Amarho A Mulugu Bani?

Yezu Kristu ddi Mwana wa Yehova vina ddilitxi marho waye vina wofuniwa. Ahinathi okalawo ninga muthu Velaboni ya vati, Yezu wakala odhulu ninga muthu wa omuyani wa guru vaddiddi. (Joau 17:5) Mumaleliye iyene ohidha Velaboni ya vati wila asunzihe athu ebaribari ya Mulugu. (Joau 18:37) Iyene vina ohipereka egumi yaye wila avune nlogo na athu owiwelela muthegani vina mukwani. (Roma 6:23) Ovanene Yezu ddi Mwene wa Omwene wa Mulugu, nlamulelo na odhulu ninasaddule Elabo ya vati ekale Paraizu.—Ovuhulela 19:16.

Angelo vina amarho a Mulugu. Angelo karomile egumi yawa ninga athu Velaboni ya vati. Awene athanddiwe odhulu Mulugu ahinathi okosa Elabo ya vati. (Jobi 38:4-7) Ohikala angelo matxikwi na matxikwi. (Danieli 7:10) Amarho aba a odhulu a Mulugu anfuna wila athu asunze ebaribari ya Yehova.—Ovuhulela 14:6, 7.

Mulugu vina ohikana amarho Velaboni ya vati; iyene onatxemerha anamona aye. Vamuthegoni wa miladdu, namona onothaka ejile eziwiliye mwaha wa muthu muthuvi obe elobo elobovi. Anamona a Yehova anowapanga athu ena esile dhiziwilani mwaha wa Yehova na dhifunelo dhaye. (Izaia 43:10) Dhaene ninga angelo, Anamona anfuna okamihe weyo osunza ebaribari ya Yehova. Awene anfuna wila weyo vina okale marho wa Mulugu.