Novemburu

Akala weyo ohikana aima, wakamihedhe osasanyedha dhowakula mowiwanana na vyaka dhawa. Dila dhina makani orutxa aniwanana na makattamiho a vamateloni na meena anoniwa ninga otota manyazo, anologiwa vamatugumanoni, masiki dhawene txino enele okalawo ddima modha obe bili dhigawodhile anawo ovaha dhowakula. Ottiya ejo omukamihedhe mwanawo ononelamo wi kanatonyiwe dila dhotedhene dhinavenyihiye nlada, dhawene attu ena agatonyiwa ottiya iyene wi avahe dhowakula kanasilidhiwe. (1 Tim. 6:18) Notene nihikana ewodhelo ya osasanyedha dhowakula dholibiha dhinimuttittimiha Yehova vina dhinalibiha abali ehu. (Gano 25:11) Dila dhina ninodhaga ovaha yowakula mowiwanana na ejile enipadduweli, mbwenyi ninofwanyela okala pasope wila ninalogetxe vopitta dhinipadduweli. (Gano 27:2; 2 Kor. 10:18) Ottiya ejo, dhowakula dhehu dhinofwanyela wiwanana na Yehova, Nzu naye vina nlogo naye orugunuwa elabo yotene.—Ovuh. 4:11. w23.04 24-25 ddima 17-18

Okwela ononittukulela ovyang’anela vina ovilela. (Mt. 22:​37-39) Omukwela wehu Mulugu ononikamihedha olaleya novilela masiki nipattiwaga makattamiho-makattamihovi. (2 Tim. 1:​7, 8) Vowi iyo ninowakwela abale ahinimulabela Yehova, ninodhowavi nilaleyaga, nilabihedhaga telefoni obe makarta. Iyo kaniniyelela mundduni ninojedhela wi labo-labovi abale ahinimulabela Yehova anele otxinja mweddelo wawa baroma okosa dhilobo dhapama. (Ezek. 18:​27, 28) Iyo vina ninowakwela abali ehu. Ninotonyihedha wakwela abali ehu modhela olibihana vina okamihedhana. (1 Tes. 5:11) Dhahene ninga munkamihedhana anyakoddo mukoddoni, iyo vina ninolibihana. Iyo txipo kanigafunile omunyimula mbalihu obe murogorihu vina wiyihedhana obure na obure. (1 Tes. 5:​13, 15) Enowodheya iyo otonyihedha okwela modhela wariha abali attomeliwe weddiha mulogo—1 Tes. 5:12. w23.06 10 ddima 6; 11 ddima 10-11

Mukalelo mmodha enanikamihedhe olibiha nroromelo nehu otanalela yobolo. Yobolo nikuluvelo ninoniha wi Yehova onele wakwanihedha dhipikirheliye. Otanalela sabwaya enivahile Yehova yobolo na dhetene dhikosiliye wi mwanaye adhe anikwele, enele olibiha nroromelo nehu wi nipikirhelo na okala namukalakala mwilaboni eswa ninele wakwanihedheya. Ninlogelani ejuwene? Wi anobole, Yehova ohimuruma Mwanaye wokweleya wi adhe velaboni ya vati abaliwe ninga muttu se yottega. Vali Yezu velaboni ya vati, iyene ohipattiwa makattamiho owinjiva. Vasogorhova iyene ohitabutxiwa vaddiddi mpaka okwa. Se waganyedha muttengo opitxile Yehova munddimuwa vaddiddi! Mulugu wehu wokwela txipo kagattiyile wi Mwanaye adhe velaboni ya vati, apiwe wi nikane egumi yaderetu malabo mang’onovi. (Jo. 3:16; 1 Ped. 1:​18, 19) Vowila Yehova ohipitxa muttengo munddimuwa vaddiddi iyene onele okosa muli mwetemwene wi nipikirelo na egumi yapama mwilaboni eswa nakwanihedheye. w23.04 27 ddima 8-9

Koddi Yehova okana efunelo ya wavenyiha amarafula? Kavali waganyedha. Iyene ohavudhelela anamaleba enjene a Bibilia oleba mapikirhelo a ovenyihiwa mukwani anapadduwe musogorho. (Iza. 26:19; Ovuh. 20:​11-13) Vina Yehova agapikirhela elobo, onowakwanihedha. (Jos. 23:14) Txibarene Yehova okana efunelo enddimuwa ya wavenyiha abale akwile. Katanalela mazu alogile Job. Iyene wankuluvela wi masiki kókwa, Yehova agahinvenyiha mukwani wi akalewo wili. (Job 14:​14, 15) Yehova ohikana efunelo yakene ya wavenyiha mukwani alabeli aye otene. Iyene onofuna wawiyihedha wili okalawo, na egumi yaderetu vina n’ohagalala. Ki niloge dhavi sabwa ya attu mabiliau menjene akwile ahana gari ya osunza mwaha wa Yehova? Mulugu wehu wokwela onele wavenyiha vina mukwani. (Mer. 24:15) Iyene onofuna wavaha wili gari ya okala amarho aye wi akalewo namukalakala velaboni ya vati.—Jo. 3:16. w23.04 9 ddima 5-6

Onalibihe dhavi njedhelo nawo? Akala njedhelo nawo tta okala velaboni ya vati namukalakala kengesa mapadduwo a Bibilia anloga sabwa ya paraizu vina otanalele. (Iza. 25:8; 32:​16-18) Kobuwela mukalelo enakale egumi mwilaboni eswa. Vina kavubuwele buli mwenemo. Nigatamela mudhidhi wi nitanalele mukalelo onakale egumi yehu mwilaboni eswa, masoso anonihu ovanene anakale ninga “kahiyo elo.” (2 Kor. 4:17) Njedhelo ninivahile Yehova ninele onilibiha. Iyene ononivaha dhotene dhinfunihu wi nakele guru yaye. Nona ogatamela nikamihedho wi wakwanihe mabasa attomeliwiwe, owodhe owanana makattamiho obe odhowegevi okanaga wagalala kanfugulele Yehova murima wawo na nlobelo, katamela malago aye modhela okosa nsunzo nomwinya. Karumela nipangarhazo vina nikamihedho na abali ena. Mudhidhi wotene kavilibihedhe otanalela mukalelo onakale egumi mparaizu. Ogakosa dhawene Mulugu onele wuwaraliha na owodha waye onddimuwa wi owodhe ovikoma mmakattamihoni mwetemwene.—Kol. 1:11. w23.10 17 ddima 19-20

Iyo nihikana mwaha dhinjene dhinnittukulela omutamalela Yehova nigalobelaga. Enowodheya omutamalela Yehova sabwa ya dhilobo dhotene dhina iyo; sabwani, mivaho dhotene dhawakwana dhinda wa iyene. (Tia. 1:17) Motagiha, ninomutamalela Yehova sabwa ya dhilobo dhokoddela dhittanddiliye mwilaboni. Ninomutamalela sabwa ya onivaha egumi, murala wehu, amarho ehu vina njedhelo na musogorho. Kanidduwale omutamalela Yehova sabwa ya gari enivahiliye ya okala amarho aye. Txino enofuneya ovilibihedha wubuwela mwaha dhina iyo dha omutamalela Yehova. Attu enjene masaka abano kanziwa otamalela. Awene anovilibihedha otamela okana dhinfunani oku adduwalaga otamalela dhilobo dhinani. Iyo nigapattiwa na mikalelo esi, malobelo ehu anoroma okala muddonddonddo wa dhokumbirha dhehu bahi. Wi ejene enapadduwe ninofwanyela wubuwela mudhidhi wotene otamalela dhilobo dhinnikosela Yehova.—Lk. 6:45. w23.05 4 ddima 8-9

Ninga Babi wokwela, Yehova kanziveliwa aganona nitabuwaga. (Iza. 63:9) Masiki dhawene, iyene kannibarela wi nihipattiwe makattamiho orutxa anladdanihiwa na minje vina motto. (Iza 43:2) Mbwenyi iyene onele onikamihedha “ovira” mmakattamihoni abo otene. Vina txipo kanarumele wi iyo nigweliwe makattamiho anagonele okala nokala-wene. Ottiya ejo iyene onivaha muya waye wokoddela wi niwodhe ovilela. (Lk. 11:13; Fil. 4:13) Nona ninokuluvela wi mudhidhi wotene ninele okana ejile ennijombela wi niwodhe ovilela vina ororomeleya vamentoni va Yehova. Yehova onjedhela wi nimukuluvele. (Aheb. 11:6) Masaka mena makattamiho ehu anokala manddimuwa ofiyedha wubuwela wi kaninawodhe ovilela. Ninodhaga waganyedha wi Yehova kananikamihedhe. Mbwenyi Bibilia ononaddela wi na guru dha Yehova enowodheya iyo owela mwango. (Masal. 18:29) Nona ottiya waganyedha akala Yehova onele onikamihedha, ninofwanyela olobela venjene na nroromelo, na nikuluvelo wi iyene onele wakula malobelo ehu.—Tia. 1:​6, 7. w23.11 22 ddima 8-9

Okwelana onoviha ninga motto ondha wa Yehova. Mazu aba anowalibiha atelani wi enowodheya nyuwo, otonyihedha okwelana watxibarene muttu na mukwaye. Okwelana watxibarene vina wamukalakala ontonyihedhana mamuni na mwadhiye, ondha sabwa ya ovilibihedha wawa. Motagiha, karoma wubuwela motto ogasiwe—wi mottoya odhowevi ottiddaga enofuneya wikagavo kuni, ogahikale txenjewa mottoya onodha ottima. Na mukalelo wakakene, okwelana wa mamuni na mwadhiye, onele odhowavi okalaga wolibene—aweneyá agazuzumela matelo awa. Txino, atelani anodhaga wona wi matelo awa anowobana, makamaka akala awene anowinjiveliwa mittorho ninga oyelega, makattamiho a egumi obe walela aima. Wi motto wa Yehova ottiddegevi vamuralani, muteli na muteliwi anofwanyela ovilibihedha okana mandano oliba na Yehova. w23.05 20-21 ddima 1-3

Txini enfwanyelihu okosa wi nunuwihe oliba murima? Enowodheya amambali ehu onikokomeza iyo okala attu oliba murima, mbwenyi awene kanwodha onittiyedha mukalelo obu dhahene ninga ennittiyedhani nifumo. Wunuwiha oliba murima enkala ninga wunuwiha ewodhelo eswa. Mukalelo mmodha wa osunza ewodhelo eswa ja ofwaseyela wang’ana enkosa namasunzihaya vina ofwara yotagiha yaye. Nekalelo yakene iyo ninele osunza okala attu oliba murima modhela wawang’ana attu anlagiha mukalelo obu vina ofwara yotagiha yawa. Dhahene ninga Daniyel iyo ninofwanyela oziwa pama Nzu na Mulugu. Ninofwanyela okana mandano ofiyedheya na Yehova modhela ologa na iyene mudhidhi wotene. Ottiya ejo, ninofwanyela omukuluvela Yehova vina okuluvela wi mudhidhi wotene iyene onele onikamihedha. Nigakosa dhawene mudhidhi onehiwe nroromelo nehu ninele oliba murima. Attu oliba murima dila dhinjene anorihiwa na attu enjene. Vina enowattukulela attu ofewa murima omuziwa Yehova. Iyo nihikana mwaha dhapama dhinnittukulela oliba murima. w23.08 2 ddima 2; 4 ddima 8-9

Na elogelo ya Egregu nzu ntti opima nalabihedhiwa wi epimiwe mijila dha ttima metal. Iyo ninofwanyela opima dhiniwehu vina dhinengesihu wi none akala s’ebaribari. Eji jamakamaka mwa iyo veneva vanaddamela goyi enddimuwa. Nihinatti orumela dhilobo dhinloga attu, ninofwanyela olabihedha ewodhelo yehu ya wubuwela wi nipime dhinengesihu obe dhiniwihu na esile dhinloga Bibilia vina dhinloga nlogo na Yehova. Nigakosa dhahene, iyo kaninapupurutxiwe na miselu dhottambi dhinloga adomonyo. (Gano 14:15; 1 Tim. 4:1) Ninga nikuru, iyo ninoziwa wi nlogo na Yehova ninele oviluwa mu goyini enddimuwa. Mbwenyi muttu-muttu wa iyo, kanziwa enapadduwe mangwana. (Tia. 4:14) Akala iyo ninele wona goyi enddimuwa obe kaninone, iyo ninele wakela egumi yohimala nigakalavi attu ororomeleya. Nona iyo notene nizuzumele njedhelo nehu nowagalaliha vina nikale ovisasanyedhene nijedhaga labo na Yehova! w23.06 13 ddima 15-16

Iyo kaninziwa mukalelo onakwanihedheye mavuhulo mena a mBibiliani. (Dan. 12:​8, 9) Masiki iyo nihinonelemo mowakwana-mwene mukalelo onakwanihedheye mavuhuloya, eji kintapulela wi kanakwanihedheye. Se waganyedha, iyo ninokuluvela wi Yehova onele odhowavi aniziwihaga esile dhinfwanyelihu oziwa nsakana nigafiya, dhahene ninga mukosiliye nsaka na wale. Ovuwihiwa wa mazu awi “dhetedhene dhifwasa, kulí yawopiha” onele opadduwa. (1 Tes. 5:3) Ottiya ejo makuru a politika a mwilaboni anele olupela relijiau yonyengetta vina anele otolotxa. (Ovuh. 17:​16, 17) Agamala anele olupela nlogo na Mulugu. (Ezek. 38:​18, 19) Mapadduwo aba otene anele ottukulela koddo yomariha ya Armagedoni. (Ovuh. 16:​14, 16) Iyo nikana ebaribari ya wi esi dhotene dhinele wakwanihedheya mohigonela. Oku nijedhelaga wakwanihedheya wa mapadduwo aba nidhowegevi nimutamalelaga Babihu wa wirimu modhela ofwaseyela mavuhulo a mBibiliani vina wakamihedha attu ena okosa yakene. w23.08 13 ddima 19-20

Mudhidhi waloga murumiwi paulo sabwa ya nroromelo, njedhelo vina okwela, ohipuliha na mazu aba, mwa mikalelo esi dhotene munddimuwaya okwela. (1 Kor. 13:13) Paulo ologele nni dhahene? Musogorho mapikirhelo otene a Mulugu anele wakwanihedheya, nona kaninafune vina nroromelo nne njedhelo. Mbwenyi ninele odhowavi nimukwelaga Yehova vina attu ena. Txibarene okwela kunamale. Vina nigakwelanaga ninowoniha wi nili Akristu atxibarene. Yezu ohawaddela arumiwi aye: “Mugakwelanaga, athu etene anoziwa wi muli—anamasunza aga.” (Jo. 13:35) Okwela ononiwananiha. Paulo ohiloga wi okwela “onowakwaniha wiwanana wa athu.” (Kol. 3:14) Murumiwi Joau ohileba: “Onimukwela Mulugu, amukwelege vina mukwaye.” (1 Jo. 4:21) Nigakwelagana ninowoniha wi ninomukwela Mulugu. w23.11 8 ddima 1, 3

Bibilia onoladdaniha egumi ya Mukristu na ottamaga. Anamattamaga anawodhe ottamaga mpaka omagomo, anele wakela egumi yohimala. (2 Tim. 4:​7, 8) Iyo ninofwanyela ovilibihedha odhowagavi nittamagaga, sabwani ohalile mudhidhi mung’onovi wi nifiye omagomo wa ottamagawa. Murumiwi Paulo ohiloga enanikamihedhe ottamaga mpaka omagomo. Iyene onaddela “ndhoweni nírule muthorho wotene . . . nithamage na ntidi mudila ennitonyihedha Mulugu.” Paulo wafuna aloge wi Mukristu kanakane muttorho wottukula? Kahiye mwenemo. Iyene waloga wi ninofwanyela orula mittorho dhohifuneya. Mittorho esi dhohifuneya dhinodhaga onizuzumiha vina onilemiha. Wi niwodhe ovilela, ninofwanyela momaguva-mwene ozinddiyela vina orula mittorho dhihili dhofuneya dhigadhile oniyelutxa. Mbwenyi iyo kaninfwanyela orula mittorho dhinfuniwana iyo ottukula. Nigattiya mittorho dhinfwanyela iyo ottukula, ninele okoddihiwa ottamaga.—2 Tim. 2:5. w23.08 26 ddima 1-2

Ofewa murima ononikamihedha oriha monelo dha attu ena. Motagiha, arogorihu ena anoziveliwa makiyagem, oku ena kaziveliwa. Akristu ena anoziveliwa omwa dholezeliha n’ovipimelela oku ena ahitadha. Akristu otene anofuna okana egumi yapama, anokosa ejuwene modhela osakula marhe ottiyana-ttiyana a ozuzumela egumi. Iyo nigobuwela wi dhokosa dhehu sapama vina banakwekwettela ena okosa yakene ninodhaga wakakattutxa ena vina banitota ogawana mmulogoni. (1 Kor. 8:9; 10:​23, 24) Ottiya onivaha malamulo a mukalelo wowabala, Yehova onivahile magano anfwanyelihu ofwara. Iyo ninofwanyela wabala na mukalelo wapama, wovipimelela vina wofwanyelela ononiha wi nili alabeli a Mulugu. (1 Tim. 2:​9, 10) Ottiya ejo, iyo kaninfwanyela wabala na mukalelo onziveliwana iyo nanya. Magano a Bibilia anele onikamihedha orabela wita malamulo mwaha wa dhowabala vina mugwaddelo wa nttitti. w23.07 23-24 ddima 13-14

Yehova onolabihedha dhotagiha dha ayana aba eli wi anilagihe mukalelo wa ojavo mareliho musogorho. Otene anrumela niwobo na muyana wa jeberuwa anosakula okosa mararuwo. Sabwa ya opwaza dhilobo dhapama dhinapadduwe musogorho awene ankalawo mudhidhi mung’onovi, omamalelowa angomela mmasiye.” (Gano 9:​13, 17, 18) Otene anrumela niwobo na muyana ona eziwelo yebaribari, anokana njedhelo nottiyana na abale anrumela niwobo na muyana wa jeberuwa! (Gano 9:1) Iyo ninosunza okwela dhinkwela Yehova vina widda dhinidda Yehova. (Masal. 97:10) Vina ninowagalala sabwani ninowawoba attu ena wi asunze na eziwelo yebaribari. Iyo ninoladdanihiwa na anamukatti arumiwe wi “alaleye mmathukuwani a muthethe, eraga: ‘Mudhe okuno nyuwo athu ahinziwa elo!’” Mareliho anakele iyo vina abale annivuruwana kannipuriha masaka aba ankalawo iyo bahi. Mbwenyi anele onipuriha musogorho anikamihedhaga okalawo na mukalakala, venevo vandowa iyo nittukulaga dila eneddana attu a malago.—Gano 9:​3, 4, 6. w23.06 24 ddima 17-18

Weyo oniviwamo dhavi akala mukwawo womabasani obe woskola onowukosa mavuzo mwaha wa esile dhinrumela weyo? Weyo onozuzumaga? Enji mwa iyo niniviwamo dhawene. Mbwenyi mavuzo ninga abo anonikamihedha oziwa enubuwela muttuya vina anonivaha gari ya omulaleya. Mbwenyi dila dhina attu anokosa mavuzo na efunelo ya otota makani. Eji kinnitikiniha. Sabwani, enjene anowiwa miselu dhottambi sabwa ya dhinrumelihu. (Mer. 28:22) Vowi ninkalawo “masaka omariha,” ahikalawo attu enjene “ahinthiddeya myeddo” vina “awali.” (2 Tim. 3:​1, 3) Weyo txino onovivuza, ‘Ddinawodhe dhavi okala wokurumuwa vina wofwasa muttu agatamela wakulana sabwa ya esile dhinrumela miyo mBibiliani?’ Txini enawukamihedhe? Okurumuwa. Muttu wokurumuwa kammaguvela osilidhiwa, ottiya ejo onowodha ovyang’anela agaligiwa obe agahikane yowakula. w23.09 14 ddima 1-2

Dila dhina, iyo ninowakela malago munikuruni na Yehova annibarela, ninga motagiha iyo ninowaddeliwa mwaha wa ngovi ya ozuzumeletxa dhorela vina ya okosa dhilobo dhiganittukulele olupa malamulo a Mulugu. Nigewelelaga malamulo ninga aba ninele okana wagalala onda mwa wiwelela magano a Yehova. (Iza. 48:​17, 18; 1 Tim. 6:​9, 10) Kaninaganyedha, Yehova onele odhowavi àlabihedhaga attu wila aneddihe mudhidhi wa goyi enddimuwa vina mwari mwa Vyaka Txikwi Dhinalamulele Yezu elabo ya vati. Koddi iyo ninele wiwelela malagoya aba? Elobo enanikamihedhe wiwelela malago a Yehova nsaka ntto ja wiwelela malago anakela iyo masaka abano. Eji enowiwanana na orumela malago otene annivaha iyene àlabihedhaga attu attomiliye wila aneddihe. (Iza. 32:​1, 2; Aheb. 13:17) Ninfware Nameddiha wehu, Yehova, na nikuluvelo nawi iyene onele onibarela mwa dhowopiha vina onele oneddiha okalawo wehu wotene mpaka—mwilaboni eswa. w24.02 25 ddima 17-18

Murumiwi Paulo wanagalala sabwa ya omulabela Yehova, mbwenyi dila dhina kiyali elobo yovevuwa. Paulo wankosa oleddo wolapela vina okosa oleddoya kiyali elobo yovevuwa. Sabwani muleddonimwa, masaka mena wanfwanyiwa “dhawopiha mwiko” vina “osegedhiwa na atimbwini.” Iyene vina wansottottiwa na amwiddani aye. (2 Kor. 11:​23-27) Ottiya ejo, dila dhinjene abali aye kalagiha otamalela mwaha wa ovilibihedha wakosa iyene wila akamihedhe. (2 Kor. 10:10; Fil. 4:15) Txini emukamihedhile Paulo odhowavi amulabelaga Yehova? Paulo ohisunza venjene mwaha wa omuttu wa Yehova mmaleboni vina na dhampadduweli. Paulo wahikana ebaribari wi Yehova wanimukwela. (Rom. 8:​38, 39; Ef. 2:​4, 5) Vina iyene wahidha omukwela Yehova vaddiddi. Paulo ohilagiha omukwela waye Yehova modhela wawirela ttagaraga akadda mutugumano.—Aheb. 6:10. w23.07 9 ddima 5-6

Attu enjene anoziwa wi anofuna nikamihedho na guverno vina ja deretu wiwelela malamulo mena anitiwa na “abale athomeliwe othonga elabo.” Mbwenyi attu ene abo anokodda wiwelela malamulo agahiziveliwena vina agobuwela wi malamuloya kaliganile. Koona motagiha opitxa misoko. Elabo dhahi ya Europa mwa attu anayi mmodhavo onubuwela wi “jaderetu ohipitxa misoko akala musokoya ononeya ninga kuliganile.” Sabwa ya ejuwene attuya ankala elabo ejo kampitxa misoko dhotedhene dhinkumbiriwani na guverno. Bibilia onologa wi aguverno anotota makattamiho, ansogorheliwa na Satana vina wi mohigonela anele otolotxiwa. (Masal. 110:​5, 6; Koh. 8:9; Lk. 4:​5, 6) Bibilia vina onologa wi “ole onavanya, onovanya nlamulo nigwihile Mulugu.” Yehova onowattiya alamuleli alamulelaga wi attiye dhilobodha mofwanyelela-mwene vina onjedhela wi iyo nawiwelelege. Nona ninofwanyela wavaha dhetene dhinafwanyelela, otaganyiha na misoko, nriho vina wawiwelela. (Rom. 13:​1-7) Masaka mena ninodhaga wona nlamulo nimodha ninga kanikalile, kaniliganile obe enele onirutxa wiwelela. Mbwenyi iyo ninimwiwelela Yehova vina iyene ononaddela wi ninofwanyela wawiwelela alamuleli. Iyo ninottiya wawiwelela aganikumbirha okosa elobo engudulana na magano a Yehova.—Mer. 5:29. w23.10 8 ddima 9-10

Nsaka nibaliwe Sansau, Afilisti annalamulela vina annatabutxa ana Izrayel. (Anam. 13:1) Awene ali atabala vaddiddi nona ana Izrayel antabuwa mmadani mwawa. Yehova wahimusakula Sansau wi “[àvune] ana Izrayeli mmadani mwa akadda Filisti.” (Anam. 13:5) Wi awodhe wakwaniha mabasa aba attomeliwiye Sansau wanfwanyela omukuluvela Yehova. Dila modha, nikuru na akadda Filisti nahidhowa o Leí enkala ninga o Juda wi amuttidde Sansau. Akadda Juda ahittiddiwa wova nona awene ahigana omuttidda Sansau wi amperheke mmadani mwa akadda Filisti. Akadda Juda ahimmaga Sansau na kabala bili dhiti, ahimperheka mmadani mwa akadda Filisti. (Anam. 15:​9-13) Mbwenyi, “muya wa Mulugu wamudhela” Sansau vina bapatula kabala dhamagihiwiyena bawodha ovifurula. Venevo iyene “ohona nigogoddo na mulomo wa buru,” oddodda, odhudha, oapana alobwana 1.000 a akadda Filisti!—Anam. 15:​14-16. w23.09 2 ddima 3-4

Yehova ohivitula vang’ono-vang’ono efunelo yaye modhela Bibilia. Na mukalelo mmodha obe mwina mudhidhi wotene Yehova onowodha okosa ejile enfuniye sabwani “dhithanddile Mulugu, dhikana epaddutxeliye.” (Gano 16:4) Vina dhotene dhinkosa Mulugu sa mukalakala. Ovano efunelo ya Yehova jivi, vina matxinjo gani akosiliye wi akwanihedhe? Mulugu wahawaddela atelani oroma ejile yafuniyena. Mulugu wahawaddela dhahi “kalanina guru dh’obala, enjivihanani, dhalani mwilaboni, muthongemo. Mweddihe . . . Vinama dhotene” dhinedda mwilaboni. (Wita 1:28) Sabwa ya onvanya Mulugu Adamu na Eva, vina nlogo notene na attu nihittega, mbwenyi ejo kitxinjile efunelo ya Yehova. Iyene otxinjile bahi mukalelo wowakwanihedha efunelo yaye. Mohigonela Yehova ohigana wimetxa Omwene wirimu onakwanihedhe efunelo yaye yoroma na nlogo na attu vina elabo.—Mt. 25:34. w23.10 20 ddima 6-7

Yehova onowodha onikamihedha ovilela. Ebaribari wi dila dhina enorutxa ovilela makamaka nigawanagana dhawobana dhehu mwa mudhidhi mwinjene. Masaka mena, dhawobana dhehu dhinodhaga okala ninga dhorutxa vaddiddi opitta esile dhigumanilena murumiwi Pedro. Mbwenyi Yehova onowodha onivaha guru enfunehu wi nihiyelele mundduni. (Masal. 94:​18, 19) Motagiha, mbali dhahi ahinatti osunza ebaribari mwa vyaka dhinjidhene wahimutela muttu wa yano yakene. Iyene ohitxinja kakamwe egumi yaye vina wahidhowavi akalaga mowiwanana na ensunziha Bibilia. Masiki dhawene dila dhina iyene onowanagana dhifunelo esi dhabure. Txini enimukamihedha ovilela? Iyene ohiloga: “Yehova onoddilibiha.” Iyene ohejendhedha: “Na nikamihedho na muya wokoddela . . . , miyo ddihisunza wi enowodheya weddagavi mudilani yebaribari . . . Masiki na dhawobana dhaga Yehova onodhowavi addilabihedhaga vina addilibihaga.” w23.09 23 ddima 12

Muzombwe, enofuneya ovilibihedha wi okale Mukristu wowarala. Kafwara dhotagiha dhapama, konuwiha ttotto ya okosa mabasa, otanalela, okuluveleya, osunza mabasa anawukamihedhe vina ovisasanyedhele mittorho dha musogorho. Txino weyo onozuzuma ogobuwela mabasa aba otene anujedhela musogorho. Mbwenyi onele owodha. Kudduwale, Yehova onofuna venjene wukamihedha. (Iza. 41:​10, 13) Kinaganyedheya wi abali na arogora a mmulogoni anele wukamihedha. Ogadha okala Mukristu wowarala ninga munfunela Yehova, egumi yawo enele okala yowagalala vina yozivela. Azombwe, iyo ninowukwelani venjene! Abali na arogora, mukane nikuluvelo wi Yehova onele wururihani venjene venevo vandhowinyu munuwaga wi mukale Akristu owarala. w23.12 29 ddima 19-20

Kobuwela buli vamattangani na abali ang’onovi. Munovega omamalelo wa mattangaya weyo opida foto modha. Foto yoroma egahikale pama, onopida foto dhina bili. Ovano ona foto ttaru, foto modha weyo ozinddiyela wi mbali mmodha kabudduwile pama. Onofudha, vowi ohikana foto dhina bili, eso bili abali otene anoteya otaganyiha na mbali oddule. Txibarene onowubuwela dhilobo dhapama mudhidhi waliwe na abali. Mbwenyi nsaka ntto txino mbali obe murogora wahiloga obe wahikosa elobo yohikala. Onakose nni na dhubuwelo eso dhohikala? Onkoddelani ofudha dhahene ninga enfudha weyo foto ehibudduwile pama? (Ef. 4:32) Ogazuzumela wang’ana dhilobo dhapama dhipadduwile mudhidhi wali weyo na mbali oddo, eloboya ejo modha epadduwile kinakale enddimuwa vaddiddi vowi onobuwelege dhilobo dhapama. w23.11 12-13 ddima 16-17

Mazu alabihedhiwe apa na Egregu anolagiha wi muyana wanfwanyela wabala na mukalelo wofwanyelela vina oriha mubuwelo wa attu ena mwaha wa dhowabala dhaye. Iyo ninowagalala venjene na arogora anvirihamo nlago ntti vina annabala na mukalelo wofwanyelela! Okana zelu elobo yamakamaka vaddiddi. Kito zelu txini? Ewodhelo enihu ya ottiyaniha eli yapama na eli yabure—venevo banisakula okosa eli yapama. Koona yotagiha ya Abigaíl. Mamunaye wahikosa yogana yabure vaddiddi vina wahika vang’ovini egumi ya amudhaye vina ya anamalaba aye. Mbwenyi Abigaíl wahikosa elobo momaguva. Momaguva-mwene iyene wahiziwa elobo yapama yafwanyeliye okosa, sabwa ya ejuwene ohavuna attu enjene. (1 Sam. 25:​14-23, 32-35) Zelu enonikamihedha oziwa mudhidhi wa ologa vina wa omala. Enonikamihedha vina wazuzumela attu ena mbwenyi se ovivolotxa mmakanini mwawa.—1 Tes. 4:11. w23.12 20 ddima 8-9

Murumiwi Paulo walebeli mazu aba Akristu o Roma. Abali a mulogo obule ahisunza ebaribari sabwa ya Yehova vina Yezu, ahunuwiha nroromelo vina ahidha okala Akristu. Sabwa ya nroromelo nawa Mulugu wahidha wawittana aligani vina wahattikittela na muya wokoddela. (Rom. 5:1) Awene anjedhela wakela nlivo nowagalaliha, vina ahikana nikuluvelo wi njedhelo nawa nigahakwanihedheya. Vasogorhova Paulo ohalebela Akristu ottikitteliwa o Éfezo sabwa ya njedhelo nakelilani. Njedhelo ntto newanana n’owakela dhorela dhikoyeliwe akoddeli. (Ef. 1:18) Vina alebelaga akadda Kolosi, Paulo ohoniha mburho ogakelile Akristu ottikitteliwa nlivo nawa. Paulo ohiloga wi nlivo nawa nakoyiwe wirimu. (Kol. 1:​4, 5) Nona njedhelo na Akristu ottikitteliwa tta ovenyihiwa mukwani wi akele egumi yamukalakala wirimu, wenewo onalamulelani vamodha na Kristu.—1 Tes. 4:​13-17; Ovuh. 20:6. w23.12 9 ddima 4-5

Nzu noroma nitapuleliwe ninga “okoya” nali nzu nalabihedhiwa mukoddoni naddiwana anyakoddo akoya muttette ang’anelaga wila onalupeliwe. Anyaya a muttette ang’aneliwa, angona na murenddele aziwaga wi anyakoddo ali vamusuwo ang’anelaga. N’ekalelo yakakene murenddele wa Mulugu ogakoya mirima na dhubuwelo dhehu, ninokala wofwaseyene niziwaga wi nili obareleya-wene. (Masal. 4:8) Dhahene ninga epadduwile na Ana, masiki akala makattamihoya kangoma momaguva, ninokanavi murenddele. (1 Sam. 1:​16-18) Vina nigakala wofwaseyene, ninowodha otanalela vina okosa dhogana dh’eziwelo. Txini enfanyeliwe okosa? Ogapattiwa makattamiho, kakala ninga onimukuwela mwang’aneli. Dhavi? Modhela olobela ofiyedha okana murenddele wa Mulugu. (Lk. 11:9; 1 Tes. 5:17) Akala weyo onogumanana makattamiho, kadidela olobela, onele okana murenddele wa Yehova oku okoyaga murima na mubuwelo wawo.—Rom. 12:12. w24.01 21 ddima 5-6

Wi akoddelihe nzina na Babe, Yezu ohivilela otabutxiwa, oruwaniwa, vina miselu dhottambi dhalogiwa mwaha waye. Iyene wanziwa wi wahiwodha omwiwelela Babe mwa dhetedhene; iyene kakosile elobo egamuttukuleli okana manyazo. (Aheb. 12:2) Iyene vina wanziwa wi Satana wela omweha midhidhi esile dhorutxa. (Lk. 22:​2-4; 23:​33, 34) Satana wanfuna okosa muli-mwetemwene wi Yezu amuttegele Babe; mbwenyi txipo kawodhile! Yezu ohilagiha wi Satana muttambi wottabwa vina wi Yehova ohikana adhari ororomeleya ankalavi oweddeyana na iyene masiki agapattiwa makattamiho orutxa vaddiddi! Weyo onofuna omwagalaliha Mwene wawo Yezu? Kadhowagavi ottittimihaga nzina na Yehova, wakamihedhaga ena osunza mikalelo dhapama dha Mulugu wehu. Ogakosa ejuwene onofwara ttarho dha Yezu. (1 Ped. 2:21) Dhahene ninga Yezu weyo onomwagalaliha Yehova, vina onele woniha wi mwiddani Waye, Satana, muttambi munddimuwa! w24.02 11-12 ddima 11-13

Vyaka tanu dhivirile, attu okwaranya miliau modha abatiziwa ninga Anamoona a Yehova. Weyo ogaviperheka wa Yehova, onosakula okala namafwara wa Yezu Kristu vina oromana venevo okosa efunelo ya Yehova enakale elobo yamakamaka vaddiddi mwigumini mwawo. Kito oviperheka oniwanana na eni? Yezu ologa: “Ole onfuna oddifwara miyo, attukule pingirhizi yaye addifwaregevi.” (Mt. 16:24) Nzu ntti “pingirhizi yaye” na Egregu ninotapulela vina “ovikodde wamwinya.” Ogaviperheka wa Yehova, weyo onofanyela okodda elobo-txilobo egadhile omunyimula. (2 Kor. 5:​14, 15) Eji enowiwanana vina na okodda “[dhintopa] maningo,” ninga ogonihana wonyakuwa. (Gal. 5:​19-21; 1 Kor. 6:18) Omwiwelela Yehova enodhana makattamiho mwigumini mwawo? Nne, mbwenyi ejo enawodheye ogamukwela Yehova vina ogakuluvela wi malamulo aye anowupuriha.—Masal. 119:97; Iza. 48:​17, 18. w24.03 2 ddima 1; 3 ddima 4

Yehova onowavaha muya waye wokoddela abale anarumeliye. (Mt. 12:18) Kavivuze, ‘Koddi ddinolagiha mikalelo dhimbala muya?’ Ovanene weyo onowavilela attu ena mottiyana na nsaka nali weyo ohinatti okala Munamoona wa Yehova? Venevo vandowiwe wunuwihaga mikalelo dhimbala muya wokoddela, pavenevo vankaniwe nikuluvelo wi onorumeliwa na Yehova! Yehova ohinivaha yobolo wi yakamihedhe abale anàrumeliye. (1 Tim. 2:​5, 6) Kito akala mmurimani mwawo onubuwela wi Yehova kanurumela, masiki okuluvelaga yobolo vina bumalile obatiziwa? Karoma wubuwela, kilitxi yofuneya mudhidhi wotene okuluvela dhubuwelo dhehu, iyo nimukuluvele Yehova. Yehova onawona abale animukuluvela ninga aligani vina onopikirhela waruriha.—Masal. 5:12; Rom. 3:26. w24.03 30 ddima 15; 31 ddima 17