Omova Mulugu Onodhana Dhopurelamo

1-2. Dhahene ninga Loti, makattamiho gani angumanana Akristu masaka abano?

IYO nigona mweddelo wa attu masaka abano ninovyona ninga Loti. Iyene wannulana mweddelo wabure wa attu a nsaka naye, sabwani iyene wanziwa wi Babi waye wa wirimu wannidda dhokosa dhawa dhonyakuwa. (2 Ped. 2:7, 8) Omova Mulugu vina omukwela waye ohimuttukulela orabela mweddelo wonyakuwa wa attu a nsaka naye. Iyo vina ninkala mwilaboni muli attu ahineddana magano a Yehova. Masiki dhawene, enowodheya okana mweddelo wokoddela modhela odhowavi nimukwelaga Yehova vina okana mukalelo wapama wa omova iyene.—Gano 14:2.

² Yehova ononikamihedha modhela onilibiha na mazu anfwanyeya munivuruni na Gano. Akristu otene, alobwana, ayana, azombwe vina anakalaba, nigasunza magano anfwanyeya munivuruni ntti ninele opurelamo.

OMOVA MULUGU ONONIBARELA

3. Mowiwanana na Gano 17:3, sabwaya jani enfwanyelela iyo obarela murima wehu? (Koona vina foto.)

³ Elobo yamakamaka ennittukulela obarela murima wehu wa nladdaniho jawi Yehova onopima murima wehu. Eji entapulela wi iyene onowodha wona opitta esile dhinona attu ena vina onoziwa ejile eli iyo txibarene. (Kengesa Gano 17:3.) Iyo nigadhowavi nubuwelaga magano a Yehova eji enele onokamihedha okalawo na mukalakala. (Jo. 4:14) Iyo txipo kaninapupurutxiwe na mubuwelo wohikala vina dhozivala dha Satana na dha attu abure a elabo eji. (1 Jo. 5:18, 19) Iyo nigakala ofiyedheya na Yehova omukwela wehu vina omuriha wehu onele wunuwa. Vowi iyo kaninfuna omunyimula Babi wehu, ninele widda dhotedhene dhiganittukuleli ottega. Nigafwanyiwa yoweha yokosa eli yabure ninofwanyela ovivuza, ‘Miyo ddigahikosa elobo yabure egadhile omunyimula Muttu ondditonyihedha okwela?’—1 Jo. 4:9, 10.

4. Omova Yehova ombareli dhavi murogora wafwanyiwe yoweha yokosa elobo yabure?

⁴ Marta, murogora onkala o Croácia wagumanilena yoweha ya okosa mararuwo, ohileba: “Yahirutxa wubuwela mowakwana-mwene vina orabela okosa elobo yabure. Mbwenye omova waga Yehova ohiddibarela.”b Omova Mulugu omukamihedhile dhavi? Marta ohiloga wi iyene wahitanalela dhodhelavo dhinda sabwa ya okosa dhogana dhohikala. Enowodheya iyo okosa yakakene. Yodhelavoya yottabwa jawi iyo ninele omukubanyiha Yehova vina kaninakale mwibaribarini na mukalakala.—Wita 6:5, 6.

5. Txini ensunza weyo na yotagiha ya Leo?

⁵ Iyo nigamovaga Yehova ninele orabela wandana na attu ankosa dhilobo dhabure. Leo, onkala o Congo, mbatizeliwiye dhivira vyaka nayi wahikana mandano abure. Iyene obuwela wi kanakose dhilobo dhabure vina kagamuttegeli Yehova. Mohigonela mandano aye abure ahimuttukulela omwa bure dholezeliha vina okosa mararuwo. Iyene wahiroma wubuwela dhamusunzihile amambali aye vina wagalala wayeleliliye. Yodhelavoya? Wahiroma wili okosa dhilobo dhapama. Na nikamihedho na anddimuwa a mmulogoni iyene wahimwiyelela Yehova. Ovano onolaba nowagalala ninga munddimuwa wa mmulogoni vina pionero wavawoka.

6. Ayana gani a nladdaniho anfunihu wasunza ovanene?

⁶ Ndowe nisunze Gano kapitulu 9, veneva iyo ninowengesa mwaha wa ayana eli, mmodha onladdanihiwa na muyana ona merelo otowa malago, mwina ona eziwelo yebaribari. (Kaladdaniha na Roma 5:14; Galásia 4:24.) Nigasunzaga nihidduwale wi elabo eji ya Satana muhidhala attu anziveliwa mararuwo vina wawona attu bali yovi. (Ef. 4:19) Nona enofuneya odhowavi nisunzaga okana mukalelo wapama wa omova Mulugu vina orabela dhili dhabure. (Gano 16:6) Iyo notene peno nikale alobwana obe ayana, ninopurelamo makani anlogiwa kapitulu eji. Ayana aba oheli anowawoba attu abale—“otowa malago.” Muttu-muttu onloga dhahi, dhaunoni vatakulu vaga, muje pawu. (Gano 9:1, 5, 6, 13, 16, 17) Mbwenye enimpadduwela ole onrumela niwobo ntti ehittiyana vaddiddi.

ORABELE NIWOBO NA MUYANA WA JEBERUWA

7. Mowiwanana na Gano 9:13-18, txini enapadduwela abale anrumela niwobo na muyana wa jeberuwa? (Koona vina foto.)

⁷ Ovano ninfuna nisunze niwobo na muyana wa jeberuwa. (Kengesa Gano 9:13-18.) Iyene onowakuwela attu abale otowa malago alogaga, “Vaduwaní apano,” mudhe muje mattanga. Yodhelavoya? “Aweneyá kanziwa wi venevo pali okwa.” Txino weyo onowubuwela mazu oladdana alogiwe omaromo wa versu eji. Iyo ninowaddeliwa wi nikale pasope na muyana wa jeberuwa. Bibilia onologa: “Ogathukula dila ya owaniwe, ofwarilé dila y’o masiye.” (Gano 2:11-19) Gano 5:3-10 enloga wi ohikalawo muyana wa jeberuwa, abale anedda na iyene angomela mmasiye.

8. Yosakula gani enfwanyelihu okosa?

⁸ Otene aninvuruwana muyana wa jeberuwa, anofwanyela osakula akala anele orumela obe okodda niwobo naye. Enodhaga ofuneya iyo vina okosa yosakula ninga eji. Txini enfwanyelihu okosa akala muttu ononikwekwettela okosa mararuwo, obe akala mohijedheleya ninowona mafoto a attu bali yovi?

9-10. Mwaha gani dhina iyo dhinnittukulela orabela okosa mararuwo?

⁹ Ohikalawo mwaha wapama onnittukulela orabela okosa mararuwo. Bibilia onomuloga muyana wa jeberuwa alogaga dhahi: “Manje awiyiwa anothabwa oridha.” “Manje awiyiwa” antapulela nni? Bibilia onoladdaniha ogonihana wa mulobwana na mwadhiye ninga manje oridha. (Gano 5:15-18) Mulobwana na muyana atelanile anorumeliwa ogonihana ejuwene enadhelana wagalala. Ogonihana oku onottiyana na “manje awiyiwa.” Manje awiyiwa antapulela ogonihana wonyakuwa obe mararuwo. Attu ankosa mararuwo ankosa moviteya, dhahene ninga mbava oniya dhilobo moviteya. “Manje awiyiwa” txino anodhaga woniwa ninga oridha na attu anubuwela wi kawo muttu onaziwe dhinkosani. Jokubanyiha wubuwela dhawene! Sabwani Yehova onowona dhilobo dhotedhene. Kuli elobo yattima opitta weddeyana wehu na Yehova, nona kiwo elobo yottapira empitta wandana na Yehova. (1 Kor. 6:9, 10) Mbwenyi, ekalawo elobo yina.

¹⁰ Okosa mararuwo onotota manyazo, ohivyonana ttima, onononga mirala, dila dhina enotota yari yohifuna. Mohaganyedha ja malago ohirumela niwobo na muyana wa jeberuwa. Ottiya oyelelavi mandano awa na Yehova attu enjene ankosa mararuwo anorava maredda enattukulela okwa bali azombwe. (Gano 7:23, 26) Versu 18 ya kapitulu 9 enogoma na mazu aba: Amala ovolowa mwikuttani. Kito attu enjene anrumelelani niwobo ntti ninattukulela otolowa?—Gano 9:13-18.

11. Wawona attu bali yovi ekalele nni elobo yabure?

¹¹ Elobo yina enfwanyelihu orabela ja wawona attu bali yovi. Attu ena anubuwela wi wawona attu bali yovi kahiye elobo yabure. Mbwenyi abale anawona attu bali yovi anoviputtula, kanivyonana ttima vina anotowiwa nriho na attu ena, ottiya ejo enokala yorutxa ottiya ekarho eji yabure. Akala muttu onowona mafoto a attu bali yovi enokala yorutxa odduwala dhoniliye. Wawona attu bali yovi kinnikamihedha ottiya dhifunelo dhabure, ottiya ejo enonittukulela ofuna okosa esile dhinona iyo. (Kol. 3:5; Tia. 1:14, 15) Ndde, muttu onawona attu abali yovi onottukuleleya okosa mararuwo.

12. Ninalagihe dhavi wi ninovilibihedha orabela woona mafoto anlagiha dhilobo dhonyakuwa?

¹² Ninga Akristu txini enfwanyelihu okosa akala mohijedheleya mutelefonini mwehu munodha mafoto anlagiha attu bali yovi? Momaguva-mwene ninele orabela woona. Enanikamihedhe okosa ejuwene ja wubuwela wi elobo elitxi yamakamaka ba mandano ehu na Yehova. Masiki akala mafotoya kanlagiha attu bali yovi, anodhaga onittukulela okana mubuwelo wonyakuwa. Ninfwanyelelani orabela woona mafoto aba? Sabwani iyo kaninfuna wubuwela dhilobo dhigadhile onittukulela okosa mararuwo. (Mt. 5:28, 29) Munddimuwa wa mmulogoni wo Tailândia onkuweliwa David ohiloga: “Miyo ddinovivuzaga: ‘Masiki akala mafotoya txino kanalagiha attu bali yovi, Yehova onele wagalala miyo ddigadidela woona mafotoya abo?’ Ovikosa mavuzo ninga aba enoddikamihedha okosa dhosakula dhapama.”

13. Txini enanikamihedhe okosa dhilobo na malago?

¹³ Wova okosa elobo-txilobo enamukubanyihe Yehova enele onikamihedha okosa dhilobo na zelu. Bibilia onloga dhahi, “Nipara” na “ononelamo” kumova Mulugu. (Gano 9:10) Iyo nihona omaromo wa nivuru na Gano kapitulu 9 wi eziwelo yebaribari enoladdanihiwa na muyana mwina.

KARUMELA NIWOBO NINDHA WA EZIWELO YEBARIBARI

14. Niwobo gani nottiyana ninfwanyihu va Gano kapitulu 9:1-6?

¹⁴ Kengesa Gano 9:1-6. Veneva iyo ninowengesa mwaha wa niwobo ninnikosela Yehova oli Muttanddi wehu vina Nipara na eziwelo yotene. (Gano 2:6; Rom. 16:27) Versu esi dhinologa mwaha wa nyumba ena matxikwa matanu na meeli. Musibo obu ononisunziha wi Yehova Mulugu wotapuwa mada vina onowattambirha otene anfuna olabihedha eziwelo yaye mwigumini mwawa.

15. Mulugu onniwoba iyo okosa eni?

¹⁵ Mwari mwa yotagiha ya muyana onlagiha eziwelo yebaribari enfwanyeya va Gano kapitulu 9, iyo ninosunza wi Yehova Mulugu wotapuwa mada vina onnivaha dhilobo dhinji dhapama. Versu esi dhinologa wi muyana oddu onowawoba attu wi adhe vatakulu vaye aje nama vina vinyu yoziva esasanyedheliye. (Gano 9:2) Ottiya ejo mowiwanana na Versu 4 na 5: Muyana wa eziwelo onologa na attu ahinziwa elo dhaunoni muje pawu. Ninfwanyelelani orumela niwobo na muyana oddu? Yehova onofuna wi anaye akane eziwelo vina avibarele. Iyene kanfuna wi iyo—nikose dhovonya dhigadhile oniputtula. Sabwani iyene “onowathiddela abale aneddeyana na athu.” (Gano 2:7) Iyo nigakana mukalelo wapama wa omova Mulugu ninele ofuna omwagalaliha. Iyo ninele ovuruwana malago aye a eziwelo vina ninele wagalala nigavirihamo.—Tia. 1:25.

16. Omova Mulugu emukamihedhile dhavi Alain okosa dhosakula dhapama, nanda okanile dhopurelamo gani?

¹⁶ Katanalela mukalelo okamihedheyile Alain okosa dhosakula dha malago sabwa ya omova Mulugu. Alain oli munddimuwa wa mmulogoni vina namasunziha oskola ohiloga dhahi, “Anamasunziha akwaga enjene anowubuwela wi woona mafilmi anlagiha attu bali yovi mukalelo mwina wa masunziho aniwanana na ogonihana.” Mbwenyi Alain onoziwa wi ejo kahiye ebaribari. Iyene ohiloga “Sabwa ya omova vina omukwela Yehova, miyo ddinotxatxama wona mafilmi aba. Ottiya ejo ddihatapulelamo mwahaya enkoddela miyo woona.” Iyene ohivirihamo malago a eziwelo yebaribari modhela ottukula dila eneddana attu a malago. (Gano 9:6) Anamasunziha akwaye ahidha otikina na ejuwene, ovanene anosunza Bibilia vina anowona matugumano.

17-18. Mareliho gani anakele abale anrumela niwobo na eziwelo yebaribari vina txini enjedhela awene? (Koona vina foto.)

¹⁷ Yehova onolabihedha dhotagiha dha ayana aba eli wi anilagihe mukalelo wa ojavo mareliho musogorho. Otene anrumela niwobo na muyana wa jeberuwa anosakula okosa mararuwo. Awene anosakula okala mudhidhi mung’onovi, ankosa ejuwene apwazaga dhilobo dhapama dhinapadduwe musogorho. Sabwa ya opwaza dhilobo dhapama dhinapadduwe musogorho awene ankalawo mudhidhi mung’onovi, omamalelowa angomela mmasiye.—Gano 9:13, 17, 18.

¹⁸ Otene anrumela niwobo na muyana ona eziwelo yebaribari anokana njedhelo nottiyana na abale anrumela niwobo na muyana wa jeberuwa! Sabwani awene ahikana dhilobo dhotedhene dhinfuna awene wi akale ofiyedheya na Yehova. (Iza. 65:13) Amulabihedhaga namavuhulela Izaiya Yehova ohiloga: “Muddiwe, muddivuruwane: munofwanya dhoja dhoziva, dhinukolani.” (Iza. 55:1, 2) Iyo ninosunza okwela dhinkwela Yehova vina widda dhinidda Yehova. (Masal. 97:10) Vina ninowagalala sabwani ninowawoba attu ena wi asunze na eziwelo yebaribari. Iyo ninoladdanihiwa na anamukatti arumiwe wi “alaleye mmathukuwani a muthethe, eraga: ‘Mudhe okuno nyuwo athu ahinziwa elo!’” Mareliho anakele iyo vina abale annivuruwana kannipuriha masaka aba ankalawo iyo bahi. Mbwenyi anele onipuriha musogorho anikamihedhaga okalawo na mukalakala, venevo vandowa iyo nittukulaga dila eneddana attu a malago.—Gano 9:3, 4, 6.

19. Mowiwanana na Kohelét 12:13, 14, txini eganile iyo okosa? (Koona vina kasha “Omova Mulugu Ononikamihedha.”)

¹⁹ Kengesa Kohelét 12:13, 14. Omuriha Yehova ononibarela vina ononikamihedha okana mubuwelo wotxena vina akala ofiyedheya na iyene mwari mwa masaka aba omariha vina abure ankalawo iyo. Ninele odhowagavi nawobaga attu enjene egawodheya wi avede eziwelo yebaribari vina asunze na eziwelo eji, vowi ninomukwela vina ninomuriha Yehova na murima wehu wotene.