NSUNZO 5
JIBO 108 Mulugu Ddokwela-wene
Mareliho Ankaana Iyo Sabwa ya Okwela wa Yehova
“Kristu Yezu odha mwilaboni wi àvune attegi.”—1 TM. 1:15.
DHINASUNZE IYO
Ninele wona mareliho ankanihu sabwa ya yobolo vina ninalagihe dhavi omutamalela Yehova.
1. Ninawodhe dhavi omwagalaliha Yehova?
KATANALELA dhahi, weyo onvaha elobo ya ttima vaddiddi muttu onimukweliwe, ottiya okoddelavi muttuya onele olabihedha. Mbwenyi musogorhomwa muttuya ottukula okoya mukashani vina odduwala, kavali waganyedha wi ejo egahukubanyiha venjene! Mwa mpaddi mwina, kowiliwa muttuya weele olabihedha elobo envahiliwe vina bauwaddela wi oziveliwana, ejo egahuwagalaliha venjene. Yotagiha eji eniwanana dhavi na yobolo? Yehova ohiniperhekela Mwanaye. Mohaganyedha iyene onowagalala vaddiddi agonaga wi ninotamalela mvaho obu wa ttima vaddiddi vina okwela onilagihiliye modhela okosa masasanyedho a yobolo!—Jo. 3:16; Rom. 5:7, 8.
2. Txini enasekeserhihu mu nsunzoni ntti?
2 Mbwenyi mwa ovira wa mudhidhi, ninodhaga odduwala ttima enna yobolo mwa iyo. Nigattiya otamalela yobolo enkala ninga ninottiya mvaho obu Yehova mburo ohinwodhihu wona vina wubuwela. Wi ejo ehipadduwe, mudhidhi na mudhidhi ninofwanyela wubuwela dhilobo dhotene dhinnikosela Yehova vina Yezu. Nsunzo ntti ninele onikamihedha okosa ejuwene. Ninele wona mareliho ankanihu ovanene sabwa ya yobolo vina anakanehu musogorho. Ninele wona vina enfwanyelihu okosa wi nilagihe otamalela okwela wa Yehova, makamaka sumana dhing’onovi Muttupo wa Wubuwela Okwa wa Yezu ohinatti vina ogavira.
MARURIHO ANKANA IYO OVANENE
3. Mareliho gani ankaana iyo ovanene sabwa ya yobolo?
3 Ovenyana ovanene ninokana maruriho menjene sabwa ya mukutto wa Yezu. Motagiha, Yehova onolevelela dhottega dhehu, modhela yobolo. Iyene kammageleliwa okosa ejuwene. Ebaribariya jawi Yehova onofuna onilevelela. Munasalmo wantamalela olevelela wa Yehova nona ohiloga: Nyuwo Yehova, muli wa wapama muli womala-nawale wi mulevelele.—Ms. 86:5; 103:3, 10-13.
4. Yehova ompitxele yobolo ani? (Luka 5:32; 1 Timóteo 1:15)
4 Ena txino anowubuwela wila kanfwanyela oleveleliwa na Yehova. Ejoya ebaribari kawo muttu onfwanyelela. Murumiwi Paulo wanziwa wi iyene ‘kafwanyela okuweliwa murumiwi.’ Masiki dhawene iyene ohiloga: “Mwaha wa mahala a Mulugu, miyo ddili ejile elimi.” (1 Ko. 15:9, 10) Iyo nigatxinuwa dhottega dhehu, Yehova ononilevelela. Sabwaya? Kahiye wi ninofwanyelela, mbwenyi sabwani Yehova ononikwela venjene. Nona ogakala wokubanyene wubuwelaga wi kunfwanyelela oleveleliwa na Yehova, kobuwela wi iyene kakosile masasanyedho a yobolo sabwa ya attu oligana ahinattegaga, mbwenyi sabwa ya attegi atxinuwile.—Kengesa Luka 5:32; 1 Timóteo 1:15.
5. Japama wubuwela wi ninofwanyelela oleveleliwa na Yehova? Katapulela.
5 Kawo muttu wa iyo onfwanyela wubuwela wi onofwanyelela oleveleliwa na Yehova, masiki akala nidhile nimulabelaga mwari mwa vyaka dhinjene. Ebaribari wi Yehova onowubuwela dhotedhene dhimukosele iyo. (Ahe. 6:10) Mbwenyi iyene ohinivaha Mwanaye ninga mvaho, ottiya ninga nlivo mwaha wa mabasa animukosela iyo. Egali yabure wubuwela wi iyo ninofwanyelela oleveleliwa na Yehova obe iyene onofwanyela oneddiha na mukalelo wa vawoka. Wubuwela dhahene egali ninga wona wi Yezu kafwanyela onikwela.—Kaladdaniha na Galásia 2:21.
6. Txini emuttukulele Paulo ovilibihedha mmabasani a Yehova?
6 Paulo wanziwa wi iyene kafwanyelela oleveleliwa na Yehova. Kito txini emuttukulele ovilibihedha mmabasani a Yehova? Iyene ohikosa ejuwene wi alagihe otamalela waye mwaha wa opama wotene wa Yehova vina ttagaraga yamulagihiliye. (Ef. 3:7) Dhahene ninga Paulo, iyo vina ninovilibihedha omulabela Yehova, kahiyo sabwa ya otamela oleveleliwa na iyene, mbwenyi sabwani ninfuna nilagihe otamalela wehu dhilobo dhotedhene dhinnikosela iyene.
7. Mareliho gani mena anna iyo sabwa ya yobolo? (Roma 5:1; Tiago 2:23)
7 Mareliho mena anna iyo ovanene sabwa ya yobolo, gari ya okana mandano ofiyedheya na Yehova.a Ninga monelihu nsunzo nivirile, iyo kanibaliwe banimalile okana mandano na Mulugu. Mbwenyi sabwa ya yobolo enowodheya okana “murenddele na Mulugu” vina okala amarho aye.—Kengesa Roma 5:1; Tiago 2:23.
8. Ninfwanyelela nni omutamalela Yehova sabwa ya mvaho wa nlobelo?
8 Ndoweni nitanalele mpaddi mwina wa mandano ehu na Yehova—mvaho wa nlobelo. Yehova kanvuruwana bahi malobelo ankosihu nigatugumana wi nimwebedhe, mbwenyi onovuruwana vina malobelo ankosa muttu-muttu wa iyo. Iyo nigalobela ninokala ofwaseyene, mbwenyi nlobelo kannikamihedha na mukalelo obu bahi. Nlobelo ninonikamihedha vina olibiha mandano ehu na Mulugu. (Ms. 65:2; Tia. 4:8; 1 Jo. 5:14) Vali Yezu velaboni ya vati, iyene wanlobela mudhidhi wotene sabwani wanziwa wi Yehova waninvuruwana. Iyene vina wanziwa wi nlobelo nigahimukamihedha olibiha mandano aye na Yehova. (Lk. 5:16) Iyo ninowagalala venjene oziwa wi enowodheya okana mandano ofiyedheya na Yehova vina ologa na Iyene modhela nlobelo, dhotene esi dhinwodheya bahi sabwa ya mukutto wa Yezu!
MARELIHO ANAKANE IYO MUSOGORHO
9. Mareliho gani anakaane alabeli a Yehova musogorho?
9 Mareliho gani anakaane adhari a Yehova musogorho sabwa ya yobolo? Awene anele wakela egumi yohimala. Attu enjene anubuwela wi eji kinawodheye, sabwani ovenyana masaka awale okwa onokosa mpaddi wa nlogo na attu. Mbwenyi ovenyana omaromelo efunelo ya Yehova yali yawi attu akalegewo namukalakala. Adamu kohittega, kawo muttu wobuwelege wi kinwodheya okalawo namukalakala, sabwani attu otene agahikaana egumi yohimala. Masiki ekalaga yorutxa ovanene otanalela wi ninele okana egumi yohimala, ninofwanyela okuluvela wi ejo enele owodheya, sabwani Yehova opitxa muttengo munddimuwa—egumi ya Mwanaye.—Rom. 8:32.
10. Attikitteliwi vina mabila mena anjedhela elobo gani?
10 Egumi yohimala mareliho a musogorho, mbwenyi ovenyana ovanene enowodheya otanalela mukalelo onakalani vina Yehova onfuna wi nikosege ejuwene. Attikitteliwi anojedhela egumi yotikiniha wirimu na gari ya olamulela elabo vamodha na Yezu. (Ovu. 20:6) Mabila mena anojedhela vina nowagalala okalawo mparaizuni velaboni ya vati mwenemo muhinakale obulela, otabuwa vina okubanya. (Ovu. 21:3, 4) Weyo oli mmodha wa mabila mena anna njedhelo na okana egumi yohimala velaboni ya vati? Kaninfwanyela wubuwela wi njedhelo ntti kanina ttima nigaladdaniha na njedhelo na okala wirimu! Jijuwene yafuna Yehova omaromo-wene vattanddiliye attu. Okala velaboni ya vati onele onagalaliha venjene.
11-12. Mareliho gani anjedhela iyo venjene wakela Mparaizu? (Koona vina mafoto.)
11 Katanalela mukalelo onakale egumi Mparaizu. Weyo kunove vina obulela obe okwa. (Iza. 25:8; 33:24) Yehova onele wuvaha dhilobo dhotedhene dhapama dhinfuniwe. Elobo gani enfuniwe osunza? Onfuna osunze venjene mwaha wa dhinama? Epano ya jibo? Onofuna osunza opintari? Mwilaboni eswa munele ofuneya anamamaga vina anamalima. Enele ofuneya vina attu anapiyege dhoja, anasasanyedhege dhipano vina anasasanyedhege mimburo dhokoddela dhinakanehu mwilaboni eswa. (Iza. 35:1; 65:21) Sabwa ya okana egumi yohimala, onele wunuwiha mikalelo dhinfuniwe.
12 Katanalela wagalala onakaane iyo sabwa ya wawakela abale anavenyihiwe mukwani! (Mer. 24:15) Katanalela vina wagalala onakaane iyo sabwa ya osunza mwaha wa Yehova modhela dhilobo dhinji dhittanddiliye. (Ms. 104:24; Iza. 11:9) Yamakamakaya, katanalela mukalelo onakalani yapama omwebedha Yehova se ovipwatteliha muladdu! Koddi ogahiziveliwa oyelela maruriho aba a musogorho sabwa ya “ojavo mudhidhi mung’onovi dhilobo dha dhottega”? (Ahe. 11:25) Nne! Guru ji guru enkosiwe ovanene kinladdanihiwa na egumi yowagalala enakanihu. Kobuwela wi Paraizu velaboni ya vati kinadhowegevi ekalaga njedhelo na musogorho. Ninele ofiya siku ninakalani ebaribari. Ejo enapadduwe bahi sabwani Yehova ohinikwela ofiyedha oniperhekela egumi ya Mwanaye wokweleya!
Ogatanalelaga mareliho anakaniwe mwilaboni eswa txini enuwagalalihetxa? (Kang’ana ddima 11-12)
OLAGIHE WI ONOTAMALELA OKWELA WA YEHOVA
13. Ninawodhe dhavi olagiha wi ninomutamalela Yehova sabwa ya onivaha yobolo? (2 Korinto 6:1)
13 Ninawodhe dhavi omutamalela Yehova sabwa ya onivaha yobolo? Modhela wika mabasa aye vamburoni voroma mwigumini mwehu. (Mt. 6:33) Vowi Yezu ohakwela otene, “wila abale ankalawo ahivikalelewo anya mbwenyi amukalelewo ole wakwelile vina ovenyihiwe mukwani.” (2 Ko. 5:15) Yehova ddwapama vaddiddi vina ononilevelela. Nigavilibihedha okosa muli-mwetemwene wi nimulabele, ninolagiha wi ninononelamo dhotene dhinnikosela iyene vina ninotamalela venjene.—Kengesa 2 Korinto 6:1.
14. Ninalagihe dhavi wi ninokuluvela malago a Yehova?
14 Mukalelo mwina wa olagiha otamalela wehu okwela wa Yehova bwa okuluvela malago aye vina ofwara. Ninawodhe dhavi okosa ejuwene? Nigakosaga dhogana dhomwinya, motagiha akala ninele okosa masunzo manddimuwa obe nne, mabasa gani anfwanyelihu ottidda, ninofwanyela wubuwela ejile ennifunana Yehova wi nikose. (1 Ko. 10:31; 2 Ko. 5:7) Nigakosa dhogana mowiwanana na malago a Yehova enopadduwa elobo yotikiniha—nroromelo nehu, njedhelo nehu na musogorho vina mandano ehu na Yehova anolibavi.—Rom. 5:3-5; Tia. 2:21, 22.
15. Ninawodhe dhavi olagiha otamalela nsaka na Muttupo wa Wubuwela Okwa wa Yezu?
15 Ohikalawo mwaha wanoraru onnittukulela olagiha otamalela okwela wa Yehova. Nilabihedhe nsaka na Wubuwela Okwa wa Yezu wi nimulagihe Yehova wila yobolo ehikana ttima vaddiddi mwa iyo. Ottiya okalavi va Muttuponi wa Wubuwela Okwa wa Yezu, enowodheya wakonvidari ena. (1 Tm. 2:4) Watapulelemo attuya enapadduwe va Muttuponiva. Txino egahikala walagiha mavidiyu Yezu Okweli Eni? Vina Wubuwela Okwa wa Yezu mu jw.org. Anddimuwa a mmulogoni anofwanyela okosa masasanyedho a wakonvidari abale attiyile otugumana. Katanalela wagalala onakale wirimu vina velaboni ya vati nibila na Yehova narimelile nigamuyelela! (Lk. 15:4-7) Nona va Muttuponi wa Wubuwela Okwa wa Yezu, ninfuna nivilibihedhe walejela attu otene ottiya abalihu bahi mbwenyi makamaka abale ali aswa obe attiyile wona matugumano mwari mwa mudhidhi mwinjene. Ninfuna wi awene aviwemo pama!—Rom. 12:13.
16. Ekalele nni yapama ovilibihedha okosa venjene mmabasani a olaleya nsaka na Muttupo wa Wubuwela okwa wa Yezu?
16 Enowodheya weyo okosa venjene mmabasani a olaleya mudhidhi wa Muttupo wa Wubuwela Okwa wa Yezu? Obu mukalelo wapama wa olagiha omutamalela wawo Yehova vina Yezu sabwa ya dhotedhene dhukoselani. Venevo vandowihu nimulabelaga Yehova, ninozinddiyela nikamihedho naye, yodhelavoyá, omukuluvela wehu iyene onoliba. (1 Ko. 3:9) Ottiya ejo, kudduwale wengesa Malebo asasanyedhiwe wengesiwa nsaka na Muttupo wa Wubuwela Okwa wa Yezu anfwanyeya va Malebo a Siku na Siku obe va tabela enfwanyeya va nivuruni na mabasa a matugumano. Enowodheya olabihedha mapadduwo aba a mBibiliani va nsunzoni nawo nomwinya.
17. Txini enimwagalaliha Yehova? (Koona vina kasha “Ninawodhe Dhavi Olagiha Otamalela Okwela wa Yehova.”)
17 Txino mwaha wa mikalelo dhawo kunawodhe olabihedha mwigumini mwawo monelo dhotene dhivahiwe mu nsunzoni ntti. Mbwenyi kobuwela, Yehova kanang’ana ejile enkosiwe baladdaniha na enkosa muttu mwina; iyene onang’ana eli mmurimani mwawo. Yehova onowagalala agoona wi onotamalela mvaho obu wa ttima onivahiliye, yobolo.—1 Sam. 16:7; Mk. 12:41-44.
18. Txini ennittukulela omutamalela Yehova vina Yezu?
18 Oleveleliwa wa dhottega dhehu, mandano na Yehova vina njedhelo na egumi yohimala, dhinwodheya bahi sabwa ya yobolo. Nona ninfuna nilagihe wi ninotamalela okwela wa Yehova obuwene omuttukulele onivaha mareliho aba. (1 Jo. 4:19) Ninfuna vina nilagihe wi ninomutamalela Yezu onikwelile, mpaka oniperhekela egumi yaye!—Jo. 15:13.
JIBO 154 Okwela Kunamale