Olabihedhe Kajavo Egumi Yamukalakala! Mmabasani Mwawo mwa Olaleya

Ninowagalala venjene sabwa ya okana brochura vina nivuru niswa na weddihana masunzo a Bibilia! Ninofwanyelela omulobelela Yehova wi anivahe guru ya wakosa anamafwara. (Mt 28:18-20; 1Kor 3:6-9) Ninalabihedhe dhavi dhipano esi dhiswa?

Kalabihedha Kajavo Egumi Yamukalakala!, omaromo wa masunzo a Bibilia, oli mukalelo muswa wa osunziha. Kafwara maswagiho a makamaka ninga osasanyedha vina weddiha masunzo a Bibilia.a

• Kengesa makaniyá vina osekeserhe mavuzoyá

• Kengesa malebo alebiwe “kengesa” vina omukamihedhe namasunza ononelamo entapulelani

• Orumihe vidiyu mugamala muriganele vamodha, olabihedhaga mavuzo ali mvidiyunimwa

• Mugaroma nsunzo nimodha muvilibihedhe omariha

Mmabasani a olaleya, vamaromo-vene kanvahe muttuya brochura wi owodhe wona akala okana efunelo. (Koona kasha “Ninavahedhe dhavi Brochura Kajavo Egumi Yamukalakala! Labo Noroma.”) Ogamala osunza brochura na namasunza wawo, iyene agafuna odhowa osogorho na nsunzona onvahedhe nivuru vina murome osunza nsunzo 04. Akala onosunza na namasunza wawo nivuru Txini Ennisunziha Bibilia obe Neddegena Okwela wa Mulugu, kamwalihedha nsunzona nivuru Kajavo Egumi Yamukalakala! vina opime vanfunenyu oroma nsunzona.

KOONA VIDIYU MUNOMOYELIWA VANSUNZONI NENYU NA BIBILIA, OGAMALA WAKULE MAVUZO ANFWARELA:

• Namasunza wawo onasunze nni munivuruni ntti niswa?

• Onfwanyelela nni watonyihedha anamasunza aswa vidiyu eji?

• Ttarho gani dhinfwanyeliwe omukamihedha namasunza wawo ofiyedha vina wakwanihedha?—Koona kasha “Ttarho Dhinfwanyeliye Ofiyedha Nsunzo Nimodha-nimodha”