Dezemburu

Yehova ohikana ewodhelo yowavenyiha amarafula? Ndde! Iyene onowodha “Dhetedhene.” (Ovuh. 1:8) Iyene ohikana owodha wa watolotxa amwiddani otene vina ogomiha okwa. (1 Kor. 15:26) Elobo yina ennittukulela okuluvela wi Yehova onowodha wavenyiha amarafula, jowi ewodhelo yaye yowubuwela kingoma. Iyene onowittana neneri modha-modha na nzina naye-naye. (Iza. 40:26) Iyene onowodha wubuwela dhilobo dhotene dha muttu onanvenyihiye mukwani. (Job 14:13; Lk. 20:38) Ekalelo yali muttuya, mikalelo dhaye, dhipadduwile mwigumini mwaye vina dhubuwelo dhaye. Iyo ninokuluvela wi musogorho mpo Yehova onele wavenyiha amarafula, ninoziwa ejuwene sabwani Yehova onofuna vina okana efunelo ya wavenyiha amarafula. Ovano ninfuna nitanalele mwaha mwina onnittukulela okuluvela nipikirelo na Mulugu na wavenyiha amarafula. Masaka a mundduni Yehova wahavenyiha amarafula. Dila dhinjene Bibilia onologa wi Yehova ohakamihedha alobwana okuluveleya vina Yezu wi avenyihe amarafula. w23.04 9-10 ddima 7-9

Nigaloga na nriho vina nokurumuwa attu ena anele okana efunelo ya odhowavi alogaga na iyo. Akala muttuya ontamela wakulana obe ologa bure esile dhinrumelihu, iyo kanindideliwa odhowagavi nilogaga na muttuya obe omwakula. (Gano 26:4) Attu enjene kanakose ejuwene—awene—anele onivuruwana. Iyo ninopurelamo vaddiddi nigakala attu okurumuwa. Kamukumbirhe Yehova nikamihedho wi okale wokurumuwa ogamwakulaga muttu onukosa mavuzo obe ombedda esile dhinrumeliwe. Kudduwale, wakula wawo nokurumuwa onele okamihedha wi makaniya ahigome nowakulana. Okosa eji enodhaga wakamihedha attu ena otxinja mubuwelo wawa mwaha wa esile dhinrumelihu vina Bibilia. Kakala womala nawale wi obarele esile dhinrumeliwe, okose ejoya nokurumuwa vina na nriho. (1 Ped. 3:15) Eji enele woniha wi kuli muttu wawobana! w23.09 19 ddima 18-19

Katanalela mikalelo minayi dhinwodhihu olagiha ovilela. Woroma, muttu wovilela kammaguvela osilidhiwa. Iyene onovilibihedha okala wofwaseyene akala attu ena anomuliga obe anomukosela elobo yabure. (Obud. 34:6) Yanawili, muttu wovilela onojedhela n’ofwaseya. Akala elobo kimpadduwa ninga mwajedheliye, iyene onovilibihedha ohidhugudheya obe osilidhiwa. (Mt. 18:​26, 27) Yanoraru, muttu wovilela kankosa elobo ahinatti otanalela. Masiki dhawene muttu wovilela agafunaga okosa elobo yamakamaka, onottukula mudhidhi wi arome otanalela. Iyene onotamela mudhidhi wi atanalele enfwanyeliye okosa. Omamalelowa onokosa ejile etadeliye. Yanonayi, muttu wovilela onovilibihedha ovilela makattamiho nowagalala. Masiki dhawene muttu wovilela onele wubuwela mwaha wa dhilobo dhapama dhimpadduwa mwigumini mwaye vina onele okosa muli-mwetemwene wi adhowegevi bagamulabela Yehova nowagalala. (Kol. 1:11) Ninga nlogo na Mulugu, ninofwanyela olagiha ovilela dhipaddi-dhene esi. w23.08 20-21 ddima 3-6

Elobo yamakamaka ennittukulela obarela murima wehu wa nladdaniho jawi Yehova onopima murima wehu. Eji entapulela wi iyene onowodha wona opitta esile dhinona attu ena vina onoziwa ejile eli iyo txibarene. Iyo nigadhowavi nubuwelaga magano a Yehova eji enele onikamihedha okalawo na mukalakala. (Jo. 4:14) Iyo txipo kaninapupurutxiwe na mubuwelo wohikala vina dhozivala dha Satana na dha attu abure a elabo eji. (1 Jo. 5:​18, 19) Iyo nigakala ofiyedheya na Yehova omukwela wehu vina omuriha wehu onele wunuwa. Vowi iyo kaninfuna omunyimula Babi wehu, ninele widda dhotedhene dhiganittukuleli ottega. Marta, murogora onkala o Croácia wagumanilena yoweha ya okosa mararuwo, ohileba: “Yahirutxa wubuwela mowakwana-mwene vina orabela okosa elobo yabure. Mbwenyi omova waga Yehova ohiddibarela.” Omova Mulugu omukamihedhile dhavi? Marta ohiloga wi iyene wahitanalela dhodhelavo dhinda sabwa ya okosa dhogana dhohikala. Enowodheya iyo okosa yakakene. w23.06 20-21 ddima 3-4

Yezu wanziwa wi efunelo ya Yehova ja okoddeliha nzina Naye vina olagiha wi dhilobo dhalogiwe mwaha waye s’ottambi. Ji sabwaya emuttukuleli Yezu wasunziha anamafwara aye olobela dhahi: “Baba wehu muli odhulu, nzina nenyu nikoddelihiwe.” (Mt. 6:9) Yezu wannonelamo wi aba makani ampatta dhottanddiwa dhotene. Kawo anju obe muttu okosile muli-mwetemwene wi nzina na Yehova nikoddelihiwe opitta ekosile Yezu. Mbwenyi vattiddiwe Yezu, amwiddani aye ampwattelihile muladdu gani? Onveyiha Mulugu! Se waganyedha Yezu wanziwa wi olabihedha nzina na Mulugu na mukalelo wohifwanyelela obe oveyiha nzina nokoddela na Babe yali yottega yottabwa egakosile muttu. Omagedhiwa vina ottongiwa sabwa ya muladdu obu yahimukubanyiha venjene Yezu. Txino obu bu mwahaya wamakamaka ottukuleli murima waye “[othabwa] omparhuwa” iyene ahinatti ofugeliwa.—Lk. 22:​41-44. w24.02 11 ddima 11

Venevo vandowihu nittamagaga mudila ya egumi, iyo ninofwanyela omukwela Yehova vina Yezu opitta okwela onakanelihu amudhihu. (Mt. 10:37) Eji kintapulela wi kaninfwanyela wakwaniha dhinjedheliwihuna wakosela anamudhi ehu. Wila nimwagalalihe Yehova vina Yezu iyo ninofwanyela okosa dhinjedheliwihuna na anamudhi ehu. (1 Tim. 5:​4, 8) Nigakosa ejuwene, iyo ninele wagalala. Opitta dhetedhene, Yehova onoziwa wi anamudhi anele wagalala, akala atelaniyá anoweddihana na okwela vina nriho, akala amabali anowakwela anawa vina anowashagiha, vina akala aima anowawiwelela amambali awa. (Ef. 5:33; 6:​1, 4) Kintanala akala weyo wa muteli, muteliwi obe mwana, onofwanyela ovilibihedha ovirihamo malago a eziwelo a mBibiliani. Vina kukose esile dhinubuweliwe wi sapama, dhinubuwela attu ena mmuruddani munkaliwe obe esile dhinloga aziwitxi. Kakosa dhosakula dhapama olabihedhaga mapublikasau andela mBibiliani. Mwenemo onele ofwanya malago ottiddihedha mabasa anawukamihedhe ovirihamo magano a mBibiliani. w23.08 28 ddima 6-7

Murogora onofwanyela osunza dhilobo dhinamukamihedhe labo na labo. Dhilobo dhina dhinsunziwa muhimani vina dhinele omukamihedha egumi yaye yotene. Motagiha, kasunza wengesa vina oleba deretu. Dhilabo dhina attu anubuwela wi muyana kanfwanyela osunza wengesa vina oleba. Mbwenyi eji ewodhelo yamakamaka vaddiddi enfwanyela okana Akristu otene. (1 Tim. 4:13) Nona, kuttiye elobo-txilobo wuzuzumiha mpaka ottiya osunza na oleba deretu. Ogakosa ejuwene onapuremo eni? Enele okala yovevuwa ofwanya ganyo. Onele okala vina namasunza waderetu wa Bibilia, ottiya ejo onele owodha wasunziha attu ena. Opitta esi dhotedhene onele owodha omwengesa Bibilia, otanalela dhinengesiwe, sabwa ya ejuwene onele okala wofiyedheya vaddiddi na Yehova.—1 Tim. 4:15. w23.12 20 ddima 10-11

Omukumbirhe Yehova wi awukamihedhe orabela dhoweha. Iyo nili attu ohiligana, nona ninofwanyela mudhidhi wotene ovilibihedha orabela okosa dhilobo dhabure. Mbwenyi Satana onokosa muli mwetemwene wi akattamihe egumi yehu. Murega mmodha onlabihedhiye mavego anlagiha mararuwo. Mavego ninga aba anodhaga odhaliha mubuwelo wehu na dhilobo dhonyakuwa—si dhubuwelo esuwene dhigadhile onittukulela okosa yottega enddimuwa vina ottiya wandana na Yehova. (Mk. 7:​21-23; Tia. 1:​14, 15) Akala ninofuna opemberha okosa dhilobo dhabure ninofwanyela okumbirha nikamihedho na Yehova. Yezu ohikumbirha ejene mwasunzihiliye anamafwara aye olobela alogaga: “Kamunittiye ogwela munyengetteyani, munirabelihe mwiddani.” (Mt. 6:13) Yehova onofuna onikamihedha, mbwenyi iyo ninofwanyela omukumbirha nikamihedho. Ottiya ejo, ninofwanyela okosa dhilobo mowiwanana na malobelo ehu. w23.05 6-7 ddima 15-17

Akala mamuni na mwadhiye anovaha ttima mandano awa na Yehova, anovirihamo magano a Yehova ejo enele wakamihedha orabela vina owanana makattamiho agobanihile okwelana wawa. Muttu oliba mpaddi womuyani onovilibihedha otagiha mikalelo dha Yehova, ninga oderetu, ovilela vina olevelela. (Ef. 4:32–5:1) Akala atelani anotonyihedhana mikalelo esi okwelana wawa oganunuwavi. Murogora onkuweliwa Lena, oteliwe okwaranya vyaka 25 ohiloga dhahi: “Kinrutxa omukwela vina omuriha muttu woliba mpaddi womuyani.” Ndoweni none yotagiha modha ya mBibiliani. Vaganile Yehova wasakula abale agakalile amambali a Mesiya, munihimoni na Davidi, Iyene wamusakulile José na Maria. Sabwaya jani? Sabwani oheli akana mandano oliba na Yehova, vina Yehova wanziwa wi awene agahimwika iyene vamburoni voroma vamateloni vawa. w23.05 21 ddima 3-4

Masiki Musogorheli wehu Yezu akale woligana abale analabihedhiye wi asogorhele nlogo naye velaboni ya vati attu ohiligana. Nona masaka mena enokala yorutxa wawiwelela makamaka akala anonikumbirha okosa elobo ehinfuna iyo okosa. Nsaka dhahi Pedro wahirutxiwa wiwelela. Iyene wahakela malago na anju wi aje dhinama dhaloga Malamulo a Mizé wi sokwaruliha, Pedro wahittiya wiwelela—ottiya dila modha, mbwenyi dila ttaru! (Mer. 10:​9-16) Pedro okoselini ejuwene? Nlago nttile niswa yakala ninga kiyattidda mabasa mwa iyene. Mwa mpaddi mwina, murumiwi Paulo wahawiwelela Akristu asogorhela milogo o Jeruzalemi ahiloga wi Paulo àttukule alobwana anai adhowe mumparhani na iyene wi avikupe vamodha na awene ninga mwalogela Malamulo, kokosa dhawene iyene agahilagiha wi wanvaha ttima Malamulo. Mbwenyi Paulo wanziwa wi Akristu kafwanyela ofwara Malamulo a Mizé. Vina wi iyene kakosile elobo yabure. Paulo “oathukula athu abo anai, okupiwa vamodha na awene.” (Mer. 21:​23, 24, 26) Wiwelela wa Paulo ohikamihedha wiwanana wa abali.—Rom. 14:​19, 21. w23.10 10 ddima 15-16

Txino weyo kugafiyedhile wubuwela wi wova mukalelo wamakamaka wa okana mandano apama. Nona, nigaloga wi animova Yehova bankana mandano oliba na iyene. Kintanala mudhidhi olihu nimulabelaga Yehova, iyo notene ninofwanyelela okana monelo wapa wa omova iyene. Mbwenyi, txini entapulela omova Mulugu? Muttu ona ekalelo yapama ya omova Mulugu, onomukwela vina onorabela okosa elobo-txilobo egadhile ononga mandano aye na Iyene. Yezu wannimova Mulugu. (Aheb. 5:7) Mbwenyi, iyene kamova na mukalelo wohifwanyelela. (Iza. 11:​2, 3) Ottiya ejo, iyene wanimukwela venjene vina wahikana efunelo enddimuwa ya omwiwelela. (Jo. 14:​21, 31) Dhahene ninga Yezu, iyo ninofuna omuriha venjene Yehova sabwa ya okwela waye, eziwelo yaye, oligana waye vina ewodhelo yaye. Iyo ninoziwa wi Yehova ononikwela venjene vina ononitanala sabwa ya iyo wiwelela masunziho aye. Iyo ninomunyimula Mulugu nigakodda omwiwelela, mbwenyi ninowagalaliha murima waye nigamwiwelela.—Masal. 78:41; Gano 27:11. w23.06 14 ddima 1-2; 15 ddima 5

Mwene Oziya moniliye wi omwene waye ohimela pwi, wile odduwala dhotene dhamukosele Yehova. Eji ennisunziha nni? Kanidduwale wi mareliho otene anakelihu na mabasa anttomeliwihu anda wa Yehova. Ottiya ovisiba sabwa ya dhilobo dhinwodhihu okosa, ninvahe nttittimiho notene Yehova. (1 Kor. 4:7) Ottiya ejo nikale attu ovyeviha vina ninonelemo wi nili attu ohiligana mudhidhi mwina enofuneya osisiguliwa. Mbali mmodha wa vyaka 60 ohileba dhahi: “ddihisunza wi kaddinfwanyela osilidhiwa nne okukumuwa attu agona dhovonya dhaga. Masaka mena ddinokosa dhovonya dhing’ono mbwenyi ddinolagiwa sabwa ya ejuwene, masiki dhawene ddinovilibehedha osisigula vina odhowavi ddimulabelaga Yehova mpaka vanwodhelimi.” Nigadhowavi nimwiwelelaga Yehova n’ovyeviha, ninokana wagalala watxibarene.—Gano 22:4. w23.09 10 ddima 10-11

Akristu a nsaka na Paulo anfwanyela ovilela. Awene angumanana makattamiho angumanana attu a masaka ehu, mbwenyi awene ahipattiwa makattamiho mena sabwa ya okala Akristu. Enjene mwa awene anfwara-fwariwa, ottiya na anddimuwa a marelijiau a Ayuda vina alamuleli a akadda Roma bahi mbwenyi na anamudhi awa vina. (Mt. 10:21) Mmulogoni awene anfwanyela orabela opattiwa na masunziho onyengetta a asadduweli abuwene atamela ogawa mulogo. (Mer. 20:​29, 30) Txibarene Akristu aba ahivilela. (Ovuh. 2:3) Dhavi? Awene ahisunza mofwaseya-mwene dhotagiha dhili mBibiliani dhinloga mwaha wa attu alagihile ovilela ninga Job. (Tia. 5:​10, 11) Anlobela akumbirhaga oliba murima. (Mer. 4:​29-31) Vina awene annubuwela wi kodhowavi avilelaga, Yehova agaharuriha. (Mer. 5:41) Enowodheya iyo vina ovilela nigakana elemelelo yosunza dhotagiha dha attu atonyihedhile ovilela dhinlogiwa mBibiliani vina mapublikasau ehu, ottiya ejo ninofwanyela otanalela sabwa ya dhotagihadha. w23.07 3 ddima 5-6

Yehova vina Yezu txipo kananinyanyale. Vamalile murumiwi Pedro omukodda Yezu iyene wanfwanyela okosa yogana yamakamaka. Iyene agahittiya okala namafwara wa Kristu, obe agahidhowavi avilelaga? Yezu wahimukumbirha Yehova wi nroromelo na Pedro nihobane. Yezu wahimwaddela Pedro wi iyene wahikosa nlobelo ntti vina ohiloga wi Pedro agahiwodha walibiha abalaye. (Lk. 22:​31, 32) Txino Pedro wampangarhazeya dila dhotene dhobuweliye mazu aba a Yezu! Enowodheya Yehova walabihedha akumbuzi òkwela wila awukamihedhe na enujombela wi owodhe odhowavi okalaga ororomeleyene. (Ef. 4:​8, 11) Dhahene ninga mumukamihedhile Yehova Pedro na anamafwara ena wakwaniha dhojombeliwa dhawa dhomaningoni, Iyene onele onikamihedha akala ninowika vamburoni voroma Omwene wa Mulugu. w23.09 24-25 ddima 14-15

Yehova onowona dhilobo dhotene dhapama dhinakoselihu attu ena. Masiki akala dhilobo dhing’ono iyene onowona ninga mvaho wa ttima vina ninga mangawu anapitxe iyene. Akala weyo wahiromaga olaba ninga mudhari wokamihedha obe munddimuwa wa mmulogoni, Yehova kandduwala mabasa attiddiliwe mundduni vina okwela owuttukuleli okosa mabasaya. (1 Kor. 15:58) Iyene vina onowona okwela ondowiwe otonyihedhaga. Yehova onfuna wi iyo notene nunuwihe omukwela wehu iyene vina wakwela attu ena. Iyo ninele olibiha omukwela wehu Yehova modhela wengesa Nzu naye, otanalela vina malabo otene ologa na iyene modhela nlobelo. Enowodheya iyo vina wunuwiha wakwela abalihu na arogora modhela wakamihedha. Okwela wehu ogonuwa, ninele okana mandano ofiyedheya na Yehova vina abalihu vamodha na arogora. Ottiya ejo, ninele ojavo mandano aba okala-nokala-wene! w23.07 10 ddima 11; 11 ddima 13; 13 ddima 18

Mukristu oli wetene onofwanyela osakula mukalelo onawodhiye ozuzumela egumi yaye. Mbibiliani munofwanyeya malamulo mang’onovi oziweya, ninga motagiha, nlamulo ninloga wi ninofwanyela otadha nikami, webedha dhilobo dhihili Mulugu vina makaga. Mukristu onofwanyela orabela kakamwe mikalelo esi agazuzumelaga egumi yaye. (Mer. 15:20; Gal. 5:​19, 20) Oku dhipaddi dhina dhosakula dhomwinya. Iyo nanya ninofwanyela okana nikuluvelo na wi mukalelo obu wosasanyiwa onokamihedha obe kunkamihedha, mbwenyi ejo bilivi ninofwanyela oriha dhosakula dha abali ena sabwa ya mukalelo onzuzumelani egumi yawa. Wi ejo ewodheye ninofwanyela okana muyubuweloni ttarho esi nayi: (1) Omwene wa Mulugu bunawodhe vina bunadhena egumi yamukalakala. (Iza. 33:24) (2) Mukristu oli wotene “obuwele pama” akala yosakulaya enele omukamihedha. (Rom. 14:5) (3) Nirabele wattonga attu ena obe wakwakwattutxa. (Rom. 14:13) (4) Akristu anolagiha okwela vina anozuzumela wiwanana wa mmulogoni ottiya ozuzumeletxa dhosakula dhawa.—Rom. 14:​15, 19, 20. w23.07 24 ddima 15

Weyo onovaha ttima mandano awo na Yehova? Kavali waganyedha wi weyo onovaha ttima! Oromana masaka awale attu enjene, ahiviwamo dhahene ninga weyo. (Masal. 104:​33, 34) Attu enjene ahivilibihedha vaddiddi wi amulabele Yehova. Jijene yakosa Anazireu obe attu oviperheka nsaka na ana Izrayel. Anazireu ali ana Izrayel avilibihedha omuttiddela Yehova mabasa na mukalelo wavawoka. Nlamulo na Mizé nanrumeliha mulobwana obe muyana ompikirhela Yehova elobo yamakamaka asakulaga okala Munazireu mwari mwa mudhidhi mung’onovi obe mwinjene. (Oleb. 6:​1, 2) Mukadda Izrayel wapikirhela okala Munazireu, akale mulobwana obe muyana, yanfuneya ovirihamo magano abuwene ahavirihamo ana Izrayel ena. Txini yamuttukulela mukadda Izrayel okosa nipikirhelo ntti? Enkala ninga ji sabwa ya omukwela Yehova vina omutamalela sabwa ya mareliho Aye.—Olib. 6:5; 16:17. w24.02 14 ddima 1-2

Mbibiliani nzu ntti “weddeyana” obe “okwela woweddeyana,” dila dhinjene enaddiwana okwela onna Mulugu na alabeli aye. Nzu nakene nintonya okwela onlagihana alabeli a Mulugu. (2 Sam. 9:​6, 7) Weddeyana wehu na Mulugu onowunuwa mwa ovira wa mudhidhi. Ndowe none mukalelo wunuwihile Daniyel oliba murima. Weddeyana wa Daniyel na Yehova waheyiwa dila dhinjene mwigumini mwaye. Nsaka dhahi Daniyel bana vyaka okwaranya 90 wahigumanana yoweha enddimuwa vaddiddi. Emeleli a varhuwani va mwene Dario kaziveliwa na Daniyel vina kamuriha Mulugu wamwebedhiye. Sabwa ya ejuwene ahikosa dhopyaga wi ampe Daniyel. Awene ahimulogana mwene wi avuwihe nlamulo wila one akala Daniyel agahikala oweddeyana na Mulugu waye obe na mwene. Yafuniwana Daniyel okosa yali okala oweddeyana na mwene ottiya omulobelela Yehova mwari mwa malabo 30. Daniyel karumelile ottiya weddeyana waye na Yehova. Edhile opadduwa, Daniyel wahiponyedhiwa muttoloni mwa apoddogoma.—Dan. 6:​12-15, 20-22. w23.08 5 ddima 10-12

Yehova onfuna wi nidhowegevi nakwelaga abalihu. Akala mbali kanneddiha dhahene ninga munfuniwana Mukristu, nikuluvele wi iyene kaganile oninyimula, iyene onovilibihedha okosa dhilobodha ninga munfunela Yehova. (Gano 12:18) Yehova onowakwela adhari aye ororomeleya masiki na dhovonya dhinkosani. Iyene onodhowavi anikwelaga se onikoyela ya mmirimani. (Masal. 103:9) Ninomutamalela venjene Yehova sabwa ya onilevelela, mwa dhahene ninofwanyela omutagiha modhela walevelela ena! (Ef. 4:32–5:1) Kanidduwale wi nili vakuvi na ogoma wa elabo ejino, nona ninofwanyela okala ofiyedheya na abalihu. Enodhaga opadduwa ofwarafwariwa ottidda motto ofiyedha ofugeliwa mukamburha sabwa ya nroromelo nehu. Ejo egapadduwa, ninele ofuna venjene nikamihedho na abalihu.—Gano 17:17. w24.03 15-16 ddima 6-7

Bibilia onowaloga azombwe ena amagile mandano na Yehova, arumeliwe vamentoni vaye vina akanile egumi yohagalala. Davidi ddi mmodha wa azombwe abo. Bali muzombwe Davidi wahisakula omuroromela Mulugu, vasogorhova wahikala mwene wororomeleya. (1 Amwe. 3:6; 9:​4, 5; 14:8) Onkoddela nni osunza nipadduwo na Davidi, ogakosa dhawene txibarene onele opangarhazeya vina onele odhowavi omulabelaga Yehova nororomeleya. Obe kasunza nipadduwo na Timóteo obe na Marko. Awene aromile omulabela Yehova bali azombwe vina ahikalavi ororomeleya egumi yawa yotene. Dhinkosa weyo ovanene dhinele opatta egumi yawo musogorho. Ogamukuluvela Yehova ottiya ovikuluvela iyene onele wukamihedha okosa dhosakula dhapama. Ndde enowodheya weyo okana egumi yohagalala vina ojavo dhilobo dhapama. Mbwenyi kudduwale, Yehova onovaha ttima dhinimukoseliwe. Olabihedha egumi yawo wi omulabelena Yehova Babihu wa wirimu yosakula yamakamaka enfwanyeliwe okosa, kayiwo yina yattima opitta ejene. w23.09 13 ddima 18-19

Murumiwi Paulo wanziwa wi abalaye ali ohiligana. Motagiha, abalaye o Jeruzalemi karumela wi iyene wali namafwara wa Yezu. (Mer. 9:26) Txini epadduwile vasogorhova? Ena ahimuloga bure wi apigidhe nzina naye. (2 Kor. 10:10) Dila dhahi Paulo wahimona munddimuwa wa mulogo akosaga yogana egadhile waputtula ena. (Gal. 2:​11, 12) Marho waye wokweleya Marko wahimunyimula. (Mer. 15:​37, 38) Makattamiho abo agahimukosiha Paulo watxatxama abale amunyimula. Mbwenyi kakosile ejuwene, iyene wahizuzumela dhilobo dhapama dhakosa abalaye. Wahidhowavi azuzumelaga mabasa a Yehova. Paulo owodhile dhavi ovilela? Paulo wannakwela abalaye. Okwela wana Paulo na abalaye wahimuttukulela wona mikalelo dhawa dhapama ottiya ozuzumela dhovonya dhawa. Okwela oku ohimuttukulela Paulo okosa enfwanyeya va nleboni na ddabuno. w24.03 15 ddima 4-5

Mbibiliani muhikala dhotagiha dhinjene dhinoniha wi okurumuwa mukalelo wamakamaka vaddiddi. Koona yotagiha ya Izaki. Mudhowiliye okala o Gerar mwilaboni ya akadda Filisti, anamanddamani ahimukanela nrima avuhela na mattaka matxela otone atibile adhari a babe. Ottiya owanela matxela abale, Izaki na amudhaye ahimwalela wolapela-wene atiba matxela mena. (Wita 26:​12-18) Mbwenyi akadda Filisti ahiwadela matxelaya, ahiloga wi manje a matxela abale ali awa. Masiki dhawene, Izaki walivi wokurumuwa. (Wita 26:​19-25) Txini emukamihedhile Izaki masiki attu ena amuligaga vaddiddi? Kinaganyedheya wi iyene ohisunza vaddiddi na yotagiha ya amambali aye, ohisunza venjene na okurumuwa wa babe Abrahamu vina na ofwasa murima wa Sara.—1 Ped. 3:​4-6; Wita 21:​22-34. w23.09 15 ddima 4

Na okwela Yehova ohimuruma nammodha waye velaboni ya vati wi asunzihe attu mwaha wa Omwene wa Mulugu vina avahe egumi yaye ninga yobolo egavunile attu muttegani vina okwa. Vasogorhova Yehova ohinvenyiha Yezu mukwani wi eyelele wirimu akale Mwene wa Omwene wa Mulugu. Muselu munddimuwaya onloga Bibilia okoddelihiwa wa nzina na Yehova, eji enapadduwe agakwanihedha efunelo yaye na elabo ya vati modhela Omwene waye onlamuleliwa na Yezu. Kinwodheya otxinja efunelo ya Mulugu. Yehova ohipikirela wi dhetene dhinele wakwanihedheya dhahene ninga mulogeliye. (Iza. 46:​10, Aheb. 6:​17, 18) Na mudhidhiya elabo enele osadduliwa bikala paraizu, ziza nibudduwile mwa Adamu na Eva ninele okala noligana vina ninele okalagawo namukalakala. (Masal. 22:26) Yehova ohikana dhilobo dhinjene dhinnifuneyena, mbwenyi efunelo yaye enddimuwaya jawi emeleli aye ankala velaboni ya vati vina wirimu amwebedhege iyene nowiwanana. Otene anele okala oweddeyana vina anele omwiwelela Yehova ninga muttanddi wa wirimu na elabo ya vati. (Ef. 1:​8-11) Kinutikiniha wona mukalelo onakwanihedha Yehova efunelo yaye? w23.10 20 ddima 7-8

Vafiyilani ahiroma opattiwa makattamiho a oyelega, ofwara-fwariwa vina widdiwa. Nona ena obuwela wi yali elobo yorutxa oroma mabasa a ovenyihedha mparha. Yehova oharuma anamavuhulela eli Ajewu na Zakariya, wi àkamihedhe awene ozuzumela mabasa a Yehova. Dhahene ninga munonelihu, mabasa akosile anamavuhulela aba ehakamihedha. (Aje. 1:1; Zak. 1:1) Mbwenyi muvirile vyaka 50, awene anfwanyela olibihiwa wili. Ezdra, namaleba wa ttotto wa Malamulo, ohibudduwa o Babilónia mpaka o Jeruzalemi wi àlibihe ana Izrayel wika vamburoni voroma omwebedha wa Yehova. (Ezd. 7:​1, 6) Mavuhulo Ajewu vina Zakariya ahikamihedha nlogo na Mulugu omukuluvela Yehova nsaka norutxa, mavuhulo aba anowodha onikamihedha ononelamo wi Yehova onowodha onikamihedha kintanala makattamiho anapattiwihu.—Gano 22:19. w23.11 14-15 ddima 2-3

Ninalagihe dhavi wi ninowakwela abalihu? Mukalelo mmodha ku wapangarhaza. Ttagaraga enele onittukulela opangarhazana muttu na mukwaye. (1 Tes. 4:18) Ninawodhe dhavi olibiha okwelana? Modhela ovilibihedha olevelela dhottega dha abalihu masiki ekalaga yorutxa. Ekalele nni yamakamaka okwelana masaka abano? Pedro ohiloga mwahaya: “Ogoma wa dhetedhene oli vakuvi, . . . [nona] mweddegena okwelana.” (1 Ped. 4:​7, 8) Omagomo wa elabo eji yabure oli vakukuvi, txini enjedhelihu? Yezu ohatxenjeriha arumiwi aye awaddelaga dhahi: “Munele widdiwa na attu a malogo otene, sabwa ya nzina naga.” (Mt. 24:9) Wi nivilele widdiwa oku, ninofwanyela ovilibihedha okala a wiwanana vina okwelana.—Fil. 2:​1, 2. w23.11 13 ddima 18-19

Ebaribari ya Nzu na Mulugu ehikana ewodhelo enddimuwa vaddiddi. Nigásunzihaga attu mwaha wa Yehova vina mikalelo dhaye ninowona elobo yotikiniha. Attu anottiya opibiwa na dhottambi dha Satana vina anoroma wona mikalelo dhokoddela dha Babi wehu. Awene anotikina agona guru ehimpimeya ya Yehova. (Iza. 40:26) Awene anosunza omukuluvela iyene sabwa ya oligana waye. (Olib. 32:4) Anosunza venjene na ewodhelo yaye enddimuwa. (Iza. 55:9; Rom. 11:33) Awene vina anopangarhazeya agasunza mwaha wa okwela wa Yehova. (1 Jo. 4:8) Venevo vandowani anfiyedhaga Yehova, njedhelo nawa na okalawo namukalakala ninokala n’ebaribari. Gari enddimuwa vaddiddi enihu wakamihedha ena onfiyedha Babi wehu! Nigakosa ejuwene, Yehova onnona ninga akamihedhi.—1 Kor. 3:5. w24.02 12 ddima 15

Akala weyo oli namasunza wa Bibilia obe obaliwe murala wa Anamoona a Yehova, wahiromaga wubuwela obatiza? Eji yogana yapama. Ohinatti obatiziwa, weyo onofwanyela oviperhekela Yehova. Onaviperheke dhavi wa Yehova? Weyo onokosa nlobelo ompikirhelaga Yehova wi onamulabele iyene bahi vina okosa efunelo yaye enakale vamburoni voroma mwigumini mwawo. Mwebaribari, onompikirhela Yehova wi onele omukwela na “murima wawo wotene, na thontho yawo yotene, na guru dhawo dhotene.” (Mk. 12:30) Nlobelo ntti noviperheka ninkosiwa muttu bali yeka, weyo na Yehova. Oku obatizo onkosiwa vari va anamwinji vina enotonyihedha wi ohiviperheka wa Yehova. Oviperheka wawo nipikirhelo na ttima vaddiddi, nona onele okosa muli mwetemwene wi wakwanihe nipikirhelo nawo, jijuwene enjedhela Yehova.—Koh. 5:4. w24.03 2 ddima 2; 3 ddima 5

Matelo otene anogumanana dhorutxa. Bibilia kampipirhiha agaloga wi abale antelana “anowona makathamiho vamuralani vawa.” (1 Kor. 7:28) Sabwaya? Sabwani matelo anowagumaniha attu eli ohiligana muttu-muttu na dhofuna dhaye vina dhubuwelo dhaye. Vamateloni txino muttu mwina dda elabo yina vina oleliwe na mweddelo wottiyana. Nona, na mudhidhiya oheli anele owodha wona dhimanya dha mukwaye dhahawodhilani wona eddelelagana. Dhilobo-dhene esi dhinodhaga otota magudulano. Atelani ena ottiya ologela makaniya wi agomihe, anopwattelihana muladdu muttu na mukwaye, masiki aziwaga wi oheli ahivonya. Ena anofiyedha wubuwela, wi agomihe makaniya japama omwalana obe ofudha matelo. Ejiya ja malago? Nne. Yehova onfuna wi atelani arihege masasanyedho a matelo masiki akala muttu mmodha wa va mateloni onototavo makani. w24.03 16 ddima 8; 17 ddima 11

Mmaleli weyo oviperheka vina obatiziwa, njedhelo nawo nihidhowavi nunuwaga venevo vadhowa weyo osunzaga venjene vina wunuwagavi mpaddi womuyani. (Aheb. 5:13–6:1) Onele wona wamwinya ebaribari ya mazu ali va Roma 5:​2-4. Txino weyo ohivira mmakattamihoni menjene, masiki dhawene ohidhowavi ovilelaga vina ohoniha wi oli worumeliwa vamentoni va Yehova. Oziwa wi Yehova onowukwela ehuttukulela okana mwaha dhinjene dha odhowavi ojedhelaga esile dhipikirheliye. Njedhelo nawo nihiliba venjene ovanene mottiyana na mudhidhi oromiliwe osunza ebaribari. Ovano njedhelo ntti ttebaribari mwa weyo, vina nihikana yotapulela yamakamaka mwigumini mwawo. Ninopatta dhotene dhinkosiwe, mukalelo onaweddihiwe amudhawo, dhogana dhinkosiwe, ottiya ejo mukalelo onlabihedhiwe mudhidhi wawo. Paulo onologa elobo yina yamakamaka eniwanana na njedhelo nehu nigamala orumeliwa na Yehova. Iyene ohinikuluveliha wi njedhelo nehu ninele wakwanihedheya.—Rom. 15:13. w23.12 12-13 ddima 16-19

Nigapattiwa dhoweha dhorutxa, dhiniwamo iyo, dhubuwelo dhehu vina dhokosa dhehu dhinodhaga ohikala dhapama. Ninodhaga oviwamo ninga paporo oli mbara atukumeliwaga oku noku na manebe. Yehova onnikamihedha dhavi nigaviwagamo dhahene? Yehova ononikuluveliha wi onele onilibiha. Paporo agapattiwa na otagala wa manebe, onoroma ottekenyeya oku-noku. Wi abarele ottekenyeya oku, mapaporo enjene ahikana epano dhahi enkuweliwa estabilizador enttiyiwa epaddi modha-modha ya paporoya. Epano eji enokamihedha wi paporoya ahittekenyeye vaddiddi, àkamihedhaga attuya oviwona obareleyene. Epano ejo enolaba pama akala paporoya onodhowavi eddaga. Na mukalelo wakakene, Yehova onnilibiha venevo vandowihu nikalaga ororomeleya nigagumanagana dhoweha. w24.01 22 ddima 7-8

Ogattiddiwa wova, karoma ovivuza, ‘Txini ekosile Yehova?’ katamela mudhidhi wi otanalele dhottanddiwa. Motagiha, “[kafwaseyela] wang’ana” mukalelo onzuzumela Yehova balame vina folori,—masiki vahittanddiwani moladdana na Yehova vina vahinimwebedhani,—eji kinoniha wi iyene ononizuzumela vottabwa? Otanalela ejuwene enele wunuwiha omukuluvela wawo. (Mt. 6:​25-32) Katanalela vina mukalelo wakamihedhile Yehova alabeli aye. Enowodheya vina weyo osunza yotagiha ya muttu onlogiwa mBibiliani wanna nroromelo noliba, obe kengesa mapadduwo a mwigumini a Anamoona a Yehova a masaka abano. Ottiya ejo, katanalela mukalelo onuzuzumela Yehova. Txini ekosiliye wi weyo oziwe ebaribari? (Jo. 6:44) Iyene wakulile dhavi malobelo awo? (1 Jo. 5:14) Dhilobo gani dhapama dhimpadduwa mwigumini mwawo dhinwodheya sabwa ya mukutto wa yobolo oniperhekeli Mwanaye?—Ef. 1:7; Aheb. 4:​14-16. w24.01 4 ddima 6; 7 ddima 17