NSUNZO 15
JIBO 30 Yehova Ddi Mukwaga
Okana Mandano Oliba na Mulugu Japama mwa Iyo!
“Miyo, osanzaya waga kukala vamodha na Mulugu.”—MS. 73:28.
DHINASUNZE IYO
Ninele wona ninawodhe dhavi okana mandano oliba na Yehova vina ejo ekalele nni yapama mwa iyo.
1-2. (a) Txini enfuneya wi nikane mandano oliba na muttu? (b) Txini enone iyo mu nsunzoni ntti?
KAMUBUWELE marho wawo wofiyedheya, mandano enyu aromile dhavi? Txino weyo wankala mudhidhi mwinjene na iyene, ohifiyedha oziwa makattamiho agumaniliyena, ozinddiyela dhilobo dhinziveliwa iyene vina dhihinziveliwiye. Weyo ohona wi marho wawo wahikana mikalelo dhinsibiwe vina wanfuna otagiha. Na mudhidhiya weyo wahiroma omukwela venjene.
2 Wi nikane mandano oliba na muttu enofuneya mudhidhi vina ovilibihedha. Yakakene enopadduwa na mandano ehu na Yehova. Mu nsunzoni ntti ninele wona mukalelo onawodhihu okana mandano oliba vaddiddi na Mulugu vina okosa ejuwene ekalele nni yapama. Mbwenyi vamaromo ninele wona sabwaya enfwanyelihu onfiyedha Marho wehu wamakamaka Yehova.
3. Ninfwanyelela nni otanalela dhopurelamo dha okala wofiyedheya na Yehova?
3 Jamakamaka otxima vang’onovi wi nitanalele ekalelani yapama onfiyedha Yehova, ejo enele onittukulela okala amarho aye. (Ms. 63:6-8) Motagiha, attu otene anoziwa wila akaane egumi yaderetu, anofwanyela oja dhilobo dhapama, onddamurha maningo vina omwa manje vaddiddi. Mbwenyi attu enjene kanvirihamo ejoya vina anottiya ofwara dhilemelelo dhigakamihedhile okana egumi yaderetu. Ebaribariya jawi, venevo vantanalela iyo dhopurelamo dha okana egumi yaderetu, ninottukuleleya ofwara dhilemelelo dhinanikamihedhe okana egumi yapama. Na mukalelo wakakene iyo ninoziwa wi okana mandano na Yehova ja deretu mwa iyo, mbwenyi otanalela dhopurelamo dha mandano aba enonittukulela okala wofiyedheya na Marho wehu Yehova.—Ms. 119:27-30.
4. Txini elogile munasalmo va Masalmo 73:28?
4 Kengesa Masalmo 73:28. Namaleba wa Masalmo 73 wali Mulevita wattomeliwe olaba mumparhani mwa Yehova ninga nameba. Enkala ninga iyene wannimulabela Yehova nororomeleya mwari mwa vyaka dhinjene. Masiki dhawene iyene wahoona ttima ya wubuwela vina ya wawubutxedha ena ekalelani yapama onfiyedha Mulugu. Okosa ejuwene egadhilena dhopurelamo gani?
OKALA AMARHO A MULUGU ENONIVAHA WAGALALA
5. (a) Ninlogelani wi okala amarho a Yehova ononidhelana wagalala? (b) Kavaha dhotagiha dhinoniha wi eziwelo ya Yehova enowukamihedha vina enowubarela. (Gano 2:6-16)
5 Venevo vanunuwa mandano ehu na Yehova ninokana wagalala. (Ms. 65:4) Nihikana mwaha dhinji dhinnittukulela ologa ejuwene. Motagiha, nigengesa mBibiliani enloga Yehova vina banivirihamo mwigumini mwehu ninokala attu a eziwelo. Eziwelo eji enonibarela mwa dhilobo dhabure vina okosa dhottega dhinddimuwa. (Kengesa Gano 2:6-16.) Nona Bibilia agalogaga dhahi: Wohagalala ddule ofwanyile eziwelo vina ole onna zelu.—Gan. 3:13.
6. Txini emukosihile munasalmo oyelela wagalala?
6 Ebaribari wi dila dhina masiki adhari a Yehova anokubanyaga. Namaleba wa Masalmo 73 wahirimeliwa wagalala mupattiwiye na dhubuwelo dhohifwanyelela. Iyene wahinyimuwa vina wannasilila attu abure, sabwani muyubuweloni mwaye abale ahamulabela Mulugu vina ahatanala malamulo Aye ankana egumi yovevuwa. Munasalmo oddu wahifiyedha wubuwela wi attu owali vina ovittukulela bafumiletxe, banna egumi yapama vina katabuwa. (Ms. 73:3-7, 12) Iyene wahizuzuma vaddiddi ofiyedha ovivuza akala guru dhakosiye wi amulabele Yehova dhahikana dhopurelamo. Ninowodha ozinddiyela okubanya wana iyene valogiliye dhahi: “Dditabuwele yovi weddana murima wothorhorha, okoya madaga okoddelene.”—Ms. 73:13.
7. Nigakala okubanyene txini enfwanyelihu okosa? (Koona vina foto ya kapa.)
7 Masiki akalaga wokubanyene munasalmo oddu wahikosa elobo wi atxinje mukalelo waye wa wubuwela. Iyene wahivolowa mmusanani mwa Mulugu, venevo Yehova wahisisigula dhubuwelo dhaye. (Ms. 73:17-19) Masaka abano vina Yehova Marho wehu wofiyedheya, onoziwa mudhidhi onkalihu okubanyene. Nigamukumbirha malago vina nirumela nikamihedho ninnivahiye modhela Nzu naye vina mulogo, ninele okana guru wi niwanena okubanya. Nigakala odhugudheya mpaka nihiziwaga yokosa, Yehova onele onipangarhaza vina onifwasiha.—Ms. 94:19.a
Mulevita olebile Masalmo 73, bemelile “mmusanani mwa Mulugu” (Kang’ana ddima 7)
NIGAKALA AMARHO A YEHOVA NINOKANA EGUMI YAPAMA OVANENE VINA NJEDHELO NA MUSOGORHO
8. Kaloga dhopurelamo dhina bili dhinkana iyo sabwa ya okala amarho a Mulugu?
8 Okala amarho a Mulugu japama mwa iyo sabwa ya mwaha dhina minli. Woroma, akala ninokana mandano ofiyedheya na Mulugu ninokana egumi ya pama. Wanawili, ninokaana njedhelo nokuluveleya na musogorho. (Jer. 29:11) Ninele ologa vang’onovi dhopurelamo esi.
9. Okala amarho a Yehova ennikosiha dhavi wagalala?
9 Masaka abano attu enji anloga wi Mulugu kawo. Nona, awene anubuwela wi egumi kina ettanddeliwani vina na mudhidhiya attu otene anele ottiya okalawo. Mbwenyi Yehova agakala marho wehu wofiyedheya iyo ninokana egumi yapama. Omusunza Bibilia ononittukulela okuluvela wi “Mulugu okalawo vina iyene onowattuva abale animutamela na murima wotene.” (Ahe. 11:6) Ottiya ejo, Yehova ohinittandda na efunelo ya omulabela, nigakosa ejuwene ninokana egumi yowagalala.—Oli. 10:12, 13.
10. Mowiwanana na Masalmo 37:29 txini empikirhela Yehova omukosela ole onimuroromela?
10 Attu enjene masaka abano, kanna njedhelo nokuluveleya na musogorho, enkosani—olaba, otela obe oteliwa, okana aima vina okoya kobiri enakamihedhe awene agattiya olaba. Awene kanziwa epikirhele Mulugu okosa musogorho. Mbwenyi iyo ninoziwa wi Yehova onowazuzumela adhari aye. (Ms. 25:3-5; 1 Tm. 6:17) Iyo ninomukuluvela Mulugu wehu vina marho wehu, ninoziwa wi iyene onele wakwanihedha dhotedhene dhipikirheliye. Iyo ninojedhela dhilobo dhinjidhene dhapama dhinapadduwe musogorho, makamaka owodha omwebedha Yehova namukalakala mParaizu.—Kengesa Masalmo 37:29.
11. Dhopurelamo gani dhina dhinkana iyo sabwa ya okala amarho a Mulugu?
11 Okana mandano na Mulugu ononidhelana dhopurelamo dhina. Motagiha, nigakosa yottega banitxinuwa Yehova onopikirhela onilevelela. (Iza. 1:18) Dhahene ninowodha okalawo na mubuwelo wotxena, nihivipwattelihaga muladdu sabwa ya dhottega dhikosilihu mundduni. (Ms. 32:1-5) Ottiya ejuwene, nihikana gari enddimuwa ya omwagalaliha Yehova. (Gan. 23:15) Kavali waganyedha wi weyo onowodha wubuwela mareliho menjene ankaana iyo sabwa ya okala amarho a Mulugu. Mbwenyi ninawodhe dhavi okalavi wofiyedheya na Yehova?
ODHOWEVI ONFIYEDHAGA MULUGU
12. Txini ekosile weyo wi okale marho wa Mulugu?
12 Akala weyo oli Mukristu wobatiziwa, ohivilibihedha venjene wi okale marho wa Yehova. Weyo ohisunza dhibaribari dhinji mwaha wa Yehova vina Yezu, ohitxinuwa dhottega dhawo, ohilagiha wi onomuroromela Mulugu vina ohivilibihedha wi okose efunelo yaye. Mbwenyi wila nikane mandano oliba vaddiddi na Mulugu, ninofwanyela odhowavi nikosaga dhilobo esi.—Kol. 2:6.
13. Kaloga dhilobo ttaru dhinnikamihedha okalavi ofiyedheya na Yehova?
13 Txini enanikamihedhe okalavi ofiyedheya na Yehova? (1) Ninofwanyela odhowavi nimwengesaga vina nimusunzaga Bibilia. Mbwenyi yogana yehu kinfwanyela okala bahi osunza masunziho oroma mwaha wa Mulugu. Ninofwanyela otamela ononelamo mukalelo onubuwela Mulugu vina txini enfuniye wi iyo nikose, osogorhowa nivirihemo ensunza iyo mwigumini mwehu. (Ef. 5:15-17) (2) Ninofwanyela olibiha nroromelo nehu modhela otanalela mikalelo dhottiyana-ttiyana dhinlabihedha Yehova wi anilagihe okwela waye. (3) Ninofwanyela odhowavi niddaga dhilobo dhinimusilidha Yehova vina ohikana mandano na attu ankosa dhilobo-dhene eso.—Ms. 1:1; 101:3.
14. Txini enfwanyelihu okosa siku na siku wi nimwagalalihe Yehova? (1 Korinto 10:31) (Koona vina mafoto.)
14 Kengesa 1 Korinto 10:31. Jamakamaka vaddiddi ovilibihedha wi nikose dhilobo dhinimwagalaliha Yehova. Ejo enopitta odhowa mmalaleyoni vina wona matugumano. Enowiwanana na enkosihu labo na labo. Motagiha, nigakala okuluveleya mwa dhilobo dhotene vina nigagawa na ena esile dhinihu, ninomwagalaliha Yehova. (2 Ko. 8:21; 9:7) Iyene vina onfuna wi nilagihe wila ninoriha mvaho wa egumi. Iyo ninokala ofiyedheya na Oddule onivahile egumi modhela oja vina omwa na ovipimelela vina ozuzumela egumi yehu na mikalelo dhina. Guru ji guru enkosihu wi nimwagalalihe Yehova, masiki na dhilobo dhinoneya ninga dhing’ono, enolibiha onikwela waye.—Lk. 16:10.
Mikalelo dhina dha omwagalaliha Yehova sisi: weddiha karo na nibarelo, onddamurha maningo, oja dhoja dhapama vina okala wotapuwa mada (Kang’ana ddima 14)
15. Ninfwanyela waweddiha ena na mukalelo gani?
15 Yehova onowalagiha opama attu oligana vina ohiligana. (Mt. 5:45) Iyene ononijedhelana yakakene. Motagiha, iyo kaninaloga bure attu, kanili anamatota kani vina ninowalagiha okurumuwa attu otene. (Tit. 3:2) Nona, masiki muttu ahirumelaga wi Yehova ohikalawo, iyo kaninubuwela wi nili attima opitta iyene. (2 Tm. 2:23-25) Nigakala attu apama vina nigaweddiha ena na ntanalo ninokala wofiyedheya vaddiddi na Mulugu.
KONUWIHA MANDANO AWO NA MULUGU MASIKI OGAVONYA
16. Namaleba wa Masalmo 73 waromile oviwamo dhavi mwaha wa dhovonya dhaye?
16 Masaka mena sabwa ya dhovonya dhinkosihu ninodhaga wubuwela wi Yehova ohittiya okala marho wehu. Namaleba wa Masalmo 73 wahiroma oviwamo dhahene. Nokubanya iyene ohiloga: “Miyo ddali nena nogwa, nosananguwa manyalo aga.” (Ms. 73:2) Iyene vina wahiloga wi mmurimani mwaye mwahidhala dhowawa vina wahifiyedha okala wotowa malago ninga enama. (Ms. 73:21, 22) Txino iyene wobuwela wi sabwa ya dhovonya dhikosiliye, kanna njedhelo vina kafwanyela okweliwa na Yehova.
17. (a) Masiki valiye wodhugudheyene txini ekosile munasalmo? (b) Yotagiha yaye ennisunziha eni? (Koona vina mafoto.)
17 Akala munasalmo oddu wobuwela wi wahiyelela mandano aye na Yehova, mohigonela wahittiya oviwamo dhahene. Enkala ninga mudhidhi watabuwiye vaddiddi, iyene wahona ttima ya onfiyedha Mulugu, nona baloga dhahi na Yehova: “Kaddithile wedda na nyuwo; nyuwo muddithiddela nlada [naga noja]. Muddeddiha na malago enyu; osogorhowá muner’oddakela munthithimihoni mwenyu.” (Ms. 73:23, 24) Nigakala okumuwene obe odhugudheya ninofwanyela otamela nikamihedho na Yehova. Iyo vina ninofwanyela omukumbirha Yehova wi anilibihe, venevo vanonihu wi nroromelo nehu ninowobana obe nigakala okumuwene sabwa ya dhovonya dhehu. (Ms. 73:26; 94:18) Masiki nigakala wolapelana na Yehova mwa mudhidhene, enowodheya wiyelela okala amarho aye sabwani ninoziwa wila iyene oli womala-nawale wi alevelele. (Ms. 86:5) Nigapattiwa makattamiho orutxa mwigumini mwehu, pavenevo vanfwanyelihu okala wofiyedheya vaddiddi na Mulugu wehu.—Ms. 103:13, 14.
Nigobana mpaddi womuyani, ninofwanyela onfiyedha Yehova modhela ozuzumela mabasa omuyani (Kang’ana ddima 17)
KONUWIHA MANDANO AWO NA YEHOVA NAMUKALAKALA
18. Ninfwanyelela nni odhowavi nilibihaga mandano ehu na Yehova okala-nokala-wene?
18 Enowodheya iyo odhowavi nilibihaga mandano ehu na Yehova okala-nokala-wene. Ninoziwa ejuwene sabwani Bibilia onloga wi dila, eziwelo vina ononelamo wa Yehova onddimuwa vaddiddi. (Rom. 11:33) Nona iyo ninelege odhowavi nisunzaga mwaha wa Yehova.
19. Nivuru na Masalmo ninnivaha nikuluvelo gani?
19 Masalmo 79:13 onologa: “Iyo nlogo nenyu, mabila ansapihenyu, ninerege outamalani masiku otene. Vamodha na anihu anadhegewo, ninere wibaga nthithimiho nenyu.” Weyo vina onofwanyela okuluvela wi enowodheya olibiha mandano awo na Mulugu vina orurihiwa na iyene okala-nokala-wene. Dhahene ninga munasalmo, weyo onele ologa: Mulugu ddi mwango wa murima waga vina nifumo naga okala-nokala-wene.—Ms. 73:26.
JIBO 32 Mudhe wa Yehova!
a Abale ankalaga odhugudheyene obe okubanyene mwari mwa mudhidhi mwinjene, anodhaga ofuna nikamihedho na adotoro. Wi oziwe miselu dhina mwaha wa makani aba, koona A Sentinela N.º 1 de 2023.