Txini Enfwanyeliwe Okosa wi Okane Egumi Yamukalakala?

1. Attu enjene anlogelani wi kinwodheya okalawo namukalakala?

ATTU enjene anotamela oja dhilobo dhapama vina onddamurha maningo wi akaane egumi yapama vina akalewo mudhidhi mwinjene. Masiki dhawene awene kanjedhela okalawo namukalakala. Txino anubuwela wi kinwodheya okalawo namukalakala. Masiki dhawene, Yezu ohiloga va Joau 3:16 vina 5:24 wi enowodheya okana “egumi yohimala.”

2. Txini enloga Joau kapitulu 6 mwaha wa egumi yamukalakala? (Joau 6:​39, 40)

² Labo dhahi, Yezu wahikosa matikiniho a ojiha muttitti wa attu na oba vina pawu.a Ejo yali yotikiniha, mbwenyi elogile Yezu labo nafwarela jalitxi yotikiniha vaddiddi. Muttitti wahinfwara Yezu mpaka o Kafarnau vakuvi na nyaza ya Galileya, venevo Yezu wahawaddela wi attu agahivenyihiwa mukwani vina agahikalawo namukalakala. (Kengesa Joau 6:​39, 40.) Katanalela entapulela ejo mwa amarho awo vina anamudhi awo akwile. Mazu aba a Yezu anonivaha nikuluvelo wi attu akwile anele ovenyihiwa mukwani vina weyo vamodha na amudhawo munele okana egumi yohimala. Mbwenyi elogile Yezu versu dhinfwarela dha Joau kapitulu 6 yahirutxa attu enjene ononelamo vina mpaka masaka abano enokala yorutxa attu enjene ononelamo. Txini elogile Yezu?

3. Txini elogile Yezu va Joau 6:51?

³ Mmalile Yezu ojiha muttitti, awene ahubuwela maná wavahile Yehova ana Izrayel mudhidhi walani mwiddeddereni. Malebo anologa maná ninga “oja [wa] wirimu.” (Masal. 105:40; Jo. 6:31) Yezu ohilabihedha maná ninga niparha wi asunzihe elobo yamakamaka. Masiki maná vakalani oja wavahiwa na matikiniho a Mulugu, abale ajile mwa ovira wa mudhidhi ahikwa. (Jo. 6:49) Mwa mpaddi mwina, Yezu ohiviloga ninga pawu ya wirimu, pawu ya Mulugu vina pawu ya egumi. (Jo. 6:​32, 33, 35) Yezu ohitapulelamo ottiyana olivo wa maná na iyene. Iyene ohiloga: Miyo ddili pawu ya egumi etitile wirimu. Akala muttu onoja pawu eji onokalawo namukalakala. (Kengesa Joau 6:51.) Ayuda abale ahizuzuma. Awene kawodhile ononelamo yalogela Yezu wi iyene ddi pawu endha wirimu vina wi pawu eji japama opitta maná avahile Mulugu amakolo awa. Yezu ohivaha monelo wamakamaka mulogiliye dhahi: Pawu envahimi ba maningo aga. Txini yafuniye ologa na mazu aba? Jamakamaka oziwa yafuniye ologa, sabwani eji enele onikamihedha ononelamo mukalelo onawodhe iyo vamodha na anamudhi ehu akwile ofwanya egumi yamukalakala. Ninele ononelamo mazu aba a Yezu.

TXINI ENTAPULELA PAWU YOKALAWO VINA MANINGO A YEZU

4. Attu ena akalelani ozuzumene na mazu a Yezu?

⁴ Attu enjene anvuruwana Yezu ahitikina vaddiddi valogiliye wi agahivaha egumi yaye wi attu a velaboni yavati afwanye egumi. Txino awene obuwela wi Yezu afuna aloge wila egahifuneya awene oja maningo aye. (Jo. 6:52) Mbwenyi musogorhomwa Yezu wahiloga elobo yatikinihile vottabwa mulogiliye dhahi: “Mugakodda oja maningo a Mwana-Muthu, omwa nikami naye, kamunafwanye egumi yamukalakala.”—Jo. 6:53.

5. Ninkanela nni ebaribari wi Yezu kafuna ologa wila attu agahimwa nikami naye?

⁵ Masaka a Nowé Mulugu wahakoddiha attu oja nikami. (Wita 9:​3, 4) Musogorhomwa Yehova wahakoddiha ana Izrayel oja nikami. Muttu ddi muttu agajile nikami wanfwanyela opiwa. (Onam. 7:27) Yezu wanniwelela Malamulo. (Mt. 5:​17-19) Nona iyene txipo kagakumbirhile Ayuda oja maningo aye obe omwa nikami naye. Mbwenyi Yezu mulogiliye mazu aba, wela wasunziha attu mukalelo wa ofwanya—“egumi yohimala.”—Jo. 6:54.

6. Ninziwa dhavi wi Yezu waloga na mukalelo wa nladdaniho va Joau 6:53?

⁶ Txini yafuna ologa Yezu? Mwebaribari Yezu waloga na mukalelo wa nladdaniho, ninga mulogeliye na muyana w’o Samariya, iyene ohiloga dhahi: Onamwe manje ananvahemi kanakane vina nttona, mbwenyi manjeyá ananvahemi, anele okala mwa iyene ninga fukuwa ya manje amvaha egumi yohimala. (Jo. 4:​7, 14)b Yezu kafuna ologa wi muyana oddule wa Musamariya agahimwa manje momaguva-mwene bakaana egumi yamukalakala. Na mukalelo wakakene, Yezu kafuna ologa wi muttitti obule w’o Kafarnau ogahikalawo namukalakala koja maningo a Yezu vina komwa nikami naye.

MIDHIDHI MINLI DHOTTIYANA

7. Txini enloga attu ena mwaha wa mazu a Yezu ali va Joau kapitulu 6:53?

⁷ Attu ena anloga wi va Joau 6:53 Yezu wela otapulelamo ejile yafwanyela okosa attu va Siyarini ya Nabuya, sabwa ya iyene olabihedha mazu oladdana. (Mt. 26:​26-28) Attu anloga wi otene ankala va Siyarini ya Nabuya anofwanyela oja pawu vina omwa vinyu. Ejoya ebaribari? Jamakamaka oziwa yowakulaya sabwani vyaka dhotedhene attu matxikwi na matxikwi anotugumana wi akose mattanga aba amakamaka. Ninele wona ottiyana olivo wa ejile elogile Yezu va Joau 6:53 vina va Siyarini ya Nabuya.

8. Dhottiyana gani dhilivo mwa midhidhi esi minli? (Koona vina mafoto.)

⁸ Ninele wona ottiyana wa midhidhi esi minli. Yoroma Yezu ologile mazu anfwanyeya va Joau 6:​53-56 wuvi vina mudhidhi gani? Iyene ologile mazu aba yaka 32 Yezu babaliwe, na muttitti wa Ayuda o Galileya. Valogiliye mazu aba vahivira yaka modha ahinatti oja Siyari ya Nabuya o Jeruzalemi. Yanawili, iyene walogile na ani mazu aba? Iyene ologile na attu azuzumeletxa oja ottiya na attu àna efunelo ya osunza mwaha wa Yehova obe Omwene wa Mulugu. (Jo. 6:26) Mwebaribari mulogile Yezu mazu arutxa awene ononelamo, momaguva-mwene ahittiya omukuluvela ofiyedha anamafwara ena ottiya vina omukuluvela. (Jo. 6:​14, 36, 42, 60, 64, 66) Attu aba ahittiyana vaddiddi na arumiwi 11 oweddeyana àli na Yezu yaka modha musogorhomwa va Siyarini ya Nabuya. Nsaka nttile arumiwi aye 11, ahikalavi na iyene. Masiki vahanonelanimo mowakwana-mwene dhetene dhasunziha Yezu, arumiwi aba ankuluvela wi Yezu ddi Mwana Mulugu wadhile wirimu. (Mt. 16:16) Yezu wahatamalela arumiwi aye valogiliye dhahi: “Nyuwo muli abale akalilevi na miyo mmasosoni onilemi.” (Lk. 22:28) Ottiyana oku onolagiha wi va Joau 6:53 Yezu kafuna otapulelamo ejile egapadduwile va Siyarini ya Nabuya. Mbwenyi ohikalawo ottiyana wina.

MAZU A YEZU ANTAPULELA ENI MWA WEYO

9. Va Siyarini ya Nabuya, Yezu walogana nikuru gani?

⁹ Mudhidhi wa Siyari ya Nabuya, Yezu wahavaha arumiwi aye pawu yahana emela vina wahawaddela wi yatapulela maningo aye. Vasogorhova iyene wahawaddela wi vinyu entapulela nikami naye na nipagano. (Mk. 14:​22-25; Lk. 22:20; 1 Kor. 11:24) Ejile yalogiliye yali yamakamaka vaddiddi. Iyene ohiloga wi ntti nipagano niswa. Nipagano ntti tta Yehova na “nlogo na Izrayel [womuyani]” abene analamulele na Yezu Mumweneni mwa Mulugu. (Aheb. 8:​6, 10; 9:15) Nsaka nttile arumiwi kanonelamo dhotene sabwa ya nipagano ntti, mbwenyi mohigonela awene agahittikiteliwa na muya wokoddela vina agahikosa mpaddi wa nipagano vamodha na Yezu wirimu.—Jo. 14:​2, 3.

10. Ottiyana gani wina olivo wa ejile elogile Yezu va Siyarini ya Nabuya na yalogiliye o Galileya? (Koona vina foto.)

¹⁰ Ejile elogile Yezu mudhidhi wa Siyari ya Nabuya enapatta attu ang’onovi ankuweliwa nikuru ning’ono na mabila. Arumiwi àli vamodha na iyene baromile okosa mpaddi wa nikuru ntti. (Lk. 12:32) Babuwene àkumbirhile Yezu wi aje pawu vina amwe vinyu. Ena agakosile mpaddi wa nikuru ntti musogorho agahija pawu vina agahimwa vinyu va Siyarini ya Nabuya. Bawene anakele mburo wirimu vamodha na Yezu. Mwadhahene oku ottiyana wina wa Siyari ya Nabuya na ejile epadduwile o Galileya. Mazu alogile Yezu va Siyarini ya Nabuya anapatta bahi nikuru ning’ono na attu, mbwenyi mazu alogile Yezu o Kafarnau anopatta muttitti munddimuwa wa attu.

11. Txini elogile Yezu o Galileya enlagiha wi iyene kalogana nikuru ning’ono?

¹¹ Mudhidhi wali Yezu o Galileya yaka ya 32 Kristu babaliwe, attu enji alogiliyena afuna oja bahi. Mbwenyi Yezu wahakamihedha ononelamo wi yahikalawo elobo yamakamaka opitta oja, eji egahavaha egumi yohimala. Yezu vina wahiloga wi abale akwile agahiwodha ovenyihiwa labo nomariha vina okalawo namukalakala. Mottiyana na Siyari ya Nabuya, va Joau kapitulu 6 Yezu kaloga maruriho ankana attu ang’onovi bahi, mbwenyi waloga maruriho agawodhile wakela attu a malogo otene. Mwebaribari, iyene ohiloga: Akala muttu onoja pawu eji, onokalawo namukalakala . . . pawu envahimi ba maningo aga wila attu a velaboni ya vati afwanye egumi.—Jo. 6:51.c

12. Txini enfuneya wi nakele egumi yohimala?

¹² Yezu afuna aloge wi attu otene akalilewo agahakela egumi yamukalakala? Nne, mbwenyi abale anja pawuya, kuloga animuroromela Yezu. Attu enjene ali Akristu anubuwela wi anele ovuneya sabwa ya omurumela Yezu vina omoona ninga nvuni wawa. (Jo. 6:29) Mbwenyi enofuneya elobo yina, ahikalawo attu enjene o Galileya amurumela Yezu vamaromo, mbwenyi musogorhomwa ahittiya onfwara. Sabwaya jani?

13. Txini enfuneya wi nikale anamafwara a Yezu?

¹³ Attu enjene a muttitti obule anfwara Yezu sabwani iyene wanavaha esile dhafunani. Awene afuna wi Yezu àvulumutxe, àvahe dhoja vina awaddele dhilobo dhafunani wiwa. Mbwenyi Yezu ohilagiha wi yanfuneya elobo yina wi akale anamafwara aye. Yezu vina ohilagiha kakamwe wi iyene kadhile velaboni ya vati wi àvahe attu esile dhafunani bahi, mbwenyi yanfuneya awene odhowa valiye, kuloga onvuruwana vina omwiwelela.—Jo. 5:40; 6:44.

14. Txini enfwanyelihu okosa wi nipurelemo maningo vina nikami na Yezu?

¹⁴ Yezu ohisunziha wi sabwa ya operheka maningo aye vina nikami naye egahiwodheya attu okalawo namukalakala. Mbwenyi attuya anfwanyela orumela ebaribari eji vina omuroromela, nroromelo ntti nali nofuneya mwa Ayuda vina mwa iyo masaka abano. (Jo. 6:40) Mwadhahene, ejile elogile Yezu va Joau 6:​53, entapulela wi iyo ninofwanyela ororomela yobolo wi nikane egumi yohimala. Enowodheya attu enjene wakela mareliho aba.—Ef. 1:7.

15-16. Dhilobo gani dhamakamaka dhinsunzihu va Joau kapitulu 6?

¹⁵ Nipadduwo ninfwanyeya va Joau kapitulu 6 ttamakamaka mwa iyo notene. Mu nipadduwoni ntti ninosunza wi Yezu onowakwela vaddiddi attu. O Galileya iyene wahavulumutxa attu, wahasunziha sabwa ya Omwene wa Mulugu vina wahavaha oja attu. (Lk. 9:11; Jo. 6:​2, 11, 12) Mbwenyi yamakamakaya, wahasunziha wi iyene ddili pawu ya egumi.—Jo. 6:​35, 48.

¹⁶ Ebaribari wi abale àkuwelile Yezu ninga mabila mena kanja pawu vina kamwa vinyu va Siyarini ya Nabuya. (Jo. 10:16) Masiki dhawene, awene anopurelamo maningo vina nikami na Yezu Kristu. Dhavi? Awene anopurelamo modhela ororomela mukutto wa Yezu Kristu vina okuluvela wi onele wakwanihedha mapikirhelo otene. (Jo. 6:53) Mwa abale anja pawu vina ammwa vinyu anolagiha wi anokosa mpaddi wa nipagano niswa vina ahikana njedhelo nolamulela Mumweneni wa wirimu. Mwadhahene kintanala akala nili attikitteliwi obe mabila mena nipadduwo na Joau kapitulu 6 ttamakamaka mwa iyo. Ninonisunziha wi iyo notene ninofwanyela okana nroromelo noliba mwa yobolo wi nikalewo namukalakala.