‘Dila Ebaribari Vina Egumi’

1, 2. Onfiyedha Yehova ogakalile dhavi wohiwodheya kohikaana nikamihedho, ki Yezu Kristu onikoseli eni mwaha wa ejene?

WAHIROMAGA opupuruwa? Txino onowubuwela mudhidhi wadhowiwe omoona marho obe mmudhi nanda bukoodda ofanya dilaya. Venevo vadhowiliwenavi dila yakooddiwe oziwa, wahiimela nanda buvuzedha dilaya? Katanaalela mukalelo ogewilewe, othiya iyene okalela wulagihavi dilaya, muthu wa nemi kologa dhahi: “Ndowe. Ddinowuperhekawo.” Weyo ogahikurumuwa vaddiddi!

² Podi ologiwa wila, Yezu Kristu ohinikosela elobo ninga ejene. S’ohikaana nikamihedho, onfiyedha Mulugu kugawodheyile. Sabwa ya dabi vamodha na ohakwana oravilehu, nlogo na athu nihipupuruwa, ‘kaninfanya egumi ya Mulugu.’ (Éfeso 4:17, 18) Wila nifanye dilehu ninofuna nikamihedho. Yezu, Yotagiha yehu ya nemi, kankalela onivahavi nlago vamodha na musogorhelo; iyene onokosa dhilobo dhiina. Ninga moonelihu mu Kapitulu 1, Yezu ononiwobela, bagaloga dhahi: ‘Kadhawuno okale namafara waga.’ (Marko 10:21) Dhaene iyene ononivaha vina mwaha waderetu wila nirumeele niwobelo nthi. Mudhidhi dhahi, Yezu wahiloga: “Miyo ddili dilayá, ddili ebaribari, ddili egumi. Kawo onfiya wa Baba, ahivirile mwa miyo.” (Joau 14:6) Ndoweni nisekeserhe sabwa enwodheyela onfiyedha Baba modheela Mwana bahi. Nigamala, banigobuwela sabwa esi, ninela woona mukalelo okalile txibarene Yezu ‘dila ebaribari vina egumi.’

Nibasa Na Makamaka Mu Efuneloni Ya Yehova

3. Sabwa yani onfiyedha Mulugu oli modheela Yezu?

³ Yoroma vina ya makamakaya, wila ninfiyedhe Mulugu eli modheela Yezu sabwani Yehova ohisakula onvaha Mwanaye nibasa na makamaka vaddiddi.a Baba ohimukosa iyene okala mfugulo, nipara na osoriheya wa dhifunelo Dhaye dhotene. (2 Korinto 1:20; Kolosi 1:18-20) Wila ninonelemo nibasa na makamaka na Mwana, ninofanyeela osekeserha ejile yapadduwile mmunddani mwa Edeni, mwenemwale mwavitaganyihile atelani ooroma na Satana mwa onvanya Yehova.​—Wita 2:16, 17; 3:1-6.

4. Ovanya wa mu Edeni otatamulile mwaha gani, ki Yehova oganile okosa eni wila asasanyedhe mwahaya?

⁴ Ovanya wa mu Edeni wahitatamula mwaha wofuneya wa elabo yotene: Yehova Mulugu onolamulela dhothanddiwa dhaye na mukalelo wofanyeela? Wila mwaha obu wa makamaka osasanyedhiwe, Yehova wahilamula wila mwana wa omuyani wowakwana wanfanyeela odha velaboni ya vati. Mabasa agakosile mwana oddu wa omuyani aali a makamaka vaddiddi—bagaperheka egumi yaye wila eeyihedhe olamulela onddimuwa wa Yehova vina wila alabe ninga yobolo wila obole nlogo na athu. Sabwa ya okalavi wororomeleyene mpaka okwa, mwana oddu osakuliwe agahiwodha osasanyedha makathamiho otene abene atotiwe na ovanya wa Satana. (Ahebreu 2:14, 15; 1 Joau 3:8) Mbwenye Yehova wahikaana matxikwi na matxikwi a ana a omuyani owakwana. (Daniyel 7:9, 10) Iyene omusakulile ani wila athidde mabasa aba a makamaka? Yehova omusakulile Mwanaye wa “Nammodha,” oddwene odhile oziweya musogorhomwa ninga Yezu Kristu.​—Joau 3:16.

5, 6. Yehova olagihile dhavi wila wannimukuluvela Mwanaye, nanda nikuluvelo nthi nemetxiwe vavi?

⁵ Ninofanyeela otikina osakula okosile Yehova? Nne wene! Baba wannimukuluvela vaddiddi Mwanaye wa nammodha. Vyaka mazana menjene Mwanaye ahinadha velaboni ya vati, Yehova wahibaza ologa wila Mwana oddu agahikalavi wororomeleya masiki vagooniliye goi ya mukalelo wotene. (Izaiya 53:3-7, 10-12; Merelo 8:32-35) Koona ejile egapadduwile sabwa ya Yehova obaza ologa wila Mwanaye agahikalavi wororomeleya. Mwana, moladdana na anju vina athu, wahikaana ofuru wa osakula, na ewodhelo ya osakula olodda dila yayene. Masiki dhaene, Yehova wahikaana nikuluvelo mpaka iyene obaza ologa ororomeleya wa Mwanaye. Nikuluvelo nthi nemetxiwe vavi? Na nzu nimodha bahi, eziwelo. Yehova onomuziwa deretu Mwanaye vina onoziwa mukalelo onfuniye Omuhagalaliha vaddiddi. (Joau 8:29; 14:31) Mwana onomukwela Babi waye, nanda Yehova vina onomukwela Mwana Waye. (Joau 3:35) Okwelana wa Baba na Mwana onomaga nifunddo na wiwanana vina ororomelana okwene ohinfudheya.​—Kolosi 3:14.

⁶ Sabwa ya nibasa na makamaka na Mwana, nikuluvelo ninimukaanela Babi, vina okwela onawiwananiha vamodhavi Baba na Mwana, enotikiniha wila onfiyedha Mulugu onwodheya modheela Yezu bahi? Masiki dhaene, ohikala mwaha mwina onwodhela Mwana bahi onisogorhela wa Baba.

Mwana Bahi Ddinimuziwa Kakamwe Baba

7, 8. Yezu wawodheli eni ologa deretu wila kavo onimuziwetxa Baba “ahili Mwana”?

⁷ Ohikala magano anfanyeela osorihiwa akala ninofuna onfiyedha Yehova. (Masalmo 15:1-5) Bani onziwa deretu enfuneya ompitha Mwana wila nifiyedhe magano a Mulugu vina wila Iyene anirumeele? Yezu ologile dhahi: “Babaga oddithiyedha dhetene mmadani mwaga. Kawo onimuziwa Mwana, ahili Babe; kawo onimuziwa Babi, ahili Mwana n’abale anfuna Mwanayá waziwiha.” (Mateu 11:27) Ndoweni noone sabwa yawodhela Yezu ologa, na mukalelo wonyaala vina s’ohithabwiha, wila kavo onimuziwa kakamwe Baba “ahili Mwana.”

⁸ Ninga “muthaji wa dhopaddutxiwa dhotene,” Mwana ddina omarho onddimuwa wa vawoka na Yehova. (Kolosi 1:15) Kobuwela wandana wa Baba na Mwana okwene wunuwile mwari mwa mudhidhi wohiziweya baliwo eeli bahi—ovenya omaromo wa dhothanddiwa mpaka okalawo dhothanddiwa dhiina dha omuyani. (Joau 1:3; Kolosi 1:16, 17) Katanaalela gari ya thima vaddiddi yana Mwana mudhidhi waliye na Babi waye, baganonelamo dhubuwelo dha Babi waye vina bagasunza efunelo, magano vina dila Dhaye. Txibarene, kaninoziviha ologa wila Yezu onomuziwa Babi waye deretu opitha muthu muthuvi. Ofiyedhana oku txibarene ohimuwodhiha Yezu omuthwanyutxa Babi waye na mukalelo ohigawodhile okosa muthu mwina.

9, 10. (a) Yezu omuthwanyutxile Babi waye na makalelo gani? (b) Wila Yehova anirumeele, txini enfanyeelihu okosa?

⁹ Masunziho a Yezu alagiha eziwelo yaye ya mukalelo onubuwela vina oniwa Yehova vina ejile enafuniyena anamebedha Aye.b Yezu vina wahimuthwanyutxa Babi waye na mukalelo mwina wovaya vaddiddi. Yezu walogile dhahi: “Oddonile miyo, omona Baba.” (Joau 14:9) Na mukalelo wonyaala Yezu wahimutagiha Babi waye mwa dhilobo dhotene dhalogiye vina dhakosiye. Noona nigengesaga Mbibiliani mwaha wa Yezu​—mazu a guru vina ooziva abene aalabihedhiye mmasunzihoni aye, supaje ejilene yamuthukuleli wavulumutxa athu ena vina sisi ejilene yamutoteli okuthula mintori—​ninowodha omoona deretu Yehova bagaloga vina bagakosa dhilobo esi dhakakene. (Mateu 7:28, 29; Marko 1:40-42; Joau 11:32-36) Dila vamodha na efunelo ya Baba enovuhuliwa deretu mmazuni vina mmereloni a Mwana. (Joau 5:19; 8:28; 12:49, 50) Dhaene wila Yehova anirumeele, ninofanyeela ovuruwana masunziho a Yezu vina nifarege yotagiha yaye.​—Joau 14:23.

¹⁰ Vowila Yezu onomuziwa deretu Yehova vina yawila onomutagiha iyene na mukalelo wowakwana, kintikiniha wila Yehova ohilamula wila Mwana ddi dila ya onfiyedhana Baba. Na matibeelo aba a ononelamo sabwa endowelihu wa Baba modheela Yezu bahi, ovanene ndoweni nisekeserhe ejile entapulela mazu a Yezu: “Miyo ddili dilayá, ddili ebaribari, ddili egumi. Kawo onfiya wa Baba, ahivirile mwa miyo.”​—Joau 14:6.

‘Miyo Ddili Dila’

11. (a) Ninwodhela eni wandana na Mulugu modheela Yezu bahi? (b) Mazu alebiwe va Joau 14:6 anlagiha dhavi wila nibasa na Yezu tha vawoka?

¹¹ Nihimala osunza wila kaninanfiyedhe Mulugu s’ohikala modheela Yezu. Koona dhilobo dhiina makamaka ejile entapulelani wa iyo. Yezu ddi ‘dila’ bigatapulela wila modheela iyene panwodhehu wandana na Mulugu. Eji ekaleli eni dhaene? Modheela okalavi wororomeleya mpaka okwa, Yezu wahiperheka egumi yaye ninga mukutho wa yobolo. (Mateu 20:28) Kohikala mukutho obu, kigawodheyile iyo onfiyedha Mulugu. Othega onowika nibarelo vari va athu na Mulugu, sabwani Yehova ddokoddela dhaene iyene txipo kanarumeele dabi. (Izaiya 6:3; 59:2) Mbwenye mukutho wa Yezu ohiburutxavo nibarelona; wahikala mukuneelo wofanyeela wa yothega. (Ahebreu 10:12; 1 Joau 1:7) Nigarumeela musasanyedho wa Mulugu modheela Kristu nanda baniroromela musasanyedho obu, ninela wakela mahala a Yehova. Kawiwo mukalelo mwina wa iyo ‘wandana’ na Mulugu.​—Roma 5:6-11.

12. Mukalelo gani okalile Yezu ‘dila’?

¹² Yezu ddi ‘dila’ nigafunaga olobela. Modheela Yezu bahi panwodhihu onfiyedha Yehova na nlobelo vina nikuluvelo nawila malobelo ankosihu na murima wotene anela ovuruwaniwa deretu. (1 Joau 5:13, 14) Yezu mwinyene walogile dhahi: “Dhetene dhinamulobinyu Baba na nzina naga, iyene onouvahani. . . . Lobani, munovahiwa, wi othaba wenyu wakwane.” (Joau 16:23, 24) Txibarene odheela nzina na Yezu, ninowodha onfiyedha Yehova mu nlobeloni vina ninowodha omutxemerha Iyene “Baba wehu.” (Mateu 6:9) Yezu vina ‘ddi dila’ na mukalelo mwina​—modheela yotagiha yaye. Ninga moonelihu mundduni, na mukalelo wowakwana Yezu wahimutagiha Babi waye. Dhaene yotagiha ya Yezu enonilagiha mukalelo wa okalawo wila nimuhagalalihe Yehova. Noona wila ninfiyedhe Yehova, ninofanyeela weedda munyigalile Yezu.​—1 Pedro 2:21.

“Ddili Ebaribari”

13, 14. (a) Yezu wali dhavi webaribari agalogaga? (b) Wila Yezu akale “ebaribari,” iyene wafanyeela okosa eni, nanda sabwa yani?

¹³ Mudhidhi wotene Yezu waloga ebaribari mwaha wa nzu na nivuhulo na Babi waye. (Joau 8:40, 45, 46) Mwano mwa Yezu kamubudduwile dha othambi. (1 Pedro 2:22) Masiki vina abale ampambiha aahinonelamo wila iyene ‘wasunziha mwawakwanela dila yofiyana wa Mulugu.’ (Marko 12:13, 14) Dhaene, Yezu mwalogeliye wila “ddili ebaribari,” iyene kakalela oziwihavi ebaribari bahi mmakanini aye, bagalaleya vina bagasunziha. Dhilobo gwe vaddiddi—okala wa Yezu ebaribari wantaganyiheya opitha ologa ebaribari.

¹⁴ Kobuwela wila vyaka mazana menjene na othaga, Yehova wahawubuweliha anamaleba Bibilia wila alebe mavuhulo menjene mwaha wa Mesiya, obe Kristu. Mavuhulo aba ahibaza ologa dhilobo dha egumi yaye, mabasa vina okwa. Mowenjedhedha, Nlamulo na Mizé nahikaana malagiho, abene amutonya Mesiya. (Ahebreu 10:1) Yezu agahikalavi wororomeleya mpaka okwa, basoriha dhilobo dhotene dhobuwelihiwe mwaha wa iyene? Venevo Yehova pagakoseliwiye onamoona wawila ddi Mulugu wa nivuhulo na ebaribari. Mabasa aba manddimuwa aali vethurini va Yezu. Na mukalelo wakaliyewo​—kadda nzu nalogiye vina mabasa otene akosiye—​Yezu wahilagiha wila magano a nivuhulo aali ebaribari. (2 Korinto 1:20) Dhaene, Yezu wali “ebaribari.” Iyene wali “ebaribari” sabwa yawila nzu na nivuhulo na Yehova nahikala ebaribari na ofiya wa Yezu.​—Joau 1:17; Kolosi 2:16, 17.

“Ddili Egumi”

15. Omuroromela Mwana ontapulela eni, nanda okosa ejene onthukulela wuvi?

¹⁵ Yezu ddi “egumi,” sabwani odheela iyene bahi panawodhihu wakela egumi—kuloga dhahi: “egumi yohimala.” (1 Timóteo 6:19) Bibilia onloga dhahi: “Ole onimurumela Mwana, ofwanya egumi yohimala; ohinimurumela, oyelela okalawo oku, sabwa owali wa Mulugu kunamuthiye.” (Joau 3:36) Ki omuroromela Mwana Mulugu ontapulela eni? Ontapulela wila ninononelamo yawi kohikalaga iyene kanigawodhile wene ogumela egumi. Mowenjedhedha, entapulela wila ninolagiha nroromelo nehu modheela mabasa, ninosunzavi mwa Yezu, vina ninokosa mpaka apale vanwodhehu wila niloddege masunziho aye vina yotagiha. (Tiago 2:26) Vina, omuroromela Mwana Mulugu onothukulela wigumini ya mukalakala​—wa Akristu a ‘nikuru niñgono’ athikitheliwe na muya entapulela egumi ya omuyani yohikwa odhulu vina wa abale a ‘muthithi munddimuwa’ wa ‘mabila mena’ entapulela egumi yowakwana ya omuthu mparaizu wa velaboni ya vati.​—Luka 12:32; 23:43; Ovuhulela 7:9-17; Joau 10:16, NM.

16, 17. (a) Yezu onalagihe dhavi wila ddi “egumi” masiki wa abale akwile? (b) Nikuluvelo gani ninfanyeelihu okaana?

¹⁶ Ki abale amalile okwa? Yezu ddi “egumi” wa awene vina. Mudhidhi muñgonovi ahinathi onvenyiha marho waye Lazaro, Yezu wahimpanga Marta murogori wa Lazaro: “Miyo ddili onvenyiha mukwani, ddili egumi. Onddiroromela miyo, onokalawovi, masiki akwe; oliwo addiroromelaga miyo, kanakwe-wene.” (Joau 11:25, 26) Yehova ohimuroromela Mwanaye mpaka onvaha mifugulo dha ‘okwa vina [Hades],’ baganvaha ewodhelo ya ovenyiha mu okwani. (Ovuhulela 1:17, 18) Na mifugulo esi, Yezu oddo wothithimiheya onela ofugula misuwo dha Hades nanda venevo baafugulela otene abale amagiwe mu mburoni munkala abale akwile.​—Joau 5:28, 29.

¹⁷ ‘Miyo ddili dila, ddili ebaribari, ddili egumi’​—na mazu aba oohirutxa, Yezu wahilagiha na mazu mañgonovi mwaha wa egumi yaye vina orumiwi waye velaboni ya vati. Wa iyo ovanene mazu aba ahidhaala ntapulelo. Kobuwela wila Yezu wahidhowanavi mazu aba bagaloga dhahi: “Kawo onfiya wa Baba, ahivirile mwa miyo.” (Joau 14:6) Ovanene mazu a Yezu ba makamaka vaddiddi ninga mwakalelani a makamaka mudhidhi walogileye. Dhaene iyo podi okaana nikuluvelo kakamwe nawila niganfara Yezu, txipo kaninapupuruwe. Iyene bahi ddinanilagihe dila ya ‘wa Baba.’

Weyo Onakose Dhavi?

18. Okala namafara watxibarene wa Yezu ontaganyiheya na eni?

¹⁸ Sabwa ya nibasa naderetu na Yezu vamodha na eziwelo yaye enddimuwa ya Baba, nihikaana mwaha wofanyeela onfara Mwana. Ninga moonelihu mu kapituluni evirile, okala anamafara a txibarene a Yezu onofuna okosa elobo, othiya mazuvi obe olagihavi ejile eniwehu. Onfaraga Yezu onotaganyiheya na wiwananiha egumi yehu na masunziho vina yotagiha yaye. (Joau 13:15) Nikamihedho na osunzana, nthene ninengesiwe ovanene podi okamiha guru eji enkosa weyo.

19, 20. Nikamihedho nthi na osunzana nina eni, ejene enawodhe okamiha guru enkosa weyo wila onfare Kristu?

¹⁹ Mu kapituluni eso dhindawo, ninela ofwasedha osunza egumi vamodha na mabasa a Yezu. Makapitulu aba agawiwe gatha tharu. Yoroma, ninela woona mikalelo dhaye vina mukalelo onkosiye dhilobo. Yanawili, ninela opepesa yotagiha yaye ya guru ya olaleya vina osunziha. Yanoraru, ninela woona mukalelo wakweliye. Banigaroma na Kapitulu 3, vahikala kasha ya nsunziho ena musorho onloga “Owodhe Dhavi Onfara Yezu?” Malebo vina mavuzo ali venevale akoseliwe onikamiha otanaalela mukalelo onawodhihuna omutagiha Yezu mmazuni vina mmereloni.

²⁰ Na nikamihedho na Yehova Mulugu, kili yofuneya weyo opupuruwa, busuguleya wa Mulugu sabwa ya orava yothega. Na muthengo munddimuwa opitxileye, na okwela Yehova ohimuruma Mwanaye wila anilagihe dila ya orumeeliwa vina wandana na Mulugu. (1 Joau 4:9, 10) Ninfuna wila olibiheye orumeele okwela okule onddimuwa modheela orumeela vina okosaga dhilobo mowiwanana na niwobelo na Yezu: ‘Kala namafara waga.’​—Joau 1:43.