NIPADDUWO 19
Yakobi Ohikaana Murala Munddimuwa
NGA kañgana murala obu munddimuwa. Aba ba ana a alobwana 12 a Yakobi. Nanda iyene wahikaana vina ana a ayana. Weyo onoziwa mazina a ena mwa awene? Ndoweni naasunze ena mwa abene.
Leia wahimbaala Rubeni, Simeoni, Levi, na Yuda. Rakeli mooneliye wila kambaala, iyene wahikubanya vaddiddi. Noona iyene wahinvaha Yakobi mudhari waye wa muyana Bila, nanda Bila wahikaana ana a alobwana eeli aatxemerhiwa Dani na Neftali. Mumalelani Leia vina wahinvaha Yakobi mudhari waye wa muyana Zilipa, nanda Zilipa wahimbaala Gadi na Aseri. Omagomelowa Leia wahikaana ana a alobwana ena eeli, Isakari na Zabuloni.
Omamalelowa Rakeli wahiwodha okaana mwana. Iyene wahinvaha nzina na Zuze. Musogorho ninela osunza vaddiddi mwaha wa Zuze, sabwani iyene wahidha okala muthu munddimuwa vaddiddi. Aba aali ana a alobwana 11 aabaalile Yakobi bagakala na Labani babi wa Rakeli.
Yakobi wahikaana vina ana a ayana, mbwenye Bibilia onromola nzina na mmodha bahi mwa abene. Nzina naye nali Dina.
Wahifiya mudhidhi waganile Yakobi omuthiya Labani nanda wiyelela o Kana. Noona iyene wahigumaniha vamodhavi murala waye munddimuwa vamodha na makuru aye manddimuwa a mabila vina makuru a ñgombe, nanda wahiroma oleddo wolapa.
Mudhidhi muñgonovi Yakobi na murala waye mwiyelelani o Kana, Rakeli wahimbaala mwana mwina wa mulobwana. Eji yapadduwile awene bali mu oleddoni. Rakeli wahikaana mudhidhi worutxa, nanda omagomelowa iyene wahikwa omabaalelo. Mbwenye nyenyeya wa mulobwana wali deretu. Yakobi wahinvaha nzina na Bejami.
Ninfuna nubuwele mazina a ana a alobwana 12 a Yakobi sabwani nlogo notene na Izraeli nidhile mwa awene. Txibarene, maziza 12 a Izraeli avahiwe mazina a ana 10 a Yakobi na ana eeli a Zuze. Izaki wahikalawo vyaka dhinjene analobwana aba otene babaaliwe, nanda okaana adhuli enjene a alobwana txino wahimuhagalaliha vaddiddi. Mbwenye ndoweni noone txini yampadduweli mudhuli waye Dina.
Wita 29:32-35; 30:1-26; 35:16-19; 37:35.