwenyi Job mulobwana wororomeleya ohilagiha wi Satana muttambi. Kito mwa mpaddi wehu? Masaka abano muttu-muttu wa iyo ohikana gari ya obarela nzina na Yehova vina omwagalaliha modhela omulabela nororomeleya. (Gano 27:11) Eji gari enddimuwa vaddiddi. w24.02 8-9 ddima 3-5

Vavirile nsaka na Mizé vina Josuwé, Yehova ohattoma anamattonga wi eddihege nlogo naye. Vasogorhova, masaka a amwene, Yehova ohasakula anamavuhulela wila eddihe nlogo naye. Amwene ororomeleya annakela malago na anamavuhulela. Motagiha, Mwene Davidi wahirumela noviyeviha olagiwa na namavuhulela Natan. (2 Sam. 12:​7, 13; 1 Map. 17:​3, 4) Mwene Josafat wahiwelela malago a namavuhulela Jaaziyel wila aziwe yafwanyeliye okosa na nlogo, ejuwene egàttukulele awene wunuwihavi waroromela anamavuhulela a Mulugu. (2 Map. 20:​14, 15) Mwene Ezekiya vasegedheyiliye wahimutamela namavuhulela Izaiya. (Iza. 37:​1-6) Dila dhotene dhatamela amwene ofwara malago a Yehova awene anrurihiwa vina nlogo nakala nobareleya. (2 Map. 20:​29, 30; 32:22) Yannoneya-wene wila Yehova wela walabihedha anamavuhulela wila eddihe nlogo naye. w24.02 21 ddima 8

Satana onfuna wi iyo nandane na attu ahinnikamihedha okosa efunelo ya Yehova. Masaka abano ninofuniwana okala txenjewa mottiyana na abali a o Éfezo sabwani masaka abano kinrutxa okalaga na attu, ottiya bahi kove na kove vina mu redes sociais. Kanikwekwetteye na yubuwelo ya mwilaboni yawi kahiyo yabure okana mweddelo wohifwanyelela. Iyo ninoziwa wi oku ottambi. (Ef. 4:​19, 20) Nona enokala yamalago ovivuza: ‘Miyo ddinovyang’anela, ddinorabela okana mandano na attu o mabasani, oskola obe na attu ena ahinriha magano oligana a Yehova? Na oliba murima ddinobarela magano oligana a Yehova masiki akala attu ena kanriha, obe anona ninga ddinottabwiha dhilobodha?’ Ninga munlagiha 2 Timóteo 2:​20-22, enofuneya vina okala txenjewa nigasakulaga amarho mmulogoni. Kanidduwale wi ninodhaga omaga mandano na abali ahinanikamihedhe odhowavi nimulabelaga Yehova. w24.03 22-23 ddima 11-12

Wahiromaga wubuwela mukalelo oli Yehova? Ebaribari wi iyo kaninwodha omona Yehova, mbwenyi Bibilia onomuloga Yehova na mikalelo dhinjidhene. Bibilia onloga wi Yehova “ddi nzuwa, ddi ebarelo” vina “motho ontolotxa.” (Masal. 84:11; Aheb. 12:29) Wonihiwa okanile Ezekiyel, ohimuladdaniha Yehova na malugu ozerimela, mujila wittwile vamottoni vina ekwi. (Ezek. 1:​26-28) Vowi iyo kannimona Yehova, txino enokala yorutxa orumela wi iyene ononikwela. Abale agumanilena makattamiho mwigumi mwawa anodha wubuwela wi txipo Yehova kagawodhile wakwela. Yehova onononelamo mukalelo oniviwamo iyo vina onoziwa wi enodhaga okala yorutxa omususela. Wi anikamihedhe, ononilagiha mBibiliani wi iyene Mulugu wokwela. Yehova okwela, Bibilia onloga wi Mulugu ddi okwela. (1 Jo. 4:8) Vina ku okwela okuwene oneddiha dhotene dhinkosiye. Okwela wa Mulugu ku onddimuwa-wene vina ohikana ewodhelo enddimuwa enapurihamo abale otene animukwela.—Mt. 5:​44, 45. w24.01 26 ddima 1-3

Yehova wahimuttoma Mizé wila àsogorhele ana Izrayel obudduwa mw’Ejipitu vina na mutana Yehova wanlabihedha murabo vina na mattiyu wanlabihedha motto wila àweddihe. (Obud. 13:21) Mizé wanfwara murabo obule, ofiyedha wattukulela ana Izrayel Mwinje Wofila. Nlogo nahittiddiwa wova onddimuwa monelani wi ali vari oku mwinje, mpaddi mwina anyakoddo a Faraó. Mbwenyi Mizé kavonyile. Ddi Yehova ofunile ottukulela nlogo naye wenewale, nona amulabihedha Mizé wila akose ejuwene. (Obud. 14:2) Ejo yahinvaha Yehova gari enddimuwa ya woniha owodha waye na mukalelo wowumiha milomo. (Obud. 14:​26-28) Mwari mwa vyaka 40 dhafwarela, Mizé wahidhowavi akuluvelaga malago a Yehova wila awodhe weddihana nlogo nttile mwiddeddereni. (Obud. 33:​7, 9, 10) Yehova wanloga na Mizé, alabihedhaga murabo vina Mizé wanfiyedhana nlogo malago otene amwaddela Yehova. Ana Izrayel annona kakamwene wi Yehova wela omulabihedha Mizé wila àweddihe. w24.02 21 ddima 4-5