‘Ddinomukwela Babaga’

1, 2. Murumiwi Joau ovuhuleli eni mwaha wa omathiyu womariha wali arumiwi na Yezu?

MULOBWANA dhahi wa kalaba onobwiniha muthenga waye mu tintani, musorho waye budhaalile dhubutxedho. Nzina naye ddi Joau nanda ddi murumiwi womariha oliwovi mwa arumiwi a Yezu Kristu. Ovanene wañganana vyaka 100 dha obaaliwa, Joau onowubuwela dhitagano dha vyaka makumi matanu na meeli, omathiyu ohindduwaleya​—okulene wali womariha, walivo iyene vamodha na arumiwi akwaye vina Yezu okwa Waye ohinathi. Na muya wokoddela wa Mulugu bugamweeddiha, Joau onowodha wubuwela vina oleba dhilobo na mukalelo wofurumuleya vaddiddi.

² Omathiyu obule, Yezu wahooniha deretu yawila wahali vañgono na opiwa. Joau yeka ddinloga sabwa yalogeli Yezu wila wafuna apiwe na otabala dhayilene: “Wi athu etene aziwe wi miyo ddinomukwela Babaga, ddinowiravi eddirumileye. Ndhoweni, nivenyevo!”​—Joau 14:31.

3. Yezu walagihile dhavi wila wannimukwela Babi waye?

³ “Ddinomukwela Babaga.” Yezu kaana elobo yina ya makamaka opitha omukwela Babi waye. Kayo wila mudhidhi wotene walogetxa ejene wila yooniwe wila ja makamaka. Mwatxibarene, Joau 14:31 bu mburo womariha mBibiliani munfanyihu mazu a Yezu bagaloga kakamwe wila onomukwela Babaye. Mwa dhaene, Yezu wakalawo mowiwanana na mazu aba. Okwela waye na Yehova wela wooneya siku na siku. Oliba murima wa Yezu, wiwelela waye vina odiga waye, dhotene esi dhali mitonyo dhawila onomukwela Mulugu. Olaleya waye wotene wali sabwa ya okwela oku.

4, 5. Bibilia onkokomeza mukalelo gani wa okwela, nanda txini enwodheya ologiwa mwaha wa Yezu omukwela Yehova?

⁴ Nsaka na ovanene, txino athu ena anoona ninga athu ankwela alowobana. Txino anubuwela poizia dha okwela vina jibo dha okwelana mpaka ofiyedha esile dhovirigana, dhiniwananihiwetxa na okwela wotomola murima. Bibilia onologa okwela wotomola murima, masiki vankosiye na mukalelo wa ethomo vaddiddi opitha munkoseliwani nsaka na ovanene. (Gano dh’olelana 5:15-21) Mbwenye Nzu na Mulugu ninsekeserhetxa mukalelo mwina wa okwela. Okwela oku kayo edhivi-dhivi bure-bure obe wiwa elobo yovira; nne kayo filozofia ya atxenjerhi. Kwa murima na musorhoya. Ombudduwa mwari mwa muthuya, onlamuliwa vina oniwanana na magano a thima, vina onlagihiwa na merelo anwaraliha. Kayo wovirigana. Nzu na Mulugu ninloga wila “okwela kunamale-wene.”​—1 Korinto 13:8.

⁵ Mwa athu otene akalilewo, Yezu ddimukwelitxi Yehova. Kavo muthu ompithile Yezu mwa osoriha mazu aromoliye mwinyene ninga nlamulo nddimuwana mwa malamulo otene a Mulugu: “Omukwele Nabuya Mulugu wawo na murima wawo wotene, na thontho yawo yotene, na guru dhawo dhotene.” (Marko 12:30) Yezu wadhile dhavi okaana okwela oku? Wawaralihile dhavi okwela oku na Mulugu bali velaboni ya vati? Niwodhe dhavi omutagiha?

Nifunddo Na Okwela Nivaddiletxe Vina Nilitxi Na Wale

6, 7. Niziwile dhavi wila Gano dh’olelana 8:22-31 enimuloga Mwana Mulugu, othiya ologa zelu ya txibarene?

⁶ Wahiroma okosa ganyo na marho nanda buwoona wila sabwa ya olaba vamodha, moheeli muhikala amarho vaddiddi? Yotagiha eji yoziva enonooniha okwela okalilewo vari va Yehova na Mwana waye wa nammodha. Dila dhinjidhene ninoromolaga Gano dh’olelana 8:30, mbwenye ndoweni nañganetxe ejile entapulela nlebo nthi. Versikulu 22 mpaka 31 ninofanyavo mutapulelo wowubuwelihiwa wa zelu esadduliwe bikala ninga muthu. Ki niziwile dhavi wila mazu aba animwaddana Mwana Mulugu?

⁷ Versikulu 22, zelu enloga dhahi: “Nabuya oddipaddutxa omaromelo-wene wa mabasa aye, ahinathi okalihawo elo-ene.” Apa vahikala elobo opitha zelu, sabwani zelu txipo kinapaddutxiwege. Eji txipo kina maromo sabwani Yehova ohikalawo ovenya wale na zeluya yaye. (Masalmo 90:2) Mbwenye Mwana Mulugu, wali “muthaji wa dhopaddutxiwa dhotene.” Wahipaddutxiwa obe wahithanddiwa; wali woromaya wa dhokosa dhotene dha Yehova. (Kolosi 1:15) Mwana wahikalawo ehinapaddutxiwa elabo ya vati na odhulu, ninga munlogeliwani mu Gano dh’olelana. Nanda ninga Nzu, kuloga Munamukathi wa mwinyene Mulugu, wali nzu nowakwana na zelu ya Mulugu.​—Joau 1:1.

8. Mwana wakosa eni ahinathi odha velaboni ya vati, nanda ninfanyeela wubuwela eni nigatikinaga elobo epaddutxiwe?

⁸ Mwana wakosa eni mudhidhi obu wotene ahinathi odha velaboni ya vati? Versikulu 30 enonipanga wila wali na Mulugu ninga ‘mesirhi wa mabasa.’ Ejene entapulela eni? Kolosi 1:16 onotapulela dhahi: ‘Dhetene dha odhulu na dha vati, dhipaddutxiwe na guru dha mada aye . . . dhipaddutxeliwe iyene.’ Noona Yehova Mpaddutxi, olabile na Mwanaye, Mesirhi wa Mabasa wila akalihewo dhopaddutxiwa dhiina dhotene, ovenya muya dha odhulu mpaka erimu yotapuwa enoonihu, ofiyedha elabo ya vati na dhomela dhothiyana-thiyana vina dhinama, mpaka mutompi wa dhopaddutxiwa dha velaboni ya vati: nlogo na athu. Mwa mikalelo dhiina, ninofanyeela oladdaniha wandana oku wa Babi na Mwana na okule wa namakunga numba, oddwene onlaba na muliba omaga numbaya, ona thotho ya oparhapathela numba ninga mulebeli namakunga. Nigatikina yopaddutxiwa eli yotene, kuloga wila ninomutamaala Namakunga Munddimuwa. (Masalmo 19:1) Mwa dhaene, ninofanyeela vina wubuwela wandana wogoneela vina wosanzaya wa Mpaddutxi na ‘mesirhi [waye] wa mabasa.’

9, 10. (a) Txini yawaralihile wandana wa Yehova na Mwana waye? (b) Txini enwodha owaraliha wandana wawo na Babi wawo wa odhulu?

⁹ Athu eeli ohakwana agalabaga vamodha, dila dhiina anorutxiwa wandanavi. Kayo ejene yampadduweli Yehova na Mwana waye! Mwana olabile mwari mwa vyaka dhohengeseya na Babi waye nanda ddi iyene “watota oziveliwa waye siku-siku.” (Gano dh’olelana 8:30) Indde, wanziveliwa okala na Babi waye nanda oheeli ankwelana. Jawooneya yawi Mwana wahunuwa ninga Babi waye, bagasunza otagiha mikalelo dha Mulugu. Kayo yotikiniha yawila wandana wali vari va Babi na Mwana wahiwarala vaddiddi! Enowodheya otxemerhiwa mofanyeela wila thi nifunddo na okwela nilitxi na wale vina nivaddiletxe mwilaboni motene.

¹⁰ Ki ejene entapulela eni wa iyo? Txino onubuwela wila txipo kunda wandana dhaene na Yehova. Ja txibarene wila kawo muthu ninga iyo ona mpaddo wothukuwa ninga wa Yezu. Mbwenye nihikaanavi gari ya vawoka. Kobuwela wila Yezu wandaniletxe na Babi waye sabwa ya olaba na Iyene. Na okwela, Yehova ononivaha gari ya ‘olaba vamodha’ na iyene. (1 Korinto 3:9) Venevo vanfarihu yotagiha ya Yezu mmabasani a olaleya, dila dhotene nubuwelege wila nili anamalaba vamodha na Mulugu. Dhaene, nifunddo na okwela ninniwananiha na Yehova panawaralaganivi. Ohikala gari yina yunuwiletxe opitha ejene?

Mukalelo Wawaralihilevi Yezu Omukwelavi Yehova

11-13. (a) Ekaleli eni yaderetu wubuwelaga okwela ninga elobo ya mento, nanda mpali Yezu wawaralihilevi dhavi okwela waye na Yehova? (b) Mwana Mulugu walagihile dhavi ofuna waye wosunza na Yehova, ahinathi odha velaboni ya vati vina musogorhomwa ninga muthu wa omaningoni?

¹¹ Na makalelo menjene, jaderetu mmirimani mwehu wubuwelaga okwela ninga elobo ya mento. Ninga nrhuwa nokoddela nisorhile vatakulu, okwela onofuna ojihiwa vina otanaaliwaga wila owarale nanda obaale misapo. Ogapwaziwa, bukoodda ojihiwa, onowobana bugoma. Yezu kapwaza okwela waye na Yehova. Wanwaraliha vina wambaaliha misapo mwari mwa okalawo waye wotene velaboni ya vati. Ndoweni noone mukalelo wakosiliye ejene.

¹² Katanaalela wili mpali Yezu mwalogeliye na murima wotapuwa mwaha wa Babi waye mu mparhani o Jeruzalemi. Kobuwela mazu aye aalogeliye amambali aye aazuzumile: “Mwadditamelela nni? Kamunziwa wi enofuneya miyo ddikale vatakulu va Babaga?” (Luka 2:49) Ninga mpali muñgono, ninga munooneyelani Yezu wali ahinathi oroma wubuwela okalawo waye ahinathi odha velaboni ya vati. Masiki dhaenevi, wannimukwela vaddiddivene Babi waye Yehova. Wanziwa wila okwela oku wanfanyeela woonihiwa na omwebedha. Noona velaboni ya vati kavaali mburo mwina wamuziveletxa Yezu opitha numba ya Babi waye ya webedha webaribari. Wanziveliwa okala mwenemwale, kafuna obudduwamo. Mowenjedha, kaali namañganavi bahi. Wanrumarumela osunza dha Yehova vina ologa esile dhiziwiliye. Dhiwelo esi kadharomile mwakaaneliye vyaka 12 dha obaaliwa nne kadhagomile na saizi ejile.

¹³ Bali odhulu, Mwana wahirumarumela osunza na Babi waye. Nivuhulelo nilebiwe va Izaiya 50:4-6 nintonyihedha wila Yehova wahinvaha Mwana oddu nlelo na thima na mabasa aye ninga Mesiya. Masiki nlelo nthile vataganyiheyani na osunza makathamiho mena agakaaniliye ninga Muthikitheliwi wa Yehova, Mwana oddu wahisunza na orumarumela. Musogorhomwa, Yezu mwadheeliye velaboni ya vati bonuwa, wanrumarumelavi odhowa o numbani ya Babi waye vina webedha, vina otonyihedha mukalelo wa osunziha wafuna Yehova wila okosiwege mwenemwale. Dhaene Bibilia onologa wila Yezu kajombela odhowa mu mparhani vina mu sinagoga. (Luka 4:16; 19:47) Akala ninofuna okaanavi okwela wehu na Yehova wowaralene vina woweeddeleya deretu, ninofanyeela owaralela otugumana omatugumanoni a Okristu, wenewo onimwebedhihu Yehova vina onenjedhihu eziwelo yehu vina ntamaalelo ninimukaanelihu.

14, 15. (a) Dila dhiina Yezu watamelela eni okalavo yeka? (b) Malobelo amukoseli Yezu Babi waye antonyihedha dhavi wandana vina nriho?

¹⁴ Yezu vina wahilibihavi okwela waye na Yehova modheela olobelaga. Masiki vaaliye muthu womarho, wowandaneyana, enotikiniha wila dila dhiina wanziveliwa okalavo yeka. Motagiha, Luka 5:16 onloga dhahi: “Yezu wanpothowela mburo wahaviriwa wi alobelewo.” Na mukalelo wakakene, Mateu 14:23 onologa: “Mwapaganyeliye, owela vamwangoni wi alobelevo yeka; okala venevo mpaka vati oriba.” Mudhidhi obu na dhiina, Yezu wahitamela okalavo yeka, kayo sabwa yawila wali mukala yeka, obe kaziveliwa okala na athu ena, mbwenye sabwa yawila wanfuna okalavo yeka wila amulobelele Babi waye na murima wotapuwa.

¹⁵ Agalobelaga, dila dhiina Yezu wanlabihedha nzu ninloga “Abba, Baba!” (Marko 14:36, Nipagano Nipya) Mu nsaka na Yezu, nzu nthi “Abba” nali nzu na vamirimani nalabihedha athu a vamuralani agamuromolaga “Babi,” wawa. Nali mwari mwa mazu ooroma asunza mwana. Masiki dhaene, nali nzu na nriho. Oku nzu nthi nitonyihedhaga wandana wa Mwana bagaloga na Babi waye onimukweliye, nthi vina ninowooniha nlemezo na onddimuwa wa obabi wa Yehova. Ninofanya ogumana oku wa wandana na nriho mmalobeloni otene alebiwe a Yezu. Motagiha, Joau kapitulu 17, murumiwi Joau ohileba nlobelo nolapa vina na murima wotene nakosile Yezu omathiyu Waye womariha. Osunza nlobelo nthile txibarene ononitikiniha, nanda jofuneya wila nitagihege​—kayo modheela oromolaga mazu akakene a Yezu, mbwenye modheela ofanya makalelo a ologa ovenyedha mmirimani na Babi wehu wa odhulu mpaka venevo vanwodhihu. Okosaga dhaene onela okalihawovi okwela wehu wowaralene.

16, 17. (a) Yezu woonihile dhavi na mazu wila wannimukwela Babi waye? (b) Yezu woonihile dhavi ovaha wa Babi waye?

¹⁶ Ninga mumalelihu woona, kayo wila Yezu wakalela oromolavi mazu aba ‘Ddinomukwela Babaga.’ Mwa dhaene, dila dhinjidhene ohilagiha na mazu wila wannimukwela Babi waye. Na mukalelo gani? Yezu mwinyene wahiloga: “Babani, ddinoutamalelani [vathaddo] nyuwo muli Nabuya wa wirimu, wa vati.” (Mateu 11:25) Nisunzaga Epaddi 2 ya nivuru nthi, nihoona wila Yezu wanziveliwa omutamaala Babi waye modheela wakamiha athu Omuziwa. Motagiha, wahimuladdaniha Yehova na babi wafunile vaddiddi omulevelela mwanaye wa vuruvuru, mpaka ojeedha ofiya wa muzombwe oddule watxinuwile, bamoonela wolapela nanda bamuthamagela vina bamukumbatha. (Luka 15:20) Bani onengesa epaddi eji ya Bibilia s’ohiddiginyeya murima na mukalelo woonihile Yezu okwela vina nlevelelo na Yehova?

¹⁷ Dila dhinjidhene Yezu wannimutamaala Babi waye sabwa ya ovaha Waye. Wahilabihedha yotagiha ya amambali akooddile wakwana wila oonihe wila Babi kanajombele onivaha notene muya wokoddela onfunihu. (Luka 11:13) Yezu vina wahiloga njeedhelo ninvaha Baba na murima wotapuwa. Na othaba, Yezu wahiloga njeedhelo naye na wiyihedhiwa vamburoni vaye, okala epaddi ya Babi waye odhulu. (Joau 14:28; 17:5) Wahapanga anamafara aye njeedhelo nivahile Yehova ‘nikuru niñgono’ na Kristu, na okala odhulu wila alamulelege na Mwene Muthikitheliwi. (Luka 12:32; Joau 14:2) Wahimpangarhaza timbwini dhahi wakwa, banvaha njeedhelo na okalawo Mparaizu. (Luka 23:43) Na makalelo aba alogiye ovaha onddimuwa wa Babi waye, txibarene ejene yahimuwaraliha Yezu omukwelavi Yehova. Anamafara enjene a Kristu ahoona wila kuli elobo yina enlibiha okwela vina nroromelo ninimukaanelani Yehova opitha walaleyaga athu mwaha wa Mulugu, vina njeedhelo ninavahiwe abale animukwela.

Onela Otagiha Okwela Wa Yezu Na Yehova?

18. Buvi mukalelo olitxi wa makamaka onfanyeelihu onfarana Yezu, nanda sabwa yani?

¹⁸ Mwa makalelo otene anfunihu wila ninfare Yezu, kuli elobo eli ya makamaka opitha eji: Omukwele Nabuya Mulugu wawo na murima wawo wotene, na thontho yawo yotene, na guru dhawo dhotene. (Luka 10:27) Kaninfanyeela ologavi wila ninomukwela Yehova sabwa ya esile dhiniwa iyo mmirimani mwehu, mbwenye ninofanyeela opima muthengo onimukwelihu modheela merelo. Yezu kaziveliwa okalela wiwavi mmirimani wila onomukwela Babi waye, nne okalela ologavi, ‘ddinomukwela Babaga.’ Walogile dhahi: “Wi athu etene aziwe wi miyo ddinomukwela Babaga, ddinowiravi eddirumileye.” (Joau 14:31) Satana wahimageedha wila kuli muthu agamulabile Yehova s’ohikosa ejene wila avahiwe dhilobo. (Job 2:4, 5) Wila avahe yowakula ekaliletxe ya ovanyana omageedha oku wabure wa Satana, Yezu wahikosavo elobo na oliba murima nanda batonyihedha elabo mukalelo wamukweliye Babi waye. Wahiwelela mpaka operheka egumi yaye. Onela onfara Yezu? Onela olagiha elabo yawila txibarene onomukwela Yehova Mulugu?

19, 20. (a) Sabwa gani dha makamaka dhinfanyeelelihu odhowagavi omatugumanoni a Okristu? (b) Noonege dhavi nsunzo nehu na muthu yeka, otanaalela vina nlobelo?

¹⁹ Nihikaana ofuneya vaddiddi mpaddi wa omuyani wa wooniha okwela oku. Dhaene Yehova ohinisasanyedhela wila nebedhege na mukalelo onunuwavi vina onwaralavi okwela wehu na Babi wehu. Ogadhowa omatugumanoni a mulogo, katamelaga wubuwela yawila oli wenewale wila omwebedhe Mulugu wawo. Dhitagano dha webedha oku dhinotaganyiheya na olobela vamodha na murima wotapuwa, wiba jibo dha omutamaalana, ovuruwana na ofwaseya vina egawodheya ovenyihaga mono banakula. Matugumano aba anowuvaha vina gari ya walibiha Akristu akwawo. (Ahebreu 10:24, 25) Omwebedhaga Yehova mmatugumanoni a Okristu onela wukamiha wunuwihagavi okwela wawo na Mulugu.

²⁰ Na mukalelo wakakene, okwela wehu na Mulugu podi wunuwa modheela osunza wa muthu yeka, otanaalela vina olobelaga. Koonaga esene ninga makalelo a okalavo weka na Yehova. Venevo vansunziwe Nzu nilebiwe na Mulugu vina bugatanaalela nthene, Yehova onowuwika dhubuwelo dhaye. Venevo vanlobela weyo, ononfugulela murima wawo. Kudduwale wila nlobelo kayo okalelavi omukumbirha Mulugu dhilobo. Nlobelo vina bu mudhidhi wa omutamaalela Yehova mareeliho oovahiliye vina omuthithimiha sabwa ya mabasa aye ootikiniha. (Masalmo 146:1) Mowenjedha, omutamaala Yehova vari va anamwinji na othaba vina ohagalala bu mukalelo okaliletxe wa omutamaalela Yehova vina olagiha wila onomukwela.

21. Omukwela Yehova kwa makamaka na muthengo gani, nanda txini enfunihu osekeserha mu kapituluni dhogomihedha?

²¹ Omukwela Mulugu ji elobo elitxi ya makamaka wila okaane osanzaya wa mukalakala. Ji ejene yafanyeela okaana Adamu na Eva wila eeddeleye deretu, vina ji elobo modha yajombeliwani. Ji elobo elitxi ya makamaka enafuniwe wila opemberhena elobo elobovi eneha nroromelo, okoodde mirega dhotene vina wakwanihe segedho segedhovi. Jilitxi yofuneya enlagiha okala namafara wa Yezu. Pu mwenemo, omukwela Mulugu oniwanana na omukwela muthu mukwihu. (1 Joau 4:20) Mu kapituluni dhogomihedha, ninela osekeserha mukalelo wakweli Yezu athu. Kapitulu eji enfuna oroma, ninela osekeserhamo sabwa yooneliwa Yezu na athu enjene wila onofiyedheya.