Ninfwanyelela Eni Omova Yehova?

1-2. Mowiwanana na Masalmo 25:14, txini enfwanyelihu okosa akala ninofuna okana mandano oliba na Yehova?

MUKALELO gani wamakamaka onubuwela weyo, onfwanyela okana muttu wi akane mandano ofiyedheya na muttu mwina? Txino weyo ogakulile wi amarho apama anofwanyelela okwelana vina okamihedhana. Txino weyo kugafiyedhile wubuwela wi wova mukalelo wamakamaka wa okana mandano apama. Nona, nlebo na nsunzo ntti, nigaloga wi animova Yehova bankana mandano oliba na iyene.—Kengesa Masalmo 25:14.

² Kintanala mudhidhi olihu nimulabelaga Yehova, iyo notene ninofwanyelela okana monelo wapa wa omova iyene. Mbwenyi, txini entapulela omova Mulugu? Ninawodhe dhavi osunza omova Yehova? Ninele osunza omova Mulugu na Abdiya, Namakutta Munddimuwa Joyadá, vina mwene Jowás.

TXINI ENTAPULELA OMOVA MULUGU?

3. Kaloga dhilobo dhinnitotela wova vina mukalelo onawodhihu ovibarela.

³ Iyo ninodheliwa wova nigaziwa wi ninele otabuwa makattamiho-makattamihovi. Mukalelo obu wa wova bwapama vina ononikamihedha okosa dhilobo na zelu. Wova onele onittukulela orabela wedda sere-sere ya mwego motibeya. Wova opeya onele onittukulela orabela ovolowa mmakattamihoni owopiya. Wova ononga mandano na muttu onimukwelihu ononittukulela orabela ologa obe okosa elobo yohikala.

4. Satana onnifunana wi nikane mukalelo gani wa omova Yehova?

⁴ Satana onfuna wi attu amovege Yehova na mukalelo w’ohifwanyelela. Satana onodhowanavi vasogorho dhubuwelo dhalogile Elfaz—wi Yehova onowatabutxa attu, Mulugu wabure vina enorutxa omwagalaliha. (Job 4:18, 19) Satana onfuna wi iyo nimovege Yehova vaddiddi vina nittiye omulabela. Wi nirabele murega obu, ninofwanyela wunuwiha mukalelo wapama wa omova Mulugu.

5. Txini entapulela omova Mulugu?

⁵ Muttu ona ekalelo yapama ya omova Mulugu, onomukwela vina onorabela okosa elobo-txilobo egadhile ononga mandano aye na Iyene. Yezu wannimova Mulugu. (Aheb. 5:7) Mbwenyi, iyene kamova na mukalelo wohifwanyelela. (Iza. 11:2, 3) Ottiya ejo, iyene wanimukwela venjene vina wahikana efunelo enddimuwa ya omwiwelela. (Jo. 14:21, 31) Dhahene ninga Yezu, iyo ninofuna omuriha venjene Yehova sabwa ya okwela waye, eziwelo yaye, oligana waye vina ewodhelo yaye. Iyo ninoziwa wi Yehova ononikwela venjene vina ononitanala sabwa ya iyo wiwelela masunziho aye. Iyo ninomunyimula Mulugu nigakodda omwiwelela, mbwenyi ninowagalaliha murima waye nigamwiwelela.—Masal. 78:41; Gano 27:11.

NISUNZE OMOVA MULUGU

6. Mukalelo gani mmodha wa osunza omova Mulugu? (Gano 2:5)

⁶ Iyo kanimbaliwa na ekalelo ya omova Yehova, enofuneya osunza. (Kengesa Gano 2:5.) Mukalelo mmodha wa osunza omova Mulugu, wang’ana dhilobo dhittanddiliye. Venevo vandowihu nonaga eziwelo ya Mulugu, owodha waye, vina onikwela waye onddimuwa onona iyo “mvitaganoni dhipaddutxileye,” omukwela wehu vina omuriha wehu onelege wunuwavi. (Rom. 1:20) Murogora onkuweliwa Adrienne ohiloga dhahi, “Ddigonaga eziwelo ya Yehova modhela dhilobo dhittanddiliye enodditikiniha vina enoddikamihedha oziwa wi iyene onoziwa ejile eli yamakamaka mwa miyo.” Otanalela dhilobo dhittanddile Yehova ohimuttukulela ologa dhahi, “Miyo kaddinfuna okosa elobo egadhile ononga mandano aga na Yehova odduwene oli Nipara na egumi yaga.” Katamela mudhidhi sumana ejino wi otanalele elobo-txilobo ettanddile Yehova. Ogakosa dhawene onele wunuwiha omukwela vina omuriha Yehova.—Masal. 111:2, 3.

7. Malobelo anikamihedha dhavi wunuwiha ekalelo yapama ya omova Yehova?

⁷ Mukalelo mwina wa wunuwiha omova Mulugu okosa malobelo mudhidhi wotene. Venevo vandowihu nikosaga malobelo, ninelege omona Yehova ninga muttu. Dila dhetene dhinimukumbirihu Yehova wi anivahe guru dha owodha ovilela makattamiho, iyo ninowubuwela wi iyene txibarene ohikana guru dhinddimuwa. Nigobuwela wi iyene ohinilevela Mwanaye wi anivune, ninowubule onikwela onddimuwa wa Yehova. Nigamukumbirha Yehova wi anikamihedhe owanana makattamiho, ninononelamo eziwelo yaye enddimuwa. Malobelo aba anowunuwiha omuriha wehu Yehova. Vina anonittukulela okana efunelo ya orabela okosa elobo-elobovi egadhile wika mandano ehu na Yehova vangovini.

8. Txini enfwanyelihu okosa wi nihittiye omova Mulugu?

⁸ Iyo ninele odhowavi nimovaga Mulugu nigakana yogana ya osunza dhotagiha dhinfwanyeya mBibiliani dha attu akosile dhilobo dhapama vina dhilobo dhabure. Ovano ndoweni none dhotagiha dha alabeli eli ororomeleya a Yehova—Abdiya namalaba wa ntakulu na Mwene Akabe vina Namakutta Munddimuwa Joyadá. Omamalelowa ninele osunza na yotagiha ya Mwene Jowás w’o Juda, wamulabela Yehova vamaromo omamalelowa battiya.

OLIBE MURIMA NINGA ABDIYA

9. Omova Yehova omukamihedhile dhavi Abdiya? (1 Amwene 18:3, 12)

⁹ Bibilia onoroma omuloga Abdiyab na mazu aba: Abdiya wali muttu wamova Yehova. (Kengesa 1 Amwene 18:3, 12.) Mukalelo obo wapama wa omova Mulugu omukamihedhile dhavi Abdiya? Mwa mpaddi mwina, iyene wali muttu waloga ebaribari; vina wali wokuluveleya, nona Mwene wahinvaha mabasa a weddiya dhotene dha vatakulu vaye. (Kaladdaniha na Nehemiya 7:2.) Yehova ohinvaha Abdiya oliba murima—mukalelo wafuniye. Iyene okalilewo nsaka nalamulela Mwene wabure Akabe, odduwene “[okosile] dhinimutakalela Nabuya opitha-wene amwene otene athongile, iyene ahinathi.” (1 Amwe. 16:30) Jezabel mwadhi Akabe wanimwidda venjene Yehova, nona ohikosa muli mwetemwene wi agomihe webedha webaribari mwari mwa mahimo kumi. Iyene ohapa anamavuhulela enjene a Mulugu. (1 Amwe. 18:4) Mohaganyedha, Abdiya wanimwebedha Yehova nsaka norutxa vaddiddi.

10. Abdiya wonihile dhavi oliba murima?

¹⁰ Abdiya wonihile dhavi oliba murima? Muromile Jezabel wapa anamavuhulela a Mulugu, Abdiya wahattukula anamavuhulela 100 bavita, makumatanu gurugudha modha, makumatanu gurugudha yina baroma wasapela na oja vina na omwa. (1 Amwe. 18:13, 14) Mulobwana oddu woliba murima kofwanyiwa, agahipiwa. Abdiya wannova vina kafuna okwa. Mbwenyi, iyene wanimukwela venjene Yehova opitta mukalelo wavikweliye.

11. Anamoona a Yehova masaka abano, ali dhavi ninga Abdiya? (Koona vina foto.)

¹¹ Masaka abano, Anamoona a Yehova enjene ankala dhilabo munkoddihiwa mabasa ehu. Awene anowariha alamuleli, mbwenyi dhahene ninga Abdiya, abali na arogora aba anokodda ottiya omulabela Yehova. (Mt. 22:21) Awene anowoniha wi anomova Mulugu modhela omwiwelela iyene ottiya wawiwelela attu. (Mer. 5:29) Anowoniha ejuwene mwa odhowavi alaleyaga miselu dhapama vina atugumanaga moviteya. (Mt. 10:16, 28) Awene anowazuzumela abali na arogora wila akanege oja womuyani onfunani wi alibihegevi mandano awa na Yehova. Koona yotagiha ya Henri onkala o Afrika, elabo yakoddihiwa mabasa ehu. Mudhidhene obo, Henri wahivilevela odhowaga mmatakulu mwa abali na arogora wi avahe oja womuyani. Iyene ohileba dhahi: “Miyo ddili muttu wawova vaddiddi. Mbwenyi, ddihidha ononelamo wi omuriha waga Yehova venjene ogahiddikamihedha okala muttu woliba murima.” Weyo onoviwonana oliba murima dhahene ninga Henri? Weyo onele owodha wunuwiha ekalelo yapama ya omova Mulugu.

OKALE OWEDDEYANA NINGA NAMAKUTTA MUNDDIMUWA JOYADÁ

12. Namakutta Munddimuwa Joyadá na mwadhiye, onihile dhavi weddeyana na Yehova?

¹² Namakutta Munddimuwa Joyadá wannimova Yehova, vina omova oku ohimuttukulela okala oweddeyana vina wakamihedha attu ena omulabela Yehova. Iyene ohoniha ejuwene mudhidhi oviwelihile Atalia mwana wa Jezabel vampaddoni vottonga o Juda. Nlogo nahikana mwaha wapama wa omova Atalia. Iyene wali muttu wabure vaddiddi, vina wanfuna venjene okala—musano! Iyene ohipiha ziza notene na omwene w’o Juda, ohapiha vina adhulaye wi aviwelihe vampaddoni va omwene. (2 Map. 22:10, 11) Mwa aima abo waviluwile ddi—Jowás—sabwani wavuniwe na mwadhi Joyadá vina yaya. Iyene na mamunaye ahinvita mwanaya baroma omusapela. Joyadá na yaya wamulela mwanaya akosile ejuwene wi munihimoni na Davidi mukale muttu agadhile okala mwene. Joyadá oweddeyana na Yehova vina kattiyile wi Atalia amutximihe okosa ejile eli yapama.—Gano 29:25.

13. Mwakwanihedhile Jowás vyaka tanu na bili dha obaliwa, Joyadá wonihile dhavi wili weddeyana waye?

¹³ Jowás vakwanihedhiliye vyaka tanu na bili, Joyadá wahoniha wili weddeyana waye na Yehova. Iyene wahikosa masasanyedho. Masasanyedho abale kowedda pama, Jowás agahikala mwene, wa nihimo na Davidi. Mbwenyi, masasanyedhoya kohidhowa vasogorho, se waganyedha Joyadá agahipiwa. Mbwenyi, na nikamihedho na Yehova, dhetene dhahedda pama. Joyadá wahikamihedhiwa na akazembe vina Alevita, ahikosa masasanyedho wi Jowás ottomiwa ninga mwene vina Atalia wahipiwa. (2 Map. 23:1-5, 11, 12, 15; 24:1) Osogorhowa Joyadá wahira nipagano “ninagumaniha Nabuya, mwene, nlogo; werela wi nlogoná nidhe okala nlogo na Nabuya.” (2 Amwe. 11:17) Ottiya ejo Joyadá “oawika vina añganeli mmilagoni dha mparha, wi amukoddihe-wene muthu wokwarula ovolowamo.”—2 Map. 23:19.

14. Mikalelo gani dhirihiwe Joyadá sabwa ya omuriha Yehova?

¹⁴ Yehova wahibaza ologa dhahi: “Ddinoariha abale anddiriha.” Jijuwene epadduwile, Yehova ohimuriha Joyadá. (1 Sam. 2:30) Yehova ohilebiha mBibiliani nipadduwo ntti na Joyadá wi ninisunzihe. (Rom. 15:4) Vakwile Joyadá, ohirihiwa venjene sabwani “ohekiwa mmuthetheni mwa Davidi, mwikuthani mwa amwene, thangwi ya dhapama dhamwireliye Izrayel, dhamwireliye Nabuya na musana waye.”—2 Map. 24:15, 16.

15. Txini ensunza iyo na nipadduwo na Joyadá? (Koona vina foto.)

¹⁵ Nipadduwo na Joyadá ninonikamihedha iyo notene wunuwiha mukalelo wapama wa omova Mulugu. Anddimuwa a mmulogoni anele omutagiha Joyadá mwa ovilibihedha obarela mulogo w’o Kristu mudhidhi wetene. (Mer. 20:28) Abali na arogora owunuwelavo anele omutagiha Joyadá mwa odhowavi akalaga oweddeyana na Yehova, Iyene onowodha walabihedha wi akwanihedhe dhopikirela Dhaye. Iyene kanadduwala abali aba. Azombwe, kasunzani mukalelo omweddihile Yehova Joyadá vina mmutagihe Iyene modhela waweddiha na nttittimiho vina nriho abali aba ororomeleya makamaka mwa abale adhile mwa vyaka dhinjidhene amulabelaga Yehova. (Gano 16:31) Notene ninofuniwana osunza na yotagiha ya akazembe vina Alevita amukamihedhile Joyadá. Nonihe weddeyana wehu nakamihedhaga “asogorheli a mutugumano” modhela wawiwelela.—Aheb. 13:17.

KUKALE NINGA MWENE JOWÁS

16. Txini enlagiha wi Mwene Jowás wali muttu wowobana?

¹⁶ Joyadá wahimukamihedha mwene Jowás okala muttu wapama. (2 Amwe. 12:2) Yodhelavoya, mwene oddule bali muzombwe, wanfuna omwagalaliha Yehova. Mbwenyi mukweli Joyadá, Jowás wahivuruwana malago abure a anddimuwa a nlogo. Yodhelavoya? Iyene vamodha na nlogo ahiroma wawebedha “amilugu a Asera na a amulugu ena.” (2 Map. 24:4, 17, 18) Masiki Yehova vasilidhiwiye na merelo aba a Jowás, Iyene “oarumela anamavuhulela, werele eyelele wa iyene; vano athu kavuruwanile-wene mazu a anamavuhulelayá.” Awene ne vina kafunile omwiwelela Zakariyac mwana Joyadá, odduwene wali namavuhulela vina namakutta wa Yehova. Ottiya ejo, wali primu wa Jowás, ottiya watamalela anamudhi abale amwireli dhilobo dhapama, Mwene Jowás ohimpiha Zakariya.—2 Map. 22:11; 24:19-22.

17. Dhilobo dhimweddeli dhavi Jowás?

¹⁷ Jowás keddilena merelo apama a omova Yehova vina dhilobodha kadhimweddeli pama. Yehova wahibaza ologa dhahi: “Ddinoapwaza abale anddipwaza.” (1 Sam. 2:30) Nikuru ning’novi na anyakoddo akadda Siria, nihigwiha nikuru ninddimuwa na anyakoddo a Jowás. Aweneya eyelelaga owaniwawa ahimuttiyana Jowás maguma manddimuwa, mudhoweli akadda Siria Jowás wahipiwa na emeleli aye sabwa ya ompa Zakariya. Mukweli mwene oddo wotakala murima kafwanyeleli wikiwa “mwikuthani mwa amwene.”—2 Map. 24:23-25.

18. Mowiwanana na Jeremiya 17:7, 8, ninarabele dhavi okala ninga Jowás?

¹⁸ Txini ensunza iyo na yotagiha ya Jowás? Mukweli Joyadá muttu wamukamihedha Jowás, nomala Jowás baroma wavuruwana asadduweli, iyene wahidha okala muttu wohiroromeleya vamentoni va Yehova. Nipadduwo ntti ninnisunziha wi omova wehu Mulugu kunfwanyelela ottiddeleya bahi na dhotagiha dhapama dha Akristu akwehu, obe anamudhi ehu. Wi mandano ehu na Yehova akalevi olibene ninofwanyela wunuwiha omukwela vina omuriha, ninawodhe okosa ejuwene nigasunzaga mudhidhi wotene Nzu na Mulugu, otanalela vina olobela.—Kengesa Jeremiya 17:7, 8; Kol. 2:6, 7.

19. Elobo gani ennikumbirha Yehova?

¹⁹ Yehova kannikumbira dhilobo dhinjidhene. Ennikumbirhiye jiji enfwanyeya va Kohelét 12:13 enloga: Ogwaddela wa makani otene alogiwe, mungwelani pumpu; omova Mulugu, ofwara malamulo aye. Iyo nigamova Yehova ninele owodha owanana dhoweha dhinagumanihuna musogorho vina ninele okala owimelene pwi, ninga Abdiya vina Joyadá. Kinakalewo elobo enanonge mandano ehu na Yehova.