Odhowegevi Onfwaraga Yezu Ogamala Obatiziwa

1-2. Mareliho gani anakela muttu agamala obatiziwa?

JOWAGALALIHA vaddiddi obatiziwa vina okosa mpaddi wa anamudhi a Yehova. Abale abatiziwe akana mandano ofiyedheya na Yehova, anorumela mazu aba a Mwene Davidi, ologile: “Onna gari ddule omusakulilenyu, omwithanelinyu okalaga na nyuwo mmusanani mwenyu.”—Masal. 65:4.

² Yehova onokala txenjewa agasakulaga abale anfuna okosa mpaddi wa murala waye. Ninga moonelihu nsunzo nivirile, iyene onakukusela mwibaribarini abale anfuna okana mandano ofiyedheya na iyene. (Tia. 4:8) Weyo ogamperhekela egumi yawo Yehova nanda obatiziwa onokana mandano avawoka na iyene. Kakuluvela wi ogamala obatiziwa Yehova onele wurubwihedha mareliho ofiyedha ohijombeliwa elo.—Mal. 3:10; Jer. 17:​7, 8.

3. Mukristu oviperhekile vina obatiziwe onttukula muttorho gani? (Kohelét 5:​4, 5)

³ Enoziweya wi obatiziwa kumaromo. Enele ofuneya weyo ovilibihedha, wi odhowegevi okalaga ororomeleya na Yehova masiki ogagumanana dhoweha obe makattamiho. (Kengesa Kohelét 5:​4, 5.) Ninga namafwara wa Yezu, weyo onele ovilibihedha ofwara yotagiha yaye na dhotedhene dhisunzihiliye. (Mt. 28:​19, 20; 1 Ped. 2:21) Nsunzo ntti ninele wukamihedha okosa ejuwene.

ONFWARAGEVI YEZU MASIKI NA MAKATTAMIHO VINA DHOWEHA

4. Na mukalelo gani onfuniwana arumiwi a Yezu ottukula pingirhizi? (Luka 9:23)

⁴ Kuwubuwele wi ogamala obatiziwa txipo kunagumanena makattamiho. Yezu wahawaddela anamafwara aye wi agahigumanana makattamiho, mwa ologa wi muttu-muttu avijele pingirhizi yaye. Awene anfwanyela okosa ejuwene “malabo otene.” (Kengesa Luka 9:23.) Yezu afuna aloge wi anamafwara aye elege otabuwa mudhidhi wotene? Kahiyo mwenemo. Iyene afuna ánonihedhemo wi ottiya mareliho akelaní, agangumanana makattamiho. Makattamiho mena agali orutxa vaddiddi.—2 Tim. 3:12.

5. Mareliho gani àpikirheli Yezu abale anivilibihedha?

⁵ Txino weyo wahigumanana widdiwa na anamudhi, obe txino ohittiya dhilobo dhamakamaka mpaddi womaningoni sabwa ya ofuna wika vamburoni voroma Omwene wa Mulugu. (Mt. 6:33) Dhigapadduwa dhilobo ninga esi, kakana nikuluvelo wi Yehova onoziwa dhilobo dhotedhene dhinimukoseliwe. (Aheb. 6:10) Txino, weyo ohona na mento awo wi mazu aba a Yezu bebaribari: “Muthu othiyile numba yaye, peno abalaye, peno arogoriye, maye, babe, anaye, mindda dhaye, thangwi y’oddiroromela miyo vina [muthaka], ddinakele esodhá senjedhedhiwevo dila zana. Ddinarome wakela ovanene mwilaboni-mpuno: numba, abali, arogori, amayi, ababi, ana, mindda vamodha na widdiwa; mwilaboni enadhe onere wakelamo egumi yohimala.” (Mk. 10:​29, 30) Kavali waganyedha wi mareliho akeliwe ahinjiva vaddiddi opitta guru ekosilewi.—Masal. 37:4.

6. Ogamala obatiziwa enfuneyelani odhowavi owanagana “monlelo abure a mwili”?

⁶ Ogamala obatiziwa enele ofuneya odhowavi owanagana “monlelo abure a mwili.” (1 Jo. 2:16) Sabwa ya orava yothega ya Adamu. Dila dhina onelege oviwoona ninga mwaviwamo murumiwi Paulo. Iyene ohiloga dhahi: “Mmurimani mwaga ddinoziveliwa na magano a Mulugu; vano mmaningoni mwaga ddinofwanyamo makalelo mena angudulana na abale anziveliwa murima waga, anddimagelela okala mudhari wa yothega.” (Rom. 7:​22, 23) Dila dhina onelege okumuwa vaddiddi sabwa ya dhovonya dhawo. Mbwenyi ogatanalela nipikirelo nimukoseliwe Yehova mudhidhi omperhekeliwe egumi yawo, onele owodha okana guru ya owanana yoweha-yowehavi enagumanena weyo. Ogagumanana dhoweha, nipikirhelo nimukosiliwe Yehova ninele wukamihedha. Ejoya empadduwa dhavi?

7. Nipikirhelo nimukoseliwe Yehova ninawukamihedhe dhavi odhowavi ororomeleyaga na iyene?

⁷ Weyo ogamperhekela egumi yawo Yehova, onovikodda wamwinya, eji entapulela wi onelege okodda elobo-txilobo enimusilidha Yehova. (Mt. 16:24) Nona ogagumanana dhoweha kunakale mudhidhi mwinjene wubuwelaga enfanyeliwe okosa vowi onele oziwa enakosiwe, odhowavi ororomeleyaga—na Yehova. Weyo onele odidelavi omwagalaliha Yehova. Ogakosa dhawene onele okala ninga Job. Masiki vagumaniliyena makattamiho orutxa vaddiddi, iyene ohiloga dhahi: “Mpaka okwa waga, kaddinatxelele woniha okoddela waga murima!”—Job 27:5.

8. Otanalela nlobelo nawo noviperheka ninawukamihedhe dhavi orabela yoweha?

⁸ Otanalela mazu alogiliwe munlobeloni mudhidhi wamperhekeliwe egumi yawo Yehova, anele wuvaha guru ya opemberha yoweha. Motagiha, weyo ogahitagiha omugayela muttu oteliwe obe otelile? Ejo kigapawadduwile! Sabwani ohimpikirela Yehova wi txipo kugakosile elobo ninga ejuwene. Ogahirumelihe dhubuwelo dhabure ovolowa mmurimani mwawo kunavivahe mabasa a ofuneya wili ovifurula mwa dhubuwelo eso. Ogakosa dhawene “[kunanyigale] munnyigala aliba otakala murima, [kunarave] meddelo awa abure.”—Gano 4:​14, 15.

9. Otanalela nlobelo nawo noviperheka ninawukamihedhe dhavi wika vamburoni voroma dhilobo dhomuyani?

⁹ Ki akala onofwanya mabasa anattambiregiwe korowa yinjene mbwenyi ahinovahege mudhidhi wa wona matugumano? Weyo kunavivuze elobo gani enakosiwe. Sabwani ohinatti ofanya mabasaya, weyo wahimala ogana wi kugattiyile elo wutximiha wonaga matugumano. Nona, kunakwekwetteye nne vang’ono burumela mabasaya, nomala vasogorhova buroma oviparhapattela wi wiwananihe dhilobo dhomuyani. Dhigapadduwa dhilobo ninga esi, otanalela yotagiha ya Yezu enele onikamihedha venjene, iyene wahigana omwagalaliha Yehova mudhidhi wotene, dhahene ninga ekosile Yezu, iyo vina ninfuna nimwagalalihe Babihu.—Mt. 4:10; Jo. 8:29.

10. Ogamala obatiziwa Yehova onokamihedhe dhavi odhowavi onfwaraga Yezu?

¹⁰ Ebaribari wi makattamiho vina dhoweha dhinele wuvaha gari ya woniha efunelo yawo ya odhowavi onfwaraga Yezu. Vina kakana nikuluvelo wi Yehova onele wukamihedha okosa ejuwene. Va 1 Korinto 10:13 Bibilia onloga dhahi: “Mulugu onovirihamo dhipikirheliye, kanarumele wi mufwanyiwe manyengetho ahinwodha nyuwo owanana. Mudhidhi wonyengethiwa, Mulugu,onoulibihani, muwodhe obudduwamo, mupemberhe.”

ENWODHEYA DHAVI ONFWARAGAVI YEZU

11. Mukalelo gani wapama wa onfwara Yezu? (Koona vina foto.)

¹¹ Yezu omulabela Yehova na murima wotene, wanimulobelela Yehova mudhidhi wotene. (Lk. 6:12) Ogamala obatiziwa, akala onele ofuna onfwaragavi Yezu enele okala yamakamaka vaddiddi okosaga dhilobo dhinawukamihedhe omususela Yehova. Bibilia onloga: “Apa vafiyilehu, ndhoweni nisogorhenavi dila eneddehuna.” (Fil. 3:16) Mudhidhi na mudhidhi onelege wiwa mapadduwo a abali na arogora avilibihedhile venjene omuttiddela Yehova mabasa. Txino ena avilibihedha okosa Eskola ya Anamalaleya a Omwene obe omwalela wego wajombeliwa anamalaleya a Omwene. Weyo ogawodha kavilibihedhe okosa dhogana ninga esi. Nlogo na Mulugu ninovilibihedha olaba venjene mmabasani a olaleya. (Mer. 16:9) Ki akala onogumanana makattamiho ahinuwodhiha okosa dhilobo esi ovanene? Kuviladdanihe na abali abo, wubuwelaga wi kunna ttima sabwa ya awene okosa venjene. Yamakamakaya ja odhowavi ovilelaga. (Mt. 10:22) Kudduwale, Yehova onowagalala venjene na ejile enwodhiwe okosa mowiwanana na makattamiho angumanana weyo vina guru yawo. Jijene enawukamihedhe odhowavi onfwaraga Yezu ogamala obatiziwa.—Masal. 26:1.

12-13. Onakose nni ogona wi onowobanela dhilobo dhomuyani? (1 Korinto 9:​16, 17) (Koona vina kasha “Kattamagagavi.”)

¹² Ki akala mwa ovira wa mudhidhi onozinddiyela wi onkosa malobelo mamodhavi, vina makalelo awo olaleya kansadduwa ankala akene? Txino onowobanela omwengesa Bibilia. Akala dhilobo ninga esi dhinopadduwa bumalile obatiziwa, kuwubuwele wi ohittawiwa muya wokoddela wa Yehova. Vowi nili attu ohiligana, mukalelo enviwehumo dila dhina onelege okala wottiyana. Ogazinddiyela wi onowobanela dhilobo dhomuyani karoma otanalela yotagiha ya murumiwi Paulo. Iyene wanivilibihedha ofwara yotagiha ya Yezu, masiki dhawene wanziwa wi mudhidhi na mudhidhi kakanege efunelo enddimuwa ya okosa ejile yajedheliwana iyene okosa. (Kengesa 1 Korinto 9:​16, 17.) Jijene emuttukuleli Paulo ologa dhahi: Masiki ddihikosaga na efunelo yaga ddinottiddavi masaba attomeliwemi. Na mazu mena Paulo wahigana odhowanavi vasogorho mabasa a olaleya ahitanalaga mukalelo waviwiyemo.

¹³ Dhahene ninga yapadduwa na Paulo, kukose dhogana mowiwanana na eniviwamo weyo ogane okosa dhapama masiki mmurimani mwawo ohikanaga efuneloya ejo. Ogadhowavi okosaga oderetu na ovira wa mudhidhi mubuwelo wawo onele otxinja buroma okosa dhilobo dhapama. Ovilibihedhe oliba mpaddi womuyani. Dhilobo dhinaukamihedhe odhowavi onfwaraga Yezu ogamala obatiziwa, nsunzo nomwinya, olobela, odhowa omatugumanoni vina mabasa a olaleya. Ottiya ejo abali agaziwa wi onomulabela Yehova n’ovilela, awene anele olibiheya.—1 Tes. 5:11.

“MUVIPIME MWANYA . . . VIVUZANI MWANYA”

14. Dhipaddi gani dhili dhofuneya weyo ovipepesa mudhidhi na mudhidhi, vina sabwaya jani? (2 Korinto 13:5)

¹⁴ Elobo yina enawukamihedhe ogamala obatiziwa ku ovipepesa wamwinya mudhidhi na mudhidhi. (Kengesa 2 Korinto 13:5.) Mudhidhi na mudhidhi oromege opima dhilemelelo dhawo wi wone akala dhilobo dhomuyani dhinowedda pama, motagiha, akala onowodha olobela mudhidhi wotene, wengesa vina omusunza Bibilia, wona matugumano vina olaleya. Katamela marhe a opurelamo venjene dhilobo esi. Motagiha, karoma ovivuza: ‘Miyo ddinowodha watapulelamo attu ena masunziho oroma a Bibilia? Enofuneya okosa elobo yina wi ddizuzumele venjene mabasa a olaleya? Malobelo aga anononeleyamo vina anowoniha wi ddinomukuluvela Yehova? Ddinowona matugumano otene? Ddinakose elobo gani wi ddifwaseyelege matugumano vina ovaha dhowakula?’

15-16. Txini esunziliwe na Robert sabwa ya opemberha yoweha?

¹⁵ Elobo yina yamakamaka ja oziwa dhowobana dhawo. Mbali onkuweliwa Robert ohiloga nipadduwo ninoniha ttima ya oziwa dhawobana dhehu, iyene ohiloga dhahi: “Baddina vyaka 20, ddalaba ganyo ya mudhidhi mong’onovi. Labo nimodha muyana walaba na miyo, wahiddiloba wi ddigaworuwa nidhowe vatakulu vaye. Iyene wahiloga wi vatakuluva nigalivo attu eli bahi vina ‘nigahivega venjene.’ Vamaromo ddihitamela mwaha wa ottawa, vasogorhova ddahikodda vina ddahimutapulelamo mwahaya wakoddela miyo.” Robert ohipemberha yoweha, vina ejo elobo yotamaleleya. Movira wa mudhidhi, obuwelaga ejile yapadduwile, Robert onowubuwela wi egahikala yaderetu mudhidhene obule kukosa elobo yottiyana. Iyene ohiloga dhahi: “Vamaromo-vene na oliba murima ddigahikodda niwobona, dhahene ninga ekosile José na mwadhi Putifar. (Wita 39:​7-9) Ologa ebaribari, yali yorutxa vaddiddi okodda mudhidhi obule, eji ehoniha wi yanfuneya olibiha mandano aga na Yehova.”

¹⁶ Dhahene ninga Robert, jamakamaka vaddiddi oroma opepesa dhubuwelo na dhowobana dhawo. Masiki ogapemberha yoweha, karoma ovivuza, ‘Ddihigonela vaddiddi okoddawa?’ Ogazinddiyela wi enofuneya oviwogolela, kuvipwattelihe muladdu. Wagalale sabwa ya owodha ozinddiyela yowobana yawo na ottaga. Omulobelele Yehova, omwaddelaga yowobana yawo, vina kakosa dhilobo wi olibihe efunelo ya omwiwelela Yehova.—Masal. 139:​23, 24.

17. Empadduweli Robert epattile dhavi nzina na Yehova?

¹⁷ Txini esunzilewi na Robert sabwa ya otxatxama dhoweha. Ninosunza elobo yina na nipadduwo na Robert. Koona elogiliye: “Vakoddile miyo niwobo naye, iyene ohiloga dhahi, ‘Weyo opemberha yoweha!’ Venevo ddahinvuza yafuniye ologa na mazu aba. Iyene wahiddipanga wi marho waye, waligi Munamoona wa Yehova, wahimwaddela wi azombwe otene ali Anamoona a Yehova ankala ninga anakattenddewa, kokana gari ya okosa elobo yabure agahikosa. Venevo wahimwaddela wi miyo ddafuna dduwehe. Ddahagalala sabwa ya oziwa wi ddahikoddeliha nzina na Yehova.”

18. Txini eganile weyo okosa ogamala obatiziwa? (Koona vina kasha “Mitoma Minli Dhinaziveliwe Weyo.”)

¹⁸ Ogamperhekela egumi yawo Yehova nanda obatiziwa, onolagiha wi onofuna ottittimiha nzina naye kintanala elobo-elobovi enapadduwe. Kakana nikuluvelo wi Yehova onoziwa makattamiho orutxa na dhoweha dhingumaniwena. Iyene onele oruriha guru enkosiwe ya odhowavi omuroromelaga. Kakuluvela wi na muya waye wokoddela, Yehova onele wuvaha guru enfuniwe. (Lk. 11:​11-13) Na nikamihedho na Yehova, onele owodha odhowavi onfwaraga Yezu ogamala obatiziwa.