Txini Ensunzihu na Yobolo?

1. Ekalele nni yamakamaka muttu-muttu wa iyo okala va Muttuponi wa Wubuwela Okwa wa Yezu vyaka dhotedhene?

KAVALI waganyedha wi weyo onorumela wila yobolo mvaho wa ttima vaddiddi! (2 Ko. 9:15) Sabwa ya mukutto operhekile Yezu enowodheya iyo okana mandano ofiyedheya na Yehova. Yobolo vina enonivaha gari ya okana egumi yohimala. Nihikana mwaha dhinji dhinnittukulela otamalela okwela onilagihile Yehova modhela oniperhekela Mwanaye wokweleya! (Rom. 5:8) Wi anikamihedhe olagiha otamalela vina ohidduwala yobolo, Yezu ohinikumbirha wi nubuwelege vyaka dhotedhene mukutto onikoseliye.—Lk. 22:​19, 20.

2. Txini enasekeserhihu mu nsunzoni ntti?

² Yaka ejino, Muttupo wa Wubuwela Okwa wa Yezu onakosiwe Sabuddu 12 ya Abrili ya 2025. Kavali waganyedha wi iyo notene ninokosa masasanyedho wi noone Muttupo obu. Enowodheya iyo opurelamo venjene mudhidhi obu nigatanalelaa ejile enikoseli Yehova vina Mwanaye. Mu nsunzoni ntti, ninele wona txini ennisunziha yobolo mwaha wa Yehova vina Mwanaye. Nsunzo ninfwarela ninele ononelamo yobolo ekalele nni yamakamaka vina ninawodhe dhavi olagiha otamalela.

YOBOLO ENNISUNZIHA ENI MWAHA WA YEHOVA

3. Mukutto wa muttu mmodha bahi onwodha dhavi wafurula attu matxikwi menjene? (Koona vina foto.)

³ Yobolo enonisunziha venjene sabwa ya oligana wa Yehova. (Oli. 32:4) Dhavi? Kobuwela eji: Sabwa ya ovanya wa Adamu iyo nihirava yottega ennitotela okwa. (Rom. 5:12) Wi anifurule Yehova ohimuruma Mwanaye wi anikwele iyo. Kito mukutto wa muttu mmodha woligana onwodha dhavi wafurula attu matxikwi menjene? Murumiwi Paulo ohitapulelamo: “Sabwani ohiwelela wa muttu mmodha [Adamu] ohakosiha enjene okala attegi, mbwenyi wiwelela wa muttu mmodha [Yezu] ohakosiha enjene okala aligani.” (Rom. 5:19; 1 Tm. 2:6) Na mazu mena, ovanya wa muttu mmodha bahi ohinikosiha okala adhari a yottega vina okwa. Na mukalelo wakakene, wiwelela wa muttu mmodha ohiniwodhiha ovuneya.

4. Yehova okoddele nni wattiya bahi ana a Adamu owiwelela okalawo namukalakala?

⁴ Koddi yanfuneya-wene Yezu okwa wi anivune? Sabwa ya jani Yehova kattiyile bahi ziza na Adamu nowiwelela okalawo namukalakala? Txino ninowubuwela wi obu ogali mukalelo wapama wa ogomiha makaniya. Mbwenyi mwa Yehova ejo kigali elobo yofwanyelela sabwani egakalile ninga Adamu kakosile yottega enddimuwa vina anaye kaana yottega mbwenyi ejo kahiye ebaribari.

5. Ninfwanyelela nni okuluvela wi dila dhotedhene Yehova onokosa eli yapama?

⁵ Kito Yehova kohikosa masasanyedho a yobolo vina kottiya oligana waye baarumeliha ana ohiligana a Adamu okalawo namukalakala? Ejo kopadduwa, na mudhidhi attu agahiroma waganyedha oligana wa Yehova mmakanini mena. Motagiha, ena txino agannubuwela, Yehova txibarene onele wakwanihedha mapikirhelo aye otene? Mowagalaliha-mwene iyo kaninfwanyela ozuzuma sabwa ya ejuwene. Sabwa ya Yehova okala woligana—vina omperheka Mwanaye wokweleya wi anikwele—ntonyihedho nawi dila dhotene iyene onokosa eli yapama.

6. Yobolo enlagiha dhavi wi Yehova ononikwela? (1 Joau 4:​9, 10)

⁶ Ottiya bahi mukutto wa Yezu onikamihedha ononelamo wi Yehova ddoligana, ononikamihedha vina ononelamo wi Yehova ononikwela. (Jo. 3:16; kengesa 1 Joau 4:​9, 10.) Yobolo enonisunziha wi Yehova onfuna wila nikalewo namukalakala vina nikose mpaddi wa anamudhi aye. Katanalela eji: Vattegile Adamu iyene wahittiya okosa mpaddi wa anamudhi a Yehova. Nona, iyo notene nigabaliwa kaninkosa mpaddi wa anamudhi a Yehova. Mbwenyi sabwa ya yobolo, attu otene animuroromela Mulugu vina aniwelela anele owodha okosa mpaddi wa anamudhi aye musogorho. Masiki ovanene, Yehova onolevelela dhottega dhehu vina ninowodha okana mandano ofiyedheya na iyene vina na abalihu. Txibarene kaninfwanyela waganyedha wi Yehova ononikwela!—Rom. 5:​10, 11.

7. Otabuwa wa Yezu onlagiha dhavi wi Yehova ononikwela?

⁷ Enowodheya ononelamo deretu okwela wa Yehova nigatanalela mukalelo otabuwiliye wi apitxe muttengo wa yobolo. Satana ohiloga wi kawo mulabeli wa Yehova agakalile woweddeyana kopattiwa makattamiho orutxa. Wi alagihe wila oku ottambi Yehova ohimuttiya Mwanaye okwa vina otabuwa ahinatti operheka egumi yaye. (Job 2:​1-5; 1 Pe. 2:21) Yehova ohimoona Mwanaye abeddiwaga vina asottottiwaga. Iyene ohona mudhidhi watomeyiwe Yezu vapingirhizini vina ohona otabuwa wotene wa Yezu ofiyedha okwa. (Mt. 27:​28-31, 39) Yehova wahikana ewodhelo ya ogomiha makattamiho abale mudhidhene obule. Motagiha, Yehova agahikosa elobo mudhidhi walogile attu wi: “Akala Muluguyá onomurumela, amvune-to ovanene.” (Mt. 27:​42, 43) Mbwenyi Yehova kokosa ejuwene yobolo kigapitxiwe, iyo vina nigahikalavi se njedhelo. Nona, Yehova ohimuttiya Mwanaye otabuwa ofiyedha okwa.

8. Ninziwa dhavi wi mwa Yehova kiyali elobo yovevuwa omoona Mwanaye atabuwaga? Katapulela. (Koona vina foto.)

⁸ Kaninfwanyela wubuwela wi Yehova kaniwa opa sabwa ya okala namawodha-wodha! Iyene onittanddile na ewodhelo ya olagiha akala ninokubanya obe ninowagalala. Bibilia onologa wi iyo nittanddiwe oladdana na Mulugu, ejo enotonyihedha wi iyene vina onowiwa opa. Bibilia onomwaddana Yehova ninga onyimuliwe vina okubanyile. (Ms. 78:​40, 41) Kobuwela vina nipadduwo na Abrahamu na mwanaye Izaki. Yehova wahimukumbirha Abrahamu wi amperheke mwanaye ninga mukutto. (Wi. 22:​9-12; Ahe. 11:​17-19) Kobuwela mukalelo oviwilemo Abrahamu mudhidhi wavisasanyedhiye wi ampe mwanaye. Katanalela mukalelo okubanyile Yehova vina wiwaliye opa mwawoniliye attu amutabutxaga Mwanaye ofiyedha ompa!—Koona vidiyu Exemplos de Fé—Abraão (Parte 2) mu jw.org.

9. Txini ensunzihu na Roma 8:​32, 38, 39 mwaha wa okwela wa Yehova?

⁹ Yobolo enonisunziha wi kawo onnikwela opitta Yehova—nne vina marho wehu wofiyedheya obe munammudhi mwina onimukwelihu vaddiddi. (Kengesa Roma 8:​32, 38, 39.) Nikane ebaribari wi okwela onna Yehova na iyo onddimuwa opitta okwela onna iyo nanya. Weyo onofuna okana egumi yohimala? Yehova onowufunana vopitta. Onofuna wi dhottega dhawo dhileveleliwe? Yehova onofuna vina vopitta. Elobo ennikumbirhiye ja olagiha wi ninotamalela yobolo, nikane nroromelo vina nimwiwelelege. Txibarene yobolo mvaho wa ttima vaddiddi, mvaho onlagiha wi Yehova ononikwela. Mwilaboni eswa vina ninele osunza venjene mwaha wa okwela onna Yehova na iyo.—Ko. 3:11.

YOBOLO ENNISUNZIHA NNI MWAHA WA YEZU

10. (a) Txini emukubanyihile venjene Yezu mwaha wa okwa waye? (b) Yezu olagihile dhavi wi Satana muttambi? (Koona vina kasha “Weddeyana wa Yezu Olagihile Dhavi wi Satana Muttambi.”)

¹⁰ Yezu wanzuzumela venjene ejile yobuwela attu mwaha wa Babe. (Jo. 14:31) Mudhidhi mung’onovi ahinakwa Yezu wahipwattelihiwa muladdu wa onveyiha Mulugu vina wa okala timbwini. Iyene wahidhugudheya venjene sabwa ya otanalela wi muladdu obule wapwattelihiwiye ogahattukulela attu okana monelo wohifwanyelela mwaha wa Babe. Jijuwene yamuttukuleli olobela dhahi: “Babaga, egawodheya ddirabeliheni kalisi eji.” (Mt. 26:39) Yezu wahidhowavi akalaga wororomeleya mpaka okwa waye, sabwa ya ejuwene iyene ohiwodha olagiha wi Satana muttambi.

11. Yezu olagihile dhavi okwela onddimuwa waniyena na attu? (Joau 13:1)

¹¹ Yobolo vina enonisunziha wi Yezu onowazuzumela venjene attu, makamaka anamafwara aye. (Gan. 8:31; kengesa Joau 13:1.) Motagiha, Yezu wanziwa wi agahigumanana makattamiho menjene orutxa mudhidhi ogali iyene velaboni ya vati, otaganyiha na otabuwa vaddiddi ofiyedha okwa. Yezu kakosa dhilobodha sabwani jijuwene yamujedhelana Yehova, mbwenyi sabwa ya wakwela attu. Yezu ohilagiha wakwela attu modhela walaleya, wasunziha vina wakamihedha. Masiki siku naye nomariha ahinakwa, Yezu ohitamela mudhidhi wa osuwa manyalo a arumiwi aye, ohavaha malago vina nipangarhazo nafunani. (Jo. 13:​12-15) Masiki vatomeyiwiye va pingirizini, Yezu kattiyile omuzuzumela timbwini wali vakuvi na iyene vina omukumbirha Joau wi amuzuzumele mamayaye. (Lk. 23:​42, 43; Jo. 19:​26, 27) Kavali waganyedha wi Yezu ohilagiha wakwela attu modhela dhilobo dhotene dhikosiliye bali velaboni ya vati ottiya operheka egumi yaye bahi.

12. Na mukalelo gani ondowavi Yezu akosaga guru wi anikamihedhe?

¹² Ebaribari wi Yezu “okwa dila modha bahi,” mbwenyi iyene onokosavi guru wi anikamihedhe. (Rom. 6:10) Dhavi? Iyene onodhowavi alabaga wi anivahe dhilobo dhotene dhapama dhinwodheya ovanene sabwa ya yobolo. Iyene onolaba ninga Mwene wehu, Namakutta Munddimuwa vina musogorheli wa Mulogo. (1 Ko. 15:25; Ef. 5:23; Ahe. 2:17) Iyene ohikana muttorho wa watugumaniha attikitteliwi vina muttitti munddimuwa, aba mabasa anagome goyi enddimuwa ehinagoma.b (Mt. 25:32; Mk. 13:27) Iyene vina onomulabihedha mudhari wororomeleya wila anivahe dhoja dhomuyani wi nidhowegevi nimulabelaga Yehova nororomeleya masiku aba omariha. (Mt. 24:45) Iyene aganilamulela mwari mwa Vyaka Txikwi, agandowavi alabaga wi anikamihedhe. Kaninaganyedha wi Yehova oniperhekele iyo Mwanaye!

OSUNZEGEVI DHILOBO DHISWA

13. Txini enawukamihedhe odhowavi osunzaga mwaha wa okwela wa Yehova vina Yezu?

¹³ Enowodheya odhowavi osunzaga mwaha wa onikwela wa Yehova vina wa Yezu ogatanalela dhilobo dhotedhene dhinnikosela awene mpaka ovanene. Yaka ejino Muttupo ohinatti vina ogavira, enowodheya weyo ofwaseyela wengesa Muttaka mmodha obe minli. Mbwenyi kuwengese makapitulu menjene mudhidhi wakakene. Kuwaguvetxe vina otamele mwaha dhina dhinawukamihedhe omukwela venjene Yehova vina Yezu. Kudduwale vina ologa na ena dhilobo dhiswa dhisunziliwe.

14. Mowiwanana na Masalmo 119:97 opepesa onnikamihedha dhavi osunza venjene mwaha wa yobolo vina masunziho mena? (Koona vina foto.)

¹⁴ Akala weyo obatiziwe vyaka dhinjidhene mundduni, txino onowubuwela akala dhikalawo dhilobo dhiswa dhigadhile weyo osunza mwaha wa oligana wa Yehova, okwela waye vina yobolo. Mbwenyi ebaribariya jawi ninelege okanavi dhilobo dhiswa dha osunza mwaha wa makani aba. Mwadhahene, txini enfwanyeliwe okosa? Katamela opurelamo venjene mapublikasau ehu. Akala onowengesa elobo mBibiliani vina buhinonelamo, kapepesa mwaha wa makaniya. Vina mwari mwa sikuna ntto, katamela otanalela dhengesiliwe vina dhisunziliwe mwaha wa Yehova, Mwanaye vina owukwela wawa.—Kengesa Masalmo 119:97.

15. Ekalele nni yamakamaka odhowavi nisunzaga dhilobo dhiswa dha mBibiliani?

¹⁵ Kukumuwe akala kunwodha ofwanya elobo eswa obe yotikiniha dila dhotene dhinimwengesiwe Bibilia obe dhimpepesiwe. Na mukalelo mwina weyo onoladdanihiwa na muttu ontamela nddarhama. Dila dhinji muttu ontamela nddarhama onononga mudhidhi mwinjene obe masiku menjene ahinafwanya nddarhamaya. Masiki dhawene iyene kaniyelela mundduni sabwani onoziwa wi masiki nddarhama eng’ono ehikana ttima. Mwa mpaddi wehu dhibaribari dhinfwanyihu mBibiliani dhihikana ttima enddimuwa opitta nddarhama! (Ms. 119:127; Gan. 8:10) Okale wovilela vina kuttiye otamela dhilobo dhiswa mBibiliani.—Ms. 1:2.

16. Ninawodhe dhavi omutagiha Yehova vina Yezu?

¹⁶ Ogasunzaga, katamela oziwa mukalelo onalabihedhe weyo mwigumini mwawo esile dhinengesiwe. Motagiha, onofwanyela otagiha oligana wa Yehova modhela ohimutanya muttu. Enowodheya weyo vina otagiha okwela onna Yezu na Babe vina okwela oniye na attu ena. Mukalelo mmodha wa okosa ejuwene bwa okala womala-nawale wi okose ofuna wa Yehova vina wakamihedhe attu ena masiki ejo ehikalaga yovevuwa. Mukalelo mwina bwa walaleyela attu ena wi akaane gari ya oziwa dhilobo dhotikiniha dhinakosela Yehova attu vina aroromele yobolo.

17. Txini enoone iyo mu nsunzoni ninfwarela?

¹⁷ Venevo vandowihu nisunzaga mwaha wa yobolo vina nivahaga ttima, omukwela wehu Yehova vina Yezu ogannunuwavi, yodhelavoyá, Yehova vina Yezu agannikwela vaddiddi. (Jo. 14:21; Tia. 4:8) Nona ninfuna nilabihedhe pama dhetene dhinnivaha Yehova vina nisunzegevi sabwa ya yobolo. Nsunzo ninfwarela ninele wona maruriho mang’onovi ankanihu sabwa ya yobolo vina ninawodhe dhavi omutamalela Yehova sabwa ya okwela waye.