Txini Ensunziha Bibilia Mwaha wa Yehova

1. Txini ennittukulela omutamalela Yehova sabwa ya Bibilia?

IYO ninomutamalela venjene Yehova sabwa ya onivaha Bibilia! Mbibiliani, iyene ohikamo malago apama annikamihedha owanana makattamiho masaka abano. Vina ohinivaha njeedhelo napama na musogorho. Yamakamakaya, jawi Yehova onomulabihedha Bibilia wi anisunzihe mikalelo dhaye. Iyo nigasunza mikalelo esi dhokoddela dha Yehova, enoddiginya murima wehu vina eji enonittukulela onfiyedha Mulugu wehu modhela okana mandano ofiyedheya na iyene.—Masal. 25:14.

2. Mikalelo gani dhottiyana dhilabihedhile Yehova wila aviziwihe?

² Yehova onfuna wi attu amuziwe. Masaka a mundduni, iyene ohiviziwiha modhela olabihedha dhoroha, dhowonihiwa na anju a wirimu. (Oleb. 12:6; Mer. 10:3, 4) Iyo nigaziwile dhavi dhoroha esi, dhowonihiwa obe miselu dhadhana anju kohilebiwa? Ji sabwaya emuttukuleli Yehova wasakula alobwana wi “[alebe] munivuruni” dhafuniye wi iyo niziwe. (Jer. 30:2) Vowi “dila dha Nabuya sowakwana,” nikane ebaribari yawi mukalelo obu wa Yehova ologa na iyo bofwanyelela vina ononikamihedha.—Masal. 18:31 [Masal. 18:30, Tradução do Novo Mundo].

3. Okalawo wa Bibilia masaka abano onnisunziha eni mwaha wa Yehova? (Izaiya 40:8)

³ Kengesa Izaiya 40:8. Nzu na Mulugu ninowavaha malago apama alobwana na ayana ororomeleya oromana vyaka dhinji mundduni. Ejo enwodheya dhavi? Ntti nivuzo na pama. Vowi Bibilia olebiwe mundduni vaddiddi mwa ovira wa mudhidhi mapapiya vina roludha dhahidha onongeya, nona masaka abano iyo kanina marolu obe mapapi abale oroma. Yehova wahakamihedha alobwana alebile makopiya a Bibilia wi alebe esilene dhali mmaroluni vina mmapapini oroma. Vowi alobwana amulebile Bibilia ali ohiligana awene ahifwasela oleba, motagiha, mulobwana dhahi wosunzetxa alogaga mwaha wa Malebo a Ebraiko ohileba: “Kaniwo nivuru nawale nilebiwe nifwaseyeliwe olebiwa dhahene ninga Bibilia.” Masiki valebiwiye wale, mmapapini, mmaroluni, vina na alobwana ohiligana, ninofwanyelela okuluvela wi dhinengesa iyo mBibiliani masaka abano mazu a Mwinyene, Yehova.

4. Txini enasunze iyo mwari mwa nsunzo ntti?

⁴ Yehova ddi Mwinya wa “dhapama dhetene na mivaho dhetene dhawakwana.” (Tia. 1:17) Bibilia mvaho wa makamaka onivahile Yehova. Muttu aganivaha mvaho, mvahoya onnitonyihedha wi iyene oniziwa vina onoziwa dhojombeliwa dhehu. Jijuwene epadduwile na Yehova. Iyo nigamwengesaga Bibilia, ninosunza vaddiddi mwaha wa Yehova. Iyo ninosunza wi iyene ononiziwa vina onoziwa dhojombeliwa dhehu. Mwari mwa nsunzo ntti, iyo ninele woona mikalelo miraru dha Yehova dhinlogiwa mBibiliani: eziwelo, oligana vina okwela. Voroma ninfuna nisunze mukalelo ononiha Bibilia wi Mulugu dw’eziwelo.

BIBILIA ONOWONIHA EZIWELO YA YEHOVA

5. Mukalelo gani ononiha Bibilia eziwelo ya Mulugu?

⁵ Yehova onoziwa wi iyo ninofuna malago a eziwelo yaye. Vina mu mvaho waye Bibilia, munofwanyeya venjene eziwelo eji. Malago a Bibilia ahikana ewodhelo yowakamihedha attu. Bibilia onotxinja dhigumi. Valebiwe manivuru oroma a Bibilia, Mizé wawaddela dhahi nlogo na Mulugu, ana Izrayel: “Nlamulo nthi kamonege ninga elobo ehinna mabasa, thinukalihaniwo-wene.” (Olib. 32:47) Abale ageweleli malebo aba agahikana wagalala vina egumi yofwasa. (Masal. 1:2, 3) Ovira wa mudhidhi kusaddulile ewodhelo ena Nzu na Mulugu ya otxinja dhigumi. Motagiha, serie “Bibilia Onotxinja Egumi ya Attu” eli mu jw.org, weyo onele ofwanya mapadduwo a attu okwaranya 50 alogile wi Bibilia ohikana ewodhelo ya otxinja dhigumi dha attu masaka abano.—1 Tes. 2:13.

6. Ninlogela nni wi kaniwo nivuru nina ninladdanihiwa na Bibilia?

⁶ Kaniwo nivuru nina ninladdanihiwa na Nzu na Mulugu. Sabwaya jani? Sabwani Mwinyaya wa nivuru ntti, Yehova Mulugu, ddi namawodha-wodha, okalawo waye kwa mukalakala vina eziwelo yaye kinladdanihiwa. Manivuru menjene anodhowavi engesiwaga masiki anyaya agamala okwa, mbwenyi kangonela mudhidhi mwinjene, s’ottiya olabihedhiwa. Mbwenyi malago a eziwelo anfwanyeya mBibiliani, ba mukalakala. Malagoya anodhavi àkamihedhaga attu ankalawo masaka otene, nigengesa nivuru ntti nokoddela vina nitanalela esile dhisunzilihu, Mwinya wa Bibilia onolabihedha muya waye wokoddela wi onikamihedhe ovirihamo malago a Bibilia mwigumini mwehu. (Masal. 119:27; Mal. 3:16; Aheb. 4:12) Ndde, Yehova Mwinya wa Bibilia, ohikana efunelo ya wukamihedha. Eji kinuttukulela omwengesaga Bibilia malabo otene?

7. Bibilia okamihedhile dhavi nlogo na Mulugu okala nowiwanana masaka a mundduni?

⁷ Elobo yina enoniha wi mBibiliani munofwanyeya eziwelo ya Mulugu ji sabwa ya wi Bibilia ohikamihedha nlogo na Mulugu okala nowiwanana. Ana Izrayel muvolowelani Elabo Yolibeliwa, attomeliwe okalaga mirudda dhottiyana-ttiyana. Ena ali anamattadda, ena ali anamafuwa ng’ombe oku ena ali anamalima. Eji egahattukulela ana Izrayel wadduwala abali awa akala mpaddi mwina wa elabo. Mbwenyi Yehova wahikosa masasanyedho wi masaka mena ana Izrayel atugumanege vamodhavi wi ewe wengesiwa vina otapuleliwa wa Nzu na Mulugu. (Olib. 31:10-13; Nem. 8:2, 8, 18) Karoma otanalela yewamo ana Izrayel ororomeleya mudhidhi wadhowani o Jeruzalemi agumanana abaliwa matxikwi na matxikwi adha dhilabo dhottiyana-ttiyana wi amwebedhe Yehova! Yehova wakosa ejene wi akamihedhe okalavi owiwanana. Vasogorhova, vetiwe mulogo Wokristu, mwahikala alobwana na ayana aloga dhilogelo dhottiyana-ttiyana ena mwa awene ali attu a makamaka, ena ali ovyeviha, ena ali areeli oku ena ali ayelegi. Mbwenyi vowi otene ankwela Nzu na Mulugu, ankala owiwanana oku amwebedhaga Mulugu webaribari. Abale akala Akristu, annonelamo Nzu na Mulugu na nikamihedho na Akristu aba vina sabwa ya otugumana na awene.—Mer. 2:42; 8:30, 31.

8. Bibilia oniwananiha dhavi nlogo na Mulugu masaka abano?

⁸ Mulugu wehu wa eziwelo onodhowavi asunzihaga vina atugumanihaga nlogo naye na nikamihedho na Bibilia. MBibiliani munofwanyeya ebaribari enfunihu oziwa sabwa ya Yehova. Mudhidhi na mudhidhi ninotugumana wi nivuruwane diskursu, wengesiwa vina otapuleliwa wa Malebo va matugumanoni a murudda, a ttattamwa vina mmatugumanoni a vari va sumana na omagomo wa sumana. Bibilia epano yamakamaka vaddiddi enlabihedha Yehova wi akamihedhe nlogo naye wi nimwebedhe mumodhani.—Sof. 3:9.

9. Elobo gani eli yofuneya wi ninonelemo muselu wa Bibilia? (Luka 10:21)

⁹ Katanalela elobo yina enoniha wi mBibiliani munofwanyeya eziwelo ya Yehova. Dhipaddi dhinjene dha Malebo munofwanyeya dhilobo dhinnoneliwamo na attu ovyeviha. (Kengesa Luka 10:21.) Attu a dhilabo dhotene anomwengesa Bibilia. Jijuwene yonile namasunza dhahi “ottiya Bibilia wengesiwa bahi, nivuru ninengesiwa nofwaseya na attu enjene.” Mbwenyi attu ovyeviya bahi banwodha ononelamo vina ovirihamo ejile enlogani.—2 Kor. 3:15, 16.

10. Mukalelo mwina ononiha wi mBibiliani munofwanyeya eziwelo ya Yehova buvi?

¹⁰ Iyo vina ninowona eziwelo ya Yehova eli mBibiliani na mukalelo mwina. Yehova onolabihedha Malebo ottiyana wi anisunzihena ninga nikuru, mbwenye vina onolabihedha wi amusunzihena vina ampangarhazena muttu-muttu wa iyo. Iyo nigengesa Mazu a Yehova ninowodha woona wi iyene onomuzuzumela muttu-muttu wa iyo. (Iza. 30:21) Dila dhina ogagumanagana makattamiho kunfugulaga Malebo buwengesa, buwoona wi elebiwevo ekalile ninga olebeliwe ddi weyo? Pumwenemo, Bibilia olebeliwe wi attu matxikwi na matxikwi awodhege omunonelamo. Enwodheya dhavi mBibiliani ofwanyeyagamo makani aniwanana na ejile enfuniwe? Eji enwodheya sabwa ya wi Mwinya wa Bibilia ohikana eziwelo ehinladdanihiwa.—2 Tim. 3:16, 17.

BIBILIA ONOWONIHA OLIGANA WA MULUGU

11. Mulugu wonihile dhavi wi kanna nsakulano mudhidhi walebiwa Bibilia?

¹¹ Oligana mukalelo mwina wa Yehova. (Olib. 32:4) Oligana onedda mumodhani na ohikana nsakulano, nanda Yehova kanna nsakulano. (Mer. 10:34, 35; Rom. 2:11) Ohikana nsakulano waye onowoneya na elogelo elabihedhiliye wi elebiwe Bibilia. Manivuru oroma 39 a Bibilia alebiwe na Ebrahiko, elogelo yaziwiwa na nlogo na Mulugu mudhidhene obule. Mbwenyi mwa ovira wa mudhidhi, Nsaka na Akristu oroma, attu owinjivaya aloga Egregu, nona manivuru omariha 27 a Bibilia alebiwe na elogelo ya Egregu. Yehova kaganile wi Nzu nilebiwe na elogelo modha bahi. Masaka abano attu waddamela 8 bilhões ali velaboni ya vati anologa dhilogelo dhinjene. Enwodheya dhavi attu enjene osunza sabwa ya Yehova?

12. Epikirheli Yehova va Daniyel 12:4 enakwanihedheya dhavi masaka abano omariha?

¹² Amulabihedhaga namavuhulela Daniyel, Yehova ohipikirhela wi masaka omariha, eziwelo ya txibarene enfwanyeya mBibiliani egahidhala mwilaboni. Attu enjene agahiwodha ononelamo. (Kengesa Daniyel 12:4.) Mukalelo mmodha wa eziwelo eji odhala mwilaboni ja otapuleliwa, opidiwa vina opakiwa wa Bibilia na manivuru andela mBibiliani. Bibilia nivuru nintapuleliwa vina nimpakiwa venjene mwilaboni. Mabibilia mena ampidiwa na dhimpereza masaka mena anogulihiwa muttengo mwinjene. Nlogo na Mulugu nimutapulela Bibilia wotene obe epaddi modha na dhilogelo okwaranya 240, muttu onvahiwa Bibilia oddo kanimpitxela elo. Sabwa ya ejuwene attu a malogo otene anosunza “miselu dhapama dha Omwene” omagomo wa elabo ohinafiya. (Mt. 24:14) Mulugu wehu woligana onfuna wi attu enjene akane gari ya omuziwa iyene mwa wengesa Nzu naye. Sabwani iyene ononikwela venjene iyo notene.

BIBILIA ONOWONIHA OKWELA WA MULUGU

13. Ninlogela nni wi Bibilia onowoniha okwela wa Mulugu? (Joau 21:25)

¹³ Bibilia onowoniha mukalelo wa makamaka wa Mulugu—okwela. (1 Jo. 4:8) Katanalela ejile efunile Yehova wi ekale mBibiliani. Iyene ohikiha mBibiliani esile dhinfunihu wi nikaane mandano ofiyedheya na iyene, wi nikaane egumi yowagalala ovanene vina nijevo egumi yohimala. Mbwenyi, sabwa ya onikwela wa Yehova, iyene kekihile mBibiliani dhilobo dhili dhetedhene wi niwodhe omulabela.—Kengesa Joau 21:25.

14. Mukalelo gani mwina ononiha Bibilia wi Mulugu ononikwela?

¹⁴ Yehova onowoniha onikwela waye na mukalelo woriheya onlogiye na iyo. Mbibiliani, iyene kekilemo malamulo anloga wi eji kakosa, eji kukose mwa dhilobo dhetene dhimpadduwa mwigumini mwehu. Ottiya ejo, iyene onlabihedha esile dhipadduwile mwigumini mwa attu, mavuhulo vina malago ottiddihedha mabasa wi niswagihena mubuwelo wehu. Na makalelo-ene aba Nzu na Mulugu ninonitukulela omukwela vina omwiwelela na murima wehu wotene.

15. (a) Yehova ononiha dhavi wi onowatanala venjene abale anengesa Nzu naye? (b) Va fotoni, nipadduwo gani na mBibiliani nintanalela mwana muyana, mbali wa muzombwe vina murogora wowunuwelavo? (Wita 39:1, 10-12; 2 Amwe. 5:1-3; Lk. 2:25-38)

¹⁵ Bibilia onowoniha wi Yehova ononitanaala venjene. Dhavi? Munzuni Naye munofwanyeya mapadduwo a attu onihile mukalelo onviwamo attu. Iyo ninowodha ononelamo dhubuwelo dha attu anlogiwa mBibiliani sabwani awene ali attu ana dhubuwelo ninga dhehu. (Tia. 5:17) Elitxi yamakamakaya, niganonelamo wi ddi Yehova waweddihile attu aba dhahene ninga iyo, eji enele onittukulela okuluvela wi “Nabuya ddodhala thagaraga na nthebwa.”—Tia. 5:11.

16. Txini ensunzihu na Yehova nigengesa mBibiliani sabwa ya attu akosile dhottega? (Izaiya 55:7)

¹⁶ Bibilia onologa onikwela wa Yehova na mukalelo mwina. Malebo anonikuluveliha wi Mulugu wehu kananinyanyale nigakosa yottega. Ana Izrayel annimuttegela Yehova dila dhinjene; masiki dhawene, agatxinuwa na murima wotene, Mulugu wannalevelela. (Kengesa Izaiya 55:7.) Akristu a nsaka zana noroma anziwa vina wi Mulugu wannakwela. Na nikamihedho na Mulugu, murumiwi Paulo wahawaddela Akristu akwaye wi amulevelele vina ampangarhaze mulobwana wakosile yottega enddimuwa nanda batxinuwa. (2 Kor. 2:6, 7; 1 Kor. 5:1-5) Ninopangarhazeya oziwa wi Yehova kananyanyala alabeli aye sabwa ya awene okosa dhottega! Ottiya ejo, iyene na okwela onowakamihedha, onowasisigula vina onowaloba wi eyelele wili mandano awa na iyene. Iyene ohipikirhela okosa yakene na otene abale anttega masaka abano.—Tia. 4:8-10.

KAVAHA TTIMA MVAHO WAPAMA NZU NA MULUGU

17. Bibilia okaleleni mvaho wohaganyedheya?

¹⁷ Yehova ohinivaha mvaho ya makamaka vaddiddi. Sabwaya jani ekaleli Nzu naye mvaho wohaganyedheya? Ninga musunzelihu, Bibilia onolagiha eziwelo, oligana vina okwela wa Mulugu. Nivuru ntti ninowoniha wi Yehova onfuna wi iyo nimuziwe. Iyene onfuna wi iyo nikale amarho aye.

18. Ninawodhe dhavi woniha wila ninotamalela mvaho obu wapama wa Yehova, Bibilia?

¹⁸ Kanipwaze mvaho obu wapama Nzu na Mulugu. (Tia. 1:17) Nona nidhowegevi nonihaga ntamalelo nehu sabwa ya mvaho obu. Ninawodhe okosa ejuwene modhela omwengesa vina otanalela dhinengesihu. Nigakosa ejuwene ninofwanyela okana ebaribari wi Mwinyaya onele oruriha guru dhinkosihu vina ninele entapulela omuziwa Mulugu.—Gano 2:5.